مايو 23، 2008

وكان يوما


كان يوم جميل جدا بكل المقاييس ، مكنتش عارفه ان حفل توقيع العدد الاول من كتاب مدونات مصرية للجيب هيكون حلم وفرح كل الناس دى ، وبالشكل الجميل ده وماشاء الله بالعدد الكبير ده من المدونين وغير المدونين اللى شرفوا الحفل بوجودهم لدرجه ان المكتبة بقت شبه يوم الفرح فى فيلم ام العروسه، مفيش مكان لرجل والناس واصله لحد السلم
*****
بالنسبة لى اليوم بدأ بدرى جدا من حوالى الساعه الواحده ظهرا ، لما اتقابلت بشيماء الجيزى (صحفية مع ايقاف التنفيذ ) بلدياتى علشان نسافر مع بعض ، وسعدت انها كانت اول واحده اتقابل معاها وتقريبا قضينا مع بعض 12 ساعه بس كانوا لذاذ رغم التعب والمجهود
*****
وصلنا المكتبة بدرى قوى يمكن قبل الساعه 5 ، لقينا خالو احمد الصباغ ملك التغطية الاعلامية فى الانتظار ومعاه ابراهيم عادل (مدونة انا وانا ) اللى بصراحه اليوم ده قام بالواجب وزياده وكان بيتحرك وسط الفرح كانه ابو العروسه وسعيده جدا انى اتعرفت عليه
*****
كمان كان موجود ايهاب عمر (مدونة ايهاب عمر ) وهو شخصيه ظريفه جدا ومرحه
وبعد شوية وصل الاستاذ احمد القاضى (المراكبى ) وبصراحه شخصيه فى منتهى الذوق والهدوء والرصانه وجه مخصوص من جده علشان الحفله
وشوية وجه هشام علاء (كلام هشام ) ولقيته طيوب جدا وهادى قوى
ومحمد مفيد ( فى الصميم ) اللى سعيده انى اتشرفت بمعرفته
وبعد شويه جه احمد البوهى بس ماسعدنيش الحظ بالكلام معاه
وصلت رحاب (كوكب ابى ) لقيت نفسى بقولها فى وسط الناس ابى انا الحله واخدنا بعض بالاحضان والقبلات
وبعد كده بصراحه الموضوع وسع منى قوى مبقتش ملاحقه
بس هحاول على اد مااقدر افتكر كل الناس
الاستاذ احمد محمد على ( يوميات عيل مصرى) سعيده جدا بمقابلته والتعرف عليه
ابونا كلنا ابو خالد اللى جه مخصوص من بورسعيد علشان يكون معانا
وبجد الراجل ده ابونا كلنا بمعنى الكلمه
حبيبتى وروح قلبى من جوا فاتيما ( روح قلب ماما ) مكنتش مصدقه انى هشوفها وكان نفسى اديها حضونه كبيرة قبل ما امشى واللى هيقولها ماما بعد كده هزعله دى حلوة واصغر منكم كلكم
عم الشباب والرياضه احمد سوووو مش عارفه اوصفلكم سعادتى انى اخيرا شفته
وكان نفسى اعرف السندوتش اللى معاه فيه ايه
احمد رفعت (قضيه عم احمد ) شخص لطيف جدا ومهذب وسعيده بمقابلته
اشرف توفيق ( اخف دم ) للاسف شفته متاخر قوى بس لحقت اسلم عليه
مروة ( لماضه ) كتكوته جدا وشربات فوق ما تتخيلوا
فريده ( حكايات فريده ) كنت متخيلاها اكبر من كده بس ماشاء الله جميله جدا شكلا ومضمونا
المفقوعه مرارتها بجد حرام اللى فيفى بتعمله فيها لانها رقيقه جدا وعسوله قوى
رئيسة حزب الاحلام شخصيه جميله قوى وهاديه
رودى ( بنوته مصرية) كنت فرحانه قوى لما شفتها وكمان علشان فى بينا صديق مشترك محمد ( الولد الشقى ) اللى كان نفسى يكون موجود
محمود الدوح من الناس اللى شفتها فى الاواخر للاسف
احمد سكر من الناس اللى اتعرفت عليها برضه متاخر
لكن للاسف بعد كده اكتشفت وجود ناس كتيييييييييييررررر قوى ملحقتش لا اكلمهم ولا اسلم عليهم
شمعى اسعد ، وينكى ، شريف ( سيبو فى حالو ) ، محمد ابو زيد ( دكتور حر )
صاحب المضيفه ، الاستاذ محمد شلبى ( عصفور المدينة )
ايناس لطفى اللى كنت فاكرة انا وشيماء الجيزى انها مجتش لولا انها كلمتها بعد كده
وتامر نبيل اللى بقوله سلامتك الف سلامه
وغيرهم كتير جدا كنت اتمنى اتعرف عليهم
ده غير الناس اللى مقدرتش تحضر ومنهم نوران ( بنت خيخه ) كان نفسى اشوفها بجد وسالت عنها فاتيما
وسامحونى واعذرونى اذا كنت نسيت حد من اللى قابلتهم واتعرفت عليهم او من الناس اللى كانت حاضرة
العدد كان ما شاء الله كبير جدا وغير كده كنت مضطرة امشى علشان السفر
وملحقتش اتعرف على كل الناس ودى حاجه مزعلانى قوى بس اللى مفرحنى ان كل الناس دى جايه علشان بتحب بعضها بجد واللى بيربطهم صداقه كلمه وراى حتى لو عمرهم ما اتقابلوا
الحمد لله حفل ناجح بغض النظر عن اى حاجه ممكن تكون حصلت او حتى الزحمه والحر
سعيده انى لقيت ناس حبونى وحبيتهم وفرحوا لما شافونى
وناس قروا ولو حاجات بسيطة فى المدونة ، وناس اتيحت ليا الفرصه انى اعرفهم لاول مرة
للمرة التانية اسفه بجد اذا كنت نسيت اى اسم
اليوم بجد كان يوم فرح لينا كلنا
وان شاء الله نقدر نتقابل كلنا مرة تانية وثالثه وعاشرة
والمرة دى يمكن يكون ده البوست الوحيد اللى مش هقدر فى اخره اقول
اهـــــــو ده عيبـــــــــه

60 عرفوا عيبها:

Tamer Nabil Moussa on 24 مايو 2008 في 1:31 م يقول...

الله يسلمك اختى العزيزة

بجد كان نفسى اشوفك واتعرف عليكى

وناس كتير

بس اعمل اية فى رجلى اللى كفتنى وخلتنى مش قادر اقوم من الكرسى

بس يوم جميل بجد

احنا كلنا اسرة واحدة وبنحب بعض ودة بان فى الحفلة

ربنا يديم الحب والمودة بينا

تحياتى

Empress appy on 24 مايو 2008 في 1:56 م يقول...

يا غطا كازوزة انتى اليوم كان حلو قوى بيكم كلم بجد وكنت مبسوطه بيكى وخلعنا عنكى لقب الحله وبقيت كازوزة ههههههههههههه
نورتى القاهرة بنت خالتى ام عز

HERO on 24 مايو 2008 في 3:24 م يقول...

انا قريت عن اليوم ده في كذا مدونة ومن كلامكوا اليوم ده كان جمييل جدا وانا كان نفسي ابقى موجود بس ظروف السفر والكسل بقى هما السبب بس تتعوض ان شاء الله

تحياتي

بنوته مصرية on 24 مايو 2008 في 4:21 م يقول...

دووولي ازيك يا قمر

فعلا كان يوم يجنن والناس مشاء الله عليها ناس محترمة وبيجمعهم صداقة وحب اخوة ملقتوش حتي في الجامعه

بجد انا كنت في اليوم ده اصغر من بنتي نور كنت مبسوطة اوووي

يارب نتجمع كدا علطول ويتولد للكتاب اخوات له كدا كتير

وحمدالله علي السلامه يا قمر

رودي

إبـراهيم ... on 24 مايو 2008 في 6:56 م يقول...

اللى بصراحه اليوم ده قام بالواجب وزياده وكان بيتحرك وسط الفرح كانه ابو العروسه وسعيده جدا انى اتعرفت عليه
**************
حلوة أبو العروسة دي يا داليا ....
أنا أسعد حقيقي باليوم الرااائع ده، وإني اتعرفت عليكم كلللللكم حقيقي ، وألف ألف مبروووك لينـااا كلنــا ...

وعقبال الإصدار التاني إن شااء الله

قوس قزح on 24 مايو 2008 في 8:00 م يقول...

على فكرة احنا اتعرفنا على بعض
لما قلت لك اسمى على اسمك وان صورتك البوء المفتوح و انتى ضحكتى و قلتى اه انا البوء ده :))
هو من كتير الناس اللى الواحد شافها تاهت الوشوش و الاسامى مننا

بس انا فاكركى كويس :)

د/اجدع بنوته on 24 مايو 2008 في 8:22 م يقول...

يارررررررربى

طبعايابختكمممممممممم جميعااااااااااا

وان شاء الله المره الجايه ربنا يوفقنى واعرف اوصلكم ف المعاد

كان نفسى اشوفكم اوىىىىىى

يلا خيرها ف غيرها

غير معرف يقول...

يالله ربنا يخليكم للبعض ونكون معاكم المرة الجاية إن شاء الله

فاتيما on 24 مايو 2008 في 10:00 م يقول...

بيبو يا عسولة
يا بنتى إيه الكلام الحلو دا كله عنى
متحرمشى منك و سيبى كل حد عاوز يقولى يا ماما يقول ...
دا اجمل لقب فى الدنيا و ببقى مبسوطة لما حد ينادينى بيه
و مبسوطة اكتر إنى اول ما سمعته - بعد يوسف ما مشى - كان منكم إنتم و خلتوه مميز و بألف معنى جميل
أنا فرحت لما شفتك و الله
دنتى طلعتى عصفورة يا بنتى أنا قولت هشوف أهو ده عيبه يعنى واحدة قوية و مفترية كدا ماسكة عصاية و قاعدة تشاور على كل حد غلطان و تقوله عيب كدا و ميصحش أبداً و الأصول لازم تمشى و كدا
طلعتى يا عينى كتكوتة رقيقة خالص و حسك هادى و كلك رومانسية خالص
أنا فرحت بلقاكى و اتمنى يتكرر اليوم دا تانى فى أقرب وقت ...
آه قبل ما انسى
شندوتش سوووو كان فيه كبدة

اهو ده عيبه on 24 مايو 2008 في 11:14 م يقول...

tamer nabil
------------
سلامتك الف سلامه
واعذرنى اذا كنت معرفتكش ساعتها
الجايات كتير ان شاء الله
واحنا يعنى هنروح من بعض فين :)

تحياتى ليك

اهو ده عيبه on 24 مايو 2008 في 11:17 م يقول...

appy
-----
يا حبيبتى سمينى زى ما تحبى
المهم انتى زى القمر ودمك عسل وشقيه
واليوم كان حلو بوجودك

ربنا يفرحنى بيكى قريب انتى واسلام

اهو ده عيبه on 24 مايو 2008 في 11:18 م يقول...

hero
------
المرة الجاية ان شاءالله مفيش كسل
ونتقابل على خير ان شاء الله

اهو ده عيبه on 24 مايو 2008 في 11:20 م يقول...

بنوته مصرية
-----------
ازيك يا رودى وازى بنوتك العسل

اليوم بجد الحمد لله كان جميل وسعيده انى شفتك ، وبجد حاسه انى شفتك قبل كده مش عارفه ليه؟

تحياتى ليكى

اهو ده عيبه on 24 مايو 2008 في 11:23 م يقول...

ابراهيم معايا
---------------
ابراهيم باشا بذات نفسه عندنا يا مرحبا يا مرحبا

كان يوم جميل بوجودك وانا اسعد بمعرفتك
وان شاء الله يكون لينا لقاء تانى

تحياتى ليك

اهو ده عيبه on 24 مايو 2008 في 11:26 م يقول...

قوس قزح
--------
معلش يا داليااعذرى قله ذوقى وذاكرتى

انا فعلا كده افتكرت لكن معرفتش اربط الاسم بالمدونة

انا اسفه جدا اعذرينى ملحقناش نتكلم مع بعض واتمنى بجد اشوفك تانى واتعرف عليكى اكتر
ده انتى حتى اسمك حلو قوى :)

تحياتى ليكى

اهو ده عيبه on 24 مايو 2008 في 11:28 م يقول...

د/اجدع بنوته
------------
كنت اتمنى تكونى معانا

ان شاء الله نتقابل فى فرصه تانية

سلامى ليكى

اهو ده عيبه on 24 مايو 2008 في 11:29 م يقول...

ابو مروان
---------
يارب يفضل دايما جامعنا الحب

ونشوفك على خير ان شاء الله

اهو ده عيبه on 24 مايو 2008 في 11:38 م يقول...

فاتيما
-------
كلام ايه هو انا لسه قولت حاجه
يا ستى انا بهزر انتى عارفه
وعارفه ان انتى بتحبى كلمه يا ماما بس بناغشك
ربنا يخليلك يوسف يارب ويرجع بالسلامه

انتى كنتى واخده عنى فكرة تانية خالص انا عاملة مفترية بس غلبانه قوى والنبى ومش حمل نفخه هوا انما عصفورة وكتكوته ده كتير على قوى الكلام ده

وبعدين رقيقه وهاديه ورومانسية انتى شكلك قابلتى واحده تانية :)

ربنا يخليكى لينا يا فاتيما ودايما كده القلب الحنين

Unknown on 24 مايو 2008 في 11:53 م يقول...

انا اسف يا داليا ملحقتش اشفو حد لانى مشيت بدرى على المنصورة وكان نفسى اتعرف بيكى بس ملحوقة
كان يوم جميل جدا واللى جاى ان شاء الله اجمل منه
تحياتى

أبو خالد on 25 مايو 2008 في 10:04 ص يقول...

أبنتى الحبيبة /داليا
ده أنا اللى فى منتهى السعادة
أن داليا و شيماء من بلدى
كان نفسى نروح مع بعض و لكن ليس الأمر بيدى فقد قدر لى الله أن أحضر حفل
جهز له أحمد سوووو و آبى الجميلة بمناسبة
عيد ميلاد أم يوسف الغالية
و هناك تمكنت من التعرف على ناس كتير حلوين ..فعلا يا داليا شعرت أننا عائلة كبيرة ممتدة و أحسست أن القادم
سيكون أفضل طالما هناك أناس جمال الفكر
من أجيال مختلفة يتعارفوا و يتألفوا
كانت لحظات جميلة جدا ياداليا
فرحان بك و بشيماء من قلبى

Unknown on 25 مايو 2008 في 1:43 م يقول...

ألف مبروك يا معلم يا معلم المتعلمين يا متعلم

و الله و ماليكى عليا حلفان كان عندى رغبة انى اجى اشوفكوا على قد الشوق

بس معرفتش خاااالص

ع العموم صاحبتى نبضات كانت هناك و وورتنى نسخة و شفت اسمك منور
حسيت انى صديقة نجمة كده و لا حاجة

ابقى افتكرينى بس

تحياتى

مـحـمـد مـفـيـد on 25 مايو 2008 في 1:56 م يقول...

ربنا يكرمك
بجد شرفت بمعرفتك وتوقيعك ايضاً
واتمني دوام التواصل بأذن الله

واحد من البلد دى on 25 مايو 2008 في 6:19 م يقول...

ألف مبروك علينا كلنا ..ويارب دايما متجمعين فى المدونات وفى المناسبات..
وياريت ما تكونش مدونات مصرية للجيب دى حاجة كده زى الزوبعة..
إحنا عايزينها تتقدم إن شاء الله ..
وأكيد حضرتك كنتى منورة اللقاء و جميع المدونين كذلك..
دمتى بكل خير ودائما متألقة

هشام علاء on 25 مايو 2008 في 11:38 م يقول...

غعلا يا دايا كان يوم و لا اروع و الواحد ماكانش يتخيل انه هيبقى بالجمال ده

و ربنا يكرمك يا ستى على الكلام الطيب اللى قلتيه فى حق العبد لله و يارب اكون استحقه

سعيد بصداقتك اللى انشاء الله تدوم

تحياتى
هش

محمد عبدالحي بتاع بيطري on 26 مايو 2008 في 2:56 م يقول...

أيوة .. هوة أنا كنت في حفلة تانية و دلوقت مستعد أحلف

عموما تدوينتك من أحلى التدوينات اللي في الكتاب

فتحياتي ليكي ، و الكتاب هيبقى فـ شنطتي و لو شفتك في المعركة هتوقعي يعني هتوقعي

اهو ده عيبه on 26 مايو 2008 في 4:10 م يقول...

ayman badr
------------
خسارة بجد ماتقابلناش

بس ان شاء الله نتقابل فى فرصه تانية
تحياتى ليك

اهو ده عيبه on 26 مايو 2008 في 4:12 م يقول...

ابو خالد
---------
انا عرفت فعلا ان حضرتك روحت معاهم
المهم اننا اطمنا عليك
وبجد كنا فى منتهى السعاده انك جيت

ويارب دايما كده نتجمع على خير وسعاده

تحياتى ليك يا ابى العزيز

اهو ده عيبه on 26 مايو 2008 في 4:14 م يقول...

عاليا حليم
------------
يا ستى ربنا يخليكى

ده انا اللى يشرفنى صداقتك وان شاء الله المرة الجايه نيجى نباركلك

انتى بجد شخصيه حلوة وسعيده بمعرفتك

اهو ده عيبه on 26 مايو 2008 في 4:15 م يقول...

محمد مفيد
---------
الشرف لينا يا فندم

ودمت اخ عزيز وربنا يوفقك ان شاء الله

تحياتى ليك

رئـــــيسـة حزب الأحلام on 26 مايو 2008 في 4:16 م يقول...

بجد انا اللى مبسوطة بمعرفتك جدا
وبجد انتى شخصية جميلة وربنا يوفقك وياريت الحفلات دى تتكرر انشاء الله
تحياتى لكى ياقمر

اهو ده عيبه on 26 مايو 2008 في 4:16 م يقول...

واحد من البلد دى
-------------------
يارب فعلا الفكرة تستمر وتقوى

وكنت اتمنى بجد وجودك معانا
وعموما الف شكر ليك

اهو ده عيبه on 26 مايو 2008 في 4:17 م يقول...

hesham
-------
فعلا كان يوم جميل بيكم كلكم

وانت فعلا شخصيه محترمه وربنا يوفقك
وسعيده بمعرفتك وصداقتك

تحياتى ليك

اهو ده عيبه on 26 مايو 2008 في 4:20 م يقول...

محمد عبد الحى
---------------
هو انت كنت موجود ؟
معلش احنا كنا زى اللى فى فرح كبير وكمان الزحمة والحر صعبت لقاء ناس كتير

والله سعيده برايك فى التدوينيه وده ييجى ايه جنب الكلام اللى بتكتبه

وان شاء الله نتقابل فى معركه تانية بس تكون اكثر تنظيما

تحياتى ليك

اهو ده عيبه on 26 مايو 2008 في 4:21 م يقول...

رئيسة حزب الاحلام
----------------
انا الاسعد بيكى

وان شاء الله يبقى فى مرات تانية ونشوف بعض تانى

تحياتى ليكى

tarek alghnam on 26 مايو 2008 في 5:15 م يقول...

اهو دة عيبة
رائع وصفك للحفل وكأنى كنت معكم
مبروك ليكوا هذا التجمع الرائع
ويارب دائما من نجاح لأخر
تقبلى تحياتى
ومتعك الله بالحب والسعادة والهناء

jessy88 on 26 مايو 2008 في 5:44 م يقول...

فعلا كان يوم جميل احنا اتقابلنا بس مش عارفة انتى هتفتكرينى ولا لأ عموما الف مبروك على الكتاب بجد كتاب جااااامد اوى انا معرفتش اذاكر كنت قاعدة بقرأه كتاب يخلص فى يومين مع انى بطيئة جدا فى القرأة

Desert cat on 26 مايو 2008 في 8:25 م يقول...

الف مبروك يا دولى صدور العدد الاول
وربنا يجعل كل ايامك مناسبات سعيدة

Soooo on 27 مايو 2008 في 7:54 ص يقول...

ماهو لو انتي وشيماء كنتو جيتو معانا البورصه واحتفلتو بعيد ميلاد فاتيما معانا .. كنتي هتشوفي ان الشندوشت اللي كان معايا كان شندوشت كبده
واديتو للقهوجي وكتاب الله

وياستي انا اللي اتشرفت بمعرفتك بجد والله ومش بقولها مجامله

وربنا يوفقك ويكرمك ويسعدك ويرضيكي دنيا وآخره يارب



سلاموووووووز

شهرزاد on 27 مايو 2008 في 9:35 ص يقول...

فعلا يا داليا كان يوم جميل للأسف لم يسعدني الحظ في أن ارى الكثير من المدونين بسبب الزحمة الرهيبة يومها بس ان شاء الله الجايات كتير
وفعلا كان يوم جميل وناس أجمل
جميلة نهاية البوست
المرة دي من غير أهو ده عيبه :)

قضية عم أحمد Ahmed Case on 27 مايو 2008 في 9:48 ص يقول...

انا والله اللى اتشرفت بيكي جدا انتي حد رائع ومهذب جدا ...


بجد كان يوم حر اوي بس حلو اوي :))))


يارب نلتقى تاني في مناسبات أسعد

اهو ده عيبه on 27 مايو 2008 في 12:13 م يقول...

طارق الغنام
--------------
كنت اتمنى تكون موجود
بس ان شاء الله تكون فيه فرصة فى مرات جاية
تحياتى لك

اهو ده عيبه on 27 مايو 2008 في 12:18 م يقول...

jessy 88
--------
معلش سامحينى انتى عارفه كان زحمه قوى والعتب على الذاكرة

ان شاء الله نتقابل مرة تانية

اهو ده عيبه on 27 مايو 2008 في 12:20 م يقول...

desert cat
-------------
ميرسى يا قطتى
ربنا يخليكى ليا

اهو ده عيبه on 27 مايو 2008 في 12:25 م يقول...

sooooooo
---------
مهو مكنش ينفع نيجى ونروح امتى
وانت عارف اننا بنات عائلات محترمات محافظات ومديريات

وبعدين السندوتش فى الجرايد قالوا كبده وفى التليفزيون قالوا لحمه وبعدين فى التعتيم الاعلامى ده عموما طالما راح لصاحب نصيبه يبقى بالهنا والشفا

والله ياسووو احلى حاجه بجد الدعوتين اللى بتقولهم فى الاخر دول وربنا يجعلهم من حدك ومن نصيبك انت كمان يا سووو يابن بنت بنت بنتى

سلامين وحته

اهو ده عيبه on 27 مايو 2008 في 12:27 م يقول...

شهرزاد
-------
فعلا كان يوم جميل وياريت يتكرر بس بتنظيم احسن ومكان اكبر

شرفتى المدونة ونورتيها وياريت تكررى الزيارة

اهو ده عيبه on 27 مايو 2008 في 12:28 م يقول...

احمد رفعت
-----------
والله ده بس من ذوقك

وان شاء الله اليوم الحلو ده يتكرر تانى

تحياتى لك

Zika on 27 مايو 2008 في 2:58 م يقول...

مبروك عالكتاب
وعلي اليوم
وعقبال كده ما نشوفكوا منزلين كتب لوحدكوا
كل واحد كتاب
يعني 42 كتاب
اشتري انا لمين بقي ساعتها ؟
:D :D :D

mostafa rayan on 27 مايو 2008 في 8:59 م يقول...

داليا ياجميلة
انابردة هناك لكن للأسف ماشوفتكيش ولاقدرت اتعرف عليكي ... الزحمة كانت جامدة قوي
معلش تتعوض المرة الجاية احمد قال ان الأصدار التاني بعد شهرين يعني هانت
تحياتي ليكي ودمت بكل الخير

(احمد سكر ) on 27 مايو 2008 في 9:39 م يقول...

اتشرفت بحضرتك

مع اننا متكلمناش كتير مع بعض

بس ان شاء الله ملحوقه

تحياتى اختى الفاضله

سبهللة on 28 مايو 2008 في 1:14 ص يقول...

تحياتى ليكى والف مبروك
وعقبا ما نبارك لك على كتابك ان شاء الله
بالتوفيق ان شاء الله

اهو ده عيبه on 28 مايو 2008 في 1:33 ص يقول...

zika
-------
الله يبارك فيك
يا سيدى ساعتها متحيرش نفسك واشتريهم كلهم

بس ابقى اعمل جمعيه واقبضها الاول

اهو ده عيبه on 28 مايو 2008 في 1:35 ص يقول...

mostafa rayan
--------------
ان شاء الله تتعوض
ونتقابل تانى على خير

تحياتى ليك

اهو ده عيبه on 28 مايو 2008 في 1:36 ص يقول...

سكر
----
اتشرفت بمعرفتك
وان شاءالله المرة الجاية نتكلم اكتر

تحياتى ليك

اهو ده عيبه on 28 مايو 2008 في 1:37 ص يقول...

سبهلله ع الاخر
---------------
الله يبارك فيك
وعقبال ما نشوف كتب لكل المدونين

تحياتى ليك

ابو لمعه 2008 on 28 مايو 2008 في 6:06 ص يقول...

ماهو حظى كده على طول
اجى بعد ما الحفله تخلص
يلا
خيرها فى حفله غيرها
ارجوا ان تتقبلينى ضيفا لمدونتك فى اول زياره لى

.:.-=- ELGaZaLy-=-.:. on 28 مايو 2008 في 12:29 م يقول...

الغزالى؟

الى كلنا نباركلة بالخطوبة ونقولة عقبال الفرح لا يا شيخة وانا معنديش علم ...كدة يا داليا طيب يصح مش كنتى عزمتينى على خطويتى الى اتعلمت من غير ما اعرف اصلا...

انا اصلا مجتش الحفلة يا داليا صباح الفل...

يا ايام زى الفل...

انا مت من الضحك على فكرة
ههههههههههههههههههههههههههههههههههههههههههههههههههههههههه

الغزالى الى بتباركيلة على الخطوبة وعقبال الفرح كمان

يا لهوى

ربنا يبسم ثغرك يا داليا زى ما ضحكتينى على الصبح

حمامة on 28 مايو 2008 في 10:48 م يقول...

على فكرة انا جيت
بس للأسف مكنتش اعرف حد خااااالص
واتكسفت اتعرف على حد
الموضوع اللى اتنشرلك لذيذ اوى
عقبال المرات الجاية ونيجى ونتعرف :)

اهو ده عيبه on 29 مايو 2008 في 11:47 ص يقول...

ابو لمعه
---------
يا اهلا ومرحبا

واتمنى تبقى زبون مستديم

مش محتاج خواجه بيجو معاك ؟

تحياتى لك

اهو ده عيبه on 29 مايو 2008 في 11:49 ص يقول...

الغزالى
-------
يا كسوفى

والله غلطه غير مقصوده وكله من الزهايمر

حق على وامسحها فيا المرة دى
واعتبرها مبوك مقدما او باثر رجعى اهو زى ما تحسبها بقى

والسماح ياهل السماح

اهو ده عيبه on 29 مايو 2008 في 11:50 ص يقول...

حمامه
-------
ان شاء الله تكون فيه فرص تانية

ومتحرمناش من زيارتك

تحياتى

 

Term of Use

أهو ده عيبه Copyright © 2009 Flower Garden is Designed by Ipietoon for Tadpole's Notez Flower Image by Dapino