مايو 21، 2008

نفضنا يا ابن الغالى


امبارح كانت حلقه القاهرة اليوم لعمرو اديب غاية فى الاستفزاز ، ليه بقى ، لان البرنامج كان بيناقش موضوع قانون الضرائب العقارية الجديد اللى تم سلقه بمنتهى السرعه من قبل يوسف بطرس ابن الغالى مسئول الجباية فى مصر وذلك لتنفيض الشعب المصرى من اخر قرش فى جيبه
*****
الفكرة كلها ان بعد العلاوة السودة اللى الناس ملحقتش تتهنى بيها اصبح الشغل الشاغل للحكومة ازاى ترجع العلاوة تانى اضعاف مضاعفه، فطبعا بديهى ان الحل الامثل زيادة الضريبة على اى حاجه او اختراع اى ضريبة جديدة المهم يلموا القرشين علشان تجبر
*****
الحلقه كان فيها ضيفين ، احدهما الرئيس الاسبق لمامورية الضرائب العقارية والاخر هو احد اعضاء مجلس الشعب المعارضين للقانون الجديد
*****
والصراحه ان رئيس المامورية الاسبق كان معترض شكلا وموضوعا على القانون بكل جوانبه ، لكن الاول شرح ايه هو القانون الحالى وده اللى لازم اديكم فكرة عنه علشان تعرفوا مدى الظلم الجائر اللى ابن غالى ناوى يعمله
*****
القانون الحالى بيقول ايه، تحتسب الضريبة العقارية على الوعاء الضريبى بعد خصم 20% من القيمة الايجارية كمصروفات ، بمعنى ان انا لو عندى عمارة فيها شقق باجرها بتطلعلى فى السنة مثلا 100 الف جنيه يبقى يتخصملى 20% وادفع ضرائب على الباقى اللى هو 80 الف جنيه ، لحد كده حلو
الكلام ده للناس اللى بتأجر شقق ، اما اصحاب الشقق التمليك او اللى شارى فى مشروع او جمعيه او كل الكلام ده فمعفى من الضريبة العقارية بنص قانون سنة 1981
*****
جه بقى سى غالى يقولك ايه ، الكلام ده مينفعش ازاى الناس دى متدفعش ، خصوصا بعد ما زادت الابراج والفيلات والقصور وشاليهات الساحل وكل الحاجات بتاعه الناس الاغنيا فلازم الناس دى تدفع ضريبة عقارية، ماشى لحد كده انا معاه ان الناس دى تدفع ضريبة ، مادام معاهم يبقى يدفعوا وماله واهو نبقى شوفنا منهم حاجه
*****
المشكلة بقى فى انه عايز يعمم القانون على مخاليق ربنا كلهم ، يعنى اللى بانى قصر زى اللى طلع عين اهله على ما عرف يجيب شقه، والمصيبة الاكبر ان الضريبة هتتحسب على قيمة العقار الشرائية الآنيه ، بمعنى ان يوسف بيه مالوش دعوة انك من 20 سنة كنت شارى الشقه دى ب50 الف جنيه ، هو هيحاسبك انها انهارده بنص مليون ، واحسب انت بقى 10% ضريبة يطلعوا كام
*****
وعلشان طبعا يقدر يحدد القيمة السعرية دى ، فهيكون فى لجان مخصوص تلف جمهورية مصر الموكوسة علشان تحصر المبانى والعقارات وتتمنها ، وبناء على قرار اللجنة دى حضرتك تعرف هتدفع كام ؟ ومادام لجنه يبقى اكيد هتتحكم فيها الاهواء ، والرشاوى والظلم الجائر والمحسوبية وكل البلاوى
*****
الغريب انهم لما طلبوا من الوزير يحدد شكل تطبيق القانون او النسب اللى هيشتغل على اساسها ، قام جابلهم ورقتين كده فيهم شوية نسب حاسب على اساسها الضريبة ، لا تمت لاى قاعدة ضريبية او رياضيه او تباديل وتوافيق ولا حتى سيجا
*****
اما راى عضو مجلس الشعب فكان ان القانون جائر على كافه القطاعات
اولا قطاع الحكومة: لان علشان تعمل اللجان دى وتجيب موظفين وتدفعلهم وتحصر المبانى وكل الليلة دى علشان منتهى امل وزارة المالية انها تلم 2 مليار جنيه، تبقى حسبة خسرانه وكان ممكن تحاول تلمها من خلال تحسين الاداء الزراعى او الصناعى من خلال الوزارات التانية ، بس ليه ده يحصل مادام سى يوسف موجود
*****
ثانيا بالنسبة للشعب: ازاى اطالب واحد قاعد فى بيت اشتراه بشق الانفس او ورثه انه يدفع ضريبة عن قيمة انهارده، يعنى افرض واحد وارث بيت فى حى راقى وممكن يكون مش لاقى ياكل او يدفع الضريبة يبقى ازاى، يعنى انا مثلا شقتنا دى يوم ما اشتريناها من حاجه وعشرين سنة كانت لا تتعدى 50 الف جنيه، دلوقتى بسعر السوق ممكن توصل 180 الف مثلا هل معنى انى قاعده فى عقار قيمته بالتمن ده انى اقدر ادفع كل سنة مبلغ ضريبة اد كده ، ولا هى مثلا حاجه بتجيبلى ايراد علشان يبقى من حقهم يطالبونى بضريبة ؟
*****
ثالثا القضاء : الموضوع ده هيعمل ضغط على العملية القضائية ، لان الناس مش هتقبل تدفع بالساهل ، وبالتالى هتبدأ تقدم طعون تتحول بعد كده لدعاوى واضرب بقى كام مليون بنى ادم مش هيدفع فى كام قضية وتخيل الوضع هيبقى ازاى
*****
الصراحه ان كان ولابد من الضريبة ، يروح يفرضها على اصحاب العقارات اللى برا كوردون المدن ، زى القصور والشاليهات والكلام ده ، لكن ميجيش على واحد مثلا كل اللى حيلته بيت مهكع فى منطقه شعبية ويقوله ادفع ، وخدوا بالكم ان ده هييجى برضه على دماغ المستاجر مش بس صاحب الشقه الملك ، لان بالوضع ده اصحاب العقارات هتطالب برفع الايجارات علشان يقدروا يدفعوا الضريبة ، وهما اصلا لسه معرفوش راسهم من رجليهم فى موضوع قانون العلاقه بين المالك والمستاجر
*****
ابوس ايدك يا بتاع الجباية ارحمنا ، البعير هلك ، روح اتشطر على الناس اللى معاها ، اللى اتحدى لو واحد منهم دفع تعريفه فى الحكاية دى ، لان بمنتهى البساطه ممكن تجيله اللجنة يديها قرشين تمسح قصره او فيلته من خريطة مصر كلها وكانه نسيا منسيا، ولا انت عايزنا نسيب البيوت ونقعد فى خيم الايواء ، المصيبة بقى انه يكون هيدفع بتوع الخيم هما كمان،السؤال اللى بيطرح نفسه يا ترى ابن الغالى هو وولاده واخواته والوزرا واللى معاهم والناس دى كلها اللى عندهم بدل البيت عشرة هيدفعوا فى الليلة دى ، ولا هنتنفض لوحدنا ؟
واهـــــــــــو ده عيبـــــــــــــــه

39 عرفوا عيبها:

غير معرف يقول...

و الله و لا حتى خيم الإيواء حتسكته

حيدفعنا ضرايب مضاعفة على القماش و الحبال و اى حاجة تانية بتدخل فى صناعة الخيم

و حتى لو موتنا كلنا.... ح يضاعف الضرايب عاى الورثة :))

ابتسمى يا عزيزتى....انت فى مصر

بلد الجباية الأولى فى العالم , منذ عهد الفراعنة

***********************

هو انا قولتلك قبل كده ان الداكور بتاع المدونة عاجبنى قوى

و ان الأغنية بتاعة الصبوحة من ابدع ما يكون

لو ما كونتش قولت...

يبقى ادينى قولت اهو :)))

تشكرات افنظم

نيفين عيد

Zika on 21 مايو 2008 في 1:20 م يقول...

كل الشواهد بتدل علي ان المرحله اللي جايه في مصر هتبقي
nescafe blaaaaaaaaaaaack
كل حاجه كل حاجه
مش هعدهملك هنا عشان انا مش بعرف اعد اكتر من مليون

Z_Diva on 21 مايو 2008 في 2:59 م يقول...

hmmmm, fe3lam y3ny???!!!, y3ny hma waf2o 3la haza elkanoun, walla lessa m7al mona2sha? :S

Desert cat on 21 مايو 2008 في 3:37 م يقول...

ده كله اساسا هيطلع على المستأجر فى الآخر يعنى الغالى ابن اللى مش غالى ينفض اصحاب العقارات واصحاب العقارات بدورهم كل واحد يحب يجدد عقد ايجاره هيدفع اضعاف مضاعفه والا ينطرد وينام فى الشارع من الصبح وبالتالى احنا برضه اللى نستاهل
لان كل واحد كاتم بؤه برغيف عيش من ابو مسامير وعمال يهرى وينكت فى نفسه تحياتى

اهو ده عيبه on 21 مايو 2008 في 4:45 م يقول...

نيفين عيد
---------
صباح شريفات
مهو مش ناقص غير كده ، ده انا حتى سمعت من فترة ان هيبقى فى ضرية على الوفيات مش عارفه طبقوها ولا لسه

اتفضلى يا ستى المدونة وصاحبه المدونة ميغلوش عليكى هما وصباح كمان

تحيات شريفات افنظم

اهو ده عيبه on 21 مايو 2008 في 4:47 م يقول...

zika
------
مفيش حد هيلاقى اصلا علشان يعرف لون البتاع ده

دى هتبقى لا مؤاخذه اسود من هباب الحلل

هما بقى بيعرفوا يعدوا اكتر من مليون عارف ليه ؟ علشان عندهم عداد يا بانى الخشب ده :)

اهو ده عيبه on 21 مايو 2008 في 4:49 م يقول...

z_diva
--------
هو حضرتك القانون لسه فى مرحله العرض على مجلسى الشعب والشورى المقورين مش الموقرين

وطبعا كالعاده هيقولوا منافقون علشان العملية تتسلق بسرعه

اهو ده عيبه on 21 مايو 2008 في 4:51 م يقول...

desert cat
--------------
والله يا قطتى ده شكله اللى هيحصل ، اذا كان فى بيوت لسه ايجار قديم والناس بتدفع اى كلام يبقى صاحب العقار هيجيب منين الضريبة

ربنا يهدها عليهم زى ما هدوا السلم لم لم

خواطر رئيس شاب on 21 مايو 2008 في 5:50 م يقول...

هايصرفوا على العلاوة من فين
وهايصرفوا على النهب من فين
وهايصرفوا على الاستيلاء والتمتع باموال الشعب من فين


لازم الشعب يدفع

el_assel on 21 مايو 2008 في 8:29 م يقول...

والله حرام عليهم بقي
والله دول مش حيلاقوا حتي ليهم مكان في جهنم


ايه الي بيعملوه ده ؟؟؟

بس كل ده بسبب الشعب
الشعب هو اللي ساكت

هم لو لقوا قدامهم شعب راجل كده مابيخافش
اكيد كانوا حيلموا نفسهم


بس احنا في مرحلة الأعتراض الصامت
عاملين زي واحد اضرب علي قفاه مرة وسكت
اكيد هو غاضب اه وكل حاجة
بس لو اللي ضربه ده ماضربهوش تاني يبقي مابيفهمش

يبقي كده احنا اضربنا بتاع خميس قفا علي سهوة

بس احنا زعلانين



ليهم حق يعملوا اكتر من كده



ما هي وكالة من غير بواب
يلحقوا بقي يمصوا دم الشعب قبل مايمشوا

والله مصر دي بلد عظيمة جدا
بقالها كام الف سنة بتتنهب
كل ده ولسة فيها خير



ربنا يكون في عونا




سلاماتي

هشام علاء on 21 مايو 2008 في 9:23 م يقول...

اولا احب احييك على الاغنية اللى حطاها فى الخلفية..اول مرة اسمعها بس جامدة جدا

فاكرة انتى من بعد مالقرارات بتاعة اسعار البزين و السولار و الصدمة اللى الناس خدتها ..عمروا كان بيقول فى كذا حلقة ورا بعض ان فى ..ولا مؤلخذة..حزمة قرارات جاية فى السكة
و اهى هلت البشاير عاى ايد ابن ال...غالى

انا اول ماقريت عن الموضوع بتاع الضرائب العقارية ده استبشرت خير و قلت اهو كده بقى ماحدش هيشترى شقة و يقفلها و كله هيبيع الزيادات و نعرف نلاقى حاجة نتهبب..اسف..نتجوز فيها لكن واضح زى مانت قولتى ان الليلة معمولة جباية للناس اللى ساكنة قبل من الناس اللى عندها عقارات زيادة و سلملى على العدالة الاجتماعية

فى المستقبل القريب توقعى ضرائب على حاجات تانية غير العقارات كمان و عادى الواحد مش هيبقى مندهش خلاص

انا مش بندهش من اللى بتعمله فينا الحكومة و لا الريس بس مندهش اكتر من حال المواطن المصرى اللى صابر و ساكت و مافيش حاجة بتحركه مهما اتعمل فيه

ما علينا

و على راى المثل

الحرامية الكبار ماخلوش للحرامية الصغيرين حاجة

تحياتى
هش

اهو ده عيبه on 21 مايو 2008 في 11:44 م يقول...

خواطر رئيس شاب
----------------
وهيصرفوا الفلوس دى فى كام سنة

ولا عاملين حسابهم تكفى ولاد ولاد ولاد ولاد ولادهم :)

ربنا يرحمنا برحمته

اهو ده عيبه on 21 مايو 2008 في 11:47 م يقول...

EL_ASSEL
----------
اولا اهلا بيك واتمنى تكرر الزيارة

ناس كتير بقت سياستها انا لا ارى لا اسمع لا اتكلم

وكفايه نعيش فى جبلايه كبيرة نستنى شوية السودانى اللى بيترمواعلينا

تحياتى ليك

اهو ده عيبه on 21 مايو 2008 في 11:51 م يقول...

HESHAM
--------
اولا ميرسى ان الاغنيه عجبتك وانا شايفه انها ماشية مع اللى بيحصل معانا

وادى اخره اللى جالنا من الحزمة،بس انت كان قلبك ابيض قوى فى حكاية قانون العقارات :)

دول شكلهم عايزين ياخدوا شقق الناس ويفتحوها على بعض

ربنا يستر

موناليزا on 22 مايو 2008 في 12:10 ص يقول...

سؤال وجيه بس انا متهيألى انهم هياخدوا مننا عشان يدفعوا
اللهم ارفع غضبك ومقتك عنا

Lobna Ahmed Nour on 22 مايو 2008 في 5:10 ص يقول...

دي سياسة شفط كل ما يمكن شفطه وما لا يمكن شفطه .. يعني حتى اصحاب القصور والشاليهات هما مثلا ما تعبوش فيها علشان نحكم عليهم بقصقصة ريش غالبا هتزيد سنويا وبما ان المؤشر الوحيد اللي بيرتفع في مصر هو الغلا والفقر يبقوا يشوفوا بقى مين اللي هيدفع .. نصيحة مني لاي حد عاقل عنده اوضة وصالة النهاردة ياخد مفتاحها ويسلمها للحكومة من باب وقوع القضى ولا انتظاره
واهو ده عيبه

Empress appy on 22 مايو 2008 في 10:10 ص يقول...

امممممممم والحل ايه بقى مش عارفه انا طيب يعنى ماما مش عاوزة تغلى الايجار على السكان اصلا علشان بتقولك حالتهم الماديه اقولها يا امى طيب واحنا ذنبنا ايه تقولى مش عارفه شوفى انتى بقى الحل وابعتيه لماما لو سمحتى

أبو خالد on 22 مايو 2008 في 10:58 ص يقول...

ده الغالى أبن الغالى من الوزراء المقربين عارفه ليه
قولى أنت ليه
لأنه خبير عالمى فى تنظيف جيوب معدومى الدخل
حسبنا الله و نعم الوكيل

غير معرف يقول...

مش عارفة فعلا فاضل ايه لسه متعملش؟
طول مالناس سلبية و بيجروا ورا أى عضمة ترميها الحكومة يبقى لهم الحق بعملوا أكتر من كده

يعنى يغلوا الأسعار يقولوا أدينا عايشبن
حيرموهم بره بيوتهم حيسكنوا فى العشوائيات؟؟؟!!!!!!!!

الحل ان محدش يدفع الضريبة دى-كده بالدراع يعنى-و يبقوا يفرجونا حيطردوا الشعب المصرى كله و لا ايه؟!!

بس الفكرة ان الناس حتيجى على نفسها تانى و يخافوا يتشردوا و يدفعوا برده كالعادة.
مفيش حرية من غير ثمن. عاوزين نعيش صح يبقى لازم نقوم كلنا قومة رجل و احد.

ليلى

شهرزاد on 23 مايو 2008 في 5:10 م يقول...

مليون مبروك على الكتاب وان شاء الله في تقدم دوما لعالم المدونين
ياريت نكمل لقاء أمس الرئع وتشاركينا على جروب المدونات على الفاسبوك
للفتيات المدونات فقط
http://www.facebook.com/group.php?gid=14647563577

اهو ده عيبه on 23 مايو 2008 في 5:20 م يقول...

monaliza
---------
الظاهر كده والله اعلم
تحياتى ليكى

اهو ده عيبه on 23 مايو 2008 في 5:23 م يقول...

unique
-------
تفتكر حتى لو اديتهم المفتاح فى ايدهم ده هيريحهم

ربنا يرحمنا برحمته
تحياتى ليك

اهو ده عيبه on 23 مايو 2008 في 5:25 م يقول...

appy
-----
مامتك قلبها حنين قوى

عموما استنى لغاية ما نشوف القانون هيرسى على ايه

تحياتى ليكى يا قله

اهو ده عيبه on 23 مايو 2008 في 5:26 م يقول...

ابو خالد
---------
والله يا بابا ربنا يرحمنا منه ومن امثاله

ويارب دايما كده منورنى

اهو ده عيبه on 23 مايو 2008 في 5:27 م يقول...

ليلى
-------
انتى جبتى المفيد
المشكلة الرئيسية الخوف اللى بيولد الجبن ويخلى الانسان خايف ياخد قرار

تحياتى ليكى

اهو ده عيبه on 23 مايو 2008 في 5:29 م يقول...

شهرزاد
-------
فكرة جميلة بجد وياريت كل المدونات يقدروا يتعارفوا

تحياتى ليكى

Unknown on 23 مايو 2008 في 10:11 م يقول...

طبعا احنا اتنفضنا ولسه هنتنفض كتير فى الفترة اللى جاية وبوست جميل جدا
سؤال: هوانتى كنتى موجودة امبارح اصلى كنت جاى من السفر ومستعجل وملحقتش اشوف ناس كتير انتى كنتى ستخبية فين؟

HERO on 23 مايو 2008 في 11:20 م يقول...

معلش انا مش هقدر اعلق على الموضوع ده لأن بابا مأمور ضرائب بس عامة مش عقارية وانا قلتله بلغ الوزير بتاعك اعتراضي الرسمي على القانون ده مش معقولة كل ما نصلح حاجة يبوظلنا حاجة تانية
وربنا يتولانا برحمته

تحياتي

hamssah on 24 مايو 2008 في 1:38 ص يقول...

انا سمعت عن مدونتك كتير
بس مكنتش متخيله طريقه العرض الواعيه المثقفه الواضحه وترتيب الافكار والتسلسل في العرض بجد اذهلتيني
اما بانلسبه للموضوع بتاع الضريبه الجديده انا من ساعه ما سمعت عنه وانا شايفه الدنيا ضلمه
ماساااااااة بكل المقاييس
وبعد كلامك مقدرش اقول غير لا تعليق
همسه

Tamer Nabil Moussa on 24 مايو 2008 في 2:49 ص يقول...

اولاا انا سعيد انك جيتى وعلقتى عندى وعرفت ان حضرتك كنتى موجودة فى حفلة التوقيع

بس لااسف مش حصل واتقابنا فيها وان شاء الله تتعوض فى المرات القادمة

-----

بالنسبة للقانون دة باين من عنوانة انة هيكون مجرد وسيلة لنهب المال ومن الغلابة

مش عارف لية واحد قاعد فى شقة يدفع عليها ضرايب ويتسوى مع اللى بياجر واللى بيبنى ابراج

دة جنون بجد وضحك على الدقون من ناس لابتراعى ربنا ولاعندها ضمير

تحياتى

محمد إبراهيم محروس on 24 مايو 2008 في 4:54 ص يقول...

لا بكرة هيفرضوا ضريبة على الاحلام كمان
طبعا هما مش هيدفعوا ولا شلن
بجد
حاجات تجيب الضغط
سعيد لمروري من هنا
خالص تحياتي

محمد فوزي on 24 مايو 2008 في 2:55 م يقول...

معرفش .. انا المعلومه اللي عندي بتقول إن العين محل الإقامه معفاه
وإن الفكره من المشروع ده إن الناس متشتريش عقارات كتير وتسقعها بغرض التجاره لأن ده بيخلق أزمة مساكن
فلو إن المشروع كده فعلا , فدي تبقى فكره ممتازه , دي معلوماتي والله أعلم
وياريت حد يصلحلي لو انا مش فاهم .

اهو ده عيبه on 24 مايو 2008 في 11:43 م يقول...

ayman badr
-----------
احنا اتنفضنا تمام

انا كنت موجودة بس مشفتكش او جايز شفنا بعض ومتعرفناش

معلش اكيد فى مرات جاية ان شاء الله

اهو ده عيبه on 24 مايو 2008 في 11:46 م يقول...

hero
-------
يا سيدى موظفين الضرائب مالهومش ذنب
ده قانون وهما بيطبقوه وده شغلهم

الذنب يقع على الوزير الماليه اللى بيتفنن ازاى يجيب فلوس باى شكل

اهو ده عيبه on 24 مايو 2008 في 11:51 م يقول...

hamssah
---------
يا ستى المدونة اتشرفت بزيارتك

واتمنى تكون عجبتك

ونامل بجد ان مشروع القنون ده ميتمش

تحياتى ليكى واتمنى تكررى الزيارة

اهو ده عيبه on 24 مايو 2008 في 11:54 م يقول...

tamer nabel
------------
الظاهر بقى مبدا الدولة المساواة فى الظلم عدل

ربنا يستر علينا من افكارهم الجهنمية

تحياتى ليك واتمنى اشوفك فى فرصه تانية ان شاء الله

اهو ده عيبه on 24 مايو 2008 في 11:57 م يقول...

محمد ابراهيم محروس
------------------
اهلا بيك ونورت المدونة

مش ناقص غير الاحلام كمان
ارحمنا برحمتك يارب

تحياتى ليك

اهو ده عيبه on 25 مايو 2008 في 12:01 ص يقول...

محمد فوزى
---------
اتمنى فعلا تكون دى حقيقه القانون

لكن انا مفهمتش كده من البرنامج او متطرقوش للنقطه دى

عموما بكرة هيبان كل شئ ان شاء الله

تحياتى ليك

CrY2DaY on 25 مايو 2008 في 4:21 ص يقول...

مهو الباشا لعبها صح فى يوم الناس فرحت وقالت فى علاوة وكانت مفاجأة بس علشان ميبقاش عيد ميلاد اسود وتحصل مظاهرات الناس كلها قعدت قدام التليفزيون تتفرج .. فروحوا فى علاوة ... تانى يوم احنا خسرنا كام مليار لمة زودنا الناس 30و 40 جنية كتير يبقى ناخدهم ازاى منهم يعنى نسد العجز دة ازاى طبعا من دمنا واللى زاد فى العلاوة زى اللى مازدش زينا احنا كطلبة ..

تقبلى تحياتى

 

Term of Use

أهو ده عيبه Copyright © 2009 Flower Garden is Designed by Ipietoon for Tadpole's Notez Flower Image by Dapino