مايو 09، 2008

لو قابلتى الراجل ده قولى يا فكيك (2)


نظرا للاقبال منقطع الجماهير على الجزء الاول قررنا نعمل جزء تانى للموضوع علشان باقى الصفات
المتـــــــــــــــــــردد

هى: فكرت هتعمل ايه فى موضوع الشغل ؟

هو: بصراحه لسه اصلى محتار ، انا بقول مفيش مانع اشوف الوظيفه الجديدة ، حاسس انى ممكن احقق نفسى فيها اكتر

هى: والله طالما كده يبقى توكل على الله ، وان شاء الله خير

هو: بس برجع اقول معقول اسيب شغلى بعد ما ثبت رجلى فيه واروح مكان تانى ابدأ من جديد

هى: عموما لو شايف انها مغامرة مش مضمونه يبقى خليك فى شغلك

هو: مش عارف ، هما لو يدونى كده اد شهرين تلاته افكر ، ولا انتى ايه رايك؟

هى: اففففففففففف زهقتنى ، انا رايى انك تقعد فى البيت احسن

كل قرار فى حياته علشان ياخده محتاج يعمل عليه استفتاء حتى لو كان واضح ومحسوم ، رغم ان هو اقدر الناس على فهم ظروفه واختيار اللى يناسبه، طبيعى تلاقى اغنيته المفضله لعبد الحليم ( اقول مقولش انا خايف اقول ) وفى كل حاجه بيقدم رجل ويؤخر رجل ، بس الحياة زى السفينه محتاجه ربان حازم وواثق فى قراراته ومش متردد ، والا هيفضل يقول يمين شوية ، شمال حبتين ، لا ارجع تانى يمين، وساعتها ممكن يلاقى نفسه لابس فى جبل زى ما حصل فى تيتانيك

العــــــــــــــــــــــاله


هو: جبتيلى الفلوس اللى قلتلك عليها؟

هى: فلوس ايه، ازاى اقول لاهلى على مبلغ زى ده، مش كفايه بتاخد مرتبى كل شهر وكمان اى فلوس بيساعدونى بيها

هو: وفيها ايه يعنى انتى مش بنتهم، وبعدين الفلوس دى اخرتها ليكى برضه

هى: اعوذ بالله عليك بتفول عليهم ، ده بدل ما تنزل تدور على شغل بدل اللى سيبته وبقالك 6 شهور قاعد فى البيت معتمد انى بصرف

هو: مش هشتغل غير على مزاجى، والشغله اللى تريحنى ، ولو مش عاجبك خلى اهلك يدونى فلوس ابدا بيها اى مشروع، هما يعنى كانوا هيلاقوا فين شاب زى الفل زيى يتجوز بنتهم ، ده انتى امك دعيالك

هى: اه يانى ، مكنتش اعرف انك بتحبينى كده يا ماما !!



مع النوع ده هتعيشى طول عمرك محنية من الاتب اللى على كتافك، لا منه راجل تعتمدى عليه ولا منه بعد عنك وارتاحتى ، شايف ان الرجوله كفايه قوى تكون خانه فى البطاقه ، وان عليكى السمع والطاعه والدفع لمجرد انه تكرم وتعطف وقبل يتجوزك ، يعنى لازم تدفعى ضريبة انه اختارك من دون خلق الله كلهم علشان يبرشت عليكى ، ويعيش على قفاكى زى تنابلة السلطان، ده حتى تنابلة السلطان كانوا عايشين على قفا راجل مش ست !!

الديـــــــــــــــــــوث


هو: وفيها ايه يعنى لما اصحابى ييجوا يسهروا عندنا فى البيت عادى يعنى

هى: عادى ازاى؟

هو: يا ستى متعقديهاش كده وخليكى فررى ، وبعدين هما هيكلوكى

هى: البيت ليه حرمه، وكده انا مش هعرف اخد راحتى و كمان انا مش برتاح لاصحابك ولا نظراتهم

هو: ياستى بلاش الكلام ده انتى اكيد بيتهيالك، الجرس بيضرب قومى افتحيلهم بقى

هى: ؟!@#؟ يا نهار اسود كمان عايزنى افتحلهم بقميص النوم ؟؟

النوع ده انتشر الايام دى كتير، يعنى ممكن تلاقيه قايم يحزمك فى فرح علشان ترقصى، او نازل يشترى لبناته مايوهات بيكينى للمصيف، والاخطر ان ممكن ادق اسراركم الشخصية يحكيها عادى لاصحابه كان اللى بيمشى فى عروقه مايه ساقعه مشبره، واللى زى ده مينفعش غير مع واحده عايزة جوز يدخل فى بعضه زى الايريال لكى تعيش هى حرة مستقله، اما اللى لسه بينقح جواها العرق الصعيدى فاحسنلها تبعد عنه بدل ما ترتكب جنايه

الشكــــــــــــــــــاك

هو: الراجل اللى هناك ده بيبصلك ليه يا هانم ؟

هى: مين ده؟

هو: اللى قاعد على يمينك ، تعرفيه منين يا هانم؟ ده منزلش عينه من عليكى ؟

هى: والله صدقنى ما اعرفه ولا عمرى شفته

هو: امال يعنى بيبصلى انا ، يالا بينا نقوم نروح والمكان ده اخر مرة نقعد فيه

هى: طب حاضر متشدنيش كده ، هتكعبل ومش شايفه كويس من النقاب !!



هو يشك ، اذن هو دبوس ممكن يفجر العلاقة ما بينكم فى اى لحظه ،جميل ان الانسان يغير على اللى يحبه من النسمة، بس مش معنى كده انه يقفل الباب والشباك علشان النسمة متدخلش ،او انه دايما يوجه اتهامات ممكن توصل للخيانه، وتحسى طول الوقت انك متراقبه وعشان تبقى عارفه اللى بيشك كتير يبقى فى الاساس بيشك فى نفسه قبل اللى قدامه او بمعنى تانى معندوش الثقه الكافيه فى نفسه ، واحنا مش ناقصين ناس مهزوزة ولا ايه؟؟


الكــــــــــــــــداب

هى: اتاخرت كده ليه ؟ خير

هو: ياه لو اقولك ، ده كان حته يوم ، محمود يا ستى والده تعب فجأه ونقلناه المستشفى ، وفضلت بقى رايح جاى معاه انتى عارفه مقدرش اسيبه فى موقف زى ده

هى: لاحول ولا قوة الا بالله، طب وهو كويس دلوقتى، يعنى الدكاترة قالوا ايه ؟

هو: والله الحاله لسه مش مستقره، يعنى ممكن يقعد كام يوم كده تحت الملاحظة ، وطبعا انا لازم ابقى الايام دى مع محمود مش هيعرف يتصرف لوحده

هى: اه طبعا ده واجب ، بس غريبة انى لسه مكلمة محمود اسأله عليك علشان تليفونك مقفول، وعرفت منه ان مراته وولاده سافروا مع باباه ومامته يصيفوا

هو: هه اه #؟@ اه منا نسيت اقولك إن ده يبقى ابو محمود بس من ام تانية !!

اهو ده بقى عمهم كلهم ، لان عمرك ما هتعرفى صدقه من كدبه ، وحتى لوقال مرة الحقيقة هتشكى فى كلامه خصوصا لو من نوعيه الناس اللى بتتحرى الكدب ، او اصحاب مبدأ الكدب للكدب ، يعنى مش بيكدب مجامله او انقاذ موقف لا ده الموضوع تحول معاه لمرض لدرجه ان حياته تتحول لكدبة كبيرة ، لو حظك العاثر وقعك مع الشخص ده قدامك حاجة من اتنين ، يا اما الفحم يفضل مولع فى بيتك 24 ساعه وكل ما يقولك حاجه تروحى لسعاه فى لسانه بالبشعه بتاعه البدو ، يا اما لو امكانياتك كويسة تبعتى تشترى جهاز كشف الكدب من برا وتوصليه بيه طول الوقت، بس متفكريش فى حل قطع اللسان لان ممكن برضه يكدب عليكى بالاشارات !!



وبكده تكون خلصت الصفات ، هو اكيد فى صفات تانية بس انا بقول كفايه كده والطيب احسن، وبرضه برجع اقول انا مش بعمم ومش معنى انتشار الصفات دى او ان ناس كتير قابلتها فى حياتها ان الرجاله كلهم كده ، كل انسان جواه ملاك وشيطان ، وزى ما فيه الصفة الوحشة اكيد فى الصفة الكويسة اللى تسندها



لكن اللى انا بقصده ان الصفه تتجاوز المعقول ، وتبقى هى اكتر حاجة ظاهرة فى شخصيه الانسان ، لدرجه انه يتعرف بيها والناس تقول فلان البخيل او علان الكداب ، وينسوا اى حاجه تانية كويسة فى شخصيته



لسه فى ناس شايفه ان الحب هو الحل وممكن يعمل المستحيل ، احب اقولهم ان الحب مش ادهم صبرى ، وحتى لو كان يقدر يعمل المستحيل لازم يكون الطرف التانى من جواه عنده استعداد يتغير للاحسن ، او على الاقل متقبل يعرف عيوبه، والا نبقى بننفخ فى اربه مقطوعه وبفعل فاعل كمان


واهـــــــــــــــــــو ده عيبـــــــــــــــــــــه

54 عرفوا عيبها:

Empress appy on 12 مايو 2008 في 12:28 م يقول...

ازيك يا مكبوته يا حله تيفال
يا لهوى على الكدب انا لسه مكتشفه صديق المفروض انه بيقول انتى بابا وانتى ماما وقفشته بمسج من واحده تانيه نيهاهاهاها
وقال ايه بيقولى افتكاسات طيب ارد اقوله ايه غير ياااااااااا تيييييييييييييييتتتتتتتتت
وخلاص خبطه بقله
اما الشكاك يا لهوى لو هو كلمك بيشك فى نفسه انا الحاجات دى بقى مرة عليا وبتبقى عيشه زفت ههههههههه
تسلم ايديكى والرجاله وخاصه الدكتور المحلل اللى عندى هيقيم عليكى ايام الاسبوع هههههه

Che_wildwing on 12 مايو 2008 في 1:36 م يقول...

انتى مصممة بقى
وبعدين انتى بتجيبى الانواع دي كلها منين
ما اظنش في بنت هتلاقي شاب في الوقت المنيل ده مفيهوش على الاقل خصلة من الخصال المهببة دي
فياريت حضرتك تحطيها بالترتيب
الاسوأ فالأكثر سوءا

اهو ده عيبه on 12 مايو 2008 في 1:59 م يقول...

appy
-------
الحمد لله دى الفل وبكرة ابقى حله بريستو كمان

فعلا الكداب والشكاك عيشتهم مرار والحمد لله انك عرفتى من الاول

اما بقى الدكتور فيعمل اللى يعمله هيكبسنى اكتر من كده اروح فين؟

اهو ده عيبه on 12 مايو 2008 في 2:03 م يقول...

che_wildwing
-------------
انا مش مصممة ولا حاجة انا قلت ناخدهم على بعضهم علشان منفتحش الموضوع تانى

والانواع دى موجودة فى الدنيا انا مش بجيبها من عندى

المسالة مش تقييم او السئ فالاسوا او نعمم ان كل الناس كده بس طبيعى اننا نركز شوية ع العيوب

وبرضه مقلتش ان حد خالى من العيوب سواء رجالة او بنات وان شاء الله اتكلم عن البنات قريب متقلقش

dawar on 12 مايو 2008 في 2:18 م يقول...

شوفى يابنتى انتى وهيا والكلام للجميع
ازرعى فجل تلاقيه فجل
لو انتى كويسه من جوة ربنا هيبعت ليكى الصح مش اللى عاوز يورى صورك فى الموبايل لزمايله
واوعى من ابن المراة يعنى بالبلدى تربيه المرة هيطلع عين اهلك

شوفى قبل الخطوبه امه بتتصرف ازاى مع ابوة هو ده نفس النسخه
سيبك من العيال الرقه بتوع الايام دى ماينفعوش بقرش صاغ ارمى من وراء ظهرك ماياكلوش عيش
بس بصراحة

انا كاب مبسوط منك فى تعريف الديوث ابن الكلب وماكترهم الايام دى اللى بيحبوا ينختموا على قفاهم

غير معرف يقول...

ربنا يسامحك, ضيعتى من وقتى اكثر من ساعه, علشان اقراء كل موضوعاتك. وحشتنى بورسعيد و موضوع النفق رجعنى 9 سنين. مع اني غيرك, انا كنت عاشق للمعديه طول الوقت و على الاخص معديه المشاه بتاعه زمان ام دوران و الراجل العجوز اللى كان بيغنى اغاني السمسميه. يمكن انتي مشفتيش المعديه دى, بس اسألى عنها.
سلامى لبورسعيد اللي سايب فيها قلبي ـ متفهمش غلط انا اقصد زوجتي و اولادي ـ على الرغم اني من الجيزه الا اننى من عشاق بورسعيد. ربنا معاكي و يوفقك

ReceptiveGuy on 12 مايو 2008 في 2:57 م يقول...

المره دي ما فيش كلام
جبتي المفيد بصراحه
الصفات مرفوضة شكلا وموضوعا
احييك على الجزء التاني
:)
مع اني من احزاب المعارضه
بس نو بروبليما

اهو ده عيبه on 12 مايو 2008 في 3:11 م يقول...

dawar
------
اولا شرفت ونورت

بس ساعات بتكون واحده كويسة ويوقعها حظها فى واحد مش ولابد دى بتبقى قسمه من ربنا

مشكور على النصايح وعلى رايك فى الموضوع

اهو ده عيبه on 12 مايو 2008 في 3:15 م يقول...

اتمنى ان الساعه اللى ضاعت تكون بفايدة والموضوعات تكون عجبتك

بس انا زيك بحب المعديه جدا ورافضه النفق رغم مزاياه
جايز معرفش المعدية دى انا اخرى ام دورين اللى لغوها

ربنا يخليلك زوجتك واولادك ويجمعكم على خير ان شاء الله

اهو ده عيبه on 12 مايو 2008 في 3:17 م يقول...

respectiveguy
-------------
اشكرك على رايك وهو الجزء التانى والاخير
خلاص حرمت

اينعم انت من حزب المعارضه بس رجاله عن رجاله تختلف

والراجل الكويس يرفض النماذج دى حتى لو كانت من حزبه
تحياتى ليك

غير معرف يقول...

جااااااااااامد البوست ده

فى كمان الغيور والمسرف وبتاع اصحابه

حاجه تفقع المرارة
:)))

سلامى
:))

sebofy7alo on 12 مايو 2008 في 3:35 م يقول...

أول تعليق
بوست هاااااااااااااااااااااااايل جميل جدا , فكرتة مش ممكن. نرجو المزيد
إمضاء
انا الفكيك

المـــفـــــــقــــــــوعـــــة مــرارتـهــا on 12 مايو 2008 في 4:14 م يقول...

انا ياختي قعدت افصص المقالتين ولاقيت خير اللهم اجعله خير اني كان مفروض اقول يافكيك من زمااااااااااااااااان
بس ماقلتش ينفع اقول دلوقتي ؟

طلب صغنون ... عاجباني الصورة بتاعة ابن أمه وانتي عارفاني بحب الصور اوي ممكن استسمحك واخدها وفوقيها بوسة كمان

اهو ده عيبه on 12 مايو 2008 في 4:38 م يقول...

shayma
-------
الغيور ممكن يكون هو الشكاك
عموما ميرسى ليكى
ونورتينى

اهو ده عيبه on 12 مايو 2008 في 4:39 م يقول...

sebofy7alo
-----------
ميرسى ليك
واتمنى تزورنا تانى ان شاء الله

اهو ده عيبه on 12 مايو 2008 في 4:50 م يقول...

المفقوعه مرارتها
---------------
معلش بقى تفيد بايه يا ندم
وكنت فين يا خشب لما كنا مسامير

يا ستى انتى تاخدى اللى عايزاه من غير استئذان وفوقيها دستة بوس كمان

اضغطى بس على الصورة ولما تطلع فى صفحه لوحدها اعمليلها كوبى
وبالهنا والشفا

قوس قزح on 12 مايو 2008 في 4:51 م يقول...

لذيذة مدونتك اوى
ميرسى انك خاليتنى اعرفها

بالنسبة للصفات عندك حق فيها ده كمان اوقات بتجتمع صفتين او تلاتة فى نفس الشخص

الاعتدال فى الغيرة كويس و كمان الكدب الابيض - زى انتى اجمل واحدة فى الدنيا - برده مقبول و مش حرام

تحياتى

دكتور بهــدوء on 12 مايو 2008 في 5:22 م يقول...

الديوث

مش راجل اساسا شكله جاي هنا غلط وسط الرجاله
ولا يستاهل انك حتي تقابليه ولو قابلتيه فعلا يا فكيييييييييك

الشكاك
بحدود الغيره عادي
الغيره حب لكن بيشك ف هدومه لاااا والف لا
المتردد
واللهي مع انه لو اتوافق عليه هيبقي لذيذ
والست هيه اللي هتاخد عجله القياده
وباي باي يا رجوله
طريقه العرض
رائعه
:)
:)
فعلا البلوج هايله

Aya on 12 مايو 2008 في 5:36 م يقول...

حبيبة قلبي داليا .. مدونتك هي اول مدونة أكتب فيها تعليق وده من شدة اعجابي بيها و بيكي .. ربنا يوفقك .. و أفضل أقرا لك على طول ..

Z_Diva on 12 مايو 2008 في 6:11 م يقول...
أزال المؤلف هذا التعليق.
Z_Diva on 12 مايو 2008 في 6:14 م يقول...

loooooooooooooooool
aywan, ana bkrh elkdab da awy, elmotarded da zmiel kfa7 m2drsh a3eb feh :D
elshakak da ana momkn artkb feh gnaya 3ady walla yhmny, fe b2a nos5a mt3rfihash, "elsuper 3aow", we da 32bal amltk feh kol elly felpost da welly ablo kman, bas eah, tcho7fa nadra wallahy, tb2y 3yza tmoutyha wet7ntyha wet7tyha felmot7af elaswad -ma3 ele3tzar le dr.ahmed, we dr.ref3at kman- :D

غير معرف يقول...

حلوة أوي لسانك حصانك إن صنته صانك

كلامك ميمة مية وتمام أوي في ناس كدة كتييييييير أوي لدرجة وأنا بقرا حوارتك بفتكر ناس بعينها وكأنك بتكلموا عنها

ربنا يعفينا يارب

Desert cat on 12 مايو 2008 في 9:19 م يقول...

طيب يا داليا هو اللى عنده حب امتلاك ينطبق عليه نفس صفات الشكاك
اصل ساعات نكون فى مكان عام والاقيه بيقولى هو اللى هناك ده بيبص عليكى اوى كدا ليه
بس بيقتنع بكلامى لما اقوله مش اعرفه لكن لما بنتصل ببعض بعد كدا الاقيه بيقولى فاكرة الواد اللى كان بيبص لك واحنا مش عارف قاعدين فييييييييين ببقى هاين عليا اجيبه من زمارة رقابته عبر الاثير

اهو ده عيبه on 12 مايو 2008 في 10:43 م يقول...

rainbow
--------
ميرسى الله يكرمك

فعلا كل حاجه بالعقل حلوة ومفيش مشكلة لو يكدبوا علينا فى الكلام الحلو بس

اهو ده عيبه on 12 مايو 2008 في 10:50 م يقول...

دكتور بهدوء
------------
ربنا يبعد عننا الديوث وامثاله

اشكرك لذوقك ولرايك فى الموضوع والبلوج

واتمنى تشرفنا تانى بالزيارة

اهو ده عيبه on 12 مايو 2008 في 10:53 م يقول...

aya
-----
ميرسى يا ايه وشرفتى المدونة بتعليقك

وان شاء الله اشوفه منور هنا دايما

اهو ده عيبه on 12 مايو 2008 في 11:06 م يقول...

z_diva
--------
اوعى تكونى متردده :)

بس الكائن السوبر ده موطنه فين؟ حد بقى يصطاده ويحنطه علشان نبقى نتصور جنبه

اهو ده عيبه on 12 مايو 2008 في 11:08 م يقول...

ابو مروان
----------
شرفت ونورت

هو جايبنا ايه ورا غير اللسان خصوصا لسانى

اتمنى ان شاء الله تكرر الزيارة

اهو ده عيبه on 12 مايو 2008 في 11:10 م يقول...

desert cat
------------
اللى عنده حب امتلاك بيبقى خايف عليكى من الناس مش خايف منك

انما الشكاك بيشك فيكى وفى الناس وفى نفسه

بس بلاش زمارة رقبته علشان ملهاش قطع غيار غير فى التوكيل

واحد من البلد دى on 12 مايو 2008 في 11:29 م يقول...

البوست عجبنى جدا على فكرة..
بس أنا عن نفسى عمرى ما ترددت فى قرار ولا كذبت على زوجتى أبدا ولا شكيت فيها ولا قبلت أى مساعدة من حد..
وحارد على البوست ده بالأرقام تبعا لما كتبته عن نفسى ..
1-لأنى أعتبر التردد مرض فى حد ذاته.فإن كان قرارى صائبا فأنا المستفاد و إن كان غير ذلك فقد إستفدت من التجربة لأنه لا يوجد إنسان على وجه البسيطة كل قراراته صائبة ومن يخطئ هو من يتعلم..
2-أنا أفضل أن أغضب زوجتى بعدم ردى عليها فى مسألة ما على أن أكذب عليها..
لأنى أعتبر الكذب ضعف شخصية وعندما تكتشف الزوجة أن زوجها يكذب عليها يكون من أوائل التفسيرات لديها أنه لم يكذب إلا لأنه يخشاها حتى وإن كذب خوفا على مشاعرها..
3-أنا أعتبر الشك فى الزوجة هو شك فى الذات لأنى إن كنت واثقا من نفسى أننى أستطيع بشخصيتى وطباعى وحسن إختيارى لزوجتى طبعا أن أجعل من نفسى قرة عين لزوجتى وأحتويها فأنا لا أستحق أن أكون رجلا وعلى أن أنظر للأسباب التى جعلت زوجتى تنظر لرجل آخر قبل أن أعاقبها فإن لم يكن هناك سببا فهذا طبعها إذن وعلى أن أتصرف من هذا المنطلق..
4-هذا الجزء بالذات يعتمد على نشأتى فقد نشأت فى أسرة عادية وكنت أعمل أثناء الدراسة وأعتمدت على الله سبحانه وتعالى ثم نفسى فى تكوين مستقبلى وحياتى ولم يساعدنى إنسان سوى أمى بدعائها فى نجاحى فى الحياة ..لهذا أنا لن أستطيع أن أفيدك كثيرا فى هذا الموضوع..
وأخيرا فقد أعجبت جدا بفكرة البوست وأوئيدك تماما فى أرائك بالنسبة للنوعيات التى ذكرتيها ..
دمتى متواصلة

محمد الهادى غانم on 12 مايو 2008 في 11:58 م يقول...

السلام عليكم
ايه الوحاشة دي انا مش قولتلك احنا عايزين قنبله بس متنفجرش فينا بس نا عايز اعرف انتي جايبة الشخصيات دي منين متقوليش ان انتي لاقيتي كل الحاجات وانتي ماشيه في الشارع .
بس زي العسل الراجل الشكاك اللي فاكر ان الناس بتبص لمراته وطلعت في الأخر واحد صاحبه مش مراته .
بس حرقتي دمي بالديوس متهئيلي الشخصية دي المفروض انه ميتجوز أصلاً عشان مبيهدلش نفسه .
بس بقه كفاية كده غيري الكلام الماسخ اللي بيجي فينا بيخلينا نبص علي نفسنا كويس واللي علي راسه بطحه .
انا اصريت ان انا ابعتلك التعليق أول

هشام علاء on 13 مايو 2008 في 2:38 ص يقول...

عزيزتى..

الحقيقة اول مرة ازور المدونة بتاعتك بس شكللى كده هجيلك تانى

البوست ده و اللى فات جامدين جدا و تشكيلة النماذج اللى طرحتيها مالهاش حل

بس السؤال بيطرح نفسه

كام بنت اضطرت تتغاضى عن العيوب دى بدافع الحب او حتى عشان جالها عريس جاهز؟

و بعدين تعالى هنا...مش برضه البنت ممكن يكون فيه ..ولا مؤاخذة عيوب..و لا الراجل بس هو اللى فيه القطط الفطسة دى كلها؟

:)

عامة احييك بشدة على الفكرة و احتمال ارد عليكى ببوست قريب تحت عنوان

لو قابلت البنت دى...لف و ارجع تانى

:)

تحياتى
هش

Unknown on 13 مايو 2008 في 6:44 ص يقول...

الله ...الله
يا حلولى..ايه الحلاوة دى
انا لى الشرف ان دى تبقى اول زيارة لمدونتك بس ايه يا معلمه خطيره

غير معرف يقول...

بوست جامد جدا و بالذات الرجل العالة. أنا أعرف واحد متجوز دفع مقدم العربية و كان عاوز مراته تدفع الأقساط و لما رفضت (ما هى كان كل مرتبها بيتصرف على بيتها حتجيب منبن يعنى) خلا مامته تدفعله الأقساط و ما رضيش يخللى مراته تركب معاه العربية!!!!!!
يعنى شخصية لا أجد لها وصف فعلا...

بالنسبة لعيوب البنات:
1- هوس التسوق(El Shopping)
2-التردد ده نتيجة للعيب رفم واحد
3- حب المظاهر (الساعة دى جبتها من سويسرا اخر مرة كنت هناك و هى تلاقيها ما سابتش الشارع اللى عايشه فيه)
4-اصطناع الرقة امام الجنس الآخر

بس كفاية فضايح بقى يا شماتة أبلة ظاظا فيا :)))))))))

اهو ده عيبه on 13 مايو 2008 في 9:20 ص يقول...

واحد من البلد دى
-----------------
بصراحه بعد تحليلك للموضوع مش لاقيه كلام اقوله

واشكرك على اتفاقك معايا فى الراى بخصوص النوعيات دى

اهو ده عيبه on 13 مايو 2008 في 9:23 ص يقول...

محمد الهادى
----------
الشخصيات دى موجود منها فى البيوت والشوارع والشغل بس انت دور كويس هتلاقى

وياسيدى ربنا ما يجيب بطحه ولا حاجه انت زى الفل

سلامى ليك

اهو ده عيبه on 13 مايو 2008 في 9:25 ص يقول...

hesham
--------
اهلا وسهلا بيك وان شاء الله تكرر الزيارة

اكيد فى كتير بيطروا يوافقوا ياما حب ياما علشان الجوازة تعدى وخلاص

واطمن البنات ليهم دور تانى بس ربنا يسهل ونقول عيوبهم

اهو ده عيبه on 13 مايو 2008 في 9:26 ص يقول...

sasatifa
-----------
ميرسى ربنا يحلى ايامك

واتمنى تزورنا دايما

اهو ده عيبه on 13 مايو 2008 في 9:28 ص يقول...

ليلى
------
والله انا شفت نوعية العاله دى كتير وفى كل المستويات

وبالنسبة لعيوب البنات ان شاء الله نتكلم عنها وشكرا انك ادتينا فكرة عن بعضها

فاتيما on 13 مايو 2008 في 2:34 م يقول...

متجيبليش سيرة القربة المقطوعة دى يا داليا ...
أنا أصلاً اللى قطعتها يا بنتى و مع ذلك قعدت أنفخ ... أنفخخخخ
لحد ما أتقطع نفسى أنا و لامؤاخذة أبويا امى و اخواتى و المجتمع و الناس
بصى أنا رأيى تلمى الصفات دى و تحطيها كلها تحت مسمى واحد هو الراجل المريض زى زمان كدا ما كانت كتب التاريخ بتحكى عن تسمية أوربا للعرب على أنهم الرجل المريض ...
الراجل - مجازا يعنى - اللى بيبقى فيه من هذه الصفات واحدة لازم هتلاقى صفى أتنين كمان ملاصقين ليها و بتلاقيه واحدة واحدة بقى شخصية مختلة تنهشها الامراض النفسية و تيجى تتجاهلى عيب و تحاولى تستحمليه تلاقيه نشع فى حتة تانية و بهدل الدنيا و يبقى مفيش فايدة من أى تصليح و تلاقى نفسك أنتى بتخسرى و لسه كمان هتخسرى و لا امل يلوح فى الأفق
يبقى مفيش غير كلمة حكمة قالتها صديقتى العزيزة بيبو ...قولى
يا فكيكككككككككككك

اهو ده عيبه on 13 مايو 2008 في 8:58 م يقول...

فاتيما
--------
كان لازم تعرفى الحقيقه المؤكده ان نفخ الارب مفيش منه فايده

انا بقول نسميه احسن رجل الغاب طويل الناب

وبعدين على راى عادل ادهم انا الصباع اللى يوجعنى اطيره معالجوش

ومع ذلك حتى لو طيرته هيفضل يوجعنى
تحياتى ليكى يا احلى فاطيما

رئـــــيسـة حزب الأحلام on 13 مايو 2008 في 9:21 م يقول...

تخيلى اغلب رجالة مصر فيهم الصفات الحلوة دى وتحياتى واكيد هتلاقى صفات اكتر احنا مستنيين

اهو ده عيبه on 14 مايو 2008 في 10:38 ص يقول...

رئيسة حزب الاحلام
----------------
لا والنبى كفايه صفات كده انتوا ما صدقتوا ولا ايه الطيب احسن

تحياتى ليكى

Unknown on 14 مايو 2008 في 12:03 م يقول...

الشكاك و المتردد و الكداب و الديوث

نماذج ستظل تعكر صفو الحياة و تحرق فى دمنا الى ابد الابدين حنروح منها فين دى طبيعة الكون

بس عرضك للموضوعات و الحوار جميل اوى و ظريف

تحياتى

Soooo on 14 مايو 2008 في 5:07 م يقول...

على فكره
انا متابعك وقريت الموضوع ده والموضوع اللي فات

بس مالقتش كلام اقولو
خايف لو اتحمقت وقلت مش كلنا كده تفتكري اني على راسي بطحه وباحسس عليها
ولو قلت طب ماهو في ستات كده واوحش تقولي علي معقد واتلسعت قلم من واحده عملت في حاجه كده ولا كده

فقلت مابيني وبين نفسي التزم الصمت وابقى اعلق في موضوع تاني


ملحوظه
انتي اتاريكي مشكله والواحد مش واخد بالو




سلامووووووووووز

أبو خالد on 14 مايو 2008 في 7:28 م يقول...

أبنتى الغالية/داليا
جزاك الله خير على نصائحك للنساء
و حسن الأختيار و التروى..
تابعت البوستين و معجب بنصائحك
و يا ريت تعملى مجموعة نصائح
للشباب الباحث عن عروس..
و الله كنت سأقول لك ما سبقنى له
سوووو..
دمتى بنيتى بخير و صحة

اهو ده عيبه on 14 مايو 2008 في 11:02 م يقول...

عاليا حليم
-----------
ميرسى لرايك وربنا يحفظنا منهم

اتمنى تنورينا دايما بالزيارة

اهو ده عيبه on 14 مايو 2008 في 11:07 م يقول...

سوووووووووو
-----------
يعنى انت بتيجى متخفى، انت يا سيدى تيجى وقت ما تحب وتقول اللى انت عايزه كمان

سلامه راسك من البطحه لست انت هذا الرجل وانا عارفه ان مش كل الرجاله كده

وبرضه لا عاشت ولا كانت اللى تقول عليك معقد

وبعدين الستات ليا معاهم قعده تانية وهتشوف بقى هطلع المستخبى من غير تحيز

لذا ارجو منك عدم التزام الصمت تانى

اهو ده عيبه on 14 مايو 2008 في 11:10 م يقول...

ابو خالد
---------
ربنا يخليك لينا يارب ودايما تشرفنى بالزيارة

ورايك على عينى وعلى راسى وان شاء الله نعمل نصايح للشباب

تحياتى ليك وان شاء الله دايما اشوفك بخير وصحه

funckydoctor on 16 مايو 2008 في 1:36 ص يقول...

الديووووووووث
انتشر بشدة أعوذ بالله

المدونة جامدة جدا

Omar El-Tahan on 16 مايو 2008 في 2:20 ص يقول...

أنا تابعت الجزئين .... واسمحيلي بكلمة ...

أنا مندهش فعلاً من قدرتك على الملاحظة والتحليل والتعبير في كلمات بسيطة عن معاني عميقة ... عامة اللسان المبرود ده متوقع من واحدة بورسعيدية ... أنا برضه بورسعيدي وعارف ... صعب اللسان يقد جوه .. خصوصاً لو شايف غلط. تقريباً البورسعيدية دلوقي ماعدش عندهم إلا لسانهم وبس.

أنا طبعاً باهزر .. حقيقي أنا باعتبر مدونتك دي كنز ... والف مبروك على صدور العدد الأول من مدونات مصرية للجيب.

اهو ده عيبه on 16 مايو 2008 في 12:00 م يقول...

funcky doctor
--------------
ميرسى ليك
وربنا يحفظنا منهم

اهو ده عيبه on 16 مايو 2008 في 12:03 م يقول...

omar el-tahan
---------------
شوف بصرف النظر عن كون البورسعيدية لسانهم مبرود فانا لسانى كده خلقه ولله الحمد

سعيدة انى تعرفت عليك واتمنى تزورنا دايما

ميرسى ليك واتمنى نبقى عن ظن حسن حضرتك

ويكا on 29 سبتمبر 2010 في 2:43 م يقول...

اول مره ليا هنا وبصدفه غريبه.

الا انها لن تكون الاخيره خلاص ان شاء الله.

بجد الاسلوب بسيط الا انه دقيق جدا .

احسنتى .

 

Term of Use

أهو ده عيبه Copyright © 2009 Flower Garden is Designed by Ipietoon for Tadpole's Notez Flower Image by Dapino