فبراير 13، 2009

انا عندى مشكلة



ازيكم جميعا عاملين ايه ، انا عارفه ان بقالى مدة غايبة وكمان مش بدخل مدونات ولا بعلق على موضوعات وبصراحه مكسوفة منكم قوى ، ويمكن اقول السبب اللى حفظتوه ان مفيش وقت ولا دماغ ولا افكار لكن دى الحقيقة بجد



المهم ان بمناسبة مرور سنة على المدونة فكرت ان الواحد يحاول يستعيد نشاطه تانى ، ينفض بيته كده ويشيل الكراكيب كلها ويبدأ بداية جديدة على نظافه



وطبعا التجديد يشمل الافكار والموضوعات وكمان الشكل العام ، فقلت اعمل فالحه وابدأ بالشكل العام يعنى اغير ستايل المدونة وشكلها وادور على شكل جديد بدل اللى زهقتم منه ده



المهم بدأت ادور على اشكال والوان واجرب واحط واشيل ، وعملت نفسى ناصحة واخدت نسخه من المدونة احتياطى علشان لو حبيت ارجع كل حاجه زى ماكانت



وقعدت اجرب كذا شكل ، وكل ما يطلعلى حاجه اقول ok ، ولما مقدرتش استقر على شكل يعجبنى قلت ارجع الشكل القديم ، وفعلا قدرت ارجعه لكن للاسف اكتشفت ان كل المدونات اللى كنت ضايفاها للقائمة عندى اتمسحت كلها !!!!!!!!



ايوة للاسف كلها اتمسحت ، يعنى بالعربى كده مبقاش عندى ولا لينك مدونة من اللى كنت بتابعهم ، لانى ببساطة اتقرصت قبل كده من حكاية الفافوريت وان كل اللى فيها بيروح لما الواحد ينزل ويندوز جديد ، فعملت ناصحة برضه وقلت الاحسن تبقى كل اللينكات فى المدونة



وادى كل حاجه راحت ، وللاسف حاخد وقت كبير قوى علشان اقدر اجمع كل المدونات اللى بتابعها ، فسامحونى بجد لانى هتاخر عليكم اكتر من الاول ، كمان كان نفسى بمناسبة مرور سنة على المدونة ان الموضوع يكون احسن من كده بس اللى حصل



عموما احب برضه اعرف رايكم فى تغيير شكل المدونة ، وهل تفضل زى ماهى ولا احاول اجدد فيها ، وخلال ده ما يحصل هبدأ اجمع تانى لينكات المدونات ان شاء الله ، وكمان محاولة الرجوع بموضوعات افضل باذن الله



واوعدكم ان المرة دى احاول استعين بحد بيفهم فى التكنولوبيا دى بدل ما الخبط الدنيا تانى ، وربنا يستر ان شاء الله


16 عرفوا عيبها:

رئيس جمهوريه نفسى on 13 فبراير 2009 في 10:46 م يقول...

ولا يهمك اهم حاجه انك بخير زكلة يتعوض كله سنه وانتى طيبه لمرور عام على المدونه وعيد ميلادك
بخصوص الشكل بتاع البلوج فده حسب ارتياحك انتى للشكل واحنا بنثق فى ذوقك

Unknown on 13 فبراير 2009 في 11:00 م يقول...

انا مع رأى محمود دى حاجة راجعة ليكى انتى
اهم حاجة متتاخريش علينا كتير
سلام

Unknown on 14 فبراير 2009 في 10:07 ص يقول...

يا جميله الاول كل سنه وانتي ومدونتك بخير يارب
والشكل جميل يا توته عليها
وبالنسبه للمدونات هقولك على حاجه احسن
احفظيهم في جوجل ريدر
ده هيسهلك تتابعي الموضوعات الجديده
وفي نفس الوقت تضيفي كل المدونات اللى بتحبيها
يلا مش تتأخري تاني يا جميل

unknown on 14 فبراير 2009 في 12:10 م يقول...

أولكشي.. كل سنة و"أهو ده عيبه" بخير ونقاشتها بألف خير...
تاني هام: مع إحترامي الكبير والتام لرأي "رئيس جمهورية نفسي" و"أيمن بدر" أنا شايف إن شكل البلوج اللي إنتي إخترتيه، جانبه الصواب.. يعني فقير تصميمياً وكئيب من ناحية الألوان.

تالت هام: بما إنك ضيعتي كل لينكات المدونات اللي كنتي بتشرفيها بالزيارة، إسمحيلي إني أستنهز الفرصة النضيفة دي وأعزمك على بلوجي المتواضع...
وعندي غن شاء الله هاتلاقي مجموعة لا بأس بيها من البلوجات التانية.
تعالي زوريني.. باي باي
أقول سلام عليكم وأستأجز

همس الاحباب on 14 فبراير 2009 في 6:27 م يقول...

كل سنة وانتى طيبة
ومدونتك بخير
ومبروك على النيو لوك الجديد
وفى انتظارك دائما
تحياتى

Empress appy on 15 فبراير 2009 في 12:41 م يقول...

معلش يا دودو مبروك اللوك

حاجات جوايا on 19 فبراير 2009 في 8:44 م يقول...

كل سنة وانتى طيبة يا جميل
معلش اللى راح يتعوض
المهم الصحة هههههههه
النيولوك لذيذ أوى
وانتى الذ طبعاااااا

عيد ميلاد سعيد للمدونة وصاحبتها

سالى

كلاكيت تانى وتانى on 22 فبراير 2009 في 7:58 م يقول...

ارجو نشر الايفنت لديك على مدونتك او جروبك والدعوة لحضور الحفل بين كل المدونين واصجقائكم على الفيس بوك وذلك لتأييد المدونات المشاركات فالحدث ويشرفنا حضورك
صورة الغلاف على مدونتى
حفل توقيع العدد الثالث من سلسلة مدونات مصرية للجيب
كتاب "أنا انثى " ..لمجموعة من المدونات النساء

أول كتاب يناقش اهتمامات المرأة بقلم مجموعة من النساء ويطرح القضايا للنقاش

ضيفة شرف الحفل ..(غادة عبد العال ) صاحبة مدونة ..عاوزة أتجوز..والتي صدر لها كتاب بنفس العنوان عن دار الشروق

ومن المشاركات في كتاب ..أنا أنثى
نوارة نجم
اسر ياسر
ايناس لطفى
نرمين البحطيطى
شمس الدين
د . رشا عبد الرازق
بيلا شريف
مكسوفة
بسمة عبد الباسط
مريم الغنيمى
إيمان نادى
زهراء امير بسام
آية الفقى
مروة السيد
أميرة محمد محمد محمد
فاتيما
مذكرات عانس
نرمين البحطيطى
سلمى أنور
انجى سمراء النيل
سارة ابراهيم على
سمر مجدى
مروة النجار
شيماء حسن
نسرين عبد النعيم
د.مرام محمود
ايناس لطفى
نجلاء الشربينى
محاسن

يصاحب الحفل عرض فيلم قصير و==================================
المكان
المركز الثقافى الدولى
17 ش السد العالى ميدان فينى الدقى
الشارع المقابل لشيراتون الجزيرة
اقرب محطة مترو انفاق محطة الاوبرا
الزمان
يوم 3 مارس الساعه 4.30 عصرا

Soooo on 3 مارس 2009 في 3:45 م يقول...

لألألألأ
انا مش مسامح في لينك مدونتي اللي ضاع
لألألأ
اي نعم هو موجود دلوقتي .. بس انا ايش يضمني انه مايضيعش تاني !!؟؟؟؟

مطلوب تفسير ووجود ضامن مرتبه مايقلش عن عشر بوستات شهريا


على فكره .. شكل المدونه حلو قوي قوي .. والبانر اللي فوق عامل شغل عالي عالي عالي

ماتعمليلي بانر زي وتكسبي في ثواب؟؟؟





سلامووووووووووووز

Soooo on 3 مارس 2009 في 3:46 م يقول...

وكل سنه تدويينيه وانتي بصحه وسعاده .. اي نعم جايه متأخر
بس انتي عارفة ازمة التكاتك دلوقتي




سلامووووووووووووز

Unknown on 5 مارس 2009 في 3:10 ص يقول...

كل سنة ومدونتك طيبة
والقديم ماكنش وحش وبردة الجديد علي العموم لو عرفتي تعملي حاجة اعملي معرفتيش سبيها زي ما هي
علشان التغير دة بيبوظ حاجات كتير
مالة الشكل مهو جميل حسن ما حاجات تضيع

وحشاني كتير كتيرررررررر

سلام

abdo on 11 مارس 2009 في 9:30 ص يقول...

كل سنة والمدونة بتاعت حضرتك شغالة وموجودة
والمرة اللى جاية متنسيش تاخدى نسخة من الفافوريت المرة اللى جاية

Unknown on 15 مارس 2009 في 7:05 ص يقول...

وليه القايمة من اساسه
إذا سمحتى لىّ بالسؤال ؟
ليه ما تبقى (منطلقة)
كالعصفور(حلوة الحتة دى؟)
بمعنى زورى اللى يجى على
بالك بدون تعمد ولا ترتيب
وبهذا تكتسبى أصدقاء جدد
ومعارف اكتر وكتابات متنوعة
بدلاً من حصر نفسك فى كذا وكذا؟
ارجو ان اكون أوصلت الفكرة لكِ
واحتراماتى .

غير معرف يقول...

انا اصلا من غير ما تطلبي رأينا كنت داخله اوقولك المدونة تجديدها حلو ودمها لطيف

ابقي سيبيلي نمرة النقاش وبتاع السيراميك عشان بفكر اجدد انا كمان

ايوه اشمعنى انتو ايه ده بأه

الله!!
الله!!

مها ميهوووو

غير معرف يقول...

دخلت مدونتك بالصدفه !!
عارفه ازاى ؟؟
لما كتبت فى جوجل ... "انا فى مشكله "
على العموم لاقيت مشكلتك اقل من مشكلتى بكتير ... يعنى انها بخصوص الفايفورتس
..ممكن تستخدمى foxmark ل فايرفوكس او انترنت اكسبلورر .. يعنى حبيت اساعد
تحياتى

موقع زواج on 18 أغسطس 2011 في 3:30 م يقول...

ولا يهمك المهم انك قومتنا بالسلامة
وحمد الله على السلامة

 

Term of Use

أهو ده عيبه Copyright © 2009 Flower Garden is Designed by Ipietoon for Tadpole's Notez Flower Image by Dapino