فبراير 28، 2008

مش عايزة النفق


من فترة كده كانوا جايبين المحافظ بتاعنا فى التليفزيون ولقيته بيقول ان فى خطة المحافظة عمل مشروع نفق كبير يربط بورسعيد ببورفؤاد وسيناء زى نفق الشهيد/ احمد حمدى اللى موجود فى السويس، والنفق حيتكلف مش عارفة كام مليار ، والخطة المبدئية انه يكون رايح بس، على اساس اللى يروح ميرجعش، اما المرحلة اللى بعدها فحتبقى رايح جاى، اهو يكونوا اتعلموا الادب فنرجعهم
**
بينى وبينكم انا قولت يا حاللولى ، حيبقى عندنا نفق ، كبير بقى صغير المهم نفق وخلاص، واهى حاجة تحرك البلد شوية ،و لما حد يسالنى انتى منين اقوله انا من بلد الشبار المزقلط (البلطى يعنى) والنفق، المهم انا سمعت الكلام ده ومحطتش فى بالى وقلت عموما يا هنا من يعيش

المهم من يومين كنت نازلة مشوار الصبح بدرى -مالكوش دعوه فين-وبعد ما خلصت مشوارى لقيت الساعة 9.5 ولسه بدرى قلت حروح البيت اعمل ايه ، خلينى اتمشى شوية قبل عين الشمس ما تحمى على راى شادية، المهم فضلت ماشية لغاية ما رجلي ودتنى لحد المعدية، قلت ياه من زمان يابت مركبتيش المعدية ولا روحتى بورفؤاد، مع ان 4 سنين الكلية كنت هارياها ركوب كل يوم رايح جاى، تخيل لما تبقى انت فى قارة وكليتك فى قارة تانية ، وكل يوم وانت رايح وانت راجع طريقك عبارة عن فسحة فى المياه

**

المهم لقيت معدية تقريبا فاضية مفيهاش غير عربيتين وكام بنى ادم، نقيت كرسى من ناحية المياه وقعدت عليه، وبصيت ع المياه مش عارفه ليه ساعتها حسيت كانى بشوفها لاول مرة ،كانى مركبتش المعدية دى بعدد شعر راسى، وبقيت عاملة زى العيل الصغير اللى اول مرة يشوف البحر

**

يمكن علشان بقالى كتير مركبتهاش، لما الواحد بيتعود على شكل الحاجة بينسى جمالها واحساسه بيها،لكن لما بيبعد عنها ويرجعلها بعد مده بيحس تانى بحلاوة اول مرة شاف الحاجة دى او جربها

**

لقيت المايه صافية وجميلة ، والشمس يادوب لسه بتبتدى تدفى الجو ، والمعدية بتتمايل بينا زى سرير البيبى الصغير، لكن اجمل منظر بجد كان طيور النورس وهى عايمة على المياه واول ما تيجى معدية تروح طايرة بسرعه ناحية الرفاس بتاعها علشان تدور على سمك، مش ممكن جمالها وهى طايرة سبحان الله ، ازاى عمرى ما اخدت بالى من الجمال ده

**

وقعدت افتكر ذكريات كتير ليا انا واصحابى مع المعدية لما كنا نركبها فى عز الحر وعز البرد ، لما كنا نجرى علشان نلحق نركبها على اخر لحظة ، او نحاول ننط بسرعه من الباب اللى على الجنب قبل ما يقفلوه، والمعدية ام دورين اللى كنا نحب نركبها قوى مش عارفه ليه،والبت بتاعه المناديل اللى كانت كل يوم تاخد مننا فلوس لحد ما عملت من ورانا ثروة

**

وافتكرت مرة كان عندنا امتحان واليوم ده كان شبورة فظيعه، ومفيش ولا معدية عارفه تمشى فى الجو ده، وفضلنا واقفين مدة كبيرة ، وطبعا الامتحان اتأجل ساعتين، طبيعى مهو مفيش طلبة ولا دكاترة عارفه تنزل بورفؤاد

**

فجاه ووسط ما انا سرحانة فى الجو الشاعرى ده افتكرت حكاية النفق، وهوب وقفت كل الموسيقى الحالمة اللى كانت شغاله فى راسى، وقلت معقول يعملوا المشروع ونتحرم من الجمال ده، ونبطل نركب المعديه ونشوف مايه القناه ، وجمال النورس وهو طاير،والذكريات الحلوة اللى فيها، وخصوصا بالليل لما نركبها بس رايح جاى لمجرد الفسحة

**

ساعتها قلت لنفسى الله الغنى، ماليش دعوه يا محافظة مش عايزة النفق، ما احنا عايشين من غيره زى الفل ، كنا اشتكينا يعنى، وليكو عليا لو حد سالنى انتى منين حقوله انا من بلد الشبار المزقلط وبس، المهم ولاد الحلال فهمومنى انه حيكون بره البلد ، يعنى مالوش دعوه بالمعدية خالص، الحمد لله ، ياه على ظنى الوحش ، دايما ظالمة المحافظة كده
اهـــــــــــو ده عيبــــــــــــــــــــى

فبراير 27، 2008

امسك حرامى


الخبر ده اتنشر انهارده فى جريدة الاخبار27/2/2008، وكمان فى الصفحة الاولى ، وبالالوان الطبيعية ،يعنى لكم ان تتخيلوا متكلف اد ايه
**
المهم الاعلان عن مكافاه قدرها (50.000 ) جنيه بحالهم لمن يدلى بمعلومات تؤدى للقبض على الهارب المطلوب، اخدت بالك من معلومات دى ، يعنى مش لازم تقفشه من قفاه زى حرامى الحلل
**
وتحت الجملة دى اللى مكتوبة بالبونت العريض زى ما بيقولوا صورة للهارب المطلوب، وشه فيها زى البدر ، ولابس اشيك بدلة عنده، ويمكن مسشور شعره كمان، لدرجة تحسسك انه راح اتصور مخصوص علشان الاعلان و اداهم الصورة بنفسه
**
وتحت الصورة كاتبين تانى نفس الجملة اللى فوق ، وكلمة خمسون الف جنيه وتحتيها خط كمان، بشكل ممكن يغرى صاحب الصورة انه يروح يسلم نفسه وياخد المبلغ،مع ان الحكاية مش محتاجة كل الاغراءات دى الناس فى عرض 500 جنيه
**
وتحت الكلام ده كوكتيل من ارقام الاحكام النهائية ، والاحكام الاستئنافية المؤيدة بلغ مجموعه 8 قضايا، الغريب انهم محددوش نوع القضايا دى ايه، كل اللى مكتوب انها جنح، بس جنح ايه دى يا خويا اللى يتعملها مكافاه بالمبلغ ده، مقدرتش اعرف
**
لا بس كتر الف خيرهم ، انهم ادونا اول الخيط وكتبوا عنوان المتهم ، اللى المفروض بتوع تنفيذ الاحكام مش لاقيينه فيه، على اساس اول ما نروح ويطمن اننا اللى بنخبط حيفتح على طول، انتوا بس روحوا هناك واى عيل يدلكوا
**
وفى الاخر مكتوب ملاحظة ظريفة ( علما بان المتهم مطلوب القبض عليه من قبل الانتربول )، يا نهار مش باين يعنى الراجل انترناشيونال كمان، لا انتربول لاقيه، ولا تنفيذ احكام عارف يقفشه ، م الاخر كده الراجل لا حكومه تهم ولا حبس يلم، وجايين علينا احنا وتقولوا دوروا، صحيح يوضع سره فى اضعف خلقه
**
وفى الاخر توقيع المحامى نيابة عن المواطن السعودى اللى مقالش اسمه مش عارفه ليه، مع ان هو المسروق، وهو اللى صارف ع الاعلان ، وهو اللى حيدفع المكافاه طب يعنى اللى سرق مش مكسوف، يقوم اللى يتسرق يتكسف
**
المشكلة ان الناس دى عاملة الاعلان وعندها امل مثلا ان الاخ ممكن يكون لسه موجود فى مصر، ولما هو لسه هنا بلغوا الانتربول ليه ،ولا الفكرة عاملة زى الغريق اللى بيتعلق بقشة وخلاص
**
اللى لفت نظرى كمان ان ارقام القضايا مفيهاش اى تسلسل ولا حتى تقارب ،كل الرابط اللى بينها انها لسنه 2007 ،او بمعنى اصح اللى اقصده ليه الراجل استنى لما بقوا 8 جنح وبعدين رفع القضايا، طب ولو هو مش رافعهم كلهم مع بعض ازاى اخد احكام بيهم فى نفس السنة، الحكاية دى محتاجة محامى يفهمهالنا
**
وبعدين لما الراجل يبقى عنده استعداد يدفع 50.000 جنيه للمعلومات يبقى الاخ ده نصب عليه فى كام، اللهم لا حسد بس اكيد حتبقى نارهم صعبه ، ربنا يعوض عليه بقى
**
على اد ما الموضوع يبان انه مضحك على اد ما انا بجد حزينة ان ذكاء المصرى يتحول لنصب على مخاليق ربنا ، وخصوصا لو كانوا مش مصريين لان الحاجات الكويسة للمصريين بتتنسى، والحاجات الوحشة بس اللى بتفضل على السطح،كانت ناقصاك يا سى مجدى
اهــــــــــــــو ده عيــــــــــــبه

فبراير 24، 2008

اوعى ترش دواخل


ممكن اسالكم سؤال؟؟ يا ترى كام واحد فيكم حب ولا طالش، او دخل فى علاقة او ارتباط وفشل او اتجرح، او اتخدع فى صديق او حد قريب منه؟ اكيد نسبة كبيرة ده اذا مكانتش 99.999% زى اى استفتاء بيتعمل

السؤال التانى بقى يا ترى ازاى الواحد يقدر يداوى جرحه او يلملمه على راى شيرين ويرجع تانى نفس الشخص اللى كان قبل الجرح ده؟؟
**
الحل عندى يا معلم ، حتقولى ازاى حقولك اعتبر نفسك عربية عاملة حادثه، استنى بس ونزل ايدك جنبك واسمع كلامى للاخر، الانسان لما بيتجرح جرح كبير بيبقى عامل زى العربية اللى عاملة حادثة بالظبط ، مدمر خارجيا وداخليا، كل حاجة فيه متكسرة، البارومة واكله قلبه ، واى حد بيشوفه بيقول ده مش ممكن يقدر يقف على رجليه تانى

**
انا حقولك بقى على كام خطوة تعملهم ويمكن ربنا يجعل فيهم الشفا:-

1-اول خطوة لازم تشوف سمكرى كويس ، وفى حالتك دى لازم تكون انت السمكرى، اوعى تصدق ان حد غيرك ممكن يداوى جرحك،يعنى لا علاقة عابرة ولا حب جديد، خليك فاكر انك لسه عامل حادثة مش ناقصين مصيبة جديدة
**
2-خلاص اتفقنا انك السمكرى، مستنى ايه بقى ، سمى بالله وابتدى رد مكان الخبطات بالراحة ، يعنى خليك صنايعى شاطر وحاول تعرف ايه الاسباب اللى وصلتك لكده، واذا كان الغلط منك ولا من الطرف التانى، وتحاول تقييم حجم الخسائر ، يعنى الخبطة كانت شديدة قوى على نفسيتك ولا يادوب طالت الرفرف، وفى المرحلة دى بالذات خد وقتك علشان الشغل يطلع نظيف
**
3-الحمد لله رديت الكام خبطة، ييجى بقى دور الصدا والبارومة ، علشان نقدر نبتدى تانى لازم نشيل اى صدا من على قلوبنا، وننسى اللى فات ومنسمحش للبارومة انها تاكل حياتنا وايامنا اللى جاية، والا نبقى معملناش حاجة ومع اول تجربة جديدة حنحس اننا مش قادرين نكون طبيعيين ، او نحس باى مشاعر حلوة، وحنفضل خايفين ان الحادثة تتكرر تانى
**
4-قضينا على الصدا، انجز بقى وابدا فى المعجون والصنفرة، يعنى حاول تعالج عيوبك اللى ممكن تكون ساهمت ولو بشكل بسيط فى الحادثة دى ، اظن محدش فينا كامل الاوصاف، اقعد مع نفسك كده حتلاقى فيها غلطة ولا اتنين، تم جميلك وحاول تعالجهم ، علشان المرة الجاية يا سيدى ميطلعش العيب مننا، ولا انت خلاص حرمت؟؟
**
5-بالمرة بقى طالما مصاريف بمصاريف غير البرباريز والفوانيس، حتقولى يعنى ايه ، اقولك يعنى حاول تغير نظرتك للتجربة اللى فاتت ، واوعى تفكر انك خسرت بالعكس ، على الاقل كسبت نفسك وكسبت وقت كان ممكن يكون اطول من كده فى علاقة فاشلة، بس نقى حاجة نظيفة بلاش استرخاص
**
6-جينا بقى للمرحلة الاخيرة، عايز ترش براحتك،عايز تخش فرن وميتاليك وحركات من دى برضه براحتك، المهم زى ما حاولت تصلح من جواك لازم ده كمان ينعكس على شكلك الخارجى، اغلب الناس بعد الفشل فى علاقة بينسوا نفسهم وبيهملوا شكلهم،حاول تدلع نفسك، جدد لبسك وشكلك، ان شالله حتى تصبغ شعرك زى ابراهيم سعيد ، العب رياضة ، دور على نشاطات جديدة ، اصحاب جداد ، المهم تحس انك انسان جديد شكلا ومضمونا
**
كده بقى اقدر اقولك مبروك ، تقدر تقول انك رجعت تقريبا لحالتك الاولى، حتقولى ازاى تقريبا اقولك وهو فى عربية بعد حادثة بترجع ع الزيرو، احمد ربنا انها جت على اد كده
**
ناقص اهم نقطة ، ولازم تحطها حلقة فى ودانك ، اوعى ترش دواخل علشان بتتكشف بسهولة، يعنى اوعى تغير طبيعتك مهما كانت الاسباب علشان ترضى حد، اللى عايز يعرفك يعرفك زى ما انت بحلوك ومرك ، ويتقبلك بميزاتك وعيوبك ، مش عاجبه يروح يشوف عربية بعيد عننا
**
بس امانة عليك لو النصايح دى جابت معاك نتيجة لتقولى ، علشان ابقى اجربها على نفسى، استنى بس قلتلك مفيناش من مد الايد

ااااااااااااااىىىىىىىىىى صحيح خيرا تعمل شرا تلقى

اهــــــــــــو ده عيبـــــــــــــــــه

ويجعله عامر


فى يوم كنت قاعدة كده مش لاقية حاجة اعملها-كالعادة يعنى-قلت لما افتح التليفزيون اشوف فيه ايه، بقلب كده فى القنوات لقيت البرنامج بتاع الست يجعله عامر الى مقضيه نص عمرها فى المطبخ دى، قلت وماله نتفرج اهو درس عملى ينفع الواحد فى مستقبله بدل ما انا مقضياها فرجة على صور الاكل الملونة فى كتاب ابله عديله-بقت عديله دلوقتى مش نظيرة-
***
المهم جبت الورقة والقلم علشان اكتب المقادير، لقيتها بتقول اكلتنا انهارده عبارة عن سلطة وشوربة غير الاكلة الرئيسية،قلت حلو قوى يعنى ضمنا اكله على بعضها
***
المهم الست قالت حتبدا بالسلطة ، قلت وماله، بصراحة وعلشان الكدب خيبة انا مقدرتش اركز فى اسم السلطة، لانه كان اسم كده يحسسك انه بتاع واحد جنرال من بتوع الجيش الروسى ، يعنى الاسم كله شين على سين على اى حاجة فيها فراشنكوف فى الاخر،قلت مش مهم الاسم احنا يعنى حناكله، ما احنا بناكل سلطة بابا غنوج وعمرنا ما عرفنا مين غنوج ده ،عديها يا بت وركزى فى المقادير، الى كانت كالاتى:-
-مقدار من البيبى كورن، انا عن نفسى معرفش غير البيبى فيس او البيبى لوشن، لكن بعد بحث اكتشفت انها ذرة، اه وربنا بس صغيرة مش عويجة
-مقدار من البروكلى، دى انا عارفاها تقريبا مدينة فى امريكا
-مقدار من الاسبارجوس، جايز اكون سمعت الاسم غلط ، بس هى شكلها كده شتيمة بالاجريجى
-معلقة روز مارى، الله يرحمك ياروزاليوسف، ايه الحاجات الغريبة دى
-معلقة فلفل ابيض، اهى دى كانت اول مرة اعرف ان فى فلفل ابيض
-مقدار من النودلز،دى جمع الجمع بتاع اندال
-مقدار من التونة، اخيرا حاجة اعرفها ولو ان التونة بتاعتها مختلفة خالص بس مش مشكلة
-رشة ملح ، فى عينك ياللى ما تصلى ع النبى، اخيرا اتكلمت عربى

اما الدريسنج بتاع السلطة فحيكون زيت سمسم، وصلصة الطرطور ، وشوية خل بلسمك (لا تعليق )

المهم انا مدققتش قوى السلطة بتتعمل ازاى ، مش علشان المقادير لا سمح الله ابدا ، بس علشان انا ماليش فى السلطة والحاجات الخفيفة دى
***
قلت خيرها فى غيرها يمكن ربنا يعوض علينا فى الشوربة، لقيتها بتقول حنعمل بقى شوربة (الميزو ) ايوة الاسم صح ، انا عن نفسى معرفش ميزو غير سمير غانم
عموما سيبكوا من الشوربة لانى اكتشفت انه زى ما شوربة العدس بتتعمل بالعدس ، وشوربة الفراخ بتتعمل بالفراخ ، فشوربة الميزو برضه بتتعمل بالميزو ، وطبعا مقدرش اعملها لانى اكتشفت انه محرم دوليا
***
قلت يا واد طنش خالص واستهدى بالله وخليكى مع الست للاخر،ان بعض الظن اثم، يمكن الطبق الرئيسى يطلع من النوع المالوف،لكن للاسف ظنى طلع فى محله والطبق طلع كده اكله صينى يابانى مش عارفة اهى حاجة عينها ضيقة والسلام، وكانت المقادير كالاتى:-
-1ك سمك اى نوع المهم يكون تمنه اكتر من 40 جنيه للكيلو
-1 ك جمبرى جامبو او كونكورد او اى حاجة تشيل اكتر من 200 فرد
-3 ملاعق زيت صويا صو حبيبى حبسوه
-مقدار من الجنجر الى هو ابن عمة مازنجر بس من ام تانية ويكون صاحى بيلعب مش مطحون
-1/2 كيلو طحالب خضرا00000 بببببببببسسسسسسس لحد كده وكفاية، هى وصلت للطحالب، ودينى لو مكنتش عارفة ان التليفزيون لو اتكسر مش حنعرف نجيب غيره كنت شيلته وهبدته ع الارض، لحد كده وكفاية انا واحدة صاحب عيا، والست دى زودتها وانا ساكتة من الصبح
***
لا والغريب انى بعد كده اخدت بالى انى كل ده بتفرج على القناة الثانية بتاعتنا ، مش بتاعة اوربيت ولا شو تايم، يعنى لا مؤاخذه قناة محدش بيتفرج عليها غير الناس الى حوجهم الزمن ليها ومش قادرين يشتروا دش،وممكن بعد البرنامج ده تلاقيهم جايبين برنامج الجريمة فى اسبوع عن اللى قتل صاحبه علشان سوجارة وكوباية شاى، او اللى اكلت دراع جوزها علشان جاب فول ومجابش الطعمية
***
الناس اللى بتعمل البرنامج ده يااما مش من البلد دى ، يا اما منها وبتستعبط،ارحموا الناس اللى عندها مرارة علشان ربنا يرحمكم، وانا عن نفسى حرمت ادور على اكل جديد،انا اقوم ادورلى على شوية رز وعدس ومكرونة واعملى طبق كشرى، ماله الكشرى كان كفر يعنى، هى مشكلة واحدة بس اللى محيرانى ، يا ترى اعمل التقلية بزيت الصويا ولا بزيت السمسم
اهــــــــــــــو ده عيبـــــــــــــــه

فبراير 23، 2008

الآنسة عند الدكتور


لالا اطمنوا، الحمد لله مفيش حد تعبان ولا حاجة ربنا ما يجيب دكاترة، انا احكيلكم ايه الحكاية بالظبط
**
انا واختى زى ما تقولوا كده عندنا وقت فراغ كبير-زى اى اتنين كده لا مؤاخذه لا شغلة ولا مشغله-ومن ضمن هواياتنا ده اذا كنا نقدر نسميها هواية، اننا ننزل نتمشى الصبح فى البلد ونتفرج ع المحلات ونشوف ايه الجديد،حتقولى الصبح فى عز الشمس اقولك اه ، علشان نشوف الحاجة فى نور ربنا
**
المهم فى مرة كنا ماشيين لقينا مركز تجميل عامل اعلان عن دورات تدريبية فى الماكياج والتجميل، اختى قالتلى ايه رايك اجرب حكاية الماكياج دى، قلتلها وماله ياختى واهى تبقى حاجة للزمن تنفعنا لو فى مناسبة كويسة لا سمح الله اهو نعمل حاجة فى خلقتنا بدل ما نبقى شبه حرس الحدود كده،يمكن ياختى الفسيخ يبقى شربات
**
قالتلى خلاص حطلع اسال، قلتلها حستناكى برة بدل ما ندخل احنا الاتنين والحكاية مش مستاهلة، دخلت وسابتنى برة وفاتت خمس دقائق، عشرة ، عشرين، والبنت لسه جوا مطلعتش
بينى وبينكم الفار لعب فى عبى، وقلت يكونش البت دخلت اشتركت فى البتاعة دى وسابتنى ملطوعه بره، قلت مبدهاش بقى ادخل اشوف ايه الحكاية،ولمعلوماتكم المركز عبارة عن كام شقة داخلين فى بعض كده فى دور مسروق
**
دخلت لقيت انسة كده واقفة ، قلتلها لو سمحتى اختى دخلت من شوية تسال على حاجة هنا ، قالتلى اه اتفضلى استريحى،الانسة عند الدكتور،انا قلت دكتور ايه ده، احنا دخلنا حته غلط ولا ايه، المهم شوية ولقيت اختى خارجة ووشها جايب 100 لون
**
-ايه بابنتى مالك، كل ده كنتى فين وبتعملى ايه، وايه حكاية الدكتور ده هما بيكشفوا على الى جاى يتدرب يشوفوا جربان ولا لاء
-لالا جرب ايه، انا دخلت لقيت واحدة واقفة لسه بقولها لو سمحتى عايزة اسال عن الدورة التدريبية الى انتوا عاملينها، لقيتها بتقولى معنديش فكرة، حضرتك ممكن تتفضلى تقابلى الدكتور وتساليه
المهم دخلتنى المكتب، لقيت راجل كبارة كده بدقن قاعد ورا مكتب، ووراه ارفف مليانة اعشاب من كل صنف ولون تقوليش خضر العطار فى زمانه، وقدامه يافطة مكتوب عليها دكتور/فلان الفلانى-اخصائى اعشاب-
**
قلتله حضرتك انا كنت عايزة اسال عن الدورات التدريبية الى انتوا عاملينها فى التجميل؟وياريتنى ما سالت، لو كان حد حلفلى ع المايه تجمد انى حتكلم مع راجل اى راجل فى الحاجات الى قالها دى، كنت قلت انه مجنون
-ازاى يابت انطقى، قالك ايه
-لقيته راح باصص للكمبيوتر الى قدامه، وقالى بصى يا انسه
اول كورس حتاخديه معانا حيبقى عن الفتلة والاستشوار-قالها كده-والمكواة وده لمدة اسبوعين يوم اه ويوم لا
تانى كورس حيبقى قص وصبغة وده لمدة اسبوع كل يوم
تالت كورس باديكيير ومانيكييرر وده برضه لمدة اسبوع
الرابع بقى ماكياج ولف طرح
ده غير لو حبيتى تاخدى كورس تدليك وتكبيس ومساج وحمام مغربى-انا معرفش غير الموز المغربى-
-طب وحضرتك بالنسبة لاسعار الكورسات دى، راح زاغرلى كانى مأمور ضراب طب عليه فجاة، وراح قايلى
-بصى يا انسة، اول كورس ان شاء الله 200 جنيه، تانى كورس 300 جنيه،تالت كورس000000000000 بصراحة انا بعد كده مسمعتش حاجة ، او محاولتش اسمع حاجة وقلتله طب ممكن حضرتك تدينى ورقة بالاسعار، ساعتها الراجل اتاكد فعلا انى م الضرائب
-اسف يا انسة ، مش حعرف اديكى ورقة بالاسعار اصل الكمبيوتر هنج والورق خلص
**
يعنى م الاخر كده العملية تدخلها فى الف جنيه،قلتلها يا بنتى كبرى دماغك دى عالم شكلها ماصدقت تلاقى زبون لقطة، انا لو معايا المبلغ ده اروح اعمل نيولوك ارجع ولا نانسى عجرم فى زمانها، روحى يبنتى خديلك بيهم كام كورس كمبيوتر ينفعوكى بدل شغل الدجالين ده ، وبعدين الحلو حلو ولو قايم من النوم، يعنى كفاية نغسل وشنا وننزل، وربنا يتولى الناس برحمته
وده كـــــــــــــان عيـــــــــــــبه

فبراير 21، 2008

يا شعبى الصبور المهاود المطاطى المطاوع



بصوا بقى انا فكرت-ودى طبعا حاجة مش بعادة-ولقيت اننا دايما بنحب نعرف اراء الناس والشعوب فى حكامها وبنفرد للكلام ده صفحات وصفحات، وعمرنا ما فكرنا نعرف راى الحاكم نفسه فى شعبه، مش بيقولوا مش لازم نحكم ع الكلام من طرف واحد
**
علشان كده بقى انا فكرت اعرض الموضوع من زاوية عكسية-ولان طبعا الجبن سيد البسطرمة-انتوا عارفين، فقررت اسمى الدولة الى بنتكلم عليها (جمهورية بعرة )،حد يقولى اشمعنى الاسم ده اقولك علشان هى بالظبط عاملة زى قهوة بعرة الى موجودة فى اى مكان شعبى،مفتوحة للى داخل والى خارج ع البحرى،يشرب وياكل ويسرق كمان وفى الاخر يهرب من غير ما يدفع الحساب،حتى القهوجى الى شغال فيها حرامى وبيسرق صاحبها، ومع ذلك لسه مفتوحة متسالنيش ازاى
**

المهم انا قررت اسمح لفخامته (الى هو رئيس جمهورية بعرة)انه يعرض وجهة نظره لعل وعسى يكون العيب مش منه، واهو نبقى اديناله فرصته برضه، ربنا ميرضاش بالظلم،عموما الكلام الى جاى ده على لسانه، ويتقطع لسانى لو كان ليا دخل:-


يا شعبى الصبور المهاود المطاطى المطاوع


بصوا بقى م الاخر انا زهقت وقرفت منكم، وبقولهالكم قبل ما انتوا تقولوها،انا كان مالى ومال الشغلانة دى، اشمعنى انا الى حظى يوقعنى فى شعب زى ده ، ما الشعوب بره زى الفل وتشرح القلب الحزين، انما انا الى بختى كده وقعت فى شعب معفن كحيان وشه يقطع الرزق وريحته افيييييييييي خالص

**

انا م البداية مكانش ده طموحى، انا كنت حاطط عينى انى اسافر احكم اى شعب برا،هما يعنى زمايلى النظاف دول احسن منى فى ايه،مش كان زمانى حاكم الامورات ولا حتى لوبيا ، لكن اعمل ايه منها لله شومان مراتى ، اول ما جتلى الشغلانة دى مكنتش عايزها قولتلها يا شومان تعالى نسافر اى مكان تانى نحكمه، قالتلى ميحكمش انا مسبش امى واسافر اتغرب، اطريت اوافق وحتى بعد ما امها راحت مطرح ما راحت رجعت عرضت عليها الفكرة تانى، قالتلى نعم انت عايزنى اسيب صاحباتى فى نادى اللوتارية ، والمشروعات الى انا عاملاها وباكل منها عيش علشان اجى معاك برضه ميحكمش

**

المهم سلمت امرى لله ورضيت بيكم يا حوش، وكان جزائى ايه غير قلة القيمة والفضايح الى انتوا عاملينهالى فى كل حتة لما بقت رقبتى اد السمسمة فى المحافل الدولية


كل ما اروح حتة يشاوروا على ويقولوا مش ده الراجل بتاع الشعب المعفن ابو قفا كبير، لما الواحد بيبقى فى نص هدومه، وده كله من ايه مش من الى يتشكوا فى ايديهم الى فاضحنى فى جرايد ومدونات ، واشى حرام واشى كفاية واشى والنبى اخر مرة

طب ودينى ما اخليكوا تخرجوا من بيوتكم، والراجل فيكم يطلعلى وانا ارجعه يلبس بامبرز تانى ده لو قدر على تمنه


وبمناسبة الكلام ده، ايه بقى حكاية الاسعار الى مش عاجباكم دى عايز افهم، ايه يعنى الزيت والسكر والارز والسمنة واللحمة والخضار والفراخ والبيض والسمك والفول والعيش والملح والدقة يغلوا

هما يعنى بيغلوا عليكم لوحدكم ، منا برضه مكوى بالغلا، من كام يوم شومان خدت منى مليون ونزلت السوبر ماركت تجيب شوية جبن وزجاجة زيت وكيلو سمنة وحتتين صابون الشمس وكام مكعب ماجى رجعت قالتلى الفلوس مكفتش

انا الدم غلا فى عروقى-حتقولولى حتى الدم غلا حقولكم اه- قلتلها ازاى يا هانم امال لو مكنش السواق بياخد الطيارة ويجيبلك الجبنة من فرنسا والزيت من اسبانيا والسمنة من هولندا، انتى بتخنسرى من ورايا يا مدام، لكن بينى وبينكم لما قعدت مع نفسى كده قلت اللهم اغزيك يا شيطان، قلت اكيد الفلوس راحت على حتتين صابون الشمس بتاع الغسيل ومكعبات الماجى اصل دول مش بعرف اجيبهم بالطيارة
يعنى مش انتم بس يا اساتذه الى بتعانوا، العبد لله كمان طافح الدم وطالع عينه وياريت عاجبكم


لا وكمان عايزنى اشغلكم ده الى ناقص، اذا كان الواد ابنى الكبير شمال معرفتش اوظفه فى حتة ، واخر ما زهقت رحت عامله لجنة من حر مالى بدل قعدته عواطلى كده،وقلت اهى تبقى مصلحة تنفعه الواحد مش عارف بكرة مخبى ايه،تكونوش فاكرين الواد اتاخر فى الجواز لحد ما بقى فوق الاربعين عياقة يعنى ، ولا فاكرنى قاعد على تل فلوس علشان اجوزه، لولاش بس ربنا سترها بجوازة مرتاحة توزن العملية شوية كان فاته لسه قاعد جنبى


تقوموا انتوا تقولولى عايزنى اشغلكم واجوزكم، امشى ياله منك له بعيد حنرش مياه


عموما علشان تبقوا عارفين ده مش اخر كلام ما بينا، انا لسه على قلبى منكم كل علة وعلة اد كده، ومسيرى اطلع الى جوايا بس مرة تانية، ولحد ما ده يحصل ودينى وما اعبد الى حسمع منكم صوته لحبعت استورد مخصوص اسياخ من المانيا علشان احط السيخ المحمى فى صرصور ودنه ، ولا استورد ليه انا اوصى عليهم حبيبى عزوز يعملهم وصاية ،حتقولولى واسياخ جديدة ليه اقولك لا يا حدق دى اسياخ تانية للودان غير الى انتوا متعودين عليها فى الاقسام، ولغاية ما اجيلكم تانى لموا من بعضكم انت يا واد منك له حق الاسياخ ولا حجيبها كمان على حسابى


اهــــــــــــــو ده يبقــــــــى عيبــــــــــــه

فبراير 20، 2008

ععااااااااااااااااا بحبك ا جورج




طبعا حد حيقولى اشمعنى جورج كلونى، مش جورج قرداحى ولا وسوف ولا حتى دبليو سى بوش ولا بلاش ده

**

مهو طب قولولى اعمل ايه، رشدى اباظة والله يرحمه، حسين فهمى وعملها واتجوز ومش مسامحاااااااااااه ليوم الدين،والشباب بتوع اليومين دول مع احترامى ليهم لكن بحس انهم مش ملو هدومهم كده ولا ليهم هيبة الناس الى بقولكم عليها0،تحس ان ليهم شمخة كده الى انا معرفش هى ايه

**

حد طبعا حيروح طالع كده فجاة ويقولى طب ايه الى عاجبك فيه،اقوله فشرت ده كفاية شوية الشعر الرمادى دول، ولا الغمازة، ولا طابع الحسن مع العلم انه ممكن لا يكون فى غمازة ولا طابع حسن بس الكلونى بقى فى عين امه غزال(بالعند فيكم)0

**

وبعدين لازم تعرفوا بقى انه مش شكل وبس-انا مش سطحية للدرجة دى يعنى-يعنى الراجل دماغه نظيفة برضه وشخصية جامدة وعاقلة بشهادة كل الى عرفوه، ده غير موقفه من السياسة الامريكية الخارجيه المهلبية ورفضه ليها بايباء وشمم0

**

وغير كده متواضع ومؤدب وابن ناس محترمين وابوه راجل سياسى معتبر ، ايه يعنى كان متجوز قبل كده طظ هى الخسرانة، وبعدين انا شفت صورتها بينى وبينكم مش اد كده، انا عارفة عجبه فيها ايه بلا هم، المهم انه دلوقتى ميش ميرتبط0

**

وليكوا على لو الحكاية مشيت كويس انا مش عايزة منه حاجة، انا عايزاه بالبلدة الى عليه بتاعة اوشن 11 الى كان لابسها وهو طالع من السجن، شوفتوا انا شارياه اد ايه، بس على شرط انه ميمثلش مع اى واحدة غير بموافقتى ، وان كان ولابد يبقى بوس هادف فى سياق الدراما-هما دايما يقولوا كده انا مالى-

**

لكن ولانى عارفة نفسى المنحوس منحوس، ورغم كل الحاجات والاهتمامات المشتركة الى بينا للاسف فى مشكلة واااااااااحدة بسسسسس ، نفس المشكلة الى قابلت المرحوم عبد الفتاح القصرى لما ضحكوا عليه فى فيلم قديم وفهموه انه ممكن يتجوز اخت مارلين مونرو، راح متمطع وقايل بطريقته المشهورة :-

((معانديش ايتها ماااانع اتجوززززز اخت مانرررررين مونرووووو بس على شررررط تسلممممممممم))


وهــــــــو ده عيبــــــــــــــــه


خديها للاخت الى معاكى


بصوا بقى يا جماعة الحكاية دى حصلت معايا، فى يوم كنت نازلة انا وواحدة صاحبتى منتقبة ندور على حتة قماش تعملها نقاب
المهم دورنا كتير ولفينا لحد ما وصلنا لمحل وعجبتنا حته قماش، وقلنا لعمو البياع خلاص حناخدها، كل الى احنا عايزينه كان 2متر بس ، وهو مصمم ناخد الحتة على بعضها 3.5 متر علشان دى اخر حته عنده0
يهديك يرضيك دماغه والف سيف انها لازم على بعضها، ولما صاحبتى قالتله اخد 1.5 متر زيادة اعمل بيهم ايه، راح باصصلى من فوق لتحت حتة بصة كانى الست الى دايما تطلع ترقص فى الافلام قدام الكفار،وراح قايلها:-
خديها للاخت الى معاكى تعملها خمار بدل الى هى لابساه ده

وراح مدَير للراجل الى معاه وقاله انا رايح اصلى الظهر
بصراحة انا وصاحبتى فجاه نزل علينا سهم الله وملحقناش نستوعب هو قال ايه، وعلى ما استوعبنا كان الحاج راح يصلى الظهر،طبعا انا حسيت انى واقفة فى وسط هدومى الى هى اصلا مش عاجباه، مع انى وربنا بلبس عادى زى مخاليق ربنا من المحجبات بنطلون جينز وتونك طويل وطرحة ،مش جاياله لابسة بنطلون شاكيرا ولا بادى هيفا 0
**
المهم صاحبتى فاقت من الصدمة وراحت مفتوحة فى الراجل التانى الى كان واقف مبلم هو كمان، وهاتك يا زعيق،هو فاكر نفسه ايه علشان يقولها كده، هو ماله كل واحد حر فى لبسه، هو حيلبسها على مزاجه،رايح يصلى طب يعامل الناس كويس الاول
وانا اسكت فيها وهى ابدا، خد ياعم القماش مش عايزين نشترى منكم حاجة، ده كلامها طبعا والراجل التانى عمال يقولى معلش يا اختى متزعليش ، وانا كل ده لسه مبلمة
**
المهم انا اقنعتها ان القماش مالوش ذنب، واشتريه وخلاص بدل ما نلف تانى على كعوب رجلينا الله لا يسيئك
**
الغريب فى كل ده اننا مكناش فى محل مخصص للبس منتقبات او مخمرات علشان الراجل يتنك قوى على ويكلمنى بالشكل ده، بالعكس انا لما دققت كويس لقيته حاطط نوعية قماش اشى دانتيل واشى حرير واشى تل وحاجات لا يمكن باى حال من الاحوال تتعمل لبس منتقبات ، دى كلها قماشات سواريه وشفتشى كمان، ده غير المانيكانات الى محطوط عليها قماش سهرة وسواريه على شكل فساتين
**
بصراحة انا اتغاظت جدا من الموقف ده، انا اعرف الى مش عاجبه حاجة ميتاجرش فيها ، بدل ما يهزا فى مخاليق ربنا
**
انا لا ضد لبس النقاب ولا من حقى اتكلم فى حاجة زى كده، لكن انا ضد ان الانسان يحكم على غيره من مجرد اللبس، او يفرض حاجة على حد بالاسلوب ده، (وادعوا الى سبيل ربك بالحكمة والموعظة الحسنة)
**
لكن الى محيرنى بجد لو كنت اخدت 1.5متر اعملهم خمار كان حيمشى ازاى مع البنطلون الجينز

اهـــــــــــــو ده عيبــــــــــــــــه

مولد وصاحبه غايب



من ساعة ما دخلت عالم الانترنت ده وانا حاسة انى دخلت سراية مجانين مش معروف لها لون اذا كانت صفرا ولا خضرا ،ولا ليها سور لان المجانين جواها وبراها ، او تقدر تقول انه عامل زى السيرك بس مش سيرك نظيف ،لالالا حضرتك عارف خيم الغجر الى بتبقى فى الموالد، وقرب قرب ادخل عندنا حتلاقى من كل صنف ولون الى عمرك ما شفته، اهو عالم الانترنت عندنا مش فى مصر بس لا فى الدول العربية كلها عامل زى خيم الغجر وكل خيمة فيها بلاويها ،وكل خيمة بتحاول تغريك بحاجة علشان تدخل وفى الاخر المولد بيتفض بعد ما تكون حضرتك اتسرقت وكل عام وانتم بخير
00000000000000000000000000000000000000
ولاننا سيد من يحسن استخدام الاستخراعات الحديثة ، فتلاقى كل الناس بتستخدمه من اول العيال الصغيرة لحد الناس الى على المعاش،والى اقصده هنا مش الانترنت عموما لان اغلب الناس بتدخل بس علشان chatting والحكاية سهلة واسهل من البساطة ، كل الى انت محتاجه انك تعمل ID على اى برنامج وفى الاغلب بيكون yahoo ، حد يقولى اشمعنى اقولك علشان سهل وكمان فى شاتروم يا حدق0
00000000000000000000000000000000000000
بس ظبطت اسم روش كده من بتوع الايام دى ،نزلت كام صورة لعمرو دياب ايام ما كان بيدور على هدومه الداخلية، خلاص يا عم مستنى ايه عيييييييييييييييييييش
ادخل على اول chat room تقابلك فى اى موقع ويا سلام لو كان الموقع اصلا مسهوك حتبقى العملية ماشية زى السكينة فى الحلاوة ، وطبعا انسى موضوع حكشة خالص ودايما افتكر انك تامر او حسام او هيثم ، وبيتكوا الى فى حوش القرافة ده اوعى تجيب سيرته الناس مش بتحب سيرة الميتين، وياسلام لو تقول انك فى AUC اهو برستيج برضه0
00000000000000000000000000000000000000
اعتقد ان ده بيبقى اغلب تفكير الشباب الى بيدخل يعمل chat خصوصا لو كان لسه مراهق يعنى لسه مكملش 45 سنة
وتلاقى الواحد من دول اول ما يلاقى اسم بنت فى الروم يروح مسنتر وداخل دخلة مستحية:-

السلام عليكم اقدر اتعرف على الاخت العزيزة المعزوزة بكل ادب واحترام طبعا (يحسسك انه البنا مؤسس الكتلة اياها)
واول ما تقوله ok تبدا الاسئلة:-
1-قوليلى حبيتى قبل كده
2-عمرك جربتى السيكو سيكو
3-انتى لابسة ايه دلوقتى
4-عندك كاميرا علشان نشوف بعض اصلى بخاف اقعد لوحدى
5-ما تيجى نتقابل واهو كله بثوابه
ولو كانت انسة وماله، متجوزة ميضرش، مطلقة او منفصلة قشطة وكان الاصل فى كل الى فاتوا انهم يكونوا منحرفين، او بمعنى اصح كل منحرف فاكر ان كل الناس زيه والى على راسه بطحة بقى
000000000000000000000000000000000
والغريب ان اول الموضوع ده ما بدا كان اغلب المهتمين بيه العيال الى تحت العشرين او فوقها بشوية، لكن الغريب دلوقتى انك تلاقى اغلبهم فوق التلاتين والاربعين والخمسين والله، وحتى لو اختلف الاسلوب واختلفت المواضيع بيبقى الهدف اغلبه واحد
(عايزين قلة ادب )
ودايما الكل بيحاول يغير حقيقته يعنى الوحشة بتقول انها قمر، والمتجوز بيحلف انه مدخلش دنيا ، والولد بيقول انه بنت مش عارفة ليه ،طب ماهو لو عمل بنت حيكلم ولاد يبقى استفاد ايه، الا لو كان سلملى على جوزك يا اسماعيل بيه
00000000000000000000000000000000
هو اه حلو ان الانسان يهرب من الواقع الاليم بس مش بالشكل ده، يعنى مش لازم نفتحها ع البحرى وكل واحد يعيش خياله المريض، ويعمل الى مش قادر يعمله فى الحقيقة، ويبص يلاقى نفسه وهو قاعد بيعمل الخطايا السبعة والعشرة والعشرين كمان 0
بصراحة انا شفت العجب ونماذج مش موجودة حتى فى السيرك القومى نفسه

يعنى مثلا واحد نفسه يبقى حصان، لا حضرتك سمعت كويس ، نفسه يبقى حصان مش مجرد بيحب الحصان زى نجلا
لدرجة ان نفسه لما يتجوز مراته تركبه وتقوله شييييييييييييي يا حماا قصدى يا حصان
والى داخل يدور على عروسة يتجوزها عرفى تقولشى العرفى شاحح فى السوق قوى داخل يطلبه من ع النت، كان نفسى اقوله انزل اى جامعه قريبة منك حترجع مجبور الخاطر
والى متجوز وبيشتكى من مراته او خاطب وبيشتكى من خطيبته او بيحب وبيشتكى من حبيبته المهم يشتكى وخلاص وكانى عبد الوهاب مطاوع الله يرحمه واكيد حلاقى حل لمشكلته رغم انه ممكن يكون هو الى ميتعاشرش

لكن ساعات بجد ساعات ونادر جدا ممكن تلاقى شخصيات كويسة وتبقى على راى طلعت زكريا فرصة نظيفة قوى ، وتلاقى ناس كويسة لكن للاسف ساعتها هما الى حيعملولك بلوووووووووووووووووووووووووووك
واهـــــــــو ده عيبــــــــــــــــه

فبراير 19، 2008

أول ما نبدى القول


بسم الله، دايما كده اى حاجة فى اولها صعبة مش عارفة ليه ،بس بعد كده بتبقى عادى وسهلة ، انا كنت قاعدة لا بيا ولا عليا لغاية ما واحد الله يكرمه كبرها فى دماغى وقالى ما تعملى مدونة،قلتله ودى حعمل فيها ايه، قالى اكتبى الى يخطر على بالك واهو بدل القعدة كده لا شغلة ولا مشغلة واكلم نفسى طول النهار0
المهم سمعت كلامه ،وبما انى معنديش فكرة قوى فالحمد لله طلعت عينه معايا على بال ما عرفت ازاى بتتعمل ،ولما جيت اسميها بصراحة احترت، لقيته بيقولى فكرى ، قلتله اهو ده عيبه (على التفكير يعنى )فلقيت الاسم مش بطال، شغال يعنى 0
المهم مطولش عليكم ،انا لقيتها فكرة كويسة ، وماله لما اقول الى فى نفسى ،واكتب الى بحسه واحس الى بكتبه على راى محمد هنيدى، مش احسن ما الواحد يطق يموت 0
حد اكيد حيقول فى نفسه يعنى احنا ناقصينك ولا هو كتر مدونات والسلام، ارد عليه واقوله سيبنى مرة واحدة ابقى رئيس جمهورية نفسى واتكلم براحتى هو الكلام عليه جمارك 0
المهم دى بس كانت اول طلعة، واول طلعة دايما صعبة ، لكن بعد كده وحياتكم ما حتعرفوا تسكتونى انا عارفة نفسى
واهــــــــــــــو ده عيبـــــــــــــــه
 

Term of Use

أهو ده عيبه Copyright © 2009 Flower Garden is Designed by Ipietoon for Tadpole's Notez Flower Image by Dapino