مايو 04، 2008

يوم من عمرى


صحيت انهارده الصبح كلى انتعاش، منبهجه منبعجه يملأنى السرور والحبور، حد هيقولى وعلى ايه السعاده دى ايه المناسبه يعنى؟ سورى بقى مضطرة اقوله يبقى انت اكيد اكيد مش من مصر، ده انهارده ياخوانا يوم من عمرى وبما ان العمر لحظه فقد شهد هذا اليوم اللحظة الى ولد فيها الزعيم المفدى والقائد الحبيب مبارك

*****

مش عارفه ليه فى قلة مندسة مدسوسة عميلة كانت عايزة تعكنن علينا اليوم قال وتعمل اضراب، طب بالذمه مش حرام نعكنن على حد فى يوم عيد ميلاده ده حتى يوم مفترج وقهره النفس فيه وحشه قوى، خصوصا لما يبقوا تمانين سنة فى عين العدو-خمسه وخميسة كان عندنا كتكوت وفتح-

*****

اكتشفت كمان بالصدفه ان انهارده برضه عيد ميلاد الراحلة ام كلثوم، ولقيت نفسى بفتكر اغنيتها الرضا والنور، وحسيت انها تنطبق على رئيسنا وحبيبنا الذى يتمتع ان شاء الله برضا ربنا، حد هيقولى وعرفتى منين؟ هقوله الحمد لله ربنا اداله طوله العمر والحكم والمال والبنون والصحه والوش المورد، وبعدين يا ناصح منك له الحكمة بتقول رضا الرب من رضا الاب مقالتش من رضا الشعب!!

اما النور فليس بخافى عن العيــون، وهل يخفى القمر؟ ده حتى النور زايد وفــايض وســادد عين الشمس واللـى ورا الشمـس ( ربنا يرجعهم بالسلامه )

*****

المهم نزلت من بيتنا وانا حاسه انى طايرة تتردد فى اذنى اغنيه حليم ( يوم من عمرى ) بس افتكرت انه كان بيقول يوم من عمرى هو اليوم اللى اتهنيت فيه وبكيت منه وعليه، زعلت قوى من حليم بصراحه بس افتكرت انه مات قبل تولى فخامته الرئاسه فقولت لا يبقى معزور مش قصده حاجة وحشة ، انا نفسى الكام سنة اللى عدوا من عمرى قبل حكمه (هما 3 سنين ) مش بحسبهم من عمرى على راى الست، وبحقد على اختى الصغيرة اشد الحقد لانها نالت شرف المولد فى العام المبارك 1981 الذى شهد توليه زمام امرنا

*****

فضلت ماشية فى الشارع لقيت الناس رايحه وجاية عادى، امال فين الاضراب يا ظلمه هتروحوا من ربنا فين، ولا عايزين تطلعوا الراجل وحش وخلاص، ما الناس كلها فى شغلها اهى ولا حد مضرب ولا بطيخ، والمحلات مفتوحه والخير كتير وعمار يا مصر، ده حتى البنوك انهارده كانت زحمه جدا مش علشان اقتصاد البلد وقف اسبوع بسبب الاجازات والاعياد والكلام ده اطلاقا ابسليوتلى، ده لان الناس الظاهر اخدت العلاوة ونازلة تعمل بيها ودائع وحسابات فى البنك !!

*****

حتى لما روحت لبتاع الجرايد تصوروا ملقتش لا الاهرام ولا الاخبار ولا اى جريدة قومية مهلبية ، الناس من كتر فرحتها خلصت الجرايد ، كل واحد عايز يشوف التهانى والمباركات بمناسبة عيد الاعياد ، وللاسف ملقتش غير جرايد المعارضه الصفرا اللى بتقول عن حبيبنا كلام ايااه خالص ، وطبعا انا مش ممكن اشترى جريده تجيب سيرة حبيب قلبى بالبطال

*****

بصراحه بقى المفروض احنا كشعب كنا نستزوق ونلم من بعض ونجيبله هديه كده كويسة من مقامه ، الراجل مش حارمنا من حاجة ولا مخلى جهد على جهده علشان يسعدنا، بيطلبلنا الرضا نرضى، لكن احنا البعدا معندناش دم وشنا كالح ، زى القطط ناكل وننكر، ده بدل ما نلم من بعض كده نجيبله تورتاية ولا هدية كويسة ، وبعدين ماهو كله من خيره برضه، والعنوان ميتهوهش مصر الجديدة خلف محطة البنزين

*****

وبعدين فين شيرين واليسا ونانسى وهيفا وكل المطربات، مفيش واحده تخلى عندها شوية هيموجلوبين وتعملوا اغنية happy birthday زى مارلين مونرو ما عملتها لكيندى ولا هو يعنى كيندى على راسه ريشة، مناسبة زى دى مش اقل من 3 اوبريت و7 اغانى ، بطلوا بخل بقى، شعب ماسك ع القرش صحيح

*****

عموما عن نفسى قررت اقضى اليوم فى مود سعيد منشكح ، اتامل فى انجازاته، اتفكر فى مبادراته، ومسمعش كلام الناس الوحشة اعداء النجاح والانبطاح ، وادعيله من كل قلبى بطوله العمر اصل طوله العمر تبلغ الامل ، ولا يحرم ولادنا وولاد ولادنا منه

اللهم افقرنا واغنيه ، اللهم عرينا واكسيه ، اللهم امرضنا واشفيه، اللهم جوعنا واكله كباب وكفته كل يوم بسلطاته ببابا غنوجه، اللهم خليه يحلى بكل فاكهه الموسم من مانجه وتفاح وكنتالوب ومشمش وموز وكل حاجة الكيلو منها غالى ع الناس ، وبطيخ من غير بذر طبعا هو الزعيم لسه هياكل ويتفتف، فاكرينه فاضى زيكم

واهـــــــــــــــــو ده عيبنـــــــــــــــــا مش عيــــــــــــبه

38 عرفوا عيبها:

فاتيما on 4 مايو 2008 في 8:10 م يقول...

أخص عليكى يا بيبو
عاوزة يتعمل غنوة زى ما مارلين مونرو عملت غنوة لكينيدى ؟؟!!
إنتى مشوفتيش كينيدى جراله إيه بعد كدا ؟؟؟

أبو خالد on 4 مايو 2008 في 8:40 م يقول...

كل سنة و أنتى و هو طيبين و منورين
جزاك الله خير يا داليا

غير معرف يقول...

اللهم اخرب بيتنا احنا يا شيخة

اللهم موت الشعوب كلها فى يوم واحد

علشان الرؤساء يصحوا الصبح ما يلاقوش حد يحكموه بقى :)))

----------------------------

و بعدين مين قالك ان القطط بتاكل و تنكر , القطط لسة كاتبة مقال معتبر فى الأخبار ... عايزة ايه بقى تانى

بس سيبك انتى ... الأغنية روووعة , باموت فى صباح

انتى عسسسسسسل و دمك شربات :)))

-----------------------------------

سعيدة بالمرور عليكى , و اكيد مش اخر مرة

تشكرات افندم

نيفين عيد

اهو ده عيبه on 4 مايو 2008 في 9:21 م يقول...

فاتيما
-------
وماله يا حبيبتى مش يمكن دى اللى يكون فيها الشفا
ساعات بتيجى على اهون سبب

اهو ده عيبه on 4 مايو 2008 في 9:22 م يقول...

ابو خالد
----------
وحضرتك بالصحه والسلامه ودايما منورنى

اهو ده عيبه on 4 مايو 2008 في 9:25 م يقول...

نيفين عيد
---------
يالا احسن خليهم بقى يروحوا يدوروا على عقد عمل فى الخليج

الاغنيه دى للناس الى فرحانه بالعلاوة
(اه كركدن لا تحسبن تتقبضن امشى على ضو يمكن فى الجو فى مقلبن)

Wael on 4 مايو 2008 في 9:46 م يقول...

كل سنة ونتا طيب ياريس

افتكر ان ده عيد ميلاده الـ 79 صح ؟

يلا ربنا يديله الصحة

وعقبال 79,5 سنه انشاء الله D:


very nice post

غير معرف يقول...

دمك زى السكرررررررررر
:))))))))))
ده حتى النور زايد وفــايض وســادد عين الشمس واللـى ورا الشمـس ( ربنا يرجعهم بالسلامه )


بجداسلوبك حلو اوى
وكل سنه والشعب بخييييييييييير
:)))))

حسبي الله ونعم الوكيل on 5 مايو 2008 في 12:34 ص يقول...

تحياتى لك

بنوته مصرية on 5 مايو 2008 في 1:58 ص يقول...

ههههههههههههههههههه

ده حتى النور زايد وفــايض وســادد عين الشمس واللـى ورا الشمـس

انا اكتر وحده حاسة بلموضوع ده

علشان نور بنتي معايا (8_^)

بيني وبينك فعلا اليسا ونانسي معندهمش دم علشان كدا انا اللي هغنيلو

اانا ليه مين غيرة ده حبيبي يووه لحسن اطلق فيها اقصد حبيبنا كلنا :D

ياللا حالا مالا بالا .. غنوا لآبو الفساد قولوا في عيد ميلاده الليلة اتعس الآعياد.. يسقط أبو الفساد
أنا الغرقان بانادي .. وباقول للبحور
يوم أغبر رمادي ..عيدك يا طرطور
لك ملايين اعادي ..عايزينك تغور
امتي حاتفرحهم.. وتسيب البلاد
في داهية يا ابو الفساد

مواطن مصرى نايم on 5 مايو 2008 في 2:12 ص يقول...

لا لا انتى كده دخلتى فى حاره سد
يالا ربنا معاكى بقى
و كل سنة و حبيب قلوبنا الريس
بألف خير
اه ( الف خير ) فى حاجة
كل واحد و نيته بقى
سلامى ليكى
eslam

اهو ده عيبه on 5 مايو 2008 في 2:39 ص يقول...

wael
-----
يا اخ وائل دول 80 سنة عايز تاكل على الشعب المصرى سنة من الرخاء والديموقاطية

اهو ده عيبه on 5 مايو 2008 في 2:41 ص يقول...

shayma
--------
يا ستى ده من كتر النور المفروض يوزعوا علينا نظارات شمس او حتى نظارات من اللى بيلبسوها بتوع اللحام اصل الشرار وحش على عيونا
شرفتى ونورتى

اهو ده عيبه on 5 مايو 2008 في 2:42 ص يقول...

حسبى الله ونعم الوكيل
------------------
اتمنى الموضوع يكون عجبك

اهو ده عيبه on 5 مايو 2008 في 2:45 ص يقول...

بنوته مصريه
------------
يا ستى ربنا يخليلك نور
والموضوع مفيهوش طلاق ولا حاجة لا سمح الله لان هو بمثابه الاب الروحى لشعبه وانتى عارفه ان الاب محرم يعنى عادى

اهو ده عيبه on 5 مايو 2008 في 2:48 ص يقول...

مواطن مصرى نايم
---------------
روح يا شيخ الله يطمنك وبعدين ده انا مدحته ومسحت جوخ ع الاخر امال لو كنت قلت حاجة بطالة لا سمح الله
عموما الاعمال بالنيات وكل واحد بياخد على اد نيته :)

المـــفـــــــقــــــــوعـــــة مــرارتـهــا on 5 مايو 2008 في 12:10 م يقول...

عيلة مُعمرة ... يعني قدامه كدة حوالي أربعين سنة كمان في الحكم ... نكون أحنا في اواخر الستينات وساعتها نبدأ نشم هوا ريس جديد
يحيينا ويحييكي ربنا
ربنا يزود في عمره كمان وكمان

Crystal Lobna on 5 مايو 2008 في 12:33 م يقول...

كل سنة و ريسنا طيب.

بوست جامد مووت و أهو أدينى بعلق أهو فى البلوج.
أى خدمة

اهو ده عيبه on 5 مايو 2008 في 12:44 م يقول...

المفقوعه مرارتها
--------------
يا ستى خللى ولاد ولادنا يعيشوا العصر المزهزه اللى عشناه
ده لو فضل فينا حيل اصلا نشم

اهو ده عيبه on 5 مايو 2008 في 12:47 م يقول...

crystal lobna
----------------
يا حبيبتى تشرفى وتنورى فى اى وقت
بيتك ومطرحك

khobayb on 5 مايو 2008 في 2:23 م يقول...

ااااااااااااه

كل سنة وانت ...

وانت ...


يللا

ربنا يديك على قد نيتك يا ريس

وعلى قد اللي عملت في الشعب

مش أكتر من كده ..

اهو ده عيبه on 5 مايو 2008 في 2:28 م يقول...

خبيب
-------
شرفت ونورت واتمنى تكرر الزيارة
وربنا اعلم بنيتنا ونيته بقى:)

Desert cat on 5 مايو 2008 في 3:51 م يقول...

القطط بتاكل وتنكر يا داليا
جايبة فى سيرتى ليه بقى
القطط لو شافته هتشربببببببببببب
من البحر
الهى وانت جاهى تريحنا بقىىىىىىىى
تعبت ياربى خلالالالالالالالالاص
من الحر مش من حد تانى وصلات النت ليها ودان برضه

Yasser Hussein on 5 مايو 2008 في 4:41 م يقول...

أنا نفسي أعرف بتجيبي الكلام ده منين
:)
أهو ده عيبه

خالص تحياتي

Soooo on 5 مايو 2008 في 6:05 م يقول...

ابقي فكريني اكلملك مرسي عطالله او سمير رجب
هتبقي هايله هايله هايله لو اتكلمتي بلسان الحكومه
----
انا عارف انك بتهزري .. لكن والله العظيم لو قريتي كلام جرايد الحكومه يوم عيد ميلاد الريس هتلاقيه كده
----

بقولك ايه
تحبي نجبلك عيش وحلاوة طحينيه .. هتقضيها رجيم
اعوذ بالله من الشيطان الرجيم





سلاموووووووووووز

اهو ده عيبه on 5 مايو 2008 في 7:39 م يقول...

desert cat
----------
يا حبيبتى انا قصدى القطط السمان
قادر ربنا يزيح عننا الحر بقى

اهو ده عيبه on 5 مايو 2008 في 7:40 م يقول...

ياسر حسين
--------
هذا من فضل ربى يا استاذ ياسر
واما بنعمه ربك فحدث
والله ما جايبنى ورا غير لسانى

اهو ده عيبه on 5 مايو 2008 في 7:45 م يقول...

سوووووووو
-----------
سورى انا مستوايا مش اقل من ابراهيم نافع وممتاز القط لو سمحت

وبعدين انا فعلا دورت على جرايد يومها ملقتش اصلى بصراحه نزلت الساعه واحده الظهر بعد ما كل الطبعات خلصت

عايز تضحك عليا بعيش وحلاوة هو اللى اكل الكباب احسن منى
حبيبى ابو احمد

محمد الهادى غانم on 5 مايو 2008 في 7:51 م يقول...

حمد لله علي سلامتي ان انا قدرت اوصل هنا طبعا هتستغربوا ليه لأن انتوا مش واخدين بالكوا ان المرور عندنا بقاله 3 ايام بيحتفل بالمناسبة السريعة وشرينلهم ونشين جداد ماشين يصوتوا أسف يحتفلوا بيها بالمناسبة السعيدة دي . وانتي طبعا فاهمه

اهو ده عيبه on 5 مايو 2008 في 7:53 م يقول...

محمد الهادى
------------
منور وحمدالله على سلامه وصولك
اما الونشين فاحب اطمنك انهم اتسرقوا كالعاده تانى يوم

david santos on 5 مايو 2008 في 10:09 م يقول...

I loved this post and this blog.
Have a nice day

اهو ده عيبه on 5 مايو 2008 في 10:15 م يقول...

david santos
------------
thanx

دكتور مستكنيص on 6 مايو 2008 في 7:56 ص يقول...

خدتي بالك انتي من حركة غلاء البنزين والجاز دي اوعي تفهميها غلط
ده البنزين والجاز حبوا يحوشوا عشان يجيبوا لبابا حسني هدية مش أكتر

اهو ده عيبه on 6 مايو 2008 في 9:19 ص يقول...

دكتور مستكنيص
----------------
اه طبعا اللى عملنا حسابه حصل
بس هما غلوها علشان يحوشوها لاغراض تانية قادر ربنا يحققهاويستخدموها هما لوحدهم

شرفتنى بالزيارة واتمنى تتكرر تانى

كلبوزة لكن سمباتيك on 6 مايو 2008 في 1:40 م يقول...

عسولة جدا
عجبتني الحتة بتاعة الودائع اللي بالعلاوة الجديدة
اروح اعمل وديعة ب 22 جنيه و نصف في البنك
متهيالي ممكن يضربوني بالشلوت

قال علاوة قال من دم الشعب و على راي المثل من دقنه و افتله

تحياتي

اهو ده عيبه on 6 مايو 2008 في 1:50 م يقول...

سمباتيك
-------
يا اهلننين وسهلننين

يا ستى ده مبلغ عال ماهوش بطال

شرفتى واتمنى تكررى الزيارة

غير معرف يقول...

عيد ميلاد أبو الفساد
-----------------
ياللا حالا مالا بالا . . غنوا لأبو الفساد
قولوا فى عيد ميلاده الليلة . . أتعس الأعياد
يسقط أبو الفساد . .
أنا الغرقان بانادى . . وباقول للبحور
يوم أغبر رمادى . . عيدك ياطرطور
لك ملايين اعادى . . عايزينك تغور
امتى حا تفرحهم . . وتسيب البلاد
فى داهية يابو الفساد . .
أنا عاطل مكافح . . على كرهك أمين
يابو مخ سايح . . ضيع ملايين
طول عمرك مقاوح . . ويا الشقيانين
اسمك مكروه جدا . . من كل العباد
فلتسقط يابو الفساد . .
وأنا جعان وواقع . .جيبى كمان نضيف
رحت طابور وراجع . . مافيش معايا رغيف
لقيت واحد هطنفل . . بيبيع عا لرصيف
موبايل بألف جنيه . . بيغطى البلاد
خربت يابو الفساد . .
انا عانس بأقاسى . . لا عيلة ولا أصحاب
قوضتى فاضيه عليه . .مافيهاش غير الدولاب
شنطى جاهزة تملى . . حاطاها جنب الباب
أنا مش زى خديجة . . عشان ما بقولش داد
إعتقنا يابو الفساد . .
انا السرطان بلانى . . من أكل الحمير
تعالى عيش مكانى . . ويا الصراصير
مش بعيد عن قصرك . . ده أنا فى ترب الغفير
واللا انت عايز مدفن . . فى أرض الميعاد
ماتموت يا أبو الفساد . .
وأنا مش رايح أغشك . . ألعبان خطير
يامولود فى عشة . . مفطوم عالجرجير
مين يقدر ينشك . . وإنت ابن الغفير
إحنا بتوع عظمتك . . حافظين الوداد
فلتحيا يابو الفساد . .
أنا إبن بهانة . . محتاج مترين قماش
عشان مافيش صيانة . . أرضى راحت بلاش
وقبل الأربعين . . طلعت عا المعاش
وأنت فى الثمانين . . ضارب فيها طناش
دا احنا قرفنا منك . . ومن الإستبداد
ما تغور يابو الفساد
من كثر المهانة . .عيدك يوم بكانا
فيه الحزن جانا . . من كثر ظلمك لينا
شوف بقى يا أخينا . . لولا انت ما حفينا
حاسبوا يا أصحاب . . من حسنى النصاب
الواجب علينا . . نشيله من فوقينا
ونهتف ونقول له . . غرقت السفينة
شوف بقى يا أخينا . . لولا انت ما حفينا
جينا قرب دارك . . نقولك يا مبارك
لا فى ليلك أونهارك . . ولا باجدع رجالك

حانسيبك تبرطع . . وتتمريس علينا

غير معرف يقول...

مراحب
أنا علي من لبنان
أسأل نيفين عبده أو أي حد يعرف
لو سمحت تبعتيلي عل email ali3anka@hotmail.com
صاحب أغنية "اه كركدن لا تحسبن تتقبضن امشى على ضو يمكن فى الجو فى مقلبن"
و علا أي website
شكرا مسبقا

 

Term of Use

أهو ده عيبه Copyright © 2009 Flower Garden is Designed by Ipietoon for Tadpole's Notez Flower Image by Dapino