مايو 16، 2008

لو قابلت الست دى قول يا فكيك


بما ان المساواه فى الظلم عدل ، فمن العدل عزيزى هو انى اقولك شوية حاجات لو لقيتها فى الست يبقى تقول يا فكيك


النكـــــــــــــدية


هو: السلام عليكم

هى: ايه اللى جابك بدرى كده من الشغل؟ انا لسه مطبختش وورايا غسيل وو......

هو: طب ردى السلام الاول ، انهارده يا ستى اخدت مكافاة من الشغل فقلت امشى بدرى واشتريلكم شوية حاجات

هى: ياما جاب الغراب لامه، ايه اللى يخليك تروح تشترى كده من نفسك ، انت عارف ان ذوقك وحش كنت اديتنى الفلوس اجيب انا

هو: يعنى دى جزاتى، الامر لله ، عدينى بقى خلينى ادخل اريح شوية علشان هنخرج بالليل نتعشى برا

هى: تعدى فين، انت مش شايف الارض لسه ممسوحه استنى مكانك لغاية ما تنشف ، ولا انا الجارية اللى جابوهالك

هو: @!؟# روحى يا شيخه اللهى ينكد عليكى زى ما نكدتى على


خميرة عكننه، هدفها الاساسى انها تكرهك فى الحياه وتقضى على شوية الامل اللى عندك ووسيلتها فى كده البوز المتين اللى بيظهر مع اى حوار او مناسبة او مبادرة منك او اقتراح لاى حاجه، وساعات بيكون مش محتاج سبب علشان يظهر لان بيبقى خلاص الوش اطبع ع القالب ده ، واحب اطمنك ان مفيش فايدة حتى لو ادتلها صوابعك العشرة شمع، فوفر الشمع ده لواحده ممكن تكون سعادتها انها تقعد على ضوئه معاك



اللعـــــــــــــــــوب


هى: لعلمك ، انا كان لا ممكن ابدا اقعد مع شــاب فى مكان عام ،اه امال ايه انا من عيله محافظــة قوى ، لــولاش بس حسيت انك ابن ناس وحبوب ودمك شربات

هو: والله انا قصدى شريف ، بس انا قلت نتعرف على بعض اكتر قبل ما اتقدم واخطبك

هى: اه ما انت لازم تخطبنى ، انت فاكر بنات الناس يخرجوا مع شباب كده بالساهل

الجرسون: انسه فتكات ، انتى فين من زمان ده استاذ محمود جه كذا مرة وسال عليكى ، واستاذ فتحى كمان

هو: نعم ؟ محمود وكمان فتحى ، الله الله ، وعماله تقوليلى عيلة ومحافظة ده تلاقى صورتك هى اللى فى المحافظة، انا ماشى ومش عايز اشوف خلقتك تانى

هى: استنى يا احمد.. يا امجد ... ياااا.... يووووه قطيعه هو كان اسمه ايه؟



زى ما فى رجاله عينها زايغه، فى برضه ستات بتلعب بالرجاله وبتحب انهم يبقوا كتير حواليها، ويدوروا فى فلكها هى بس وده ممكن يكون نوع من انواع المرض ، الغريب انها ممكن ترسم عليك براءة خضرة الشريفه بذاتها وفى رجاله كتير ممكن تصدق ويدخل عليها الشوية دول ، المهم انك بذكائك تقدر تكتشف ده بدرى قبل الفاس ما تقع فى الراس وساعتها يا حلو للخلف دُر طوالى





الغيــــــــــــــورة

هى: انت متشيك كده وخارج على فين


هو: هكون رايح فين يعنى ، عندى انهارده اجتماع مهم فى الشغل مع مديرين الفرع الرئيسى ولازم يكون مظهرى كويس قدامهم

هى: مديرين ؟ وهما المديرين بيتلبس لهم احسن بدلة وكمان بيتحطلهم برفان

هو: لا ماليش حق المفروض اروح بالبيجامه ومن غير حموم كمان علشان ترتاحى

هى: قدامك حاجه من اتنين، يا تغير البدله دى وتلبس واحده على مزاجى ياما مش هتنزل من البيت خالص

هو: انا عندى حل تالت ، ما تيجى معايا الشغل احسن @#؟!#؟

هى: والله فكرة، استنى لما اقوم البس !!




الغيرة مرة وقاتله، خصوصا غيرة الست لانها ساعات بتكون انعكاس لحب التملك ، وممكن توصل انها تخنق الانسان وتحسسه ان انفاسه محسوبة عليه ، مع الست اللى زى دى علشان تريح دماغك يبقى تصور يومك صوت وصورة لكى يطمئن قلبها عن تحركاتك ، وتمضى قدامها حضور وانصراف وتعتبر ان زيك زى اللى عليه مراقبه مع الفرق ان هو بيبات فى القسم وانت بتبات فى بيتكم




المهملــــــة

هو: فين القمصان بتاعتى؟ مش لاقى ولا واحد فى الدولاب

هى: اصلهم فى الغسيل، منا نسيت اغسل امبارح

هو: مش كفايه البيت يضرب يقلب ومفيش حاجه فى مكانها ، والعيال شكلهم ولا الشحاتين كمان مفيش هدوم نظيفه طب هنزل الشغل ازاى دلوقتى

هى: معلش اتصل بيهم وخد انهارده اجازة ، مش هيجرا حاجه

هو: وانتى على بالك ايه ، بصى بقى مبدهاش انا هاخد بعضى واروح اقعد عند امى على الاقل الاقى حته نظيفه اقعد فيها بدل المزبله دى

هى: طب طالما كده بالمرة خد معاك القمصان تتغسل عند مامتك !!



قمه البرود اللى فى الدنيا ، عندها قدرة غريبة على التعايش فى وسط الفوضى وقله النظافه ومتجاهله حقيقه ان مظهر البيت والزوج والاولاد مسئولية الست ، وطبيعى ان الاهمال يكون فى نواحى حياتها كلها من اول مظهرها لحد بيتها وولادها ، ودى مينفعش معاها انسان منظم او منضبط فى حياته ، دى محتاجه فنان بوهيمى زى العيسوى حياته عبارة عن فوضى كبيرة وبيستحمى من السنة للسنة






المــــــــــــــادية



هى: فين الفلوس اللى قلتلك عليها ؟

هو: فلوس ايه انتى مبتشبعيش ، اجيبلك منين؟

هى: ماليش دعوه اتصرف ، اشمعنى انا اللى بختى قليل من دون الناس ، مش شايف اختى سوسن جوزها مهنيها ازاى ومغرقها فلوس هى وعيالها

هو: طب هو راجل مقتدر وربنا كارمه ، انا اجيب منين اسرق يعنى ولا انهب علشان ارضيكى

هى : معرفش ، الراجل الشاطر هو اللى يعرف يجيب القرش من بق العــوو

هو: @!؟#؟@#! ياخى عــوو لما يلهفك



الست اللى زى دى تفضل تقولك هات هات لحد ما تجيبلك الهيتهات، الحياه بالنسبة لها مش اكتر من مشروع استثمارى كبير الهدف الوحيد منه هو الربح المادى، واكيد انت هتكون فى حياتها صفقه ، ودورك الاساسى انك تبقى ممول وراعى رسمى، وياويلك لو مقدرتش تقوم بالدور ده لانها هتفضل طول عمرها تقطمك بالكلام وتقارنك بفلان وعلان ، ومش بعيد تلاقى نفسك من كتر زنها على ودانك فتحت الدرج او مديت ايدك للحرام ، ودى فيها كلابوش يا حلو





السطحيــــــة-المغـــــرورة


هو: قراتى الكتاب اللى ادتهولك ؟

هى: هه ، لا لسه مش فاكرة اصلا حطيته فين

هو: معقول ده كتاب مهم ، واكيد لو قريتيه هتعرفى منه معلومات كتير كويسه

هى: بعدين ابقى اشوفه، بقولك انهى احلى على الروج الفوشيا ولا الاحمر؟

هو: انا بكلمك عن الكتب وانتى تقوليلى روج

هى: كتب ايه ووجع دماغ ايه، ده بدل ما تحمد ربنا انك خاطب اجمل واحده مش بس فى العيلة لا فى البلد كلها كمان عايزنى امقق عنيا الحلوة فى كلام فاضى، ال كتب ال وهو انا ناقصه علم

هو: انتى شايفه كده ؟

هى: انا شايفه ان ماكس فاكتور نمرة 15 هيكون احلى على !!



انا دمجت الصفتين فى بعض لان غالبا ما هتلاقى الست السطحية انسانه مغرورة وغرورها بيصورلها انها مش محتاجه تتعلم او تعرف اكتر، وبرضه قلما تلاقى مغرورة مش سطحيه لانها بتبص للامور بما يتناسب مع وجهه نظرها هى بس مهما كانت مختلفه عن اللى الناس شايفاه ، والغرور مرفوض حتى لو كانت بتتغر بعلمها مش بجمالها ، عموما لو كانت طموحاتك انك تتجوز عروسة حلاوة للفرجه بس فاحب اقولك فى الزمن اللى احنا فيه ده سوق الحلاوة جبر ، وان كان الموضوع يفرق معاك قوى يا سيدى اختارها عاقله وابقى اعملها عمليات تجميل بعد كده !!


طبعا مش محتاجه اقول ان مش كل الستــات كده ، وده بجد مش تحيز بس الحقيقه ان دايما السئ هو اللى بيظهر وبيجذب نظـرنا اكتر ، بالظبط زى البحر مليان سمك جميل اشكال والوان لكن للاسف الميت بس هو اللى بيطفو على السطح

الستات الكويسة كتير ، بس المهم انك تدور كويس وبتأنى لان اللؤلؤ دايما بيكون فى اعمق حته فى البحر ومحتاج حد يكون عنده الصبر والعزم انه يلاقيه بجد ويقدر قيمته ، مش حد يستسهل ويفرح بالصدف الفاضى المرمى على الشط



عموما حتى لو قسمتك خلتك تصادف حد بالصفات دى ، اوعى ده يخليك تكره كل الستات وتقول زى ما قال صلاح جاهين

اوعى تصدق انثى ، المراة خلاص الغاء اعدام

مخلوقه من ضلع اعوج ، وزى البحر فى قلبه ضلام

واهــــــــــــو ده عيبــــــــــــــه

42 عرفوا عيبها:

Z_Diva on 18 مايو 2008 في 12:18 ص يقول...

nihahhahahaahahahahahaaaaaaaaaaaaa -d7ka shaytanya-
la bas gamd elklam ya dody
we f3lan fe sa7aly kteer mn hazih el3ynat, we bsar7a kln fena mnhm bas bnsab 5afifa gdan y3ny -ana knt bashabih 3almohmila elsara7a :D-
bas tab3an zay m2olty dol 3aynat nadra, we e7na a3'labna shaya....opps asdy malayka malyka :D

موناليزا on 18 مايو 2008 في 12:39 ص يقول...

تصدقى فعلا فيه ستات كتير كده والملفت للنظر انهم بياخدوا ناس خسارة فيهم والعكس برضه سبحان الله فيها ايه لو كل واحد حمد ربنا على اللى معاه وحاول يبطل سلبية
جميلة بجد وواقعية جدا
...............
لكى منى شكر خاص على تعليقك عندى

محمد الهادى غانم on 18 مايو 2008 في 1:19 ص يقول...

ازيك يا دودو قبل ما اتكلم علي الموضوع بتاع انهارده انا فعلاً بهنيكي من كل قلبي علي اللي انتي وصلتيله وتشرفيتا في الكتابه في المدونه للجيب وانتي عارفه الشعور وخاصه البورسعيدي اللي بيتفشخر بابن بلده لما يوصل لحاجه حلوه انا فعلا مبسوط وبتفشخر بيكي ونفسي اكون يوم الخميس في القاهرة .
اما بالنسبة للموضوع انهارده انتي بصراحه بتخلينا نشوف حاجات احنا بنتعاما عنها وخدي بالك من نتعاما عنها بسي انتي مجبتيش سيرة الزنانه والا انتوا عندكو صاعق ناموس .
واللي بجد تحفه الصور اللي انتي بتحطيها وخاصة الصورة بتاعت المهملة انتي بتجبيهم منين .
تحياتي ليكي ززززززززززززز طبعا دي الناموسة مش حاجه تانيه هههههههههه

هشام علاء on 18 مايو 2008 في 3:49 ص يقول...

ههههههههههههههههه

احييك بشدة على صراحتك المتناهية و روحك الرياضية فى عرض هذه النماذج الغير لذيذة من بنات حواء

و على فكرة النماذج كلها واقعية و موجودة بينا و ساعات بتبقى موجودة بدرجات يعنى تلاقى ست مش نكدية اوى بس بتعز النكد احيانا و ست مش مادية قوى بس ساعة لما الراجل تجرى فى ايده الفلوس تطلب اكتر و هكذا اما نموذج الست السطحية المغرورة او اللى بتمثل جمال بلا عقل فده للاسف نموذج مفضل لدى رجال كثيرين رغم ان الست العاقلة اللى ليها دماغ تريح الراجل اكتر و تفهمه و تشيله لكن التانية دى رغم الحلاوة و الجمال ممكن بسطحيتها تحول حياته جحيم

مافيش حد فينا خالى من العيوب و كلنا فينا العيوب درجات بس الحب بيغطى و بيعوض كل ده..ده لو فى حب من اصله



عامة احييك مرة تانية و اقولك ان فى نماذج مهمة جدا وقعت منك و ممكن تعملى بيها بوست تانى

المسرفة

الزنانة

الرغاية


تحياتى
هش

بنوته مصرية on 18 مايو 2008 في 5:46 ص يقول...

ازيك يا دولي

اخبارك ايه

والله انتي جبتي العيوب الموجوده في بعض الستات

النكدية و اللعوب و الغيورة و المهملة والمادية و السطحية المغرورة


كلللللللل دي صفات موجوده في بعض الستات وموجوده في اي وجده ممكن تكون غيورة مادية مهملة

مش كل واحد مميزاته 100في 100 وكلنا فينا عيوب

وربنا يهدينا ويغفر لنا

لكي تحياتي يا قمر

بوست يجنن كالعاده

اهو ده عيبه on 18 مايو 2008 في 10:55 ص يقول...

z_diva
--------
هو الضحك اشيطانى ده بيطلع لوحده زى النبات كده :)

اذا كنتى بتشبهى على المهملة فانا بشبه ع النكديه والغيورة

لكن طبعا احنا ملايكه وخليها فى سرك بقى

اهو ده عيبه on 18 مايو 2008 في 10:57 ص يقول...

monaliza
---------
سبحان الله عندك حق بشوف ساعات ناس احس ان التركيبة مش نافعه مع بعضها وازاى الراجل ده او الست دى وقعت الوقعه الغريبة دى

والعفو متشكرنيش على واجب المهم تكونى بخير

اهو ده عيبه on 18 مايو 2008 في 11:00 ص يقول...

محمد الهادى
----------
ازيك يا محمد وربنا يخليك ليا بس قولى هو فعل فشخر ده تصريفه ايه :)
اتمنى بجد انك تيجى

عايز تفهمنى انى فتحت عينيكم ، انتوا مفتحين على طول وواقفين ع الواحده كمان بس خلينى ساكته

كويس ان الصور عجبتك اصلى بفضل ادور كتير على حاجه مناسبة

اهو ده عيبه on 18 مايو 2008 في 11:06 ص يقول...

hesham
-------
ازيك وميرسى انك ضيفتنى ع الفسيبوك، ولا يكون هشام تانى :)

الصراحه طبعا حلوة وبعدين بيدى قبل يد عمر
العيوب طبعا درجات وممكن تظر بدرى او تظهر متاخر انت وحظك

النماذج دى انا مش نسياها وليها جزء تانى ان شاء الله بس لو صبر القاتل ع المقتول

اه وان شاء الله نتقابل يوم الخميس

اهو ده عيبه on 18 مايو 2008 في 11:16 ص يقول...

بنوته مصرية
------------
ازيك يا احلى بنوته

العيوب موجودة فى بعض الستات بس انتى عارفه لما بتيجى تتكلمى عنها بطرسقة كوميدية بتضخمى المسالة شوية

المهم ربنا ما يجعلنا منهم

تحياتى ليكى

شيماء الجيزى on 18 مايو 2008 في 12:52 م يقول...

بصى يا ستو
انا مقرتش الموضوع كله علشان اعلق عليه
استنى همزمز فيه
ولونى عارفه انواع الستات دى اللى بقت كتييييييييير جدا فى حياتنا
واللى بقى نادرا تلاقى حد مش كده
بس مجربتش اكون الست دى لسه علشان انا ..عانسة أأٌقصد أنسة
ممممممم
ما علينا
انا فررررررررررررحانه جدا انى لقيت حد من بورسعيد معايا فى الكتاب
ومن موقعى هذا اقولك انى متوقعه النجاح الباهر له مدام اتنين بورسعيديه فيه :d
اتمنى بجد يكون بنا تواصل ، وتقوليلى هتركبى ايه وانتى رايحه
:D

تحياتى لكِ يا قمر

اهو ده عيبه on 18 مايو 2008 في 1:45 م يقول...

شيماء الجيزى
-----------
شرفتى ونورتى فى اول زيارة ليكى لمدونتى المتواضعه

مزمزى براحتك ، بس لازم تعترفى اننا حلوين وطعمين ومفيناش حاجه من الصفات دى خالص

انا بجد فرحانه زيك ان فى حد معايا من بورسعيد العزوة حلوة برضه فى الغربة

ان شاء الله هبعتلك اميلى فى تعليق عندك علشان نقدر نتكلم ونشوف هنركب ايه

خواطر رئيس شاب on 18 مايو 2008 في 7:20 م يقول...

اكيد طبعا كلامك صح جدا

مفيش احسن من ان الواحد يدور على المتدينة حتى لو كانت مش جميلة


هتراعى ربنا


موضوع جميل

تحياتى

Desert cat on 18 مايو 2008 في 7:36 م يقول...

دولى الجميلة
انا شوفت النماذج دى يا حبيبتى واتعاملت مع بعضها
منهم النكدية كنت فاكره نفسى انكد على بلد لكن طلعت اللى عرفتها طلعت تنكد على دولة كامله
وكمان السطحية برضه زى ما وصفتى كدا
وانيل
ربنا يرزق كل واحد باللى يستحقه
محبتى يا جميله

Soooo on 18 مايو 2008 في 10:17 م يقول...

عاجبني قوي الحوار اللي عاملاه
بجد حوار ساخر جدا

وعاجباني الصور اللي حطتيها

بس فعلا في لسه نوعيات كتير ماتكلمتيش عنها


ملحوظه
عبده كفته وزيزو نتانه .. ماتلخبطيش الاسماء .. ده تاريخ يابنتي مش اي حاجه والسلام




سلامووووووووووووز

Soooo on 18 مايو 2008 في 11:44 م يقول...

اه صحيح
حلوة قوي الاغنيه
مش دي بتاعة الحاج بوب مارلي برضك؟؟

بس مين اللي بيغنيها ده؟؟
اوعي تقوليلي عبد الباسط حموده .. أزعل قوي انه خدها من أحمد بليه




سلامووووووووووز

HERO on 18 مايو 2008 في 11:45 م يقول...

الصفات اللي موجودة في الستات والصفات اللي كتبتيها عن الرجالة كلها جميلة وفعلا موجود منها كتير في حياتنا وبنشفهم كتير والواحد مش عليه الا انه يفكر بعقله قبل ما يختار علشان ربنا يوفقه في حياته ويختار الانسانة المتدينة اللي تعرف ازاي تحافظ على جوزها

تحياتي

اهو ده عيبه on 18 مايو 2008 في 11:51 م يقول...

خواطر رئيس شاب
--------------
اولا شرفت ونورت

والله عندك حق الجمال جمال الروح
فاظفر بذات الدين

تحياتى ليك

اهو ده عيبه on 18 مايو 2008 في 11:54 م يقول...

desert cat
----------
قطتى الحلوة

الستات دى مالية البلد بس خليها فى سرك خصوصا النكدية

ربنا يبعد عنك وعننا النكد

تحياتى ليكى

اهو ده عيبه on 19 مايو 2008 في 12:18 ص يقول...

سووووووو
---------
ميرسى يا باشا اخجلتم تواضعنا
الحوار ده بيحصل فى بيوت كتير ومع ناس كتير
واطمن لسه فى جزء تانى دى حتى الصفات الحريمى هتبقى اكتر من الرجالى :)

عبده كفته خراب بيوت وزيزو نتانه خراب معده يعنى تعددت الاسباب والخراب واحد

الاغنيه صحيح بتاعه خالد الذكر بوب مارلى لكن دى بصوت على مارلى اخوه بس مش شقيق

منورنى يا سوو واتمنى بجد اشوفك يوم الخميس ان شاء الله

اهو ده عيبه on 19 مايو 2008 في 12:20 ص يقول...

hero
------
انا كان كل هدفى اننا نقول شوية من الصفات علشان نعرف ايه عيوبناونحاول نصلحها

شرفت ونورت واتمنى الزيارة تتكرر

Empress appy on 19 مايو 2008 في 12:53 ص يقول...

ههههههههههههههههه انتى طلعتى حله صحيح انتي هطفشي الرجاله ولا ايه يا ست انتى الا اتا كنت عاوزه خطيبي يقرها لكن بعينك اقولك كان هيقولك اكتبى عن الستات او البنات اللى بتدون وقرفانى معاها ههههههههه اللى هو سيادتي طبعا

Zika on 19 مايو 2008 في 2:28 ص يقول...

اخيرا انصفتينا في حاجه
:D
اكيد بوست رائع
تحياتي

د. إيمان مكاوي on 19 مايو 2008 في 11:09 ص يقول...

وصفك لأنواع الستات جميل ودمه خفيف ...وياريت تعملليلنا بوست تاني بأنواع الستات الكويسه ..بنفس خفة الدم..علشان الناس يعرفوا إن فيه ستات كويسه..

تحياتي وياريت تشرفيني بالزياره

مـحـمـد مـفـيـد on 19 مايو 2008 في 11:13 ص يقول...

السلام عليكم
بجد انتي طرحتي موضوع هام
ولكني ضد نظره التشاؤم
ضد نظره التمييز بين الرجل والمرأه والحوار علي الفارق
قكلنا لدينا نفس العيوب وان كانت كفه المرأه ارجح في هذه العيوب
أسلوبك بسيط ومميز

اهو ده عيبه on 19 مايو 2008 في 2:30 م يقول...

appy
-----
شكلى كده طلعت مقطف مش حله

وبعدين الرجالة طفشانه خلقه
ياستى سيبيه يقرا وخايفه من ايه، وبعدين مالهم القلل اللى بيدونوا

ياخوانا رفقا بالقلل

اهو ده عيبه on 19 مايو 2008 في 2:34 م يقول...

zika
-----
يالا بقى يوم لك ويوم عليك

شكرا ليك

اهو ده عيبه on 19 مايو 2008 في 2:36 م يقول...

ema
-------
والله هحاول فى موضوع الستات الكويسة ده ولو ان الكويس معروف

يمكن طبيعه المدونة تتوافق مع العيوب اكتر

تحياتى ليكى واتمنى الزيارة تتكرر

اهو ده عيبه on 19 مايو 2008 في 2:39 م يقول...

محمد مفيد
---------
وعليكم السلام

والله يا استاذ محمد مش فكرة تشائم بس هو مجرد تسليط ضوء على بعض العيوب بس الضوء طلع شديد شوية

انا عارفه ان مفيش فرق بين راجل وست لان الوحش مرفوض عموما

بس هى الفكرة ان فى بعض الصفات بيغلب عليها شوية طابع انثوى

تحياتى ليك وشكرا على الزيارة والتعليق

غير معرف يقول...

ههههههههههههههههه

جااااااااامده يا داليا
بجد تحفه
هو بينى وبينك حقيقى وكتيييير
بس انا مع ابى انتى عايزة تطفشيهم ولا ايه
هههههههههههه

بس برده جامده ومبروك يا جميل على الكتاب

سلامى
:))

Unknown on 19 مايو 2008 في 6:30 م يقول...

ايه يا داليا انتى كده هتكرهينا فى الستات والجواز امال هنصرف الملايين اللى بنكسبها فى الشغل ده على مين
جميل قوى البوست ده واللى على الرجالة وانتى تقريبا جمعتى اغلب الصفات الوحشة فى الرجالة والستات
ثانيا اسف على التأخير لظروف شغلى وان شاء الله احاول اجى يوم الخميس حفل التوقيع واتعرف عليكم اكتر
تحياتى

كاميليا بهاء الدين on 19 مايو 2008 في 7:36 م يقول...

اوعى تصدق انثى ، المراة خلاص الغاء اعدام
مخلوقه من ضلع اعوج ، وزى البحر فى قلبه ضلام
.......

ههههههههههه

ياعم انت هاتضيعنا كدة

هههههه

احييكى على الحوارات الجميلة

الحقيقة مبهرة وسلسة

دمتى مبدعة يارب

ابو العربى on 19 مايو 2008 في 10:50 م يقول...

بس لو حده فيها كل الصفات دى ده يبقى ايه ده متهيئلى احسنهم الغيورة لان التنيين مستفزين قوى
ولو بعدنا عن كل الصفات دى فى الستات مش هنلاقى ستات من الاساس
مفيش وحده فى الدنيا مفيهاش نسبه من الصفات دى وده على ما اعتقد
ابوالعربى

اهو ده عيبه on 19 مايو 2008 في 10:56 م يقول...

shayma
-------
يا ستى هما طفشانين خلقه يبقى خليها تيجى مننا

ميرسى ليكى يا قمر

اهو ده عيبه on 19 مايو 2008 في 10:59 م يقول...

ayman badr
-----------
لو تعباك الملايين هاتلى بيهم اكله كباب

ان شاء الله فى بوست كمان للستات

ربنا معاك ويوفقك وان شاء الله نشوفك هناك

اهو ده عيبه on 19 مايو 2008 في 11:00 م يقول...

كاميليا
--------
يا ستى خليهم يشوفوا يومين من نفسهم

علشان الحيادية برضه :)

تحياتى ليكى

اهو ده عيبه on 19 مايو 2008 في 11:03 م يقول...

ضد الظلم
---------
اولا سعيده ان ابو العربى بلدياتى مشرف عندنا

مش هتلاقى واحده فيها كل الصفات

وحتى لو فيها واحده فالنسب متفاوته وفى صفات يمكن التعايش معاها وصفات لا

عموما اطمن لسه الحمد لله فى ستات كويسة بس اللى يدور صح

تحياتى ليك

mostafa rayan on 21 مايو 2008 في 2:46 ص يقول...

تفتكري يا داليا ان في ست مافيهاش اي عيب من اللي انتي قولتيهم دول
بجد لو قابلت واحدة خالية من كل هذه العيوب دة انا اتجوزها فورا
تحياتي ليكي

khobayb on 21 مايو 2008 في 2:50 ص يقول...

بصراحة ..

ممتاااااااز

---

هو ده الكلام ..

"يا فكيك"

لأن فيه ناس بتتصور إنها تقدر تغير ..

وللأسف بتفشل ..

وبتعيش في تعاسة متناهية ..

ولا يخدعنك معسول الكلام في البداية

فإن الطبائع تبدووووو

اهو ده عيبه on 21 مايو 2008 في 10:28 ص يقول...

mostafarayan
------------
انا مقلتش ان فى ست خاليه من العيوب لان الكمال لله وحده

بس فى ناس تقدر تتكيف مع عيوبهم وناس لا

ولو هتستنى ست خاليه من العيوب يبقى للاسف هتستنى كتير :))

تحياتى ليك

اهو ده عيبه on 21 مايو 2008 في 10:30 ص يقول...

خبيب
-------
الطبع يغلب التطبع

ولا يغير الله ما بقوم حتى يغيروا ما بانفسهم

يعنى محدش بيقدر يغير حد الا لو كان من جواه عنده الاستعداد لكده بس ده نادر جدا لما بيحصل

شرفت ونورت

غير معرف يقول...

بقه كده يا داليا المراه خلاص
الغاء اعدام
امال اللى ما يتسموش يقولو علينا ايه بس
هاهاها
تجنن يا فكيك دى

 

Term of Use

أهو ده عيبه Copyright © 2009 Flower Garden is Designed by Ipietoon for Tadpole's Notez Flower Image by Dapino