أهو ده عيبه

دعوة لزيارة ذوى الاحتياجات الخاصه

2009-04-05T15:45:00.009+02:00

لقاء بورسعيد الثالث

المرة دى لزيارة ذوى الاحتياجات الخاصه

او بالتحديد من ذوى الاعاقه الذهنية

وده هيكون يوم الجمعه القادم 10/4/2009 الساعه 11 ظهرا ان شاء الله

فى جمعية التثقيف الفكرى -ببورسعيد

والاطفال اللى فى الجمعية الى جانب انهم معاقين ففى منهم ايتام كمان

الحالات اللى هنقابلها ان شاء الله
فيهم 23 فتاة من سن 8 سنوات الى سن 45 سنه
ومنهم 17 شاب من سن 11 سنة الى سن 26 سنه

ودول اللى مقيمين فى الجمعية الى جانب الحالات الاخرى غير المقيمة

هم محتاجين شوية حاجات ياريت نقدر نساعدهم ولو باى شئ

ملابس مستعملة او احذية

او فــــوط

كور الجلة 2/4/3كجم لان بهم رياضيين

كاسيت او ديفيدى للتعلم عليه او الترفيه

و كور للعب

ميكروفون لاسلكى

تربيزة تنس طاولة

بازل

كتب تلوين

الوان

العاب تكوين

او مكعبات

العاب ذكاء

راكت

مظلة

صلصال

حلوى

عصاير

اللى تقدروا عليه
مقاسات الناس
2 S بنتين
8 M نصفهم ولاد
12 L منهم 8 بنات
7 XL منهم اربعة فتايات
11 XXL منهم 6 شباب

وان شاء الله نكمل بعد كده اليوم مع بعض

وربنا يجعله فى ميزان حسناتكم ان شاء الله

حاجه غريبة !!!

2009-03-15T23:57:00.005+02:00

ازيكم جميعا وحشتونى ، النهارده حصلتلى حاجه غريبة قوى ، داخلة على النت زى كل يوم لا بيا ولا عليا اشوف الاميلات ، بصيت لقيت جايلى ولا 10 تعليقات على موضوعات فى المدونة مع انها موضوعات قديمة ، قلت خير اللهم اجعله خير ده مين اللى دخل وجاله صبر يقرا كل الموضوعات دى لا ويعلق كمان ، اكيد حد اول مرة يدخل المدونة وبصراحه قلت ربنا يستر لانى لقيت التعليقات من غير معرف

المهم فتحت اول تعليق اتصدمت ، لقيته كله صينى ، ايوة مكتوب بالصينى او زى ما بيسموها حروف KANJI على ما اظن، ومش سطر ولا اتنين ، ده انا لقيت عريضة ، قلت ما علينا جايز غلطة كيبوورد ، ساعات الواحد ييجى يكتب عربى فتتحول الحروف لرموز غريبة وحاولت اقنع نفسى بكده

قلت اشوف تانى تعليق ، لقيته نسخه من اخوه ، طب التالت ، الرابع ، لحد العاشر نفس الحكاية وتقريبا نفس التعليق ، هو انا مش متاكده بس هى تقريبا نفس النقوش وبنفس الترتيب ، يعنى باختصار اللى كتبه خده COPY و PASTE مهو مش معقول هيقعد يكتب كل ده

الغريب انى مش قادرة استوعب الحكاية ، يعنى بتاع ايه يجيلى تعليق بالصينى او باى لغه تانية؟ ده لو افترضنا ان دى تعليقات اصلا ، ولو اعتبرنا ان دى من نوعية الاعلانات الغريبة اللى الناس بتدخل ترميها فى اى مدونة والسلام ، طب بسلامته اللى حط الكلام ده وصل للمدونة ازاى؟ وهل متخيل انى هفهم حاجه من اللى حطها؟ ، ولو حتى هفهم كان هيلزق التعليق فى اول موضوع يقابله وخلاص ، يعنى مش هيكلف نفسه ويدخل على 10 موضوعات علشان يلطعه

بينى وبينكم قعدت اقلبها فى دماغى يمين وشمال ملقتش غير تفسير واحد منطقى ، انا معمولى عمل فى المدونة ، اينعم ، واللى رماه علشان يتاكده انى همشى عليه بالماوس رماه فى اكتر من موضوع علشان يضمن مفعوله ، امال تفسروا بايه اللى بيحصل ده ؟

فياريت تساعدونى فى حاجه من اتنين ، لو فيه حد بيفهم اللغة دى يقوللى ايه اللى مكتوب ، ياما اللى منكم يعرف يفك العمل يفكهولى والاجر والثواب عند الله

ولغاية ما ده يحصل مفيش قدامى غير انى اغسل المدونة بمايه مالحه ، بس ياترى استعمل ملح رشيدى ولا انجليزى ؟

واهــــــــــــــــو ده عيبــــــــــــــــــــه

انا عندى مشكلة

2009-02-13T21:02:00.002+02:00

ازيكم جميعا عاملين ايه ، انا عارفه ان بقالى مدة غايبة وكمان مش بدخل مدونات ولا بعلق على موضوعات وبصراحه مكسوفة منكم قوى ، ويمكن اقول السبب اللى حفظتوه ان مفيش وقت ولا دماغ ولا افكار لكن دى الحقيقة بجد

المهم ان بمناسبة مرور سنة على المدونة فكرت ان الواحد يحاول يستعيد نشاطه تانى ، ينفض بيته كده ويشيل الكراكيب كلها ويبدأ بداية جديدة على نظافه

وطبعا التجديد يشمل الافكار والموضوعات وكمان الشكل العام ، فقلت اعمل فالحه وابدأ بالشكل العام يعنى اغير ستايل المدونة وشكلها وادور على شكل جديد بدل اللى زهقتم منه ده

المهم بدأت ادور على اشكال والوان واجرب واحط واشيل ، وعملت نفسى ناصحة واخدت نسخه من المدونة احتياطى علشان لو حبيت ارجع كل حاجه زى ماكانت

وقعدت اجرب كذا شكل ، وكل ما يطلعلى حاجه اقول ok ، ولما مقدرتش استقر على شكل يعجبنى قلت ارجع الشكل القديم ، وفعلا قدرت ارجعه لكن للاسف اكتشفت ان كل المدونات اللى كنت ضايفاها للقائمة عندى اتمسحت كلها !!!!!!!!

ايوة للاسف كلها اتمسحت ، يعنى بالعربى كده مبقاش عندى ولا لينك مدونة من اللى كنت بتابعهم ، لانى ببساطة اتقرصت قبل كده من حكاية الفافوريت وان كل اللى فيها بيروح لما الواحد ينزل ويندوز جديد ، فعملت ناصحة برضه وقلت الاحسن تبقى كل اللينكات فى المدونة

وادى كل حاجه راحت ، وللاسف حاخد وقت كبير قوى علشان اقدر اجمع كل المدونات اللى بتابعها ، فسامحونى بجد لانى هتاخر عليكم اكتر من الاول ، كمان كان نفسى بمناسبة مرور سنة على المدونة ان الموضوع يكون احسن من كده بس اللى حصل

عموما احب برضه اعرف رايكم فى تغيير شكل المدونة ، وهل تفضل زى ماهى ولا احاول اجدد فيها ، وخلال ده ما يحصل هبدأ اجمع تانى لينكات المدونات ان شاء الله ، وكمان محاولة الرجوع بموضوعات افضل باذن الله

واوعدكم ان المرة دى احاول استعين بحد بيفهم فى التكنولوبيا دى بدل ما الخبط الدنيا تانى ، وربنا يستر ان شاء الله

زيارة جرحى غزة بالاسماعيلية

2009-01-14T22:09:00.003+02:00

موعدنا يوم الجمعة إن شاء الله

هنتقابل فى الاسماعيلية

يوم الجمعه 16 يناير 2009

الساعه 11 ظهرا

امام الباب الرئيسى للمستشفى الجامعى

عدد الجرحى فى الاسماعيلية 19 حالة

منهم سيدة تبلغ من العمر 58 عام

وشابة فى العناية المركزة عندها 17 سنة

والباقى رجال من سن 17 عام الى الاربيعنيات

ومازالت المستشفى تستقبل المزيد

محتاجين تبرعات مالية

وبعض الملابس

الاصدقاء اللى هيروحوا من القاهرة

ممكن يروحوا مع احمد الصباغ والمجموعه اللى رايحه معاه

هيتقابلوا فى ميدان رمسيس يوم الجمعة الساعة 8:30 صباحاً

واللى حييجى من اماكن غير القاهرة مش حيلاقى صعوبة ان شاء الله

لان المستشفى قريب جدا من موقف الاتوبيس ومفيش صعوبة للوصول له

واللى يحب يستفسر عن حاجه او مش عارف يوصلنا

ممكن يتصل على ايناس نهر الحب

وان شاء الله ربنا يوفقنا نقدر نساعدهم

ملحوظة*

الصورة اللى فوق ينقصها بعض الحكام العرب لكى تكتمل

حوارات عن غزة

2009-01-08T14:33:00.017+02:00

سائق الميكروباص بعد ان تمر امامه سيارة تقودها امراءه وبجوارها رجل : واحنا ناقصينك انتى كمان ،لا والبيه قاعد جنبك انا معترفش بالراجل اللى يجيب لمراته عربية ويركب جنبها ده ميبقاش راجل

راكب : افرض عربيتها ، او مش بيعرف يسوق ، وفيها ايه

السائق: لا ياعم برضه ميركبش جنبها ، الرجال قوامون على النساء يبقى ازاى هى اللى تسوق ؟

راكب : انا مش شايف فيها حاجه ، ما الرسول عليه الصلاة والسلام كان بيعمل فى تجارة السيده خديجة

السائق : بس مجبلهاش عربية وركب جنبها

راكبة : يابنى مالك فيها ايه افرض ورثاها ترميها يعنى، ولا حتى جايبهالها علشان يريحها من المواصلات

السائق: ماهم الستات كده عايزين يعملوا كل حاجه وكمان يركبوا الرجالة ويدلدلوا وهم مالهمش الا بيتهم وبس ده لو نفعوا فيه كمان

راكب : ليه بس ما الست بقت بتشتغل كل حاجه دلوقتى حتى فى النيابة والقضاء ، ومن قبل كده كمان على مر الزمن اشتغلت فى حاجات كتير

السائق: والنبى تسيبونا من الكلام ده علشان انا تعبت ومش ناقص مناهده، كفاية ان مبقاش يجرى فى عروقنا دم بعد اللى بيحصل فى غزة ده ، وبيوت ربنا اللى بتتضرب والناس بتصلى جواها

راكب : ده غير الاطفال والستات اللى مالهمش ذنب

السائق: سيبك من الاطفال ، هى وصلت ان بيوت ربنا تتضرب وتنداس ، دى تبقى خلاص القيامه حتقوم ، ياريت الواحد يقدر يروح هناك ويستشهد معاهم

راكب: بس يابنى ده حتى لو قدرت تروح حتموت قبل ما تعدى الحدود

السائق: وماله بس يبقى اسمى مت شهيد ، مش بقولك احنا هنا مبقاش يجرى فى عروقنا دم، ومبنفكرش غير فى نفسنا وبس

ثم توقف اخيرا لينزل سيده بح صوتها من قول هنا ياسطى

******

زميل : تفتكروا المدير هيدينا الزياده السنوية ؟

زميلة : والله مفتكرش ، اكيد حيتحجج ويقولك الظروف ومفيش فلوس رغم ان الشركة بتكسب بس هم يحبوا يدعوا الفقر

زميل : طب وليه كده بس، دى العيشة بقت نار وبعدين يزكوا شوية عن مالهم ، دى الناس عماله تموت كانت اخدت ايه معاها

زميلة : صحيح شفت اللى بيحصل فى غزة ؟

زميل : اه والله ، طول الليل قدام التليفزيون مش قادر انام ، حسبنا الله ونعم الوكيل

زميلة : مش عارفه اخرة المهازل اللى بتحصل دى ايه ، والكل ساكت ومحدش بيتحرك

زميل : فعلا حاجه تقطع القلب ، بس تفتكرى بجد مفيش زيادة السنة دى ؟

******

انا بسخرية : ليه يعنى الكربنة بتلاته ونص ، هى عيار كام ؟

البائع : هى المفروض اربعه ، بس يالا طلعت منى كده مشيها تلاته ونص

انا : طب دى حته خفيفه ومنفوخه على الفاضى

البائع : احمدوا ربنا اننا لاقيينه ، داحنا فى نعمه ، الناس عماله تضرب وتموت فى غزة ، وانتوا بتفاصلوا فى كرنبة ، طب ايه رايك مش بايع غير باربعه !!

******

المذيعه : وليه حضرتك فكرت تعمل الجروب ده ع FACEBOOK ؟

الضيف : والله انا فكرت فى فكرة الجروب من ساعه ما بدأ القصف على غزة ، والهجوم الشديد على مصر لعدم سماحها بفتح المعابر

المذيعه : طب وايه الهدف من الجروب ؟

الضيف : بصراحه انا شايف ان مصر مالهاش دعوة باللى بيحصل ، ومش من حق حد يحملها عبء فوق عبئها ، خصوصا ان اللى بيحصل ده فى الاول وفى الاخر شان فلسطينى ، ومش مطالبين اننا نتحمل نتيجه تصرفات فتح او حماس، او ندخل فى موقف سياسى مع اسرائيل ينتج عنه تعريض مصر لخطر امنى او عسكرى

المذيعه : وفى نهاية لقائنا نحب نقول لحضرتك مسائك سكر زيادة

******

انا لصديقتى على الهاتف : مالها بنتك بتنادى عليكى ليه ؟ شوفى مالها

صديقتى : مفيش ، بتقولى تعالى ياماما افتحيلى الجزيرة علشان اشوف عزة

انا : عزة مين ؟

صديقتى : قصدها غزة ، بتقول الميس بتاعه الفصل قالتلهم افتحوا الجزيرة وشوفوا الاطفال اللى بتموت فى غزة

انا : المدرسة دى اكيد مجنونة ، ازاى تقول كده لاطفال فى كى جى وان ، هى عايزة العيال تتفزع

صديقتى : مش عارفه ، بس انا عن نفسى مش حخليها تتفرج

******

انا لنفسى : لحد امتى حنفضل نشوف المآسى دى ونسكت ، واقصى حاجه نقولها مفيش فى ايدينا حاجه نعملها ، وكبيرنا ندعى او نصوم رغم ان فينا قوة ممكن تهد جبال ، بس الخنوع والخضوع هو اللى مكتفنا ، ناسيين ان الدايرة بتدور ومحدش عارف بكرة الدور على مين

نفسى الامارة : عندنا شغل بدرى ، خلينا ننام دلوقتى وبكرة يحلها الف حلال

انا : مش لو كان فيه بكرة !!

من احمد مطر الى اوباما

2008-12-03T03:15:00.010+02:00

اولا وحشتونى كلكم ، وعارفه انى مقصرة فى حق ناس كتير سواء فى زيارتى للمدونات او حتى الرد على التعليقات هنا ، وصدقونى مش عارفه هل هو ضيق الوقت ولا ضيق النفس خصوصا مع اللى بيحصل اليومين دول فى عالم التدوين ، من ناس بتتعرض للتجريح والاهانه ، وناس بتتعرض للدخول فى حياتها الشخصية ، وناس مختلفة مع بعضها بشكل شخصى ، او حتى البعض اللى عايز يقفل مدونته خالص

******

مش عارفه ليه بجد الامور وصلت لكده بين بعض المدونين، بس اتمنى اننا زى ما كانت معرفتنا فى الخير انها تستمر بالشكل ده ، من غير خلافات ولا اساءة لحد ، لان المفروض اللى بيجمعنا حرية الراى والتفكير والتعبير عنه ، نختلف مع بعض فى الراى جايز لكن ده مش معناه ان خلافاتنا تبقى على نطاق شخصى

******

ولكل ما سبق من حاجات تسد النفس بصراحه ، اضافه الى حاله الافلاس الفكرى اللى بعانى منها واللى وابتديت احس انها مزمنة ، ملقتش احسن من قصيده احمد مطر اللى حبيت تقروها معايا

******

لِجَميعِ الأعرابِ شُعوباً أو حُكّاما:

قَرْعُ طَناجِرِكُمْ في بابي

أرهَقَني وَأطارَ صَوابي..

(افعَل هذا يا أوباما..

اترُك هذا يا أوباما

أمطِرْنا بَرْداً وسَلاما

يا أوباما.

وَفــّـِـرْ للِعُريانِ حِزاما!

يا أوباما.

خَصِّصْ للِطّاسَةِ حَمّاما!

يا أوباما.

فَصِّـلْ للِنَملَةِ بيجاما !

يا أوباما..)

قَرقَعَة تـَعلِكُ أحلاماً

وَتَقيء صَداها أوهَامَا

وَسُعارُ الضَّجّةِ مِن حَوْلي

لا يَخبو حتّى يتنامى.

وَأنا رَجْلُ عِندي شُغْلٌ

أكثَرُ مِن وَقتِ بَطالَتكُمْ

أطوَلُ مِن حُكْمِ جَلالَتِكُمْ

فَدَعوني أُنذركُمْ بَدءاً

كَي أحظى بالعُذْر ختاما:

لَستُ بِخادمِ مَن خَلَّفَكُمْ

لأُسِاطَ قُعوداً وَقياما.

لَستُ أخاكُمْ حَتّى أُهْجى

إن أنَا لَمْ أصِلِ الأرحاما.

لَستُ أباكُمْ حَتّى أُرجى

لأكِونَ عَلَيْكُمْ قَوّاما.

وَعُروبَتُكُمْ لَمْ تَختَرْني

وَأنا ما اختَرتُ الإسلاما!

فَدَعوا غَيري يَتَبَنّاكُمْ

أو ظَلُّوا أبَداً أيتاما!

أنَا أُمثولَةُ شَعْبٍ يأبى

أن يَحكُمَهُ أحَدٌ غَصبْا..

و نِظامٍ يَحتَرِمُ الشَّعبا.

وَأنا لَهُما لا غَيرِهِما

سأُقَطِّرُ قَلبي أنغاما

حَتّى لَو نَزَلَتْ أنغامي

فَوقَ مَسامِعِكُمْ.. ألغاما!

فامتَثِلوا.. نُظُماً وَشُعوباً

وَاتَّخِذوا مَثَلي إلهاما.

أمّا إن شِئتُمْ أن تَبقوا

في هذي الدُّنيا أنعاما

تَتَسوَّلُ أمْنَاً وَطَعاما

فَأُصارِحُكُمْ.. أنّي رَجُلُ

في كُلِّ مَحَطّاتِ حَياتي

لَمْ أُدخِلْ ضِمْنَ حِساباتي

أن أرعى، يوماً، أغناما!

كان يوم يفرح

2008-11-16T02:34:00.009+02:00

مكنتش متخيلة لما فكرنا اننا نعمل يوم لزيارة الايتام ، انه حيكون بالجمال والنجاح ده ، خصوصا ان احنا كبنات اللى تولينا الترتيب لليوم ككل بس الحمد لله طلع احلى بكتير مما كنا متخيلين ،احنا كان هدفنا من البداية انا وايناس نهر الحب ودعاء ربع ضارب ونسمة انه مش بس يكون لقاء للمدونين، لكن اننا كمان نقدر نخدم مجتمعنا من خلال اللقاءات دى ، وده شئ يارب نقدر نحققه باستمرار

******

اليوم بدأ بالنسبة لى الساعه 10.30 صباحا لما وصلت انا ودعاء عند الدار ولقيت ايناس ونسمة موجودين بره ، ولقيت معاهم ماما امولة ودى كانت اول مرة اتقابل بيها وبصراحه سعيده جدا بمعرفتها وكانت بالنسبة لى من اهم مكاسب اليوم

******

قررنا اننا ندخل علشان نظبط الحاجه لغاية ما تبدأ الناس توصل ، ودخلنا صاله الاكل وبصراحه كان شكلها ميسرش ، زبالة على الارض وكراسى مكسرة ، والغريب ان كل ده اتغير بقدرة قادر لما المديرة وصلت !!!

******

اول واحد وصل كان الخواجه احمد الصباغ ، وده لقبه الجديد وحتعرفوا بعد كده سبب التسمية ، بعدها وصل خالد همس الاحباب وكان معاه العسقلانى ، ودى كانت اول مرة اقابله بس اكتشفت انه من الشخصيات المرحة وطيب جداوكفاية الشنطة اللى كانت تقيله جدا اللى كتر خيره شالها ووصلها

******

كمان جت سارة محاولات فى البحث عنى وكنت سعيده جدا انى اخيرا شفتها بنوتة لذيذه والحمد لله كسبت صديقة جميلة

******

وبعدها وصل شفقة هانم واحسان بك اللى اكتشفت بجد انهم حاجه تانية غير ما بيكتبوا عن بعض ، وان نقارهم على المدونة نتيجه انهم couple لذيذ وخفاف الدم جدا

******

طبعا البنات والشباب راحوا يصلوا الجمعه ، وانا وايناس اضطرينا نستنى علشان نرتب الحاجه ونصنفها ، وخلال الوقت ده ابتدينا ناخد بالنا من حاجات فى الدار
*اكبر بنت فى الدار اللى هى مخطوبة حاليا كانت بتتكلم معانا بمنتهى الدبلوماسية ولما سالناها عن المعاملة فى الدار كانت بترد كانها حافظة الكلام ، او كان الدار مفيهاش اى سلبيات وده مستحيل

*لاحظنا ان المشرفات سابونا ندخل وفضلوا قاعدين بره عادى من غير ما يدخلوا معانا يشوفوا احنا بنعمل ايه مع الاطفال، صحيح كان كل شوية واحده تيجى وتروح بس المفروض لما يكون فيه ناس غريبة عن الدار سواء بنات او شباب ان المشرفة متتحركش من جنب الاولاد

*كمان لاحظنا ان فيه رجالة طالعه ونازلة المبنى ولما سالنا عرفنا انه مهندس وعمال بيرمموا مبنى موجود، حتى لما حبيت اصلى المشرفة قالتلى اطلعى فوق فى مصلى من غير ما تطلع معايا

*اول ما المديرة وصلت المشرفات حالهم اتبدل ، وابتدى الكنس والمسح ، حتى الاطفال خلوهم جابوا كراسى تانية غير المكسرة وفى ثوانى الصاله بقت حاجه تانية

*كان فيه طفلتين موجودين معانا من الاول قبل ما باقى الاطفال تنزل ، استغربنا جدا من طريقة كلامهم خصوصا انهم بيقولوا على عاملات النظافة خدامين ، حاولنا نفهمهم يقولوا دادا او اى حاجه تانية اصروا انهم بينادوهم كده ، كمان صورة عبد الرحمن وهو ماسك المنشار اللى مش عارفه جابه منين وكان عمال يلعب بيه ولا هامم حد من الدار انه يقوله حاجه

******

خلصت صلاه الجمعه ، ورجعوا الشباب وكان معاهم احلى مفاجئة وهى طبعا بابا ابو خالد والاسرة ، بصراحه سعادتنا كانت كبيرة اننا شفناه واطمنا عليه ، وكنا نتمنى يكمل معانا اليوم ،المهم المديرة نزلت كل الاطفال فى الصاله وجزء مننا اخد الحاجات يسلمها فى الادارة والجزء التانى ابتدى يوزع اللعب والحلويات على الاطفال

******

فى الوقت ده ابتدينا نكتشف ان الاطفال بيتعاملوا معانا بطرق مختلفة ، فيه اللى كان زى عبد الرحمن بيحاول يلفت النظر ليه وعايز يكلم اى حد، وفيه اللى منطوى على نفسه وخايف يتكلم او ياخد حاجه، وفيه اللى كان عدوانى او عنيف ودول ضربوا الصباغ لما شبعوا ، كمان كان فيه بعض البنات اللى بتتعامل بعصبية ورافضينا تماما

******

بصراحه مكنتش متوقعه حجم التبرعات اللى جت للاطفال ، بجد ماشاء الله حاجه تفرح ، والجميل ان كل احتياجاتهم جت الحمد لله وكان فيه تنوع والصراحه انا حابة اشكر كل اللى شارك ومقدرش ييجى

داليا قوس قزح اللى طول عمرها سباقة فى الخير الحمد لله وكنا نتمنى وجودها

نوران بنت خيخه اللى مش خيخه خالص وبصراحه مكناش متوقعين كم الحاجات اللى بعتتها خصوصا انها مكلمتش حد فينا قبلها

فاتيما روح قلب ماما توأم روحى اللى بجد كنت اتمنى تيجى وتنورنا

محمد فاروق قلب مصرى جزاه الله كل خير وكنا نتمنى نتعرف بيه

احمد سكر اللى غاب عننا المرة دى بس ان شاء الله المرة الجاية ينورنا

******

خلصنا الزيارة علشان ميعاد غدا الاولاد ، وقررنا اننا نشد الرحال على بورفؤاد ، وقبل ما نركب المعدية لقينا المدون البورسعيدى محمد توفيق ابو العربى بيتصل بينا لانه معرفش يوصل الدار وجالنا عند المعدية وبصراحه جزاه الله كل خير على تبرعه اللى ان شاء الله حنوصله الدار، وركبنا المعدية وياريتنى ما ركبت ، الاخ سواق المعدية الظاهر كان نظره على اده فضل يخبط بينا على الرصيف لحد ما فجاه لقيتنى فى الارض، ايون انا وقعت فى المعدية وبقولها بنفسى بدل ما الصباغ يقعد يذلنى ، لانه مسابش بشر ولا شجر ولا حجر فيكى يابورسعيد الا لما قاله ان داليا وقعت فى المعدية

******

وصلنا النادى ، وقابلنا هناك مجموعه من شباب بورسعيد مدونين وغير مدونين ، بصراحه القعده كانت تحفه قدام الماية والسفن والمعديات عماله تروح وتيجى علينا ، والصباغ من اول ماوصلنا وهو عايش دور الخواجه السايح اللى مسابش حاجه مصورهاش ، المهم قعدنا اتكلمنا فى حاجات كتير لحد ما الغدا يجهز ، صحيح اتاخر قوى يعنى كنا صمنا احسن ، بس بصراحه كان جميل والحمد لله ربنا ستر

******

الغريب ان الصباغ بعد ما اكل -فراخ وسمك وجمبرى شوفوا الطفاسه-وكله موجود بالصور وهو ماسح الاطباق ، ظهرت عليه اعراض غريبة من الاذبهلال والتناحه ، وابتدى يسال اسئلة غير منطقية خالص يعنى مثلا هو اللى حفر قناة السويس مصريين؟ طب حفروها باديهم؟ المهم اقنعته ان الصينيين هم اللى حفروها بالمعالق البلاستيك
بجد كانت قعده لطيفة بعد الغدا، اتكلمنا كتير وضحكنا اكتر ، وبعد كده قررنا ننزل بورسعيد تانى ، اتمشينا على الممشى السياحى وطبعا الخواجه صباغ مسابش حاجه مصورهاش او مسالش عليها اسئلة غير منطقية ، لغاية ما وصلنا لقاعده تمثال ديليسبس والشيطان كان بيوزنى ازقه من هناك بس قلت بلاش حرام ده لسه عازمنا على ايس كريم ، اشهدوا ياقوم الصباغ عزمنا !!!

******

واخيرا جه وقت المرواح بصراحه كان اليوم جميل ومحدش عايز يروح، بس حنعمل ايه بقى ، الحمد لله قدرنا نحقق الهدف اللى كنا عايزينه ، اتبسطنا جدا ويارب نكون قدرنا نبسط الاطفال ، مش حتكون اخر زيارة اكيد على الاقل لينا كبورسعيدية ، وبشكر كل اللى شرفنا وكل اللى اتبرع وكل اللى اهتم باليوم واتصل يطمن وبجد بجد كان يوم يفرح

نشرة اخبار امريكانى

2008-11-08T00:18:00.004+02:00

اعزائى المشاهدين اليكم نشرة اخبار التاسعه بتوقيت واشنطن

******

بمناسبة تولى السيد/باراك اوباما رئاسة الولايات الامريكية ، توالت خطابات التهنئة من كلا من فخامه وسمو وسيادة ملوك وامراء ورؤساء الدول فى انحاء العالم راجين من الله ان يكون خير خلف لخير سلف ، واعرب سيادته عن شكره وامتنانه لتهنئتهم واعدا اياهم ان يجاملهم فى الافراح

******

قام الرئيس اوباما اليوم بتفقد قوات الجيش الامريكى بصفته القائد الاعلى للبنتاجون ، والقوات البحرية بصفته القائد الاعلى للقوات البحرية ، والقوات الجوية بصفته القائد الاعلى للقوات الجوية ، وكذلك القوات الخاصة والضفاضع البشرية وكان بصحبة سيادته الجنرال طنطاوى

******

بمناسبة ذكرى الرابع من يوليو قام الرئيس/اوباما بوضع اكليل من الزهور على قبر الرئيس الراحل/ايزنهاور ، كما قام بوضع اكليل من الزهور على قبر الجندى المفقود فى فيتنام وافغانستان وايران والعراق وسوريا ولبنان والخليج

كما حضر سيادته الحفل المقام بهذه المناسبة ، وشهد الاوبريت الذى احياه لفيف من الفنانين وقام باخراجه ستيفن سبيلبرج

******

قام الرئيس/اوباما بالاجتماع بالساده الوزراء لوضع خطة اقتصادية لالغاء الدعم عن كل السلع ، على صعيد اخر افاد سيادته انه لا مساس بمحدود الدخل الامريكى

******

اوفد الرئيس/اوباما مندوبا لحضور المؤتمر الدينى بدلا من سيادته ، وذلك لانشغال سيادته بحضور حفل بريتنى سبيرز

******

اعلن الرئيس/اوباما ايمانه المطلق بحرية الراى والتعبير وتفعيل الديمقراطية ، من ناحية اخرى اقر سيادته باستمرار تطبيق قانون الطوارئ الامريكانى حتى اشعار اخر

******

منحت الجامعه الامريكية-فى امريكا- السيدة/اوباما قرينة الرئيس الدكتوراة الفخرية فى الانشطار النووى وذلك لجهودها فى مجال التنمية

******

افتتحت السيدة/اوباما قرينة الرئيس بصفتها رئيس المجلس القومى للمرأة الامريكية عددا من المدارس والجمعيات الاهلية واكشاك السجائر والحلويات ، وطالبت بوضع خطة للقضاء على ظاهرة اطفال الشوارع

******

فى غمار الحديث الدائر حول حقيقة التوريث ، اشار سيادته انه شئ مستبعد وذلك لان بناته لسه صغيرين على الكلام ده

كانت هذه كل الاخبار فى نشرة التاسعه، نلقاكم على خير بإذن الله

دعوة لزيارة الايتام

2008-11-02T23:29:00.008+02:00

البوست ده دعوة لكل الناس

مدونين وغير مدونين

لزيارة دار من دور رعاية الاطفال الايتام فى بورسعيد

وتقضية يوم يمكن نقدر نسعدهم فيه ونسعد نفسنا معاهم

******

ان شاء الله مكان اللقاء حيكون فى الجمعية النسائية لتحسين الصحه

(المؤسسة الايوائية )

بورسعيد-شارع كسرى المنطقه الثانيه-امام قسم شرطة المناخ

وده يوم الجمعه الموافق 14/11/2008 بإذن الله

******

الدار فيها حوالى 60طفل

اعمارهم تتراوح ما بين 3 سنوات حتى 21 سنة

لكن العدد الاكبر من سن 6 الى 15 سنة بنات وبنين

******

صحيح الدار بتحاول توفرلهم معيشه معقوله

بس اكيد ينقصهم شوية حاجات حنحاول ان شاء الله اننا نكملها

******

يعنى مثلا هم محتاجين ادوات مدرسية زى الكشاكيل والكراسات وكراسات الرسم والالوان

الادوية الخاصه بالاطفال زى خافض الحرارة وادوية الكحة والاسهال والبرد

المطهرات والمنظفات عموما زى الديتول والشامبو والصابون

وكمان محتاجين مكواة للملابس

******

ان شاء الله نحاول قدر المستطاع اننا نقدملهم حاجه حتى لو بسيطة

علشان يحسوا انهم زى غيرهم من الاطفال

والاهم يحسوا بالحب والاهتمام

******

نتمنى انكم تلبوا الدعوة

واى استفسار ياريت تبعتولى او تبعتوا لمدونة اوتار (نهر الحب)

امرئتان وقطار

2008-10-15T10:07:00.013+02:00

جمعهما كرسيا القطار المتقابلان ، امرئتان تتشحان بالسواد ، احداهما تناهز الخمسين ، لفحتها شمس الصعيد الحارقه وحفرت السنون تجـــاعيدها على بشــرتها ، اما الاخرى فما زالت فى مقتبل العمر ، يسرى فى عروقها دم الشباب ويصبغ وجنتيها بلونه

******

تجاذب اطراف الحديث كان وسيلتهما الوحيدة لقتل الوقت فى قطار يعدو نحو هدفه مزدحما ، فالجرح يبدو واحدا ، والام الرحيل تركت اثارها على الوجهين على اختلافهما ، فما اصعب ان تفقد رفيقا لدربك

******

لم تتردد كلتاهما فى ان تحكى قصتها للاخرى ، عندما تحادث شخصا يمر بما انت فيه ، فكانك تحادث نفسك فى المرآه دونما حرج ، او خوف

******

اخذهما الحديث بعيدا عمن حولهما ، لم تتوقف حكايتهما الا بتوقف القطار ، وبالرغم من الوجوم البادى على الوجهين ، لم يجدا سوى طلب المغفرة له

مجرد تساؤلات

2008-09-23T20:20:00.004+02:00

حينما طلب بنى اسرائيل من موسى (عليه السلام ) ان يدع ربه كى تنبت الارض من بقلها وقثائها وفومها وعدسها ، امرهم الله ان يهبطوا مصر فإن لهم ما سالوا ، والان بعد ان تجاوزت اسعار البقول كل الحدود ، الى اين يذهب اهل مصر ؟

******

تحاول الحكومة اقناعنا بأن الفشخرة والمنظرة هى سبب ارتفاع الاسعار ، رغم ان الاسواق مليئة بالبضائع التى لا تجد من يشتريها ، هل الحكومة تخاطب شعبا اخر ؟ ام تحاول تبرئة نفسها من تهمه رفع الاسعار والصاقها بمدام فشخرة وجوزها؟

******

محاولات الدعاية المستميتة لتحفيظنا ان اللى بنى مصر فى الاصل كان طلعت مصطفى ، هل هى محاولة لحفظ ماء الوجه الذى اريق مع دماء سوزان تميم ؟

******

يتكالب الناس فى رمضان رجالا ونساءا على الصلاة فى المساجد لدرجه انك احيانا لا تجد موضع قدم، فأين يذهب كل هؤلاء بعد رمضان ؟

******

هل من الضرورى لكى يظهر احمد عز بمظهر رجل البر والاحسان الذى يسعى لتزويج الشباب ، ان يخرج علينا محمود سعد بهذا البرنامج الساذج ؟ ام انه لا يجوز فى مصر ان تكون هناك صدقه لا يتبعها منُ او اذى؟

******

رغم الايام المباركة والشياطين المكبلة الا ان الناس تعانى ضيق الصدر ونفاذ الصبر ، ولم يتوقف البعض عن السب واللعن ، وارتكاب افظع الاشياء ، فكيف سيكون الوضع بعد عودة الشياطين؟ ام اننا لم نعد فى حاجه لهم ؟

******

يبدو ان مع انشغال الشارع المصرى بالشبكة الجديدة ، واين ذهبت الشبكة القديمة ، مر حادث الدويقه مرور الكرام وكانه لم يحدث رغم ان المحمول كان فى يد الجميع حتى تحت الانقاض ، الا ترى معى اننا نستحق عن جدارة ان نكون الشعب الشومبونجى ؟

اللهم تقبل منا رمضان

2008-08-31T21:00:00.002+02:00

كل عام وانتم بخير، اللهم تقبل منا صالح الاعمال ، واعفو عنا واغفر لنا

اعتـــــــــذار

2008-08-20T18:26:00.014+03:00

البوست ده مالوش موضوع غير انه اعتذار

اعتذار لكل اللى بعتلى تاج او اسئلة ومجاوبتش عليها

اعتذار لكل الناس اللى بقالى مده مش بدخل مدوناتها او بعلق على موضوعاتها

اعتذار لكل اللى علق عندى ومردتش عليه

اعتذار لكل اللى سأل على واهتم يعرف اخبارى

اعتذار لكل واحد قدرنى ودخل المدونة وللاسف ملقاش حاجه جديدة

اعتذار لكل اللى دعانى الى لقاء او حملة خيرية ومقدرتش البى دعوته

******

للاسف بقالى فترة مش قادرة اركز او اجمع افكارى ، مش قادرة اكتب وكانى اصبت بالبلاهة ، عندى حاله من الملل والفتور مش عارفه ايه سببها ولا قادرة افسرها ، حاسة بشئ من اليأس مش عارفه ليه ، الظاهر ساعات الواحد يكون موهوم انه موهوب ويكتشف العكس

انا طول عمرى ملولة بطبعى ، واخشى ما اخشاه انى اكون فقدت حماسى للتدوين زى ما فقدت حماسى لحاجات كتير قبل كده حبيتها واهتميت بيها

كتير يكون فى دماغى فكرة معينة وابقى خلاص ناوية اكتبها ، واول ما اقعد الاقيها طارت من دماغى والاقى نفسى بعمل اى حاجه تانية مش عارفه ليه ، كانى بهرب من الكتابة زى التلميذ الخايب اللى بيتفنن ازاى يهرب من المذاكرة

لكن مش بايدى والله ، لكن حاسه ان روحى مبقتش زى الاول ، مش عارفه استمتع بشئ ولا اتحمس لحاجه وكأن روحى بتشيخ ، رغم انى بحاول ادور على اى حاجه تسعد او تبسط لكن للاسف مش لاقية ، وحتى لو لقيت مش بعرف استمتع بيها

حاسه الايام بقت شبه بعضها ، مزيج من الروتين والرتابة والملل بيتفنن انه يقضى على اى حماس جوايا ، ضغوط داخلية وخارجية بتخلى الواحد غصب عنه يكون عصبى وعلى غير طبيعته ، وواحدة واحده يلاقى نفسه بيبعد عن كل الناس وكل الحاجات اللى بيحبها وده اللى بيحصلى

بدعى ربنا بجد ان دى تكون فترة وحتعدى ، لانى مش حقدر اتعايش معاها اكتر من كده ، ويارب الايام الجاية فى رمضان تغسل شوية من روح الواحد وتنعشها ، وتصحى فيها الحاجات اللى قربت تدبل وتموت ، وترفع عنا الاسى واليأس وتحمى قلوبنا منه

اتمنى ان ميكونش حد زعلان منى او من تقصيرى معاه ، واتمنى انى اقدر ارجع تانى للمدونة روحها المرحه اللى كانت عليها ، وعشان ده يحصل لازم ارجع ده لروحى اولا، وده اللى بدعى ربنا انى اقدر اعمله

واخيرا اتمنى من كل قلبى للجميع رمضان كله خير وبركة ورضا من الله ، وكل سنة وانتم طيبين

حتى يفرقنا الموت

2008-07-26T17:20:00.013+03:00

اتعهد بان احبك واحترمك ، فى السراء والضراء ، فى الغنى والفقر ، فى الصحه والمرض ، حتى يفرقنا الموت

عهود جميلة بنسمعها كتير ، لكن هل يا ترى من الممكن تحقيقها فى الواقع ؟ هل من الممكن ان تتحمل شريك حياتك فى الفقر والمرض وتغير الاحوال ؟ ولا هى مجرد كلمات

*****

سؤال يجب ان نطرحه على انفسنا بمنتهى المصداقية ، لان اوقات كتير الانسان بيتوسم فى نفسه المثاليه ، وبيتخيل ان مهما تغيرت الظروف هيكون ثابت على موقفه ، ثم يفاجئ بنفسه يتصرف بشكل مختلف عند تعرضه للموقف فعليا

*****

الازمات اللى بيتعرض لها الانسان كتير ، لكن اخطرها المرض لانه بيمس حياه الانسان ومن حوله بشكل مباشر ، وتاثيره على النفس اشد من ازمات اخرى

*****

فبالتالى لازم كل انسان يسال نفسه بصراحه ، هيكون ايه رد فعلى لو لاقدر الله اصيب شريكى بمرض عضال او معدى ، او فقد عضو من اعضاؤه او اقعد عن الحركة ؟

*****

هل اقبل الحياه معه مهما كانت الظروف ، ولا هيكون ليا رد فعل تانى ، مع الوضع فى الاعتبار الا نحكم على المساله من الناحيه الاخلاقيه فقط ، ولكن ايضا من كافه النواحى لان اى قرار هنتخذه هو فى النهاية قرار مصيرى سيحدد حياتنا

*****

ربما فى الايام القادمه سيفكر اغلب المقبلين على الزواج فى هذا السؤال ، بعد ما اصبح الكشف الطبى الزامى قبل عقد القران لمعرفه اذا كان فيه اى امراض خطيرة او متوارثه ، وكذلك معرفه القدرة الانجابية

*****

البعض قد يراه قرار صائب-من ناحية عقلانيه-لانه هيدى امكانية للكشف المبكر عن امراض وامكانية علاجها فى مرحلة مبكرة ، وايضا توضيح الصورة وايجاد نوع من الصراحه منعا للغش والتدليس

*****

اما البعض الاخر اللى ممكن ينظر للموضوع من زاوية عاطفيه ، هيشوف ان ده اجراء قد يصدم الاطراف ويحرجهم اذا ما ظهر مرض او عرض ، خصوصا بعد الاستعداد نفسيا وماديا وذهنيا للزواج

*****

القرار ربما وضع لكشف الامور مبكرا ، وسرعه علاجها اوحتى تحديد كل انسان لموقفه قبل الزواج ، واذا كان يرغب فى الاستمرار ولا لا، ودى فى حد ذاتها نقطه جيده ، لكن اكيد فى نقط ضعف تانية ، يعنى مثلا ازاى نضمن صحه التحاليل وان مش باى مبلغ ممكن طرف يغير نتيجه تحاليه لصالحه

*****

نقطه كمان وهى اغفال الجانب النفسى ، يعنى كان من الضرورى وجود اختبارات نفسية للمقبلين على الزواج ، لان المساله مش صحه البدن بس ، لكن من المهم برضه الجانب النفسى والسلوكى

*****

عموما وبصرف النظر عن صحه القرار من عدمه ، موافقتنا عليه او رفضنا ، فالمساله فى الاول والاخر ترجع لقناعتنا الشخصية ، وصراحتنا مع النفس فى الاجابة عن السؤال المطروح ، هل من الممكن ان نستمر رغم كل الظروف ؟

*****

نتمنى ان يكون القرار هدفه فعلا الصالح العام ، والكشف عن اى شئ قد يؤرق حياه زوجية سعيدة ، وان ميكونش كل هدفه تجميع فلوس من الشباب المقبل على الزواج اللى مصرين يعصروه لاخر قطرة دم فيه

واهـــــــو ده عيبــــــــه

يوم سعيد

2008-07-18T20:32:00.005+03:00

هو فعلا كان يوم سعيد - بس مش بتاع عبد الوهاب - ده بتاعنا احنا كمدونى بورسعيد

من يوم ما كلمنى بابا ابو خالد وقالى عايزين نعمل لقاء لمدوني بورسعيد وانا بجد مبسوطة ان اخيرا هنتجمع ونتعرف وخصوصا ان منعرفش من مدونى بورسعيد غير عدد قليل قوى

الفرحة كمان زادت لما عرفت ان فيه مدونين هيجولنا مخصوص من القاهرة يشاركونا اليوم ده

حاولنا على اد ما نقدر نعرف الناس بالتجمع وميعاده سواء من خلال المدونات ، زى ما عمل بابا ابو خالد وعيلة مفترية وحتى محمد داوود (دبابيس ) اللى بشكره بجد لان على الرغم من عدم تواجده فى مصر حاليا لكن كان مهتم باللقاء زينا واكتر ، وحاول يساعدنا بشتى الطرق

كمان حاولنا نعرف الناس من خلال جروب مدونى بورسعيد على الفيسبوك

*****

اما بقى عن اليوم فاحكيلكم بقى ايه اللى حصل ، كنت عامله حسابى اوصل بدرى علشان انتظر الناس اللى جايه ، وفعلا وصلت هناك حوالى الساعه سته وربع انا واختى دعاء (ربع ضارب )

شوية لقيت بابا ابو خالد بيقولى ان الناس وصلت من القاهرة وهييجوا كلهم معاه ، قلت كويس وصلوا الحمد لله

شوية لقيت محمد (كراكيب شيكو ) جه ، وشيكو من الشخصيات الجدعه قوى ، وكفايه انه جه من بدرى علشان يستنى الناس ، وانا شخصيا بعتبره اخويا الصغير حلاوة

بعديه جه استاذ طارق الغنام (بورسعيدى ) وبجد واحد من الشخصيات اللى بحترمها وتحسه هادى كده ووقور، ودايما نفسه يعمل اى حاجه تفيد البلد والناس

شويتين كمان والاقيلكم شيمو داخله علينا (عيلة مفترية ) وطبعا هاتك يا سلامات وقبلات ، كانت وحشانى بجد المضروبة

واحنا قاعدين كده الاقيلكم واحدة زى السكر جاية تسالنا انتوا مدونين ؟ قلنالها اه ، قالتلنا انا نهر الحب (مدونة اوتار ) ، اتبسطت جدا انها قدرت تيجى خصوصا انى كنت فاكراها زعلت علشان معرفناش انها من بورسعيد ، بس بجد ايناس طلعت لذيذه قوى وحبوبه وكمان اختها زى العسل

لحد كده وخلصوا مدونين بورسعيد ، اه متستغربوش ، للاسف هم دول اللى حضروا من مدونى بورسعيد بالرغم من انى عرفت ناس كتير سواء عن طريق الجروب او عن طريق التليفون ، لكن للاسف البعض كان عنده ظروف والبعض الاخر محضرش

*****

المهم وصل ابو خالد ومعاه رحاب (كوكب آبى ) قلتى الحلوة ، رودى (بنوتة مصرية ) برقتها الجميله ، دوللى (قوس قزح ) اللى كنت مبسوطة بجد انها جت خصوصا ان يوم الحفله متكلمناش ، احمد ( احمد سكر ) بهدوئه وكلامه القليل ، خالد (همس الاحباب ) ودى كانت اول مرة نتقابل ، وعم الشباب والرياضه احمد (سوووو )

*****

المهم بعد ما الكل اتعرفوا وقعدوا ، بابا كان عامل حسابه نحتفل بعيد ميلاد خالد ، وجايبلنا معاه تورته وحاجات حلوة كتير ، عارفين احساس العيال الصغيرة اللى باباهم واخدهم يفسحهم وجايبلهم كل حاجه حلوة ، اهو ده بجد اللى حسيناه ، اللى حصل بقى ان المكان للاسف مكانش مناسب ، وانا بعتذر للجميع عن اختيارى ليه ، انا كانت وجهه نظرى ان نادى قعدته افضل من كافيتريا ، لكن للاسف طلع حر جدا وكمان زحمه ، فقررنا نشد الرحال بناء على رغبة الجميع ونروح نقعد فى كافيتريا على البحر من اختيار بابا

*****

مش قادرة اقولكم القعده كانت حلوة اد ايه ، وبدا سووو يصورنا وطبعا طلع فضايح ، كمان ايناس صورت بس قلنا مفيش حاجه تتنشر، دوللى قطعت التورتة هى ورودى ، وقعدنا ناكل ونتكلم ، هتقولولى اتكلمتم فى ايه ؟ هقولكم فى حاجات كتير قوى ، عن التدوين والمدونات ، اختيارنا لاسماء مدوناتنا ،عن الاختلاف فى الراى ، عن السينما والافلام والاغانى ، عن تاخر وتعدد الزواج ، وحاجات تانية كتير وفى وسط ماحنا بنتكلم عن ده كله ، كنا بنستنشق كل انواع الدخان من سووو اللى كان فاضل شوية ويبقى مدخنة بطاطا ، مديها سجاير وشيشة لما سطلنا

*****

البعض كان ماشاء الله بيتكلم فى كذا موضوع ، والبعض متكلمش كتير خصوصا احمد سكر وخالد ، اللى حسيتهم هاديين قوى ، عن نفسى كنت حاسه انى رغاية قوى غير كده كان صوتى عالى ، مش عن قصد لا سمح الله بس منها لله الطرحه الساتان خلتنى مش سامعه نفسى فبالتالى بقيت اعلى صوتى

*****

للاسف الوقت الحلو بيعدى بسرعه ، وحبايبنا من القاهرة قاموا الساعه 9.50 مضطرين علشان يلحقوا يسافروا بالسلامه ، ودوللى كمان قامت علشان سايبة ولادها فى القرية ، لكن اتفقنا اننا هنتقابل تانى ان شاء الله فى القاهرة ، وبالنسبة للبنات وعدنا رودى وآبى اننا نحضر اللقاء الحريمى المرة الجاية

اما البورسعيدية فكملوا القعده ، وبصراحه كانت ممتعه جدا بوجود بابا ابو خالد بحكمته ، وطارق بعقله الجميل ، وايناس بلباقتها وتفكيرها ، وشيماء بخفه دمها وحضورها ، وشيكو بشقاوته واتفقنا ان لقاءنا يكون بشكل دورى ان شاء الله

*****

حاجه واحدة بس اللى كانت مضيقانى، الناس اللى محضرتش من مدونى بورسعيد ، وبقولهم ميصحش نكون فى البلد ومنحضرش وناس تيجى سفر 3 ساعات علشان تشاركنا اليوم ده ، كنت اتمنى اهتمام اكتر من كده

*****

عموما احب اشكر من كل قلبى ابونا العزيز/ابو خالد على كرم ضيافته لينا ، بجد حسسنا اننا كلنا اولاده ومبخلش علينا باى حاجه ، كان فاضل يشيلنا من على الارض شيل

بشكر الاستاذ/ محمد داوود على اهتمامه باللقاء رغم بعد المسافه ، وده شئ للاسف معملهوش الناس اللى مقيمه داخل بورسعيد

بشكر/ آبى وسووو و دوللى ورودى وخالد واحمد على اهتمامهم وحضورهم ، وبقولهم نورتوا البلد ونورتونا

بشكر/ طارق وشيماء وايناس وشيكو ودعاء على حضورهم ، وان شاء الله تتكرر لقاءاتنا

واخيرا بشكر /حبه النوفالجين ، التى لولا مفعولها السريع فى القضاء على المغص الفاجئ اللى جالى ، مكنتش قدرت احضر اللقاء الجميل ده وساعتها كان يبقى بجد هو ده عيبه

لقاء مدونى بورسعيد

2008-07-13T18:12:00.005+03:00

بناءا على رغبة الاب العزيز لكل المدونين / ابو خالد فى عمل لقاء لكل مدونى بورسعيد

بهدف التعارف والتواصل وتبادل الاراء

ان شاء الله هيكون لقاء مدونى بورسعيد الاول يوم الخميس الموافق 17/7/2008

وذلك بمركز شباب الاستاد-باستاد بورسعيد الرياضى

الساعه السابعه مساءا

والدعوة عامه ومفتوحه لمدونى بورسعيد وكل المدونين اللى يحبوا يشاركوا

ونتمنى حضوركم ان شاء الله

واللى يقد ر يحضر قبل الساعه 7 مفيش مشكلة هنكون فى انتظاره

وبالنسبة للى يحب يستفسر عن اى حاجه ، او مش عارف يوصل للمكان ، او وصل ومش عارف مكانا بالداخل يقدر يتصل على تليفون ابو خالد /0108994310

وفى انتظار تشريفكم

مات اكلينيكيا

2008-07-08T01:55:00.003+03:00

لكل اجل كتاب ولكل شئ نهاية ، هى دى الجملة اللى بحاول اصبر نفسى بيها الايام دى وانا على وشك فقد عزيز دامت عشرتى ليه مده طويلة ، لكن هنقول ايه ادى حال الدنيا وسبحان من له الدوام

مين كان يصدق ان بعد العمر ده تكون دى النهاية ، واشوفه كده بيحتضر قدامى وانا مش عارفه اعمله حاجه ، للاسف حكم السن وهو كتر خيره بلغ من العمر ارزله ، وكويس قوى انه قدر يصمد كل السنين دى

لسه فاكرة يوم ما اشتريته كانه زى انهارده ، صعب اصدق ان عدى حوالى 10 سنين ، اه متستغربوش ، وفيها ايه لما يعيش العمر ده كله، المعاملة الحلوة تطول العمر وانا عمرى ما عاملته وحش ، صحيح اول ما جيبته مكنش لسه بينى وبينه عمار لكن بعد كده بقينا زى السمن على العسل لدرجه ان السنين دى عدت من غير ما احس انه بيكبر

فاكرة لما جبته ومكنتش لسه اعرف عنه اى حاجه ، يادوب لسه بتعلم ، وجه جارنا يعلمنى عليه شوية حاجات راح ضاربلى الويندوز وانا لسه مفرحتش بيه ، بس الحمد لله ربنا ستر والموضوع اتصلح وتبت بعد كده انى اخلى حد يمد ايده عليه

اللى مضايقنى ان وقت كبير ضاع قبل ما اعرف قيمته ، كنت بتعامل معاه على انه لعبة ، مكنتش شايفه فيه نواحى كتير اكتشفتها متاخر ، يمكن علشان وقتها كان اقصى حاجه العب عليه لعبة ولا اشوف فيلم -طبعا قبل غزو الانترنت-

لحد ما جت فترة ابتدا يبقالى فيه شريك -اختى- قلت مش مشكلة ، لكن يوصل الامر انه يتغرب عنى اربع سنين بحالهم ويسيبنى ويروح معاها اسيوط ، ومشوفوش غير من الصيف للصيف ، اهو ده اللى قطع فى قلبى بجد لكن اعمل ايه ما باليد حيلة ، حكم القوى ، وادينى كنت بصبر نفسى فى غيابه باى شبيه ليه فى اى سيبر واقول ربنا يهون الايام ويرجع بالسلامه

ورجع تانى ونور بيته ، وابتديت اكتشف فيه حاجات جديدة ، واعرف من خلاله دنيا تانية كانت مجهولة بالنسبة لى ، وفتحلى طاقه نور ابص منها على الدنيا والناس ،واتعلم حاجات واشوف وافهم ، وبقى حاجه مهمه جدا فى حياتى

لكن للاسف ، فى الفترة الاخيرة ابتدى يتغير ، مبقاش هو اللى انا عارفاه ، من امتى كان بيهنج كده ويتقل ، من امتى كان بينزله ويندوز كل شوية وبرضه مفيش فايدة ، من امتى كنت اطلب منه حاجه مينفذهاش ، معقول هو ده اللى لما كانت كل الاجهزة تعطل مع البنات ايام المشروع بتاع اختى هو اللى ينجدهم ، معقول ده اللى استحمل هبد القطر وحر الصعيد وسوء استخدام اختى لاى كائن حى او ميت

مش ممكن يكون هو ، ولا يمكن هو بس السن بان عليه واحنا مش حاسين او يمكن مش واخدين بالنا ، بقالنا مده بنسايسه ونسترضيه ، ونطلبله الرضا يرضى لكن مفيش فايده

جربنا معاه كل حاجه ، صحيح اننا كل شوية كنا بنغير فيه حاجات ، لكن الظاهر ان البعير هلك وبرك ، ومعادلوش قومة تانى ، عجز وشاخ ومعادش قادر يلاحق على طلباتنا اللى كترت ، وشغلنا اللى زاد عليه ، كتر خيره برضه ياما خدم

لحد ما وصلنا للقرار اللى مكنش له بديل ، اننا نشترى كمبيوتر جديد ، خصوصا بعد ما بقى شبه ميت ، او تقريبا زى ما بيقولوا ميت اكلينيكيا ، مقدرش اقول مات كليا لانه من حين لاخر يفوق ويصحصح وكانها حلاوة الروح ، خصوصا بعد ما حس ان ممكن يكون فيه وافد جديد يسحب البساط من تحته ، لكن مفيش فايدة من المكابرة والعناد

حقيقى صعب على انى اودعه ، لكن اعمل ايه قدر ، ومفيش مفر منه ، مهما هربنا ، كل اللى اقدر اقوله انه كان نعم الصديق ، صحيح غيره هيحل مكانه لكن عمره ما هياخد مكانته ، اتمنى ان ساعات الاحتضار متطولش عليه ، عايزاه يموت بسلام كما عاش بسلام ، ولو غبت عليكم فاعرفوا انى بودعه الى مثواه الاخير ، وبستقبل -مضطرة- بديله الجديد ، عملا بالمثل المقيت الحى ابقى من الميت

واهـــــــــــو ده عيبــــــــــه

*سامحونى لتقصيرى فى زيارة مدونات كتير بس اظن دلوقتى عُرف السبب

ألبــــس ايـــــه ؟

2008-07-05T05:13:00.005+03:00

السؤال ده بسأله لنفسى كل يوم الصبح لما بفتح الدولاب واقف قدامه زى احمد حلمى فى جعلتنى مجرما ، مع ان دولابه كان كله قميصين وبنطلون لكن الحيرة كانت طالعه من عينيه ومش عارف يلبس ايه !!

*****

وبرغم ان وضع دولابى ولله الحمد احسن بكتير من وضع حلمى فى الفيلم !! ، الا ان ده ميمنعش انى باقف قدامه نفس الوقفه ، اللى متفرقش كتير عن وقفه الواحد قدام التلاجه لما يفضل مبحلق جواها وكانها تلاجه واحد تانى ، وكأن مش هو اللى شارى كل حاجه فيها ، ومتخيل ان اول ما يفتحها هتحصل المعجزة ويلاقى نفسه جوا مترو

*****

لوقت قريب مكنتش بسأل نفسى كتير هلبس ايه ، مكنش الموضوع محير قوى ، لكن من ساعه ما اشتغلت وده بقى السؤال اليومى وتقريبا يحتل المرتبة التانية بعد سؤال هناكل ايه انهارده ؟ ده اذا مكانش احيانا يسبقه

*****

الاول كان الواحد مش فارق معاه ، اهو بيشوف المشوار اللى رايحه وبيلبس الحاجه المناسبة ليه وخلاص اذا كان الصبح او بعد الظهر ، لكن نزول الشغل -خصوصا للبنات او الستات- بيفرض طبيعه لبس معينة لازم تتلائم مع المكان والزمان ، يعنى مش اللى يطلع فى ايدنا وخلاص -الا بقى بالنسبة للناس اللى مش بيفرق معاها-

*****

علشان كده رغم ان الدولاب مليان هدوم ، بلاقى نفسى بستبعد منهم نسبة كبيرة قوى يمكن تتعدى 90% ، والسبب الغالب ان بلاقى هدومى بقت اكبر منى -اه والله-كل الناس بتشتكى ان هدومها بتضيق عليها لكن انا بيحصل معايا العكس ، عماله بخس لغاية ما ابتديت احس انى بتلاشى ، وطبيعى انى لما البس حاجه حتى لو شرياها من قريب احس جواها انى شبه فطوطة ، اما الاسباب التانية للاستبعاد فغالبا بتبقى ان الحاجه مش مناسبة للشغل ، او مش بعرف اتحرك فيها براحتى ، او كويسة ومفيهاش حاجه بس ناقصها حاجه تكملها

*****

ولكل الاسباب اللى فاتت بلاقى ان الاختيارات المتاحه قدامى لا تتعدى صوابع الايدين ، وان الحلول للموقف الراهن ده تنحصر فى 3 اختيارات :-

1-انى افضل اكل لحد ما اتخن واملا هدومى وبكده استعيد نسبة كبيرة من ال90% من الهدوم المرمية فى الدولاب ، بس ده طبعا حل غير عملى وطويل المدى وممكن ميحققش نتايج خالص

2-انى احاول اظبط الهدوم دى كلها على مقاسى ، والحل ده لو حطيته فى دماغى هقدر انفذه وبنفسى كمان ، لان طول عمرى بحب الخياطة والتفصيل وبظبط اى حاجه بنفسى مش بس كده فى حاجات عملتها لنفسى من الالف للياء ، يعنى لو اركز شوية كان زمانى عملت كل لبسى بايدى ، بس مشكلتى انى ملولة وخلقى ضيق ، فالحل ده مش هينفع خالص خصوصا انه محتاج وقت وصبر

3-انى اريح دماغى واخدها من قصيره وانزل اشترى هدوم جديدة ، او اشوف الحاجات اللى عندى ناقصها ايه واكملها

لكن حتى الحل السهل ده بقيت احسه مستحيل ، بنزل اخد المحلات من اولها لاخرها وبوصل لنتيجه واحدة ، ان اللبس الايام دى بقى حاجة من اتنين :-

1-يا اما عبايات سواء بقى سودة او ملونة او منقرشة اهى المهم اى حاجه واسعه وخلاص ودى طبعا معمولة علشان تدارى سوئات الجسم المصرى اللى انتوا عارفين مواصفاته ، او بيفضلها الناس اللى ملتزمة فى لبسها

2-يا اما بديهات وفستات وفساتين ماسكة على الجسم وحاجات غريبة كتير مينفعش حد يلبسها ، تقريبا متاخد موديلات بعضها من افلام سعاد حسنى ونادية لطفى القديمة ، والبعض الاخر من افلام ناهد شريف ، مع الفرق طبعا ان دلوقتى بيتلبس تحتها حبيب الملايين وفتى الشاشه الاول البادى الكارينا

طب واللى زيى بقى يعمل ايه؟ يعنى الناس اللى واقفه فى مرحلة عمرية ما بين 29 او 30 لحد 40 يلبسوا ايه ، يعملوا زى بنات الاعدادى والثانوى ويعيشوا دور السندريلا بفستانها المنفوش -بس المهم تحته الكارينا والبنطلون-او يشوفولهم بادى يدخلوا فيه زى كيس المخدة

ولا يسلموا امرهم لله ويعبوا نفسهم جوا اى شوال ويزودوا فوق سنين عمرهم سنين لمجرد انهم مش لاقيين حاجه مناسبة

جايز يكون فيه نوعيات لبس تانية وانا مش واخده بالى ؟ بس ليه كل ما بنزل ادور مش بلاقى غير الحاجات دى ، حتى الخامات بقت مختلفه وغريبة ومش مناسبة للجو اللى كل يوم الحرارة بتزيد فيه عن اللى قبله ، خصوصا خامات البديهات اللى بقت فرض قومى على كل الناس لازم تلبسه ، بعد ما كل مصانع الملابس بقت تنسى تركب كمام للهدوم

وبعدين باى حق يتفرض ذوق محدد على كل الناس ، لدرجة بقيت احس ان كل الناس ماشية لابسه شبه بعضها ومفيش اى تميز ، ودى حاجه مستفذه بجد ، لان الناس بتلاقى مفيش قدامها بديل خصوصا وان كل المحلات عارضه نفس الحاجه بنفس الاذواق ، يبقى الناس تعمل ايه؟ وليه الناس اللى بتصنع الملابس مش بيحاولوا يراعوا كل المراحل العمرية بدل ما بيصبوا كل اهتمامهم على الناس الصغيرة فى السن بس ، ولا علشان هم دول القوة الشرائية فى مصر دلوقتى ؟

ولكل ما سبق من اسباب بلاقى نفسى بعد لفتى ودوختى برجع ايد ورا وايد قدام حتى ما حصلتش حنين -على الاقل حنين رجع بخفيه وطلع بحاجه - واقف نفس وقفتى قدام الدولاب ، واسأل نفسى نفس السؤال ، ألبــــــــــس ايــــه؟؟؟؟؟

واهـــــــــــو ده عيبـــــــــــــــــــه

البســــاطه

2008-06-29T21:24:00.009+03:00

تحـــــديث

----------

بناء على رغبة فاتيما اللى عجبها اللوجو ، انا هحطه هنا واى حد عايزه يعمل كليك ويفتحه فى صفحه لوحده وياخد منه نسخه

" لا اؤمن بكتابه تنفر القارئ ، او تعجزه عن بلوغ المقصود ، حرى بمثل هذه الكتابات ان لا تغادر ادراج المكاتب ، لست مع القارئ فى حلبة مبارزة يستعرض كل منا عضلاته ، ولا الجأ لوسائلنا الانتهازية اللغوية والبيانية لهزيمته التى لا يعوزنا منها شئ لممارسة القهر مستغلين ما ينوء به الواقع من جهل وسطحية واحوال فكرية ندركها جيدا

لا احب التمايز او التعالى وانما افرح بالسير فى الدروب المطروقة ، والدخول من الابواب التى تعود البشر العاديون على الدخول منها امنين

إن اعجاز الكلمة يكمن فى قدرتها على مخاطبة البسطاء وغير البسطاء فى نفس الوقت ، وتحقيق متعه الاكتشاف للكاتب اثناء الكتابة ، إذ لو لم تمتعنا الكتابه فلماذا نمارسها ؟"

طبعا الكلام الرائع اللى فات ده مش كلامى ، ده كلام الشاعر الكبير عبد الرحمن الابنودى فى مقدمه احد كتبه ، واعتقد انه قدر يقول بايجاز كلام كتير من اللى حابه اقوله

*****

كتير الواحد بيقرا كتابات بيحس ان الهدف منها تعجيز القارئ مش اكتر ، وكان الكاتب عايز يثبت انه الوحيد اللى فاهم نفسه ، او زى ما بيقول شاعرنا الكبير كانه داخل فى منافسه مع القارئ واستعراض عضلات ، واستغلال الكاتب وصوله لمستوى معين من الثقافه والوعى يجعله ينظر للقارئ من مستوى اعلى وكانه افضل منه

*****

للاسف بعض الكتاب بيستخدموا الفاظ او كلمات قد يعجز حتى المتعلمين عن فهمها ، فما بالك بالبسطاء وانصاف المتعلمين ، رغم ان المساله لا تقاس بالشكل ده والدليل على كده كتير من الكتاب والمبدعين اللى اثروا حياتنا بدون تعقيد

*****

محفوظ لم يصل للعالمية الا من خلال كتابته عن الحرافيش والمهمشين وبساطه اسلوبه ، احسان عبد القدوس كان قادرا على التعبير عن اعمق المشاعر بابسط الكلمات ، لم يستخدم يوسف ادريس الفاظ مقعرة للتعبير عن النفس البشرية وخباياها ، حتى الابنودى نفسه عشقناه من قصائده المشبعه بالبساطة والالفه

*****

سحر الكلمة وجمالها فى البساطه ، التى تجعلها تصل الى قلب وعقل المتلقى مهما كانت درجه ثقافته او تعليمه او استعداده الفكرى ، ومش معنى بساطه الكلمة ان تكون مبتذله او مسفة ، بالعكس احيانا ابسط الكلمات تكون ارقاها

*****

اما الكاتب الذى يرى نفسه ارقى من ان يهبط الى مستوى القارئ ويرتقى به ، او يعتبر بساطه الكلمة والاسلوب شئ يعيبه او ينتقص من قدره فزى ما قال الابنودى يخلى كتاباته فى درجه احسن ، ويبقى ريح واستريح

واهــــــــــــــو ده عيبـــــــــــه

*المقدمه من كتاب اخر الليل للابنودى

هلا ترفقت بى

2008-06-21T02:01:00.006+03:00

لا اعرف بما اناديك، هل اناديك رفيقى ؟ فلطالما رافقتى عمرا طويلا ، لكنها لم تكن يوما بالرفقة المستحبه ، لطالما اتعبتنى وانهكت قواى وانا مستسلمة لك لا اقوى على التحرر منك ، وانت تأبى ان تكف عنى او ترحل

كلا لن اسميك رفيقى ، لا يكفى ان تلازمنى دهرا كى تستحق اللقب ، انت لا تعدو ان تكون قيدا يكبلنى لا يغادر معصمى ، لم اضعه بارادتى او اختار تكبيله لى ، وانا والقيد لا نترافق

اذن فلاسميك عدوى ذلك اوقع ، ولكن مهلا ، انا اعلم انك لاتضمر لى العداوة ، هو فقط قدرى وقدرك ، قدرك ان تلازمنى وقدرى ان اتحملك جاثما فوق راسى متحكما بحياتى ، لذا اعتقد انه ليس من العدل ان ادعوك عدوى ، هذا عملك ليس اكثر

لن يغير من الامر شيئا ان اخلع عليك لقبا ، ولكن الا تسطيع ان تغض الطرف عنى ولو قليلا ، أيجب ان تؤدى عملك بكل هذا القدر من التفانى ؟ قليل من التساهل لن يضيرك - خاصه وانك تعلم بعودتك مرة اخرى لا محاله - ولكن تساهلك سيمثل لى الكثير

اتدرى انك حين تغيب عنى فترة احس بخوف ، لانى اعرف انك ستعود أشد واقوى ، ستباغتنى اذا ما استيقظت مبكرا ، او اذا ما دللت نفسى بمزيد من النوم ، ستهاجمنى فى لحظة السعادة كما فى وقت الالم دون تفرقه ، كانك تأبى الا ان تعكر صفو ايامى على اختلافها

كثيرا ما سمعت عن العرض الزائل ، لكنك فى حياتى عرض لا يزول ، اعرف كنهك لكنى لا اعرف سر ملاحقتك اياى ، لم اصرارك على ملازمتى دونما ابداء اية اسباب ، محاولتك السيطرة على عقلى وتفكيرى ومنعى من الاستمتاع حتى بابسط الاشياء

احيانا اود لو انتزع رأسى من فوق كتفى ، واركلها بعيدا بعيدا ، اركلك معها، اتابعك عن بعد وانت تلهو بها كما تشاء ، لا اشعر ، لا اشكو، لم يعد الرأس رأسى فافعل به ما تريد

لكنه الحلم بالمستحيل ، فكما تسكن انت رأسى ، تسكنها اشياء اخرى لا اقوى على فقدها ، مجبرة انا على الاحتفاظ بهذا الرأس، مجبرة على التعايش معك و الاستسلام لك ، لذا ان كان قدرنا الا نفترق ، استحلفك بالله هلا ترفقت بى

الى من لازمنى دهرا ولا يزال/ الصداع

تلت التلاته كام ؟

2008-06-14T18:48:00.006+03:00

غريب جدا كمية الجمل اللى بنقولها فى حياتنا من غير ما نعرف ايه معناها ولا اتقالت ليه وامتى ، ومنهم جمله تلت التلاته كام ؟ اللى بقالها يومين بتزن فى دماغى ومش عارفه افسرها !!

*****

الجمله دى غالبا ما تقال لاثبات القوة ، زى لما تقول لحد انا محدش يقدر يقوللى تلت التلاته كام ، مع انى والله حسبتها على ايدى وعلى الالة الحاسبة والعداد اليابانى وكل مرة كنت بلاقى ان تلت التلاته واحد مفيش غيره

*****

طب يبقى فين التعجيز مهى سهله اهى واى حد ممكن يعرفها ، اكاد اشك ان الجملة دى اتقالت فى ظروف غامضة لم يكن وقتها قد تم اكتشاف الرياضيات او القسمة او الكسور ، فبالتالى وقتها كانت معضلة حقيقيه انك تعرف الحل ، وان من حقك تحس بالتفرد لو كنت من علية القوم اللى يعرفوا حل المعادلة الرهيبة دى اللى محتاجه اينشتاين يحلها

ويوم ما تعرف الحل يبقى من حقك تمشى نافش ريشك وتهدد الناس كلهم بانك هتعرفهم تلت التلاته يبقى كام ، وكأنك بتهددهم بالقاء لعنه عليهم او قنبلة نووية

*****

الغريب ان اللى قال الجملة دى كان ممكن يصعبها شوية ، يعنى يقول انا هعرفكم الجزر التكعيبى لـ791562 مثلا اهى برضه تبقى مبلوعه وتخض كده اللى تتقال فى وشه وتلجمه ، يقوم يعرف قيمة اللى قدامه ويقَدر بيكلم مين ، انما تلت التلاته دى اى عيل صغير فى الشارع يعرف يحلها

*****

الجمله كمان زى ما بتدل على القوة ممكن تدل على الضعف لما الواحد يقول مثلا ضغطوا على ومقدرتش اقولهم تلت التلاته كام ، مع انه لو كان فكر شوية وحسبهم على صوابع ايده كان عرف الحل وموقفه اتغير من مغلوب على امره لغالب ومكنش اتحط فى الموقف الوحش ده

*****

ساعات كمان تستخدم للدلاله على الجهل ، زى ما تقول لواحد اسكت ده انت متعرفش تلت التلاته كام ، ال يعنى ايش يكون هو علشان يعرف الحل ، ولو انها مش بتستخدم بالمعنى ده كتير لان الناس بتفضل جمله متعرفش الالف من كوز الدرة اللى محيرانى هى كمان ومسيرى اعرف مدلول كوز الدرة وتاثيره على الالف

*****

الظاهر والعلم عند الله ان الناس اللى اخترعوا الجملة دى -اذا كنا نقدر نسميها مجازا اختراع على اعتبار انها نظرية رياضية- مكنش على ايامهم غير الواحد الصحيح ، يعنى لا فيه كسور اعتيادية ولا عشرية ، فاكيد معرفوش تلت الساعه يطلع كام دقيقه ، ولا كانت حصه المواطن من العيش ايامهم متزيدش عن تلت رغيف بالعافية ، ولا استخدموا فى مقادير الاكل تلت معلقه او تلت كبايه زى برامج الاكل ، ولا كانز الحاجه الساقعه ايامهم كان حوالى 330 مليلتر يعنى بتاع تلت لتر كده وبالشئ الفلانى ، والاهم من كل اللى فات ماخدوش علاوة 30% على المرتب اللى لا مؤاخذه توازى بالتقريب تلت المرتب

*****

يعنى الناس دى اكيد معاها عذرها ، لان اكيد اول واحد اكتشف الاكتشاف الخطير ده احتفظ بيه لنفسه ويمكن لم ينقله الا للقدر اليسير من الناس ، اللى بالتالى لم يفشوه لاحد وكانه سر الاسرار ، ففضل باقى الناس الغلابة محتاسين ومش عارفين تلت التلاته يطلع كام

*****

لكن احب اقولكم ان الزمن اتغير خلاص ، والحمد لله ربنا انعم علينا بنعمه المعرفه ، والالة الحاسبة بقت فى الموبايل والساعه يعنى لما ييجى حد يقولك متقدرش تقولى تلت التلاته كام ، قوله ثانية واحده وطلع موبايلك واحسبهاله وحطها فى وشه علشان يرتجع ويعرف ان الله حق

*****

ياريت نبطل نردد جمل منعرفش معناها ، ولا اتقالت امتى وليه ، واتمنى ان اللى يعرف معناها او مقصود منها ايه ينوبه ثواب يقوللى ، ويعرفنى تلت التلاته يطلع كام عن حق !!!

واهــــو ده عيبــــه

*التدوينة مجرد تهييس من حر الصيف مش اكتر

ســـــب وقــــــذف

2008-06-09T23:06:00.003+03:00

اليوم 9/6/2008 ميعاد نظر محكمة جنح الزهور -بورسعيد- فى القضيه المرفوعه من شركة تراست للكيماويات ضد المدون البورسعيدى تامر مبروك صاحب مدونة الحقيقه المصرية بتهمه السب والقذف ، بسبب كتابته عن المواد الكيماوية التى تلقى بها الشركة فى بحيرة المنزله وقناه السويس ، بالاضافه الى ظروف العمل القاسية التى يعانيها العمال وكانت سبب فى قيامهم باعتصام يطالبون فيه بوقف حالات الفصل وحصولهم على نسخ من عقود عملهم بالشركة

*****

القضيه دى لاقت تنديد من جمعيه مساواة لحقوق الانسان ومن الشبكة العربية لمعلومات حقوق الانسان التى تتولى الدفاع عن تامر مبروك ، واكدت الشبكة العربية لحقوق الانسان ان هذه القضيه تعد اول قضيه سب وقذف فى مصر ترفع ضد مدون بسبب نشره وقائع عن تلويث البيئة ، خاصه ان ملف القضيه خال من اى كلمات او تعبيرات يمكن تفسيرها بالسب او القذف

ولكن الهدف الاساسى من القضيه اسكات اى مدون يكتب عن جريمة تلويث بحيرة تربط العديد من مدن ومحافظات مصر ، وان الصور والمستندات الموجودة بالمدونة خطيرة وتستدعى التحقيق

كما اكدت جمعيه مساواة لحقوق الانسان ان تلك القضية ما هى الا حلقه جديدة من مطارة المدونين واسكاتهم

*****

ده كان ملخص للخبر اللى نشر انهارده فى جريدة الدستور فى صفحتها الرابعه وممكن تقراه من هنا

*****

بصراحه حزينة جدا من ساعه ما قرات الخبر ، وحزينة انى متعرفتش على مدونة الحقيقة المصرية ولا على تامر مبروك كمدون غير من خلال الخبر وده عن تقصير منى خصوصا وانها بتناقش قضايا مهمه موجودة فى مدينتى ، وواضح ان تامر مش هيكتفى باللى كشفه عن شركة تراست بس ، لكن فى خطته بحث عن تجاوزات مصانع اخرى واهمها مصنع اجرييوم اللى عايزين يبنوه فى بورسعيد بعد رفض اهالى دمياط !!

*****

الاخطر من كده ان القضيه اللى تعتبر الاولى من نوعها مش هتكون الاخيرة ، لان بالطريقه دى كل واحد هيتكلم عن حاجه او يناقش مشكلة هيبص يلاقى قضيه مرفوعه عليه ، وكان الناس دى فجأة صحيت واكتشفت ان فيه حاجه اسمها تدوين و مدونين ، ومحتارين يحجمونا ويكتفوا ايدينا وافكارنا ازاى ، مرة يعملوا اتحاد معرفش امتى وازاى علشان يقولولنا نكتب ايه ومنكتبش ايه ، ونمشى على قواعد وقوانين غير منطقيه ومش عارفه مين اللى حطها اصلا ، يبقى من الاخر نقفلها احسن وبلاها تدوين

*****

والمرة دى الموضوع بقى قضية لمجرد الكلام عن معاناه عمال او مخالفات تهدد البيئة ، معنى كده ان اى حاجه الواحد يشوفها من هنا ورايح يعمل نفسه مش واخد باله وميجيبش سيرة حد طالما الموضوع هيبقى سب وقذف وكلام من ده ، او يكتب عن نفسه وبس اضمن، وبصرف النظر عن صحه اللى اتكتب من عدمه لان دى حاجه يحددها القضاء لكن السؤال هل من حقى اعبر عن رايى ولا لا ؟ هل من حقى لو شفت حاجه غلط اقول عنها ولا لا ؟ ولا التدوين هيتحول لمجرد تسلية وفرفشة مش اكتر ومش من حقنا نحاول رصد اى حاجه بتحصل حوالينا

*****

الظاهر يا جماعه التدوين دلوقتى بقى الكالو اللى طالع فى قفاهم بينغص عليهم عيشتهم ومش عارفين يشيلوه ازاى ، ويارب ما يعرفوا يشيلوه ، الا بقى لو شالوا قفاهم

واهــــــــــــو ده بجد عيبـــــــــــه

عم احمد جاب سيرتنا يا ولاد

2008-06-05T22:21:00.008+03:00

انهارده كنت فى قمة السعاده لما وصلتنى رسالة من جروب مدونات مصرية للجيب على الفيسبوك كتبتها العــزيزة ايناس لطفى دنيا محيرانى بتقول فيها ان عم احمد فؤاد نجم كتب انهارده فى عموده حلاوة زمان بالدستور عن كتاب مدونات مصرية للجيب

*****

اتارى دى مش اول مرة عمنا الفاجومى يكتب عنه ، بعد ما قابله ايهاب عمر واعطاه نسخه من الكتاب ، فكتب اول مقال بعنوان العيال رجعوا تانى عن ولاده جيل جديد من العيال اللى بتتكلم وبتقول رايها وعن لقاءة بايهاب وبداية تعرفه بمشروع وطن وفكرة كتاب يجمع المدونين على اختلاف كتاباتهم

*****

اما المقال التانى اللى بتاريخ انهارده 5/6 بعنوان بداية الرحله فكان استكمالا لتعرفه على المدونين ورايه فينا اننا عيال بيور مقدرتش علينا محاولات الاباده بكل انواعها ، واشادته بمقدمه الكتاب اللى كتبها احمد البوهى ، وتاكيده باننا ناقلين للجينات المصرية واهمها خفه الدم، كمان ذكر بعض المدونات منها مدونة سكوت هنصوت ، ومدونة عايزة اتكلم ، ومدونة البنت الشلبية ، ومدونة بنت خيخه واى كلام ، ومدونة بنوته لاسعه ، ومدونة يوميات عيل مصرى ، ومدونة الفقيرة الى الله اهو ده عيبه

كما ابدى اعجابه بشعر احمد عصام و شعر محمود موسى

*****

اه والنبى يا ولاد انا اسمى مكتوب ، الواحد قلبه كده اتشرح واتبسط مش بس علشان الكتاب خرج بالشكل اللى توقعناه ونال القبول والاعجاب ، لا ده كمان دخل دماغ عمنا الفاجومى والا مكنش كتب عنه مرة واتنين ومفيش حاجه بصراحه تجبره على كده وانتوا عارفينه

وعلى راى صديقى العزيز هشام فى مدونته كلام هشام ان كلام عم احمد نزل علينا بردا وسلاما وبل ريقنا ربنا يكرمه وحسسنا ان فيه مننا امل وان اللى بنقوله ده ممكن يتسمع ويسيب اثر عند الناس

*****

اتمنى بجد اننا نفضل زى ما عم احمد شايفنا دماء جديدة متجددة ، راى حر لا يخاف او يهاب ، لسان حال الشارع المصرى بكافه اتجاهاته وتوجهاته ، والاهم اننا نفضل عيال بيور ومفيش حاجه تقدر تغيرنا

والمرة دى الحكاية مفيهاش عيوب خالص

الحقيقة العارية

2008-05-28T12:54:00.016+03:00

يروى انه فى قديم الزمان كان هناك ملك قليل العقل يفتقر الى الحكمه ، اقنعه احد المحتالين بقدرته على ان يحيك له ثياب لا يراها الا الاذكياء والمخلصين ، اما الاغبياء والخونه والحاقدين فليس لديهم القدرة على رؤيتها

*****

واستمر هذا المحتال فى طلب الاموال من الملك لنسج الثوب الوهمى ، حتى جاء اليوم الموعود، وبدأ الملك فى الاستعداد للخروج على شعبه فى موكب مهيب ، اتاه الحائك المحتال وشرع ينزع عنه ثيابه قطعه قطعه امام وزرائه واعوانه حتى عاد كما ولدته امه ، ثم تظاهر بانه يلبسه الثوب الجديد ، لم يشعر الملك بشئ يذكر على جسده لكنه لم يجرؤ على الاعتراف بعدم قدرته على رؤيه الثوب، والا كان اعترافا صريحا منه بانه غبى !!

*****

اندهش اعوان الملك لوهله مما رأوا ، ثم ما لبثوا ان ابتلعوا الصدمه ، وتذكروا ان اعترافهم بعدم القدرة على رؤيه الثوب لهو اعتراف منهم بالخيانه ، فتظاهروا جميعا برؤيتهم للثوب ، بل وبالغ البعض فى مدح جماله وفخامته ، ومهارة الصانع !!

*****

اطمئن الملك لمظهره ، ظنا منه ان اعوانه يصدقونه القول ويرون ما لا يقدر على رؤيته ، وخرج من القصر فى عربة ليطوف المدينة ، لم يصدق الناس ما رؤوا ، البعض اشاح بوجهه والبعض اخذ يدقق النظر ، لكن احدا لم يجرؤ على الاعتراف بان الملك يجوب المدينة عارى الجسد ، فالاعتراف معناه الموت ، مرت دقائق من الصمت تلتها بعض الهمهمات عن جمال الثوب وتصميمه ، ثم بدات تعلو الاصوات حتى صارت هتافا للملك وحسن اختياره لمظهره

*****

وفجأه حدث ما لم يكن فى الحسبان ، ظهر طفل صغير من وسط الحشود ودقق النظر فى الملك ، ثم اشار اليه باصبعه وقال "الملك عار" ، ساد صمت عميق واتجهت الانظار ناحية الطفل، حتى ان والده قال بانكار "لمن هذا الطفل ؟" حتى يدرأ عن نفسه تهمه الخيانة بسبب ما فعله ابنه ، لكن الصمت لم يدم كثيرا وكأن صيحه الطفل ايقظت العقول النائمة ، وبدأ الناس فى استعاده رشدهم ، الملك فعلا عارى الجسد وبدات تعلو الاصوات من جديد ، لتعلن عرى الملك ، الذى اخذ يقود عربته مسرعا الى قصره وهو يدارى سوئته ، لم يكن ابدا ليتحمل الحقيقه ، الحقيقه العاريه

*****

القصه رغم قدمها الا انها تناقش بعضا مما نعانى منه اليوم ، من طمس الحقائق او الخوف من اظهارها، حتى وان كانت جليه كالشمس ، والخجل من الاعتراف بالجهل او عدم المعرفه او حتى بالخطا، والتمادى فى انكار الحقيقه حتى على النفس

*****

الى متى سيظل صمتنا عن الحقائق خوفا من ان نتهم بالغباء او الخيانه؟ ، الى متى سنظل نسير كالقطعان تقودنا العصا كيفما تشاء ونحن معصوبين الاعين بارادتنا ؟ ربما خوفا او طمعا او تملقا ، ايا كانت الاسباب فليست مبرر ان نتغاضى عن الحقائق او ان نتجاهلها، ولا سببا لتزييف الواقع ، بل والتمادى فى تصديق الزيف

*****

ربما نحتاج الى هذه الاصبع الصغيرة لتشير الى الحقيقه العارية التى لا ندركها ، ولننفض عنا الخوف ، ولنعلم ان الحقيقه ستحررنا

*القصه لهانز كريستيان اندرسون باسلوبى

*التدوينه اسلوبها مختلف فارجو معرفه رايكم

وكان يوما

2008-05-23T22:02:00.006+03:00

كان يوم جميل جدا بكل المقاييس ، مكنتش عارفه ان حفل توقيع العدد الاول من كتاب مدونات مصرية للجيب هيكون حلم وفرح كل الناس دى ، وبالشكل الجميل ده وماشاء الله بالعدد الكبير ده من المدونين وغير المدونين اللى شرفوا الحفل بوجودهم لدرجه ان المكتبة بقت شبه يوم الفرح فى فيلم ام العروسه، مفيش مكان لرجل والناس واصله لحد السلم

*****

بالنسبة لى اليوم بدأ بدرى جدا من حوالى الساعه الواحده ظهرا ، لما اتقابلت بشيماء الجيزى (صحفية مع ايقاف التنفيذ ) بلدياتى علشان نسافر مع بعض ، وسعدت انها كانت اول واحده اتقابل معاها وتقريبا قضينا مع بعض 12 ساعه بس كانوا لذاذ رغم التعب والمجهود

*****

وصلنا المكتبة بدرى قوى يمكن قبل الساعه 5 ، لقينا خالو احمد الصباغ ملك التغطية الاعلامية فى الانتظار ومعاه ابراهيم عادل (مدونة انا وانا ) اللى بصراحه اليوم ده قام بالواجب وزياده وكان بيتحرك وسط الفرح كانه ابو العروسه وسعيده جدا انى اتعرفت عليه

*****

كمان كان موجود ايهاب عمر (مدونة ايهاب عمر ) وهو شخصيه ظريفه جدا ومرحه

وبعد شوية وصل الاستاذ احمد القاضى (المراكبى ) وبصراحه شخصيه فى منتهى الذوق والهدوء والرصانه وجه مخصوص من جده علشان الحفله

وشوية وجه هشام علاء (كلام هشام ) ولقيته طيوب جدا وهادى قوى

ومحمد مفيد ( فى الصميم ) اللى سعيده انى اتشرفت بمعرفته

وبعد شويه جه احمد البوهى بس ماسعدنيش الحظ بالكلام معاه

وصلت رحاب (كوكب ابى ) لقيت نفسى بقولها فى وسط الناس ابى انا الحله واخدنا بعض بالاحضان والقبلات

وبعد كده بصراحه الموضوع وسع منى قوى مبقتش ملاحقه

بس هحاول على اد مااقدر افتكر كل الناس

الاستاذ احمد محمد على ( يوميات عيل مصرى) سعيده جدا بمقابلته والتعرف عليه

ابونا كلنا ابو خالد اللى جه مخصوص من بورسعيد علشان يكون معانا

وبجد الراجل ده ابونا كلنا بمعنى الكلمه

حبيبتى وروح قلبى من جوا فاتيما ( روح قلب ماما ) مكنتش مصدقه انى هشوفها وكان نفسى اديها حضونه كبيرة قبل ما امشى واللى هيقولها ماما بعد كده هزعله دى حلوة واصغر منكم كلكم

عم الشباب والرياضه احمد سوووو مش عارفه اوصفلكم سعادتى انى اخيرا شفته

وكان نفسى اعرف السندوتش اللى معاه فيه ايه

احمد رفعت (قضيه عم احمد ) شخص لطيف جدا ومهذب وسعيده بمقابلته

اشرف توفيق ( اخف دم ) للاسف شفته متاخر قوى بس لحقت اسلم عليه

مروة ( لماضه ) كتكوته جدا وشربات فوق ما تتخيلوا

فريده ( حكايات فريده ) كنت متخيلاها اكبر من كده بس ماشاء الله جميله جدا شكلا ومضمونا

المفقوعه مرارتها بجد حرام اللى فيفى بتعمله فيها لانها رقيقه جدا وعسوله قوى

رئيسة حزب الاحلام شخصيه جميله قوى وهاديه

رودى ( بنوته مصرية) كنت فرحانه قوى لما شفتها وكمان علشان فى بينا صديق مشترك محمد ( الولد الشقى ) اللى كان نفسى يكون موجود

محمود الدوح من الناس اللى شفتها فى الاواخر للاسف

احمد سكر من الناس اللى اتعرفت عليها برضه متاخر

لكن للاسف بعد كده اكتشفت وجود ناس كتيييييييييييررررر قوى ملحقتش لا اكلمهم ولا اسلم عليهم

شمعى اسعد ، وينكى ، شريف ( سيبو فى حالو ) ، محمد ابو زيد ( دكتور حر )

صاحب المضيفه ، الاستاذ محمد شلبى ( عصفور المدينة )

ايناس لطفى اللى كنت فاكرة انا وشيماء الجيزى انها مجتش لولا انها كلمتها بعد كده

وتامر نبيل اللى بقوله سلامتك الف سلامه

وغيرهم كتير جدا كنت اتمنى اتعرف عليهم

ده غير الناس اللى مقدرتش تحضر ومنهم نوران ( بنت خيخه ) كان نفسى اشوفها بجد وسالت عنها فاتيما

وسامحونى واعذرونى اذا كنت نسيت حد من اللى قابلتهم واتعرفت عليهم او من الناس اللى كانت حاضرة

العدد كان ما شاء الله كبير جدا وغير كده كنت مضطرة امشى علشان السفر

وملحقتش اتعرف على كل الناس ودى حاجه مزعلانى قوى بس اللى مفرحنى ان كل الناس دى جايه علشان بتحب بعضها بجد واللى بيربطهم صداقه كلمه وراى حتى لو عمرهم ما اتقابلوا

الحمد لله حفل ناجح بغض النظر عن اى حاجه ممكن تكون حصلت او حتى الزحمه والحر

سعيده انى لقيت ناس حبونى وحبيتهم وفرحوا لما شافونى

وناس قروا ولو حاجات بسيطة فى المدونة ، وناس اتيحت ليا الفرصه انى اعرفهم لاول مرة

للمرة التانية اسفه بجد اذا كنت نسيت اى اسم

اليوم بجد كان يوم فرح لينا كلنا

وان شاء الله نقدر نتقابل كلنا مرة تانية وثالثه وعاشرة

والمرة دى يمكن يكون ده البوست الوحيد اللى مش هقدر فى اخره اقول

اهـــــــو ده عيبـــــــــه

نفضنا يا ابن الغالى

2008-05-21T10:35:00.003+03:00

امبارح كانت حلقه القاهرة اليوم لعمرو اديب غاية فى الاستفزاز ، ليه بقى ، لان البرنامج كان بيناقش موضوع قانون الضرائب العقارية الجديد اللى تم سلقه بمنتهى السرعه من قبل يوسف بطرس ابن الغالى مسئول الجباية فى مصر وذلك لتنفيض الشعب المصرى من اخر قرش فى جيبه

*****

الفكرة كلها ان بعد العلاوة السودة اللى الناس ملحقتش تتهنى بيها اصبح الشغل الشاغل للحكومة ازاى ترجع العلاوة تانى اضعاف مضاعفه، فطبعا بديهى ان الحل الامثل زيادة الضريبة على اى حاجه او اختراع اى ضريبة جديدة المهم يلموا القرشين علشان تجبر

*****

الحلقه كان فيها ضيفين ، احدهما الرئيس الاسبق لمامورية الضرائب العقارية والاخر هو احد اعضاء مجلس الشعب المعارضين للقانون الجديد

*****

والصراحه ان رئيس المامورية الاسبق كان معترض شكلا وموضوعا على القانون بكل جوانبه ، لكن الاول شرح ايه هو القانون الحالى وده اللى لازم اديكم فكرة عنه علشان تعرفوا مدى الظلم الجائر اللى ابن غالى ناوى يعمله

*****

القانون الحالى بيقول ايه، تحتسب الضريبة العقارية على الوعاء الضريبى بعد خصم 20% من القيمة الايجارية كمصروفات ، بمعنى ان انا لو عندى عمارة فيها شقق باجرها بتطلعلى فى السنة مثلا 100 الف جنيه يبقى يتخصملى 20% وادفع ضرائب على الباقى اللى هو 80 الف جنيه ، لحد كده حلو

الكلام ده للناس اللى بتأجر شقق ، اما اصحاب الشقق التمليك او اللى شارى فى مشروع او جمعيه او كل الكلام ده فمعفى من الضريبة العقارية بنص قانون سنة 1981

*****

جه بقى سى غالى يقولك ايه ، الكلام ده مينفعش ازاى الناس دى متدفعش ، خصوصا بعد ما زادت الابراج والفيلات والقصور وشاليهات الساحل وكل الحاجات بتاعه الناس الاغنيا فلازم الناس دى تدفع ضريبة عقارية، ماشى لحد كده انا معاه ان الناس دى تدفع ضريبة ، مادام معاهم يبقى يدفعوا وماله واهو نبقى شوفنا منهم حاجه

*****

المشكلة بقى فى انه عايز يعمم القانون على مخاليق ربنا كلهم ، يعنى اللى بانى قصر زى اللى طلع عين اهله على ما عرف يجيب شقه، والمصيبة الاكبر ان الضريبة هتتحسب على قيمة العقار الشرائية الآنيه ، بمعنى ان يوسف بيه مالوش دعوة انك من 20 سنة كنت شارى الشقه دى ب50 الف جنيه ، هو هيحاسبك انها انهارده بنص مليون ، واحسب انت بقى 10% ضريبة يطلعوا كام

*****

وعلشان طبعا يقدر يحدد القيمة السعرية دى ، فهيكون فى لجان مخصوص تلف جمهورية مصر الموكوسة علشان تحصر المبانى والعقارات وتتمنها ، وبناء على قرار اللجنة دى حضرتك تعرف هتدفع كام ؟ ومادام لجنه يبقى اكيد هتتحكم فيها الاهواء ، والرشاوى والظلم الجائر والمحسوبية وكل البلاوى

*****

الغريب انهم لما طلبوا من الوزير يحدد شكل تطبيق القانون او النسب اللى هيشتغل على اساسها ، قام جابلهم ورقتين كده فيهم شوية نسب حاسب على اساسها الضريبة ، لا تمت لاى قاعدة ضريبية او رياضيه او تباديل وتوافيق ولا حتى سيجا

*****

اما راى عضو مجلس الشعب فكان ان القانون جائر على كافه القطاعات

اولا قطاع الحكومة: لان علشان تعمل اللجان دى وتجيب موظفين وتدفعلهم وتحصر المبانى وكل الليلة دى علشان منتهى امل وزارة المالية انها تلم 2 مليار جنيه، تبقى حسبة خسرانه وكان ممكن تحاول تلمها من خلال تحسين الاداء الزراعى او الصناعى من خلال الوزارات التانية ، بس ليه ده يحصل مادام سى يوسف موجود

*****

ثانيا بالنسبة للشعب: ازاى اطالب واحد قاعد فى بيت اشتراه بشق الانفس او ورثه انه يدفع ضريبة عن قيمة انهارده، يعنى افرض واحد وارث بيت فى حى راقى وممكن يكون مش لاقى ياكل او يدفع الضريبة يبقى ازاى، يعنى انا مثلا شقتنا دى يوم ما اشتريناها من حاجه وعشرين سنة كانت لا تتعدى 50 الف جنيه، دلوقتى بسعر السوق ممكن توصل 180 الف مثلا هل معنى انى قاعده فى عقار قيمته بالتمن ده انى اقدر ادفع كل سنة مبلغ ضريبة اد كده ، ولا هى مثلا حاجه بتجيبلى ايراد علشان يبقى من حقهم يطالبونى بضريبة ؟

*****

ثالثا القضاء : الموضوع ده هيعمل ضغط على العملية القضائية ، لان الناس مش هتقبل تدفع بالساهل ، وبالتالى هتبدأ تقدم طعون تتحول بعد كده لدعاوى واضرب بقى كام مليون بنى ادم مش هيدفع فى كام قضية وتخيل الوضع هيبقى ازاى

*****

الصراحه ان كان ولابد من الضريبة ، يروح يفرضها على اصحاب العقارات اللى برا كوردون المدن ، زى القصور والشاليهات والكلام ده ، لكن ميجيش على واحد مثلا كل اللى حيلته بيت مهكع فى منطقه شعبية ويقوله ادفع ، وخدوا بالكم ان ده هييجى برضه على دماغ المستاجر مش بس صاحب الشقه الملك ، لان بالوضع ده اصحاب العقارات هتطالب برفع الايجارات علشان يقدروا يدفعوا الضريبة ، وهما اصلا لسه معرفوش راسهم من رجليهم فى موضوع قانون العلاقه بين المالك والمستاجر

*****

ابوس ايدك يا بتاع الجباية ارحمنا ، البعير هلك ، روح اتشطر على الناس اللى معاها ، اللى اتحدى لو واحد منهم دفع تعريفه فى الحكاية دى ، لان بمنتهى البساطه ممكن تجيله اللجنة يديها قرشين تمسح قصره او فيلته من خريطة مصر كلها وكانه نسيا منسيا، ولا انت عايزنا نسيب البيوت ونقعد فى خيم الايواء ، المصيبة بقى انه يكون هيدفع بتوع الخيم هما كمان،السؤال اللى بيطرح نفسه يا ترى ابن الغالى هو وولاده واخواته والوزرا واللى معاهم والناس دى كلها اللى عندهم بدل البيت عشرة هيدفعوا فى الليلة دى ، ولا هنتنفض لوحدنا ؟

واهـــــــــــو ده عيبـــــــــــــــه

لو قابلت الست دى قول يا فكيك

2008-05-16T12:42:00.015+03:00

بما ان المساواه فى الظلم عدل ، فمن العدل عزيزى هو انى اقولك شوية حاجات لو لقيتها فى الست يبقى تقول يا فكيك

النكـــــــــــــدية

هو: السلام عليكم

هى: ايه اللى جابك بدرى كده من الشغل؟ انا لسه مطبختش وورايا غسيل وو......

هو: طب ردى السلام الاول ، انهارده يا ستى اخدت مكافاة من الشغل فقلت امشى بدرى واشتريلكم شوية حاجات

هى: ياما جاب الغراب لامه، ايه اللى يخليك تروح تشترى كده من نفسك ، انت عارف ان ذوقك وحش كنت اديتنى الفلوس اجيب انا

هو: يعنى دى جزاتى، الامر لله ، عدينى بقى خلينى ادخل اريح شوية علشان هنخرج بالليل نتعشى برا

هى: تعدى فين، انت مش شايف الارض لسه ممسوحه استنى مكانك لغاية ما تنشف ، ولا انا الجارية اللى جابوهالك

هو: @!؟# روحى يا شيخه اللهى ينكد عليكى زى ما نكدتى على

خميرة عكننه، هدفها الاساسى انها تكرهك فى الحياه وتقضى على شوية الامل اللى عندك ووسيلتها فى كده البوز المتين اللى بيظهر مع اى حوار او مناسبة او مبادرة منك او اقتراح لاى حاجه، وساعات بيكون مش محتاج سبب علشان يظهر لان بيبقى خلاص الوش اطبع ع القالب ده ، واحب اطمنك ان مفيش فايدة حتى لو ادتلها صوابعك العشرة شمع، فوفر الشمع ده لواحده ممكن تكون سعادتها انها تقعد على ضوئه معاك

اللعـــــــــــــــــوب

هى: لعلمك ، انا كان لا ممكن ابدا اقعد مع شــاب فى مكان عام ،اه امال ايه انا من عيله محافظــة قوى ، لــولاش بس حسيت انك ابن ناس وحبوب ودمك شربات

هو: والله انا قصدى شريف ، بس انا قلت نتعرف على بعض اكتر قبل ما اتقدم واخطبك

هى: اه ما انت لازم تخطبنى ، انت فاكر بنات الناس يخرجوا مع شباب كده بالساهل

الجرسون: انسه فتكات ، انتى فين من زمان ده استاذ محمود جه كذا مرة وسال عليكى ، واستاذ فتحى كمان

هو: نعم ؟ محمود وكمان فتحى ، الله الله ، وعماله تقوليلى عيلة ومحافظة ده تلاقى صورتك هى اللى فى المحافظة، انا ماشى ومش عايز اشوف خلقتك تانى

هى: استنى يا احمد.. يا امجد ... ياااا.... يووووه قطيعه هو كان اسمه ايه؟

زى ما فى رجاله عينها زايغه، فى برضه ستات بتلعب بالرجاله وبتحب انهم يبقوا كتير حواليها، ويدوروا فى فلكها هى بس وده ممكن يكون نوع من انواع المرض ، الغريب انها ممكن ترسم عليك براءة خضرة الشريفه بذاتها وفى رجاله كتير ممكن تصدق ويدخل عليها الشوية دول ، المهم انك بذكائك تقدر تكتشف ده بدرى قبل الفاس ما تقع فى الراس وساعتها يا حلو للخلف دُر طوالى

الغيــــــــــــــورة

هى: انت متشيك كده وخارج على فين

هو: هكون رايح فين يعنى ، عندى انهارده اجتماع مهم فى الشغل مع مديرين الفرع الرئيسى ولازم يكون مظهرى كويس قدامهم

هى: مديرين ؟ وهما المديرين بيتلبس لهم احسن بدلة وكمان بيتحطلهم برفان

هو: لا ماليش حق المفروض اروح بالبيجامه ومن غير حموم كمان علشان ترتاحى

هى: قدامك حاجه من اتنين، يا تغير البدله دى وتلبس واحده على مزاجى ياما مش هتنزل من البيت خالص

هو: انا عندى حل تالت ، ما تيجى معايا الشغل احسن @#؟!#؟

هى: والله فكرة، استنى لما اقوم البس !!

الغيرة مرة وقاتله، خصوصا غيرة الست لانها ساعات بتكون انعكاس لحب التملك ، وممكن توصل انها تخنق الانسان وتحسسه ان انفاسه محسوبة عليه ، مع الست اللى زى دى علشان تريح دماغك يبقى تصور يومك صوت وصورة لكى يطمئن قلبها عن تحركاتك ، وتمضى قدامها حضور وانصراف وتعتبر ان زيك زى اللى عليه مراقبه مع الفرق ان هو بيبات فى القسم وانت بتبات فى بيتكم

المهملــــــة

هو: فين القمصان بتاعتى؟ مش لاقى ولا واحد فى الدولاب

هى: اصلهم فى الغسيل، منا نسيت اغسل امبارح

هو: مش كفايه البيت يضرب يقلب ومفيش حاجه فى مكانها ، والعيال شكلهم ولا الشحاتين كمان مفيش هدوم نظيفه طب هنزل الشغل ازاى دلوقتى

هى: معلش اتصل بيهم وخد انهارده اجازة ، مش هيجرا حاجه

هو: وانتى على بالك ايه ، بصى بقى مبدهاش انا هاخد بعضى واروح اقعد عند امى على الاقل الاقى حته نظيفه اقعد فيها بدل المزبله دى

هى: طب طالما كده بالمرة خد معاك القمصان تتغسل عند مامتك !!

قمه البرود اللى فى الدنيا ، عندها قدرة غريبة على التعايش فى وسط الفوضى وقله النظافه ومتجاهله حقيقه ان مظهر البيت والزوج والاولاد مسئولية الست ، وطبيعى ان الاهمال يكون فى نواحى حياتها كلها من اول مظهرها لحد بيتها وولادها ، ودى مينفعش معاها انسان منظم او منضبط فى حياته ، دى محتاجه فنان بوهيمى زى العيسوى حياته عبارة عن فوضى كبيرة وبيستحمى من السنة للسنة

المــــــــــــــادية

هى: فين الفلوس اللى قلتلك عليها ؟

هو: فلوس ايه انتى مبتشبعيش ، اجيبلك منين؟

هى: ماليش دعوه اتصرف ، اشمعنى انا اللى بختى قليل من دون الناس ، مش شايف اختى سوسن جوزها مهنيها ازاى ومغرقها فلوس هى وعيالها

هو: طب هو راجل مقتدر وربنا كارمه ، انا اجيب منين اسرق يعنى ولا انهب علشان ارضيكى

هى : معرفش ، الراجل الشاطر هو اللى يعرف يجيب القرش من بق العــوو

هو: @!؟#؟@#! ياخى عــوو لما يلهفك

الست اللى زى دى تفضل تقولك هات هات لحد ما تجيبلك الهيتهات، الحياه بالنسبة لها مش اكتر من مشروع استثمارى كبير الهدف الوحيد منه هو الربح المادى، واكيد انت هتكون فى حياتها صفقه ، ودورك الاساسى انك تبقى ممول وراعى رسمى، وياويلك لو مقدرتش تقوم بالدور ده لانها هتفضل طول عمرها تقطمك بالكلام وتقارنك بفلان وعلان ، ومش بعيد تلاقى نفسك من كتر زنها على ودانك فتحت الدرج او مديت ايدك للحرام ، ودى فيها كلابوش يا حلو

السطحيــــــة-المغـــــرورة

هو: قراتى الكتاب اللى ادتهولك ؟

هى: هه ، لا لسه مش فاكرة اصلا حطيته فين

هو: معقول ده كتاب مهم ، واكيد لو قريتيه هتعرفى منه معلومات كتير كويسه

هى: بعدين ابقى اشوفه، بقولك انهى احلى على الروج الفوشيا ولا الاحمر؟

هو: انا بكلمك عن الكتب وانتى تقوليلى روج

هى: كتب ايه ووجع دماغ ايه، ده بدل ما تحمد ربنا انك خاطب اجمل واحده مش بس فى العيلة لا فى البلد كلها كمان عايزنى امقق عنيا الحلوة فى كلام فاضى، ال كتب ال وهو انا ناقصه علم

هو: انتى شايفه كده ؟

هى: انا شايفه ان ماكس فاكتور نمرة 15 هيكون احلى على !!

انا دمجت الصفتين فى بعض لان غالبا ما هتلاقى الست السطحية انسانه مغرورة وغرورها بيصورلها انها مش محتاجه تتعلم او تعرف اكتر، وبرضه قلما تلاقى مغرورة مش سطحيه لانها بتبص للامور بما يتناسب مع وجهه نظرها هى بس مهما كانت مختلفه عن اللى الناس شايفاه ، والغرور مرفوض حتى لو كانت بتتغر بعلمها مش بجمالها ، عموما لو كانت طموحاتك انك تتجوز عروسة حلاوة للفرجه بس فاحب اقولك فى الزمن اللى احنا فيه ده سوق الحلاوة جبر ، وان كان الموضوع يفرق معاك قوى يا سيدى اختارها عاقله وابقى اعملها عمليات تجميل بعد كده !!

طبعا مش محتاجه اقول ان مش كل الستــات كده ، وده بجد مش تحيز بس الحقيقه ان دايما السئ هو اللى بيظهر وبيجذب نظـرنا اكتر ، بالظبط زى البحر مليان سمك جميل اشكال والوان لكن للاسف الميت بس هو اللى بيطفو على السطح

الستات الكويسة كتير ، بس المهم انك تدور كويس وبتأنى لان اللؤلؤ دايما بيكون فى اعمق حته فى البحر ومحتاج حد يكون عنده الصبر والعزم انه يلاقيه بجد ويقدر قيمته ، مش حد يستسهل ويفرح بالصدف الفاضى المرمى على الشط

عموما حتى لو قسمتك خلتك تصادف حد بالصفات دى ، اوعى ده يخليك تكره كل الستات وتقول زى ما قال صلاح جاهين

اوعى تصدق انثى ، المراة خلاص الغاء اعدام

مخلوقه من ضلع اعوج ، وزى البحر فى قلبه ضلام

واهــــــــــــو ده عيبــــــــــــــه

اخيرا العدد الاول

2008-05-14T22:27:00.010+03:00

اخيرا يا جماعه اتحققت الفكرة ، اننا نوصل صوتنا كمدونين من خلال مدونات مصرية للجيب ونكون انعكاس حقيقى لصوت الشارع المصرى ومشاكله والقضايا المطروحه فيه

*****

والحمد لله تم الانتهاء من العدد الاول ، ولى الشرف انى اكون واحدة من ضمن المدونين اللى موضوعاتهم هتنزل ان شاء الله فى العدد الاول

*****

شكر وتقدير لاصحاب الفكرة والقائمين على تفيذها واللى كان هدفهم ان صوت المدونين يوصل لكل الناس خصوصا اللى معندهمش فكرة عن عالم التدوين او الانترنت

*****

اكيد ان شاء الله الكل معزوم فى حفله التوقيع سواء مدونين او غير مدونين الدعوة عامه لكل مهتم ومشجع للفكرة ومتحمس ليها

حفلة التوقيع بمكتبة عمر - عمر بوك ستور
شارع طلعت حرب من ميدان التحرير فوق مطعم فلفة
الموعد الخميس 22/5/2008 ـ
الساعه 6.30 مساء

لو قابلتى الراجل ده قولى يا فكيك (2)

2008-05-09T17:35:00.017+03:00

نظرا للاقبال منقطع الجماهير على الجزء الاول قررنا نعمل جزء تانى للموضوع علشان باقى الصفات

المتـــــــــــــــــــردد

هى: فكرت هتعمل ايه فى موضوع الشغل ؟

هو: بصراحه لسه اصلى محتار ، انا بقول مفيش مانع اشوف الوظيفه الجديدة ، حاسس انى ممكن احقق نفسى فيها اكتر

هى: والله طالما كده يبقى توكل على الله ، وان شاء الله خير

هو: بس برجع اقول معقول اسيب شغلى بعد ما ثبت رجلى فيه واروح مكان تانى ابدأ من جديد

هى: عموما لو شايف انها مغامرة مش مضمونه يبقى خليك فى شغلك

هو: مش عارف ، هما لو يدونى كده اد شهرين تلاته افكر ، ولا انتى ايه رايك؟

هى: اففففففففففف زهقتنى ، انا رايى انك تقعد فى البيت احسن

كل قرار فى حياته علشان ياخده محتاج يعمل عليه استفتاء حتى لو كان واضح ومحسوم ، رغم ان هو اقدر الناس على فهم ظروفه واختيار اللى يناسبه، طبيعى تلاقى اغنيته المفضله لعبد الحليم ( اقول مقولش انا خايف اقول ) وفى كل حاجه بيقدم رجل ويؤخر رجل ، بس الحياة زى السفينه محتاجه ربان حازم وواثق فى قراراته ومش متردد ، والا هيفضل يقول يمين شوية ، شمال حبتين ، لا ارجع تانى يمين، وساعتها ممكن يلاقى نفسه لابس فى جبل زى ما حصل فى تيتانيك

العــــــــــــــــــــــاله

هو: جبتيلى الفلوس اللى قلتلك عليها؟

هى: فلوس ايه، ازاى اقول لاهلى على مبلغ زى ده، مش كفايه بتاخد مرتبى كل شهر وكمان اى فلوس بيساعدونى بيها

هو: وفيها ايه يعنى انتى مش بنتهم، وبعدين الفلوس دى اخرتها ليكى برضه

هى: اعوذ بالله عليك بتفول عليهم ، ده بدل ما تنزل تدور على شغل بدل اللى سيبته وبقالك 6 شهور قاعد فى البيت معتمد انى بصرف

هو: مش هشتغل غير على مزاجى، والشغله اللى تريحنى ، ولو مش عاجبك خلى اهلك يدونى فلوس ابدا بيها اى مشروع، هما يعنى كانوا هيلاقوا فين شاب زى الفل زيى يتجوز بنتهم ، ده انتى امك دعيالك

هى: اه يانى ، مكنتش اعرف انك بتحبينى كده يا ماما !!

مع النوع ده هتعيشى طول عمرك محنية من الاتب اللى على كتافك، لا منه راجل تعتمدى عليه ولا منه بعد عنك وارتاحتى ، شايف ان الرجوله كفايه قوى تكون خانه فى البطاقه ، وان عليكى السمع والطاعه والدفع لمجرد انه تكرم وتعطف وقبل يتجوزك ، يعنى لازم تدفعى ضريبة انه اختارك من دون خلق الله كلهم علشان يبرشت عليكى ، ويعيش على قفاكى زى تنابلة السلطان، ده حتى تنابلة السلطان كانوا عايشين على قفا راجل مش ست !!

الديـــــــــــــــــــوث

هو: وفيها ايه يعنى لما اصحابى ييجوا يسهروا عندنا فى البيت عادى يعنى

هى: عادى ازاى؟

هو: يا ستى متعقديهاش كده وخليكى فررى ، وبعدين هما هيكلوكى

هى: البيت ليه حرمه، وكده انا مش هعرف اخد راحتى و كمان انا مش برتاح لاصحابك ولا نظراتهم

هو: ياستى بلاش الكلام ده انتى اكيد بيتهيالك، الجرس بيضرب قومى افتحيلهم بقى

هى: ؟!@#؟ يا نهار اسود كمان عايزنى افتحلهم بقميص النوم ؟؟

النوع ده انتشر الايام دى كتير، يعنى ممكن تلاقيه قايم يحزمك فى فرح علشان ترقصى، او نازل يشترى لبناته مايوهات بيكينى للمصيف، والاخطر ان ممكن ادق اسراركم الشخصية يحكيها عادى لاصحابه كان اللى بيمشى فى عروقه مايه ساقعه مشبره، واللى زى ده مينفعش غير مع واحده عايزة جوز يدخل فى بعضه زى الايريال لكى تعيش هى حرة مستقله، اما اللى لسه بينقح جواها العرق الصعيدى فاحسنلها تبعد عنه بدل ما ترتكب جنايه

الشكــــــــــــــــــاك

هو: الراجل اللى هناك ده بيبصلك ليه يا هانم ؟

هى: مين ده؟

هو: اللى قاعد على يمينك ، تعرفيه منين يا هانم؟ ده منزلش عينه من عليكى ؟

هى: والله صدقنى ما اعرفه ولا عمرى شفته

هو: امال يعنى بيبصلى انا ، يالا بينا نقوم نروح والمكان ده اخر مرة نقعد فيه

هى: طب حاضر متشدنيش كده ، هتكعبل ومش شايفه كويس من النقاب !!

هو يشك ، اذن هو دبوس ممكن يفجر العلاقة ما بينكم فى اى لحظه ،جميل ان الانسان يغير على اللى يحبه من النسمة، بس مش معنى كده انه يقفل الباب والشباك علشان النسمة متدخلش ،او انه دايما يوجه اتهامات ممكن توصل للخيانه، وتحسى طول الوقت انك متراقبه وعشان تبقى عارفه اللى بيشك كتير يبقى فى الاساس بيشك فى نفسه قبل اللى قدامه او بمعنى تانى معندوش الثقه الكافيه فى نفسه ، واحنا مش ناقصين ناس مهزوزة ولا ايه؟؟

الكــــــــــــــــداب

هى: اتاخرت كده ليه ؟ خير

هو: ياه لو اقولك ، ده كان حته يوم ، محمود يا ستى والده تعب فجأه ونقلناه المستشفى ، وفضلت بقى رايح جاى معاه انتى عارفه مقدرش اسيبه فى موقف زى ده

هى: لاحول ولا قوة الا بالله، طب وهو كويس دلوقتى، يعنى الدكاترة قالوا ايه ؟

هو: والله الحاله لسه مش مستقره، يعنى ممكن يقعد كام يوم كده تحت الملاحظة ، وطبعا انا لازم ابقى الايام دى مع محمود مش هيعرف يتصرف لوحده

هى: اه طبعا ده واجب ، بس غريبة انى لسه مكلمة محمود اسأله عليك علشان تليفونك مقفول، وعرفت منه ان مراته وولاده سافروا مع باباه ومامته يصيفوا

هو: هه اه #؟@ اه منا نسيت اقولك إن ده يبقى ابو محمود بس من ام تانية !!

اهو ده بقى عمهم كلهم ، لان عمرك ما هتعرفى صدقه من كدبه ، وحتى لوقال مرة الحقيقة هتشكى فى كلامه خصوصا لو من نوعيه الناس اللى بتتحرى الكدب ، او اصحاب مبدأ الكدب للكدب ، يعنى مش بيكدب مجامله او انقاذ موقف لا ده الموضوع تحول معاه لمرض لدرجه ان حياته تتحول لكدبة كبيرة ، لو حظك العاثر وقعك مع الشخص ده قدامك حاجة من اتنين ، يا اما الفحم يفضل مولع فى بيتك 24 ساعه وكل ما يقولك حاجه تروحى لسعاه فى لسانه بالبشعه بتاعه البدو ، يا اما لو امكانياتك كويسة تبعتى تشترى جهاز كشف الكدب من برا وتوصليه بيه طول الوقت، بس متفكريش فى حل قطع اللسان لان ممكن برضه يكدب عليكى بالاشارات !!

وبكده تكون خلصت الصفات ، هو اكيد فى صفات تانية بس انا بقول كفايه كده والطيب احسن، وبرضه برجع اقول انا مش بعمم ومش معنى انتشار الصفات دى او ان ناس كتير قابلتها فى حياتها ان الرجاله كلهم كده ، كل انسان جواه ملاك وشيطان ، وزى ما فيه الصفة الوحشة اكيد فى الصفة الكويسة اللى تسندها

لكن اللى انا بقصده ان الصفه تتجاوز المعقول ، وتبقى هى اكتر حاجة ظاهرة فى شخصيه الانسان ، لدرجه انه يتعرف بيها والناس تقول فلان البخيل او علان الكداب ، وينسوا اى حاجه تانية كويسة فى شخصيته

لسه فى ناس شايفه ان الحب هو الحل وممكن يعمل المستحيل ، احب اقولهم ان الحب مش ادهم صبرى ، وحتى لو كان يقدر يعمل المستحيل لازم يكون الطرف التانى من جواه عنده استعداد يتغير للاحسن ، او على الاقل متقبل يعرف عيوبه، والا نبقى بننفخ فى اربه مقطوعه وبفعل فاعل كمان

واهـــــــــــــــــــو ده عيبـــــــــــــــــــــه

لو قابلتى الراجل ده قولى يا فكيك

2008-05-06T18:24:00.013+03:00

عزيزتى هى اليك بعض النماذج من الرجال التى اذا حاولت الاقتراب منك فخدى ديلك فى سنانك وقولى يا فكيك

ابــــــــــــو عيـــــن زايغــــــــــه

هى : بتبص على ايه؟
هو: هه ولا حاجة يا حبيبتى ، وانا اقدر ابص على النجوم ومعايا القمر
هى: يعنى انت شايفهم نجوم؟ انت مش هتبطل الحكايه دى بقى
هو: صدقينى يا حبيبتى وحياتك عندى انا ماعرف حد غيرك ومن يوم ما عرفتك نسيت كل حاجه قبلك

بقولك ايه مش اللى هناك دى مها صاحبتك ؟ دى احلوت قوى، ما تندهيلها تقعد معانا !!
هى: !! @ *! &!! * اعميه يارب

النوع اللى زى ده بقى ينطبق عليه المثل بتاع ابو ديل اللى ميتعدلش ولو علقوا فيه قالب، ولو فضلتى معاه مش بعيد يجيلك ضغط وسكر منه خصوصا لو كان من النوعيه اللى بيجرى فى دمها كرات بيضا وحمرا ونسوان(سهر الليالى) ، يبقى مفيش قدامك غير حل من اتنين يا تطنشى وتعملى نفسك مش شايفه (اذا كنتى تقدرى) يا اما تعمليله عاهه مستديمه فى عينيه وساعتها هتعيشى العمر مستريحه وانتى سحباه !!

البخيـــــــــــــــــــــــــــــــــل

هو: ولازمتها ايه البعزقه دى بس يا حياتى ؟

هى: هو انا لما اقول للجرسون اتنين حاجه ساقعه تبقى بعزقه، ايه ناوى تسقينى مايه حاف

هو: لالا وحياتك ابدا بس اصلى مش بحب الحاجات دى كفاية واحده بس

هى: انت مستخسر ولا ايه ؟ ، مش كفايه لغايه دلوقتى من يوم ما اتخطبنا مجبتليش هديه ولا عشتنى فى مكان كويس، وكل ما ماما تقوللى ده شكله بخيل وايحه اقولها معلش ده بيوفر للشقه والعفش مع ان الحمد لله ربنا كارمك ومعاك ، امال لو هى عرفت انك مش عايز تدفع فى اى اوضه اكتر 5000 جنيه هتقول ايه ؟ تكونش فاكر هنجيب اوضه كرتون

هو: اه هه احم اه نتكلم فى الموضوع ده بعدين يا حبيبتى ، بقولك ايه لو مش هتكملى الحاجه الساقعه بتاعتك هاتيها دى بفلوس!!

علشان تبقى عارفه م الاخر البخيل بخيل فى كل حاجة وعلى طول الخط من اول فلوسه لحد عواطفه ، وماشى بمبدأ عض قلبى ولا تعض رغيفى ، واذا قررتى تعيشى حياتك معاه يبقى هتكون ان شاء الله اعاده لفيلم الحرمان والبؤساء وكل الافلام الكحيتى اللى فى الدنيا ، فاذا كنتى من بيت شبع يا حبيبتى يبقى عمرك ما هتقدرى تتفقى معاه

الانــــــــــــــــانـــــــــــــــى

هى: ايه ده انت جيت امتى ؟ ده انا فضلت استناك ع الغدا واخر ما زهقت دخلت نمت من غير ماكل

هو: اصل انا نزلت اشتريت شوية لبس وحاجات كده ليا بعد الشغل

هى: طب مقولتليش ليه كنت جيت معاك ، دانا حتى كنت عايزة اشوف لبس للولاد

هو: يا سلام ؟ وانا رايح اشترى لنفسى ولا للعيال ، بعدين ابقى انزلى شوفيلهم بمعرفتك

هى: طب ياله انا هقوم اسخن الاكل علشان نتغدى انا مت من الجوع

هو: لا انا اتغديت خلاص وانا معقول اقعد لغايه دلوقتى من غير غدا !!

معندوش غير كلمة انا ، كائن انوى من الدرجة الاولى ، ياكل الفرخه لوحده وينام فى السرير بالعرض مبدؤه انا ومن بعدى الطوفان، واعتقد ان الاحسن انه لا يتجوز ولا يخلف من الاساس علشان ميظلمش حد معاه، وكمان علشان يقدر يتفرغ لحب نفسه، وعموما انتى بقى وصبرك ومدى حبك ليه واذا كنتى تقدرى تتحملى تعيشى العمر معاه وهو معندوش كلمة على لسانه غير انا انا انا ابريق الشاى!!

ابــــــــــــــن امــــــــــــــــــه

هو: قوليلى انتى عامله البامية دى ازاى؟

هى: عادى يعنى زى ما كل الناس بتعملها
هو: لا مش ممكن دى غير بتاعه ماما خالص ، حكم ماما ليها نفس تانى فى الاكل مقولكيش عليه، وباميتها زى السكر ياريت تبقى تتعلمى منها كام اكله بالطريقة بتاعتها ، هو فى حد زى ماما

هى: طب بتلبس ورايح على فين؟
هو: رايح لماما ، اصلها وحشتنى قوى من امبارح !!

مش عيب ان الانسان يحب امه، بس العيب انه يتأخر فى الفطام، ولو اخترتى الراجل ده اعرفى انك دخلتى علاقه ثلاثيه الابعاد يعنى انتى وهو وامه وحياتك هتبقى بث مباشر 24 ساعه لحماتك ولا ستار اكاديمى ،هتاكلى وتشربى وتلبسى وتخلفى بقرار وزارى منها وهتفضلى طول عمرك محطوطة فى مقارنه معاها مش لصالحك طبعا ، الا اذا ريحتى دماغك واعتبرتى انك اتجوزتى حماتك

الغيـــــــــــــــــر مسئــــــــــــــــول

هى: مش هتشوف حد يصلح الغساله ؟

هو: البركة فيكى بقى اتصرفى انتى

هى: طب متنساش تبقى تشد على الولد شوية علشان يذاكر لحسن ده مش راضى يسمع الكلام خالص

هو: تربية الولد دى مسئوليتك انتى ، البيت باللى فيه تحت تصرفك وانا كفايه على اشتغل برا

هى: بس دى مش طريقة ، مش معقول كل حــــاجة تبقى على دمـــــاغى من اول شغل البيت للعيـــــال لشرا الطلبات والمجاملات ووووو

هو: يوووه هو كل يوم الكلام ده، بقولك ايه انا نازل العب كورة مع اصحابى

هايل بقيتى 2×1 ولا المزدوج ، راجل وست مع بعض والعيال اللى عندك زادوا عيل ،الراجل من النوع ده بيبقى طفل كبير عايز دايما يرمى المسئولية على غيره ويكبر دماغه لان غالبا بيكون اتعود على كده من صغره، اذا كنتى بتحبى يحيى الفخرانى يبقى مبروك عليكى حماده عزو، اما اذا كنتى ارق من انك تتحملى المسئوليات دى كلها فاستنى بقى لغاية ما يجيلك سى محمد بتاع فيلم العزيمة

طبعا فى رجالة مفيهـاش الصفات دى علشان محدش يقول انى بعمم ، ومنهم اللى فيه اكتر من واحده يعنى ممكن تـلاقى بخيل وانـانى ، ابن امه وغير مسئول لان الانسان عبارة عن تركيبة من الصفات والطباع، لكن انا كان قصدى ان فى ناس الصفات دى ظاهرة عندهم اكتر من اللزوم بحيث يستحيل ان الانسان يقدر يتعايش معاها

وفى ناس ممكن تشوف ان الحب هو العلاج السحرى لكل العيوب دى ، بس احب اقولهم ان الحب اعمى يقوده الجنون ، وكلنا عارفين ان ليس على الاعمى حرج ولا على المجنون ، يعنى لو اعتمدتوا عليه انه يعالج العيوب يبقى بتتسندوا على حيطة مايلة

واهـــــــــــــــــــو ده عيبـــــــــــــــــــــــــه

يوم من عمرى

2008-05-04T15:25:00.008+03:00

صحيت انهارده الصبح كلى انتعاش، منبهجه منبعجه يملأنى السرور والحبور، حد هيقولى وعلى ايه السعاده دى ايه المناسبه يعنى؟ سورى بقى مضطرة اقوله يبقى انت اكيد اكيد مش من مصر، ده انهارده ياخوانا يوم من عمرى وبما ان العمر لحظه فقد شهد هذا اليوم اللحظة الى ولد فيها الزعيم المفدى والقائد الحبيب مبارك

*****

مش عارفه ليه فى قلة مندسة مدسوسة عميلة كانت عايزة تعكنن علينا اليوم قال وتعمل اضراب، طب بالذمه مش حرام نعكنن على حد فى يوم عيد ميلاده ده حتى يوم مفترج وقهره النفس فيه وحشه قوى، خصوصا لما يبقوا تمانين سنة فى عين العدو-خمسه وخميسة كان عندنا كتكوت وفتح-

*****

اكتشفت كمان بالصدفه ان انهارده برضه عيد ميلاد الراحلة ام كلثوم، ولقيت نفسى بفتكر اغنيتها الرضا والنور، وحسيت انها تنطبق على رئيسنا وحبيبنا الذى يتمتع ان شاء الله برضا ربنا، حد هيقولى وعرفتى منين؟ هقوله الحمد لله ربنا اداله طوله العمر والحكم والمال والبنون والصحه والوش المورد، وبعدين يا ناصح منك له الحكمة بتقول رضا الرب من رضا الاب مقالتش من رضا الشعب!!

اما النور فليس بخافى عن العيــون، وهل يخفى القمر؟ ده حتى النور زايد وفــايض وســادد عين الشمس واللـى ورا الشمـس ( ربنا يرجعهم بالسلامه )

*****

المهم نزلت من بيتنا وانا حاسه انى طايرة تتردد فى اذنى اغنيه حليم ( يوم من عمرى ) بس افتكرت انه كان بيقول يوم من عمرى هو اليوم اللى اتهنيت فيه وبكيت منه وعليه، زعلت قوى من حليم بصراحه بس افتكرت انه مات قبل تولى فخامته الرئاسه فقولت لا يبقى معزور مش قصده حاجة وحشة ، انا نفسى الكام سنة اللى عدوا من عمرى قبل حكمه (هما 3 سنين ) مش بحسبهم من عمرى على راى الست، وبحقد على اختى الصغيرة اشد الحقد لانها نالت شرف المولد فى العام المبارك 1981 الذى شهد توليه زمام امرنا

*****

فضلت ماشية فى الشارع لقيت الناس رايحه وجاية عادى، امال فين الاضراب يا ظلمه هتروحوا من ربنا فين، ولا عايزين تطلعوا الراجل وحش وخلاص، ما الناس كلها فى شغلها اهى ولا حد مضرب ولا بطيخ، والمحلات مفتوحه والخير كتير وعمار يا مصر، ده حتى البنوك انهارده كانت زحمه جدا مش علشان اقتصاد البلد وقف اسبوع بسبب الاجازات والاعياد والكلام ده اطلاقا ابسليوتلى، ده لان الناس الظاهر اخدت العلاوة ونازلة تعمل بيها ودائع وحسابات فى البنك !!

*****

حتى لما روحت لبتاع الجرايد تصوروا ملقتش لا الاهرام ولا الاخبار ولا اى جريدة قومية مهلبية ، الناس من كتر فرحتها خلصت الجرايد ، كل واحد عايز يشوف التهانى والمباركات بمناسبة عيد الاعياد ، وللاسف ملقتش غير جرايد المعارضه الصفرا اللى بتقول عن حبيبنا كلام ايااه خالص ، وطبعا انا مش ممكن اشترى جريده تجيب سيرة حبيب قلبى بالبطال

*****

بصراحه بقى المفروض احنا كشعب كنا نستزوق ونلم من بعض ونجيبله هديه كده كويسة من مقامه ، الراجل مش حارمنا من حاجة ولا مخلى جهد على جهده علشان يسعدنا، بيطلبلنا الرضا نرضى، لكن احنا البعدا معندناش دم وشنا كالح ، زى القطط ناكل وننكر، ده بدل ما نلم من بعض كده نجيبله تورتاية ولا هدية كويسة ، وبعدين ماهو كله من خيره برضه، والعنوان ميتهوهش مصر الجديدة خلف محطة البنزين

*****

وبعدين فين شيرين واليسا ونانسى وهيفا وكل المطربات، مفيش واحده تخلى عندها شوية هيموجلوبين وتعملوا اغنية happy birthday زى مارلين مونرو ما عملتها لكيندى ولا هو يعنى كيندى على راسه ريشة، مناسبة زى دى مش اقل من 3 اوبريت و7 اغانى ، بطلوا بخل بقى، شعب ماسك ع القرش صحيح

*****

عموما عن نفسى قررت اقضى اليوم فى مود سعيد منشكح ، اتامل فى انجازاته، اتفكر فى مبادراته، ومسمعش كلام الناس الوحشة اعداء النجاح والانبطاح ، وادعيله من كل قلبى بطوله العمر اصل طوله العمر تبلغ الامل ، ولا يحرم ولادنا وولاد ولادنا منه

اللهم افقرنا واغنيه ، اللهم عرينا واكسيه ، اللهم امرضنا واشفيه، اللهم جوعنا واكله كباب وكفته كل يوم بسلطاته ببابا غنوجه، اللهم خليه يحلى بكل فاكهه الموسم من مانجه وتفاح وكنتالوب ومشمش وموز وكل حاجة الكيلو منها غالى ع الناس ، وبطيخ من غير بذر طبعا هو الزعيم لسه هياكل ويتفتف، فاكرينه فاضى زيكم

واهـــــــــــــــــو ده عيبنـــــــــــــــــا مش عيــــــــــــبه

انا مدمنه توتر وانت؟

2008-04-30T11:09:00.009+03:00

الموضوع ده قراته فى مجلة وقلت اطبقه على نفسى فتأكد لى انى مدمنه توتر بالثلث

هل تعانين من اعراض التوتر دائما؟

-------------------------
لهذا المرض اعراض شتى يمكنك اختبار نفسك لمعرفه مدى استعدادك النفسى للاصابه بالتوتر
تكون الاعراض غالبا كما يلى :

* الارق ( موجود احيانا )

* هالات سوداء حول العين ( دى مبقتش هالات دى بقت كدمات كانى خارجه من خناقه )

* سوء تغذيه ( واضحه كوضوح الشمس )

* الافراط فى تناول مواد منبهه مثل الشاى والقهوة وحتى التدخين ( بيحصل ساعات كتير لكن ماليش فى التدخين )

* الافراط فى الاكل بصفه عامه ( اهى دى وسعت منهم منين سوء تغذيه ومنين افراط فى الاكل ؟ )

اذا كنتى تعانين من هذه الاعراض وتشعرين بتغير دائم فى حالتك المزاجية والنفسية فأنت قد تكونى من مدمنى التوتر

( ما شاء الله ده انا حالتى المزاجية ولا البورصه طالعه نازله عمال على بطال وبتتغير من النقيض للنقيض اكتر من مرة فى اليوم الواحد ومن غير اى سبب واضح )

قد يرغمك الشعور بالتهديد من اى مشكلة على الهرب من الموقف والتقوقع حول ذاتك دون البحث عن طريق عقلانى لحل المشكلة ، وقد تتغلب عليك ايضا مشاعر غامرة تدفعك الى المبالغه فى الدفاع عن نفسك وبذل كل الجهد العقلى والبدنى والنفسى لحل المشكلة والخروج من الازمه ، وكلاهما خطر على صحتك

( انا فعلا بهرب من مواقف كتير ، مش خوف لكن مش بقدر اجمع افكارى معنديش سرعه تصرف، وبعد كده بدخل فى دوامه ان كان لازم اعمل كذا او اقول كذا، وده بجد بيتعبلى عقلى من التفكير، وفعلا فى اغلب الاوقات باخد موقف دفاعى حتى لو كنت صاحبه حق ومش محتاجه اصلا ادافع عن نفسى )

هرمونات متوترة
--------------
التوتر يفرز فى الجسم هرمونات خاصه شديده الخطورة، تسرى فى مجرى الدم كالهيروين وغيره من المواد الخطرة ، وقد تسبب جلطات فى الشرايين وتؤثر على القلب، وتعمل هرمونات التوتر ايضا على اهلاك الجهاز المناعى بالجسم وتعرضه للاصابه بامراض مختلفة مثل الاكتئاب

( الله يطمنهم، يعنى لو نفدت من الجلطات مش هنفد من الاكتئاب )

عادات مدمنى التوتر
----------------
لمدمنى التوتر عادات معروفه تمكنهم من تسكين معاناتهم لفترات محدودة ومنها :

* تاجيل عمل اليوم الى الغد ( احسن واحده تعمل كده )

* النقد الدائم للاشياء والاشخاص المحيطين بهم ( بقى زايد عندى قوى اكتر من الاول لدرجة تضايق )

* الضحك والهزل المستمر ( ع الفاضيه والمليانه بس مش زى الاول )

* كثرة الكلام والثرثره ( يخرب بيتك يا بقى مش بيتقفل )

* احلام اليقظه ( لا دى كانت زمان و بطلناها )

* الكلام اثناء النوم ( دى بقى مش عارفه محتاجه اسجل لنفسى زى هانى رمزى )

* الافراط فى الاهتمام بشئ معين مثل العمل او مهام المنزل ( ده فعلا حقيقى لما بهتم بحاجة او بحد ببقى اوفر قوى )

* الخوف من اشياء عادية مثل الظلام ، المرتفعات وحتى الحشرات ( انا صحيح بخاف من الاماكن العالية والمقفوله والحيوانات لكن مش لدرجه الحشرات )

العقل الباطن
-----------
يكمن السبب فى ادمان التوتر معاناه كامنه فى العقل الباطن لدى المريض، قلما يتحدث المريض عنها او يقر بوجودها من الاساس
ينتج الاحساس بالالم والكبت والاحباط بشكل تدريجى الى ان يخرج فى صورة بركان من القلق والتوتر، وتتكرر المشكلة مع استمرار السبب الكامن داخل الشخص، وتشكل تحديات الحياه مثل النجاح على المستوى الشخصى والعملى والاجتماعى اهم المشكلات الكامنه التى قد يتخوف منها الفرد ويهرب منها عن طريق تجاهلها وكبتها فى اللاوعى

(يا نهار مش فايت ده كانه بيتكلم عنى ، يمكن الالم جاى من فشلى على المستوى الشخصى والعملى والاجتماعى فده مأثر على عقلى الباطن، او ده اللى مخلى جوايا خوف واحباط تحول لصورة قلق وتوتر رغم محاولتى انى ابان متجاهله كل ده )

الثقة بالنفس وتقبل الذات
-------------------
يلتمس المريض بعض الراحه والطمانينة فى الهروب الى قوقعته ولا يخرج منها الا بدافع قوى اسمه الحب!!، حب الام والاب ، حب الزوج والاولاد وفوق كل ذلك حب الله سبحانه وتعالى الذى يبعث السكينة فى النفس فتقوى على مواجهه الحياه
والرغبة فى نيل رضا الله واسعاد الاخرين، فالحب يعطى الفرد الاحساس بالامان والثقه بالنفس التى طالما افتقدها، فبمزيد من الثقه فى النفس وتقبل الذات تظهر قدرات الفرد وتتجلى مواهبه وابداعاته فى مجالات لم يتوقع ان يتفوق فيها

( فعلا اوقات كتير بتبقى الراحه انك تهرب من كل حاجة ، وتتبع مبدأ الثبات على الوضع اللى انت فيه لانك خايف تغيره وده فعلا اللى حاصلى، لكن اذا كان الحل زى ما بيقولوا فى الحب فانا شايفه ان حب الله سبحانه وتعالى هو الاقدر على بعث الطمأنينة والامان فى القلوب خصوصا للى مالوش حد يبادله مشاعر الحب دى، اما حكاية الثقه فى النفس وتقبل الذات دى بحاول بجد اعملها ولو ان ساعات بتوصل درجه ثقتى فى نفسى لتحت الصفر مش عارفه ليه رغم ان الناس ساعات بتشوف عكس كده، يمكن انا محتاجه احسها من جوايا اكتر من مجرد انى ارسمها قدام الناس علشان ابان قوية )
*****
انا عارفه ان البوست المرة دى مش ظريف قوى وطويل حبتين لكن انا اتمنى ان كل واحد يقارن الكلام ده مع نفسه ويشوف هل هو زيى مدمن توتر ولا الحمد لله مفيش اعراض ادمان ، عموما اتمنى ان حد يتبنى فكرة علاج المدمنين اللى زى حالاتى ولا هم يعنى بتوع المخدرات احسن مننا؟
واهـــــــــــــــــو ده عيــــــــــبه

شم الفسيخ

2008-04-28T02:42:00.003+03:00

كل سنة وانتم طيبين بمناسبة كل الاعياد والاجازات اللى هبطت علينا من السما ، خصوصا شم النسيم ، لما تحمله هذه المناسبة العـطرة من عبق خاص لا يتوافر فى غيرها من المناسبات

*****

اعتقد ان ارتباط الفسيخ والسمك المجفف و المملح وكافه انواع السمك اللى متاكل قبل كده بشم النسيم هو عاده فرعونية بحته، لان واضح ان دى كانت اولى تجاربهم فى التحنيط ، زى ما تجارب الدوا الاولية بتتعمل على الفيران، ولما تنجح يجربوها على البنى ادمين

*****

وكالعاده الحياة فى اليوم ده مش هتخرج كتير برا الصور دى، كمية فسيخ محترمة، جبل من الخس والملانة والبصل واى حاجة خضرا ، ليمون كتير علشان نكسر سم الحاجات اللى قبل كده-ولو ان الليمون غالى اليومين دول-

*****

والله انا مش ضد الفسيخ ولا اكله ، بس ايه الفكرة ان الحاجات دى تتاكل برا البيت ، ده حتى مش منظر خالص ، وخصوصا ان الريحه بتبقى صعبه جدا جدا ، وتلاقى كل الناس قاعده بتاكل ولا على بالها وكانها حاطه مشبك على مناخيرها، او يمكن علشان هما فى وسط المعركة مش حاسين بيها، وغير كده الناس دى بعد ما تخلص اكل هتغسل ايديها ازاى وفين لو قاعدين فى جنينة مثلا، ولا هما عاملين حسابهم وجايبين المايه والصابون؟

*****

الكارثه بقى فى تانى يوم، لما البلد تبقى كلها معطرة بايسانس اففف، والشوارع والجناين مليانه بمخلفات الحرب العالمية اللى حصلت امبارح، وتلاقى الناس نازلة شغلها وبراءة الاطفال فى عينيها ولا كانها عامله عمله، ويتأففوا من الريحه وكان الطيارة لسه واصلة بيهم انهارده من المانيا!!!

*****

يا اخوانا كلوا واتبسطوا وكل حاجة بس فى مكان يصلح للاكل، وتقدروا تسيبوه نظيف زى ما كان، ولو مفيش يبقى كلوا فى بيوتكم وخلاص الدنيا موقفتش على فسيخه لازم تتاكل فى قارعه الطريق ، ولا هو يعنى ندر ولازم توفوه ؟؟

واهـــــــــــــــو ده عيبــــــــــــــــــه

هنا القاهرة

2008-04-23T09:47:00.008+02:00

ضحكت جدا حتى استلقيت على قفايا زى ما بيقولوا لما سمعت قرار الرئيس مبارك بتحويل حلوان و 6 اكتوبر الى محافظتين مرة واحده، يعنى مش مدينة مثلا بمجلس محلى وكلام من ده ، لا محافظة كده بمحافظ ومدير امن وميزانية مستقله وحدود جغرافية وكود تليفون مباشر وكارتة طريق وكل ما تحمله كلمة محافظة من معانى سامية!!!

*****

اسئلة كتير دارت فى عقلى ، اشمعنى دلوقتى يعنى ؟ وليه حلوان و6 اكتوبر بالذات؟ وهل من الطبيعى انهم يتساووا بالاقصر اللى بقالها قرون مجرد مدينة تابعه لمحافظة قنا رغم قيمتها السياحية والتاريخيه واخيرا حن قلبهم عليها وهيحولوها محافظة!!!

*****

طبعا حيتقال ان الهدف هو القضاء على المركزية والتكتل، والقدرة على خدمه المواطنين بشكل افضل، وكل الكلام الجميل ده اللى بنسخسخ لما نسمعه ، لكن بيتهيالى وجود 26 محافظه قبل كده لا لغى المركزية ولا قلل التكتل فى القاهرة ، ولاوفر على المواطن انه ينزل القاهرة علشان يقضى مصالحه

*****

لو بصيت من وجهه نظر اى مواطن اقاليمى زيى هتكتشف ان علشان تلاقى شغل محترم يبقى تدور فى القاهرة، عايز تتفسح وتغير جو يبقى تنزل القاهرة ، تعبان لا قدر الله وعايز دكتور كويس او مستشفى محترمة يبقى مفيش غير فى القاهرة، موهوب فى الادب او الفن او حتى الكورة مش حتلاقى فرصتك غير فى القاهرة

*****

والكلام ده الواحد بيحسه وهو موجود فى محافظة على الوش شوية وفيها الى حد ما خدمات كويسة، امال بقى الناس اللى فى الصعيد والواحات والبلاد اللى يتركبلها الافيال تعمل ايه ، وهل كتر المحافظات ده هيريح الناس يعنى ويخليهم يبقوا مكتفين ذاتيا ويستغنوا عن القاهرة الوحشة اللى بتاكلهم زى النداهه؟؟

*****

انا بقى لقيتلكم الحل اللى هيريح كل الناس فى كل المحافظات ، احنا كل اسبوع كده ولا اسبوعين ننقل رئاسة الوزراء بالوزارات بمجمع التحرير ودار الاوبرا وساقيه الصاوى والاذاعة والتليفزيون والهرم والمتحف المصرى وكمان القصر العينى ومستشفى السرطان والجامعه ، ولو فى امكانية نضيف وسط البلد وشارع جامعه الدول وعباس العقاد وسيتى ستارز وكام مول كده على كام شركة استثمارية كبيرة ونلف بيهم على كل محافظة مرة ، واللى ليه مصلحه او حاجة عايز يعملها ولا نفسه يشوفها يعرف القافله دى جاية بلده امتى ويحجز من قبلها وطبعا الكلام ده باولوية الحجز

*****

اما اذا تعذر هذا الحل لا قدر الله لمشاكل تقنيه ففى حل احسن ، احنا نمسك القاهرة الكبرى ونطلع كل الناس اللى فيها فى الصحرا بحاجتهم وعفشهم ، ونغسلها غسلة حلوة كده بالمايه والمسحوق ومفيش مانع من استعمال الكلور، ونقوم جايبين اى حاجة مهمه فى اى محافظة ونحطها يعنى هناخد مثلا قناه السويس ومعابد الاقصر وبحر اسكندرية وشاليهات الساحل حتى جبل المطاريد بتاع الصعيد، ونحطهم كلهم فى القاهرة ، ونوسع حدودها الجغرافية حتى تشمل المليون كم2 اللى حيلتنا ، وبكده يبقى كل الناس عايشين فى القاهرة ومحدش احسن من حد، وفى نفس الوقت مش هيوحشهم اى حاجة من اللى اتعودوا عليها

*****

عموما انا قلت الحلول اللى عندى وعليكم تختاروا اللى يناسبكم، ولغاية ما تقرروا انا قايمة اتصل بشركة ال dsl علشان فيه مشكلة ،اصل الشركة هنا قالتلى العيب مش مننا ، العيب م القاهرة !!!!

واهــــــــو ده عيبــــــــه

المستحيل

2008-04-19T21:11:00.007+02:00

"لا عمل اليوم" اتخذ قراره وهو ينهض متثاقلا من الفراش، منذ عده ايام وهو يشعر تغيرا فى جسده ونفسه، لم يعد يشتهى الطعام، مرت ايام لم تمتد يده الى سيجارة ليدخنها، لم يعد نفس الشخص، ترى اهى النهاية؟

قرر ان يعد الافطار لزوجته، لم يمس شيئا من طعامه، لاحظت زوجته، عاتبت اهماله لصحته، وعدها ان يترفق بنفسه، قبلها مودعا اياها عند الباب، اغلقه واستغرق فى ظنونه

"انه الموت لا محاله" قالها فى نفسه ، لم يعهد فى جسده هذا الوهن، ولا فى روحه هذه السكينة،ربما حين تستعد الروح ان تغادر الجسد تتبدل، ترق وتهفو الى اشياء لم تالفها من قبل

"الموت ياكلهم صغارا" تذكر كلمات امه ، لطالما كان الموت رفيقا لعائلته، ربما حان دوره، غالبته دموعه،ما سر هذه المشاعر الجياشة؟

انها الروح المغادرة لا شك، انه الاحتضار ، يطالب باشياء على رغم غرابتها لا نملك الا تنفيذها، انه الان يشتهى قطعه سكر و ضحكة طفل، يالها من روح مازحه حتى حين الفراق

قرر ان يخرج من افكاره، يعد لزوجته ما تحب من طعام، ربما لا يمنحه القدر فرصه اخرى، اشفق عليها الم الفراق،"الموت ياكلهم صغارا" ترددت كلمات امه فى عقله

احس الما ودوارا، حزم امره، ان كان لا يعلم متى تغادر الروح فليعلم اذن كيف، ارتدى ملابسه واتخذ طريقه للطبيب، طوال طريقه تراءى له وجه زوجته، صوت امه، ضحكة الطفل الصغير، قطعه السكر

لم يدر كم من الوقت مر حتى حان دوره، دخل حجرة الطبيب كسفينة تتلاقفها امواج الظنون، استلقى على النضد كما يستلقى الميت داخل نعشه، احس فى سماعه الطبيب برودة الموت

تفحصه الطبيب ، ابتسم فى وجهه ابتسامه حملت خوفا اكثر مما حملت ارتياح، لم يتبين من بين شفتى الطبيب سوى كلمتين" مبروك انت حامل"

مالكم ، مستغربين ليه؟؟ مهو بعد التلقيح الصناعى وتأجير الارحام والاستنساخ مكانش فاضل غير كده، ان يبقى فيه راجل حامل، انا لغاية دلوقتى مش قادرة استوعب الموضوع قوى لكن اعتقد انه حقيقى بدليل ظهور اخينا ده فى برنامج اوبرا وينفرى

Mr. Thomasهو اسم اول رجل حامل وعمره 34 سنة ،اتولد انثى وعاش لمده 24 سنة باسم Tracy

كان بيميل فى طفولته الى الالعاب الصيباينية وكرة القدم والصيد، لما كبر او كبرت شوية (حيلخبطونا ليه) ابتدى والده يشجعه انه يبقى موديل، لدرجة انه اشترك فى مسابقة للجمال، بعد كده خلال فترة الجامعه بدأ يكتشف هويته الجنسية ، وبدأ يلبس ملابس الرجال لانها بتعبر عن احساسه الحقيقى

وبعد كده اخد الخطوة الجريئة انه يعمل التحول الجراحى، ويتحول لرجل لكن يفضل محتفظ (بالرحم) على امل انه فى يوم من الايام يبقى عنده طفل-صبرنى يارب-

والاخ المحترم شايف ان رغبته فى الانجاب لا تقلل من رجولته، لانه شايف الانجاب ليس مجرد رغبة انثوية او ذكورية، ولكنها رغبة بشرية مهلبية، وانه من حقه يكون عنده طفله البيولوجى

وجت فرصته ان زوجته سبق واستئصلت الرحم، فقرر انه يحمل هو ، ويشوفوا حد يتبرعلهم بالسائل المنوى!!!

وعموما اللى عايز يعرف اكتر يدخل هنا ده الموقع اللى بيتابع حمله، او يدخل على موقع اوبرا وحيلاقى القصه كاملة، او على موقع BBC arabic

بصراحه انا مش لاقية كلام اقوله، لما هو مقتنع انه راجل وتحول بملأ ارادته ،رجع الحمل احلو فى عينيه ليه؟؟ والناس دى بتفكر ازاى؟؟ وهل بقى شئ عادى ان كل واحد تطلع فى دماغه حاجة يعملها ،كل اللى اقدر اقوله يارب ارحمنا برحمتك ومتحكمش علينا نعيش فى زمن يبقى فيه الرجالة بالشكل ده

***

المشكلة بقى مش فى دلوقتى، لما العيل ده يتولد حيبقى موقفه ايه، وحيعيش فى الجو ده ازاى ،والمشكلة الاكبر بقى حيقوله ماما ولا بابا ولا انور وجدى؟؟؟؟

واهـــــــــــو ده عيبــــــــــــه

حبيبى حبسوه saw يا saw

2008-04-14T19:59:00.009+02:00

اكتر حاجة بتضايقنى فى السينما الاجنبية وخصوصا الامريكية هى المفاهيم المغلوطة اللى بيحاولوا يوصلوها لعقولنا ، وبيتعمدوا يفرضوها علينا فرض اعتمادا على انها السينما رقم واحد، رغم ان المفاهيم دى تتعارض مع واقعنا وثوابته الاصيلة

*****

يعنى مثلا ممكن تلاقى فى مشهد كونوستابل (ابو موتوسيكل ده) بيوقف عربية مسرعه بمنتهى الهدوء ويقوله رخصك بمنتهى الادب والذوق ، يقوم المواطن يديهاله بقمه الالاطه وهو قاعد جوا العربية -شفت البجاحه-وكمان من غير ما يقوله يا باشا!!!

لا والغريب انه ممكن يعترض ان اتعمله مخالفه، واحيانا-والعياذ بالله-ممكن يتطاول على الظابط بالقول او الفعل

*****

امال فين الكماين واللجان؟؟ ، طب ده جمال اللجنة ونكهتها انها تتعمل فى اى وقت وفى اى مكان ، وقمة سعاده المواطن انه يركن على جنب، ويقف نص ساعه يتحايل على الباشا الظابط ويحلفله بالعايشين والميتين انها اخر مرة يمشى من غير طفاية حريق او يعلق دبدوب فى المراية-الا اذا احترم نفسه من الاول وضرب ايده فى جيبه باى حاجة لامين الشرطه-

*****

حاجة كمان بتستفزنى فى الافلام دى، لو حصل وتاه طفل ، يجرى الاب يبلغ فيقف القسم كله على رجل علشان يدور على حته عيل ،وتلاقى نشرات باوصافه واعلانات فى التليفزيون وكلام فاضى كتير، وكإن اللى تاه ده ابن رئيس مراجيح مولد النبى!!

*****

مع ان احنا لينا تجربة رائدة فى الموضوع ده، اللى يضيع منه عيل ياخدها من قصيره وميروحش يبلغ، ينزل الشارع حيلاقى غيره كتير ومرميين تحت الكبارى، كل اللى عليه ينقى اللى يعجبه ويشيل، ومفيش داعى لتقليد الغرب الاعمى ده والتشدد انك عايز ابنك الحقيقى، ياسيدى كلهم احباب الله ويمكن يطلع حظك كويس وتعتر فيه قاعد معاهم، ولا انت عايز تتعب الباشوات وخلاص؟؟

*****

اللى زاد وغطى بقى لما تلاقى مشهد القبض على مجرم ، تلاقيهم جايين بعد ما وصلهم البلاغ بست دقايق، ليه مش خمسة او عشرة متسألنيش، الظاهر بيقبضوا فلوسهم بالدقيقة، وحاجة من اتنين يا يتحايلوا عليه لحد ما يسلم نفسه، يا يقتحموا المكان ويقبضوا عليه، وفى الحالتين لا تلاقى لا قلم ولا قفا ولا شالوت، اقصى حاجة انه لو قاوم ينضرب ضرب فافى كده لمجرد السيطرة عليه مش اكتر

وكله كوم وحكاية الحقوق بتاعته دى كوم تانى، ال ايه من حقه التزام الصمت والا كل كلمة تتحسب عليه، وكمان من حقه ميتكلمش غير قدام محامى!!!

*****

طب بالذمه ده ينفع ازاى، اولا لما يروحوا يقبضوا على المتهم لازم ياخدوا وقتهم العملية مش فوضى لانهم لازم يتحركوا بناء على توجيهات مش اقل من 25 لواء وعميد ، غير كده عدم وجود الضرب ده راجع لانهم اهملوا شخصية مهمة جدا ولها ثقلها فى عملية الامن القومى الا وهى (المخبر) ، طب ده المتهم من دول لما يروح النيابة بيتعرف هو جاى من قسم ايه من مجرد النظر لختم كف ايد المخبر على قفاه ، يعنى ده يعتبر اجراء رسمى اساسى، هما هيبوظوا النظام ولا ايه؟؟

اما حكاية التزام الصمت دى فمتوفرة اكيد ، لانه قال او مقالش هيمضى على اللى فى المحضر ، وكمان من حقه يتكلم مع المحامى بتاعه بس وهو مترحل بقى وعليك خير، اظن مفيش بعد كده !!

*****

النكتة الكبيرة بقى انهم دايما فى الافلام خصوصا الرعب يطلعوا البطل انه قاتل متسلسل ، دموى، بيخطف الناس من غير ذنب ويحبسهم فى اماكن ضلمة ورطبة، مليانة ادوات تعذيب اشكال والوان، ويفضل طول الفيلم يطلع روحهم من التعذيب ويقطع فى جسمهم من غير سبب محدد، ومش بعيد كمان يؤذى اهاليهم والناس اللى بيحبوهم

*****

بصراحه انا بقعد اضحك فى سرى واقول يا ترى لو فيلم الرعب ده عملوه نسخة مصرية، البطل حيكون رتبته ايه ؟؟؟

واهــــــــــــــــــو ده عيبـــــــــــــه

يــافت

2008-04-08T23:13:00.006+02:00

مكدبش المثل اللى قال الناس معادن، فيهم اللى اصيل زى الدهب الحر عيار 24 قيراط او بلهجة بتوع الدهب يافت، ومنهم اللى قيمته متزيدش عن قيمه الدهب القشرة ماركة الجمل ويمكن اقل كمان

*****

ساعات تطلع شاطر وتعرف تميز بينهم وتختار،وساعات تتغش وتخدعك القشرة

بس الاتنين مبيتعرفوش غير وقت الشده، يا يطلع يافت ويقف جنبك فى زنقتك، يا يطلع ع الميزان قشرة صفيح ويبقى عليه العوض

*****

اهى الناس كده برضه، متعرفش معدنها غير وقت الشده، يا تطلع اصيلة وتسندك فى ازمتك، يا تطلع فالصو ويبقى ساعتها خسارة انك تعرفهم اصلا

*****

انا عن نفسى قابلت النوعين، او يمكن مكنتش اعرف انهم نوعين لغاية ما اتحطيت فى ظروف صعبه غيرت حاجات كتير فى حياتى، وابتدا معدن كل واحد يبان، وللاسف اكتشفت ان كتير من اللى كنت فاكراهم قريبين منى كانوا اول الناس اللى بعدوا، وعرفت اد ايه عينين الواحد اوقات بتخدعه وبيفتكر ان اى حاجة بتلمع دهب

*****

منهم انسانه كنت فاكرة انها صاحبتى، اغلب يومنا كنا بنقضيه مع بعض بحكم الشغل، وتقريبا كل حاجة كنا بنعملها مع بعض، عمر ما خطر فى بالى ان لما الظروف تتغير حتبقى هى من اول الناس اللى تبعد، رغم ان مكنش مطلوب منها حاجه اكتر من انها تكون صاحبه بجد، فى وقت الانسان بيكون محتاج مجرد كلمة تخفف عنه مش اكتر

*****

الغريب ان بعد ما عدى على موقفها ده اكتر من تلات سنين، استغربت جدا انها بتحاول تبعتلى مع اى حد يعرفنى ويعرفها انها عايزة تكلمنى، طب ليه دلوقتى ، ايه اللى جد يعنى، ما انا كنت قدامها من الاول ، وبعدين انا زى ما انا وحياتى متغيرش فيها كتير، صحيح الحمد لله احسن نفسيا بس برضه مفيش تغيير كبير قوى لدرجة انى ابقى فجأة كده حلوة وعايزة ترجع تكلمنى تانى!!

*****

عموما انا كان ردى عليهم واضح، اللى يشوفنى بقع قدام عينيه وميلحقنيش يبقى مالوش لزوم ييجى بعد تلات سنين يقوللى سلامتك، واللى خلى غيابى ميأثرش معاها كل المدة دى يبقى مش حيأثر بعد كده

*****

قعدت افكر كتير مع نفسى ايه السبب اللى خلاها تفتكرنى فجاة كده مقدرتش اعرف، بس رجعت قولت تكونش يا بت طمعت فيكى لما عرفت ان بقى عندك مدونة؟؟؟

واهـــــــــو ده عيبـــــــــــــــه

كعب اخيل

2008-04-06T09:18:00.003+02:00

اخيل او اخيليس هو احد قاده الاغريق فى حرب طروادة، ابن ملك ميرميديون، وحسب الاسطورة الاغريقية علشان يبقى اخيل من الخالدين ، لازم يغطس فى ماء نهر سيتكس اول ما يتولد، لكن للاسف الست الوالده لما جت تعمل كده، مسكت المحروس اخيل من كعبه، فبالتالى فضل الجزء ده موصلتلوش المايه ، ومن يومها بقى نقطة ضعفه

*****

بعدها عرفت الام من احد العرافين ان اخيل حيموت فى معركة طرواده، فقررت هى وابوه انهم يخفوه عن الانظار،فلبسوه لبس بنات،وبعتوه لملك جزيرة سيكاروس، علشان يعيش فى قصره مع بناته!!!

*****

بعد مده قامت الحرب بين اهل طرواده والاغريق، ولما عرفوا ان النصر حيتحقق لهم بوجود اخيل، اغروه بالاسلحه والخيول، فانضم لجيش الاغريق

*****

وقدر اخيل انه يحقق النصر لجيش اجمامون، ويهزم الطرواديين ، لكن للاسف فى النهاية تكمن احد القاده انه يصوب سهمه ناحية كعب اخيل ، فأدى لسقوطه وساعتها كان سهل انه يقضى عليه

*****

من ساعتها تعارف الناس فى اوروبا على ان لفظ وتر اخيل او كعب اخيل هو كناية عن اى ضعف فى مجال الادب والثقافه، او حتى فى السياسة والفكر

*****

حتقولى وايه مناسبة الكلام ده حقولك دور كده حواليك يا ترى فى كام كعب اخيل فى حياتنا؟؟ او بمعنى اصح ايه نقاط الضعف اللى موجودة فيها؟؟

*****

صدقنى لو دورت كويس حتلاقى نقاط ضعف فى كل حاجة، وبشكل قوى ومستفز، وللاسف الناس بتتعايش معاها عادى ، او بتشوفها ومش قادرة تاخد موقف ، وكان العادى ان كل حاجة فى حياتنا تبقى ضعيفه

*****

كعب اخيل حتلاقيه موجود فى السياسة والاقتصاد، فى الاعلام والتعليم، فى الصحة والمستشفيات، فى الشوارع وحركة المرور، فى العيش اللى بناكله،فى سلوكياتنا وتصرفاتنا ، فى الزراعه والصناعه ، فى ضمير البنى ادميين ، حتى المايه اللى بنشربها والهوا اللى بنتنفسه ، تقريبا كل حاجة فى حياتنا مليانة نقاط ضعف، ومش قادرين نلاقيلها حل ، يعنى من الاخر وعلشان اريحك حياتنا عبارة عن كعب كبيرررررر وطلعله اخيل

واهــــــــــو ده كعبـــــــــــــــــــــــــــه

يوم واحد مش كفاية

2008-04-04T21:52:00.003+02:00

انهارده كان الاحتفال بيوم اليتيم، صدقونى يوم واحد بس فى السنة مينفعش اننا نفتكرهم فيه وخلاص ، او نروح نزورهم ونقعد معاهم،وباقى السنة ننساهم

*****

اللى اكتشفته انهارده ان الاطفال دى مش محتاجه اكل وشرب ولبس وبس، محتاجه حد يحبهم ويسأل عليهم، زى ما هما فاكرين الناس اللى بتجيلهم واحد واحد وبيسألوا عن اللى مجاش يزورهم

*****

المسأله مش تاديه واجب وخلاص، او زى ما كنت بشوف ناس تهتم قوى انها تاخد ايصال من أى دار ايتام بأى مبلغ كفلوا بيه طفل علشان يخصموه من مصروفاتهم عند الضرائب، وكأن المبلغ البسيط ده مستكترين يبقى سر بينهم وبين نفسهم ومش مهم يضيع ثوابه عند ربنا ما دام حيتحسب عند الضرائب، او حتى مجرد منظرة انهم بيعملوا خير

*****

انا عن نفسى قررت انى ان شاء الله حروح على اد ما اقدر ومش حكتفى بيوم فى السنة، وياريت كلنا نحاول نعمل ده على مدار السنة بدل ما نهجم كلنا فى يوم واحد ونبقى عاملين زى اللى رايحين يغزوا دور الايتام، ونخوف العيال مننا

واهــــــــــــــو ده عيبـــــــــــــــه

اوعى تقول الوو

2008-03-31T11:21:00.005+02:00

بمناسبة انتهاء الموسم الضريبى، وتقديم الاقرارات والناس اللى قاعده مستنية العينة العشوائية وبختك يابو بخيت، الا اذا كنت حضرتك من الناس اللى بتقدم اقرارها فى مصلحة كبار الممولين فالوضع انذاك يختلف، المهم ولان الشئ بالشئ يذكر، حبيت احكيلكم تجربتى مع اول مكتب محاسب قانونى اشتغلت فيه، واهى كلها ضرايب

*****

وقتها كنت لسه متخرجه جديد ، وجاتلى فرصه الشغل فى المكتب ده، والصراحه كانت كل حاجه جديد فى جديد بمعنى الكلمة، يعنى انا متخرجه جديد، والحاج المحاسب صاحب المكتب لسه فاتحه جديد بعد ما خرج على المعاش، فى شقة جديدة فى برج جديد ، يعنى كل حاجة توحى ببداية مبشرة ان شاء الله

*****

قعدت اول كام يوم كده استكشف الشغل ماشى ازاى، وتخيلت انى حلاقى بقى ناس داخله وناس خارجه، واكتشفت يا مؤمنين ان العميل الوحيد للمكتب هو الحاج صاحب البرج اللى احنا فيه، وطول اليوم وانا قاعده بوزى فى بوز الحيطة ، بس الحق يتقال ايام الفراغ دى فادتنى فى حاجات كتير ، يعنى خلتنى ختمت القراءن فى وقت قصير، قرأت كمية من الكتب والمجلات والجرايد لا بأس بها، ده غير لما كنت ابقى ساعات لوحدى اروح قافله على نفسى الباب واروح فى نوم عميق، مش عارفه ليه النوم فى الشغل على المكتب بيبقى احلى والذ من النوم فى بيت الواحد وعلى سريره؟؟

*****

الحمد لله مفاتش وقت طويل وابتدا يبقى فى شغل، فقرر الحاج انه ياخدنى معاه جولة تفقدية فى مأمورية الضرائب للتعرف على نظام الشغل والشُعب المختلفة، ويومها اخدنى معاه وبقى يلف بيا من مكتب لمكتب ولا تجار الشنطة اللى بيلفوا على المصالح الحكومية، وكل ما يقابل حد يعرفه عليا ويقوله مديرة مكتبى، مكتب ايه يا حاج وهو كله على بعضه اوضتين وصاله منهم اوضه المحروس ابنك عاملها مكتب مستخلص خللى الطابق مستور، والحقيقة انه فرج امه لا اله الا الله عليا من اول مدير عام المأمورية لحد الفراش

*****

المشكلة ان الحكاية دى جابت نتيجه عكسية، لانى اكتشفت بعد كده اد ايه كانوا بيحبوه ، واد ايه كان مدير لطيف، لدرجة ان اللى كان بيعرف انى من مكتبه كان بيبقى هاين عليه يرمينى من الشباك، وخصوصا ان شكلى بقى معروف ليهم زى الناس اللى متعلق صورها فى المحافظة، ودى تعلم اى حد انه لما يخرج من مصلحه كمدير ميرجعلهاش تانى ابدا كعميل

*****

كل اللى فات ده عادى وبيحصل، اللى زاد وغطا ان بعد كده لقيته فى يوم بيقولى على فكرة انا مش جاى انهارده بعد الظهر، مسافر عندى حضرة، طبعا اختكوا وقعت وهى صغيرة على ودنها اصنجت، فقلت اكيد بيقول محاضرة وانا سمعت غلط، بس محاضرة ايه دى معقول يكون بيدرس فى حتة وانا مش عارفه؟؟

*****

المهم تانى يوم لقيته جاى وراح مشغل شريط كاسيت غريب، اصوات عماله تقول مدد يا رسول الله ،والله حى وحاجات كتير كده مش فاهماها، المهم ندهلى وادانى كيس فيه اعشاب وقاللى ممكن تعمليلى شاى وتحطى فيه من الكيس ده، ميروحش مخكم لبعيد دى طلعت مرمرية ، عملت الشاى ورجعتله لقيته معلق صورة واحد على الحيطة ، بقوله مين ده قاللى ده العارف بامر الله مش عارف مين بتاع الطرق الصوفيه ابصر ايه، مع ان الراجل اللى فى الصورة وشه زى البدر ولابس بدلة سينييه، صوفيه ايه بقى !!!

يعنى اللى يشوف الحاج وهو قاعد ورا مكتبه بيسمع الشريط والبخور قدامه وفى ايده كوباية الشاى ابو مرمرية-اللى بالمناسبة مكنتش بطيق ريحتها ولما اشمها احس انى عايزة ارجع من سابع دور-يقول والعياذ بالله انى شغاله عند دجال مش محاسب

*****

نسيت اقولكم ان فى خضم هذه الاحداث، كانت الحاجة مرات الحاج وبنته بييجوا يأنسونى فترة بعد الظهر، الظاهر بعد ما بيتغدوا ويشطبوا المواعين مش بيلاقوا حاجة يعملوها فييجوا ياخدوا بحسى، وتروح واحدة قاعدة على يمينى والتانية على شمالى وابقى فى وسطهم شبه عادل امام فى شاهد ما شافش حاجه ، وهاتك يا كلام ورغى عن مرات ابنهم اللى طلعت وحشة ومهملة ولما راحوا يفتشوا عليها تانى يوم الجواز ولقوا بيتها مش نظيف، بالذمه دى حد يعقلها؟؟؟

والحمد لله فضلوا وراه لحد ما طلقها وارتاحوا

*****

ثم جاءت النهاية، فى يوم بعد الحاج ما نزل لقيت موبايله بيرن، نساه على مكتبه، بصراحه مكنتش عايزة ارد لكن لما لقيته رن كتير قلت مابدهاش بقى:-

-الوو.. مين يا فندم؟

-مين ايه .. انتى اللى مين

-انا داليا.. حضرتك اللى مين؟

-انا مرات الحاج يا حبيبتى، ازاى تردى على تليفونه؟؟

-اصله نزل وساب التليفون

-وكمان سايبلك التليفون حلو قوى ، وازاى يسبهولك، وازاى....... وازاى .........

وهوب راحت قافلة السكة فى وشى، وكانها حاشا لله ظبطتنى مع التليفون فى وضع مخل، ساعتها بجد اخدت القرار انى اسيب المكتب ، مش كفاية عليا شرايط الحضرة ، والشاى ابو مرمرية اللى لعب نفسى عليا طول الشهور دى كمان تيجى هى وتكلمنى بالشكل ده، صحيح الحاج بعد ما عرف قعد يعتذرلى وحاول يسترضينى، لكن انا جبتهاله من ناحية انى مش عارفه اوفق بين الشغل فترتين والدبلومة اللى بعملها، وفعلا سبت المكتب

*****

وعموما على السادة قاطنى محافظة بورسعيد، اللى يعرف شغل بعيد عن الحاج ومراته وبنته وموبايله ياريت يبقى يقوللى ، والاجر والثواب على الله، والاهم من ده يكون بعيد عن الضرايب لان وشى عندهم بقى من النوع المألوف قوى

واهــــــــــــــــو ده عيبــــــــــــــــــه

سينما الخبيزة

2008-03-28T21:53:00.006+02:00

بصراحة يا جماعه انا مش عارفة اقول ايه، الواحد بقى يشوف ويسمع العجب يا ترى ممكن حد يفهمنى ايه موجه الشذوذ اللى بتجتاح مصر الايام دى سواء فكريا او ادبيا او سينمائيا ؟؟؟

*****

بقالى فترة ملاحظة ان كل فيلم بيظهر بيتناول الفكرة دى بشكل اكبر واغرب من اللى قبله ، صحيح فكرة تناول العلاقات الشاذه مش جديدة قوى، وسبق تناولها قبل كده بشكل غير مباشر فى اكتر من فيلم منهم ( قطه على نار) لنور الشريف وبوسى، او حتى بشكل كوميدى زى ما حصل فى مسرحية (العيال كبرت) لما حسن مصطفى يقول سلملى على جوزك يا اسماعيل بيه، ويرد سعيد صالح يقوله ليه هو اسماعيل بيه شاذ؟ الكلمة اللى فضلت محذوفه من المسرحية اكتر من تلاتين سنة

*****

لكن الحكاية اخيرا بدأت تاخد شكل مباشر، وكانت بداية القصيدة مع فيلم (عمارة يعقوبيان) اللى اكيد اغلبكم شافه، وانا من حظى انى دخلت على عمايا شفته فى السينما، وطول الوقت كنت بحاول اتشاغل عن الفيلم بانى اسأل اللى معايا يا ترى خالد الصاوى جاب العبايات الحلوة دى منين؟

*****

بعديها جت حكاية فيلم ( حين ميسرة ) والضجه اللى حصلت عليه وعلى بطلاته بسبب مشاهد الخُبيزة اللى كانت بينهم،ومدافعتهم عن الفيلم بان ده شئ موجود وبيحصل وبلاش بقى شغل النعامه اللى تحب تدفن راسها ، طب يا اسيادنا وبعد النعامه ما طلعت راسها ايه اللى حصل؟؟

*****

اللى حصل بقى ان الحكاية دى بقت التيمة السينمائية الجديدة اللى حيبتدى يلعب عليها كل المؤلفين والمخرجين ، زى ما حيحصل فى فيلم (علاقات ساخنة ) اللى احب اطمنكم انه مش حيكون فيه مشهد ولا اتنين ، لا ده حيبقى الفيلم كله بيتناول الحياة الخُبيزية السعيدة بين فتاتين، اللى حيكون التجربة الاولى من نوعها فى العالم العربى، ال يعنى اكتشفوا الذرة!!

*****

واللى يضحك ان المخرج قال انه حيقدم الفكرة بشكل غير مبتذل يعتمد على الايحاء والرمز، ومش شايف ان حيكون فيه اعتراض من الرقابة على الفيلم ،الظاهر ناوى يقدمه على طريقه القهوة اللى بتفور والشيش اللى يتفتح والبرق والرعد!!

*****

يا ترى الافلام دى الهدف منها ايه؟ ومحدش يقوللى كشف نقاط الخلل فى المجتمع، زى ما قالوا قبل كده على افلام المخدرات والاغتصاب والفساد ، اللى بالعكس كانت بتعلم الناس الحاجات دى اكتر ما بتمنعهم عنها

*****

للدرجة دى يعنى اختلت الطبيعه السوية عند الناس، مهو اللى حيدخل يتفرج عليه يا اما هو كده، يا اما الفضول هو اللى بيدفعه يعرف ايه اللى بيحصل وده برضه شئ مش سوى، ومش بعيد بعد كده تلاقى العالم الخُبيزة دول بيطالبوا بحقوقهم وعايزين هما كمان خانة فى البطاقه

*****

انا ضد الشذوذ بمختلف انواعه فكريا وادبيا وبيولوجيا، لان ربنا سبحانه وتعالى خلقنا فى الاصل أسوياء، وخلق من حوالينا طبيعه سوية، لا عمرنا شفنا جاموسة ماشية مع جاموسة، ولا طائر جه فى موسم التزاوج وقرر يغير ميولة ويبقى خُبيزى

*****

حتى فى الفيزياء علمونا ان الاقطاب المختلفة تتجاذب والمتشابهه تتنافر، يعنى لازم يبقى قطب سالب وقطب موجب علشان الدايرة تقفل، ومحصلش ان طلع حد يقولك ممكن نمشيهم شبه بعض

*****

والناس بتوع الحرف اليدوية اللى لما يكون فيه قطع متركبش غير مع بعضها يقوموا يسموها( ذكر+انثى) ، زى العاشق والمعشوق فى الارابيسك

*****

انا بستغرب فعلا على الناس دى اللى ترفض الشذوذ فى الطبيعه والصناعه والكيمياء والفيزياء وتقبله بس..... فى الاحياء

واهـــــــــو ده عيبـــــــــه

**ملحوظه:- كلمة خُبيزة بديل عن اى كلمة تدل على علاقه غير سوية

عود احمد

2008-03-27T21:51:00.003+02:00

وعادت اليكم فى حلتها الجديدة-التيفال زهران-بعد غياب مادامش اكتر من كام ساعة، وذلك بعد اجراء التجديدات والديكورات والستائر المشجرة اللى انتوا شايفينها

واحقاقا للحق يعود الفضل فى هذا التجديد والنيولوك الى الاخ محمد الشافعى اللى طلع عينه معايا النهارده ، وبقوله ربنا يكرمك ويصبرك على، ومتزعلش منى غلبتك معايا

وكذلك الاخت دينا مصيلحى (دى صفه مش اسمها) اللى نشفت ريقى علشان تعملى بعض التعديلات لان زى ما انتم راسيين اختكوا بلاطة فى اى حاجة تتعلق بالكمبيوتر، وحكاية التدوين دى واخداها عافية بالدراع يعنى

طبعا حد حيقول ايه الالوان الفحلقى اللى انا عملاها دى، حرد بمنتهى الذوق واقوله مزاجى، ده انا ما صدقت لقيت شكل فيه كل الوان الدنيا، خصوصا الالوان المزهزهة اللى تحسسك ان الدنيا ربيع فعلا، حتى لو كانت شبه قميص شعبان عبد الرحيم اللى من الوكالة

يبقى اذا كان معنديش شجاعه شعبان انى البس الالوان دى فعلى الاقل اشوفها هنا، ولا ايه؟؟

سوق على مهلك سوق وحياتك ما هايعتقوك

2008-03-23T08:50:00.006+02:00

مبروك عليكم وعلينا قانون المرور الجديد، اللى خلال ايام حيكون بيعرض امام مجلس الشعب، وطبعا موافقون على بركة الله، ومين يا جماعه يكره ان الفوضى فى شوارعنا تتنظم شوية ، كتر الف خيرهم

***

القانون الجديد حيبقى فيه تغييرات كتير، منها مثلا ان المخالفة حتبقى على السائق مش على المركبة زى زمان، لانهم بعد بحث وجهد اكتشفوا ان السائق هو المسئول مش العربية، يبقى هو اللى يشيل المخالفة حتى لو مش صاحبها، ودى حاجة كويسة علشان كل واحد غصب عنه يحافظ على عربية غيره ، وخصوصا ان مبالغ المخالفات حتكون مرتفعه، ده على حسب اللى سمعته بس لسه التسعيره منزلتش

***

مش بس كده، السائق اللى حتتكرر مخالفاته حتتسحب رخصته خالص، ومش بعيد يدخلوه مدرسة المرور من جديد علشان يوافقوا يدوه رخصة تانى، ولو فكر يطلع من وراهم بدل فاقد للرخصه المسحوبة، يبقى ليلته ليلاء ، لان الباشوات عملوا قاعده بيانات جديدة متسجل عليها دبة النملة، وساعتها حيبقى بيعرض نفسه للغرامة ومش بعيد الحبس

***

حاجة كمان، اللى حيسمح لحد اقل من 18 سنة انه يسوق عربيته ويعمل بيها حادثه لا قدر الله، مش حيقدر يقول الواد اخدها من ورايا، لانه ببساطه حيتحمل نفس العقوبة الجنائية والمادية، بس هل ياترى الحكاية دى حتتطبق على ولاد الكبرات، ولا معمولة بس لسواقين الميكروباصات اللى ماشيين من غير رخص وتحت 18 سنة ؟؟

***

وبمناسبة الميكروباصات ، حيبقى ممنوع منعا باتا انها تقف على مطالع الكبارى، او تمشى وبابها مفتوح، والتكاتك دى انسوها لان حتشتغل بس بين القرى والطرق النائية، غير كده الزامهم بالسير على يمين الطريق ، كان غيرهم اشطر!!

***

ولاننا نعيش عصر الحكومة الالكترونية، فسيتم تركيب كود على اللوحات المعدنية يمكن قراءته الكترونيا، ايوة بالظبط زى اللى فى الافلام الاجنبى،لما يحط الظابط الجهاز عليه يقوم يعرف اسم صاحب العربية واسم السواق والتباع كمان وبيحمل من موقف ايه

***

اما العربيات النقل فدى بقى حكايتها حكاية، حيحطولها نظام محدد للسرعات ، وتمشى فى الحارة المخصصة لها يمين الطريق، لغاية ما ربنا يفرجها وخلال 3 سنين يلغوا المقطورات خالص ويمنعوا استيرادها، على ان تقوم المصانع المحلية بانتاج البديل فى شكل وحدة نقل واحدة ، استر يارب ، بقى هى سياراتنا المحلية اللى حتقلل الحوادث!!!

***

غير كده حيركبوا فيها صندوق اسود علشان يعرف خط سير السيارة النقل واذا كان السواق قبل ما يتقلب بيها كان بيشرب بانجو ولا دى عملية انتحارية، كمان حيجيبوا الجهاز اللى بيكشف عن تعاطى الكحول بالنفس ،طب ما كفايه الباشا يقوله قول حاحا وحيعرف على طول اذا كان شارب حاجة ولا لا

***

صحيح القانون الجديد ليه حسناته زى تغليظ العقوبات للسير فى الاتجاه العكسى وتعريض حياة الناس للخطر قد تصل للسجن،لكن نقدر برضه نستخلص منه شوية حاجات:-

1-ان شاء الله حصيله الداخلية حتكون وافرة بعد تطبيق القانون، لان من خلال تجاربنا اى قانون جديد بيبقى فيه كلمة تشديد العقوبة بيجى من وراه فلوس كتيرة ، خصوصا لو كان بيدى الاختيار بين الدفع او الحبس

2-بعد ما كان عسكرى المرور بيرضى بالخمسة ولا العشرة جنيه المطبقه، دلوقتى حيبتدى يساوم على مبلغ اكبر لانه حيبقى عارف ان روحك بين ايديه

3-هنيئا لمستوردى كود اللوحات المعدنية والجهاز اللى بيقرا الكود ، الصندوق الاسود بتاع النقل، الجهاز اللى بيقول حاحا، وكذلك مصنعى السيارات النقل المحلية اللى حتبقى ان شاء الله احسن من المستوردة وتمنع الحوادث خالص

***

السؤال بقى اللى بيطرح نفسه هل سنكون جميعا سواسية امام قانون المرور الجديد؟ يعنى سواق الميكروباص زى سواق عربية البيه او الباشا، الراجل ابو عربية 128 على ادها، زى اللى راكب عربية محدش يعرف ينطق اسم ماركتها

***

حتى يظهر القانون للنور، ونعرف راسنا من رجلينا ، كل اللى اقدر اقولهولك عزيزى المستمع ((طريق السلامه))

واهــــــــو ده عيبـــــــــه

عفوك امى سامحينى

2008-03-21T09:42:00.003+02:00

كل سنة وانتم طيبين انهارده عيد الام، بصراحة ملقتش كلام اكتبه فى البوست ده يعبر عن اللى عايزة اقوله احسن من كلمات اغنية سامى يوسف ((أمى))

Blessed is your face
blessed is your name.. my beloved
blessed is your smile
which makes my soul want to fly
my beloved
open eyes and all the times that you did for me
but I never realized it
and now it is too late
forgiven ME
Now I'm alone filled with so much shame
for all biased I caused YOU pain
if only I could sleep in your arms again
MOTHER.. I'm lost without you
you was the sun that brightened my day
now who's gonna wipe my tears a way
if only I knew what I know today
MOTHER.. I'm lost without you

أماه.. أمّاه.. يا أمي
واشوقاه.. إلى لقياك يا أمي
أمك أمك.. أمك أمك
قول رسولك
في قلبي ..
في حلمي.. أنت معي يا أمي
رحتي
واا .. تركتيني
يا نور عينيّ
يا أنسَ ليلي يا ..
روحتي وتركتيني
من سواك .. يحضنني؟
من سواك.. يسترني؟
من سواك.. يحرسني؟
عفوك أمي.. سامحيني

وُلـــــــد الهــــدى

2008-03-19T17:34:00.007+02:00

ُولد الهدى فالكائنات ضياء....وفم السماء تبسم وثناء

كل عام وانتم بخير بمناسبة المولد النبوى الشريف، يا ترى حنحتفل السنة دى عادى زى كل سنة ولا كأن فى حاجة بتحصل؟؟ على أساس اننا اعترضنا وقاطعنا وعملنا اللى علينا، يبقى من حقنا نحلى بوقنا وناكل الحلاوة

***

طول عمرى نفسى اعرف ايه سر ارتباط اعيادنا الاسلامية بالاكل، رغم ان ده لا يمت للدين ولا السنة بشئ، رمضان يبقى كنافة وقطايف، العيد الصغير كحك وبسكويت، العيد الكبير لحمة وفتة، المولد النبوى يبقى عروسة وحصان وحلاوة، وبننسى أى حكمة من الايام الفضيلة دى

***

يعنى بكرة مثلا ذكرى مولد الرسول عليه الصلاة والسلام، بدل ما الناس تنوى الصيام وتقرر تنتهز فرصة اليوم الشريف ده للتفكر فى سنة الرسول عليه الصلاة والسلام، حتلاقيهم يا اما بيتخانقوا علشان الحلاوة اللى مجتش، يا اما واقفين متزاحمين عند الحلاوانية

***

وياويله يا سواد ليله اللى ميجيبش لخطيبته،أو اللى متهاديش حماتها، أو اللى يدخل بيتهم وايده فاضية، وكإن الناس لو مكلتش الحلاوة فى اليوم ده حتفضل تعانى من خلل بيولوجى طول السنة ، ومش بعيد يطلعلهم فسافيس فى قفاهم

***

حاولت اعرف جه منين اصل تاريخ حلاوة المولد ده، واكتشفت انه كالعادة افتكاسة فاطمية زى الكنافة والقطايف ولقمة القاضى، واضح انهم كانوا عايشين فى رفاهية خلت كل تفكيرهم منصب على ابتكار أنواع أكل وبس

***

بصوا انا مش بدعى المثالية، ولا حكدب واقول انى مش باكل حلاوة المولد، أنا كل اللى اقصده ان ميبقاش ده كل علاقتنا باليوم، لان صاحب المولد أشرف وأعز من ان ميلاده يرتبط فى اذهاننا بس بأكل الحلاوة، خصوصا فى ظل المهازل اللى بترتكب الايام دى فى حقه

***

وأخيراً وليس اخراً( اللهم صلى على سيدنا محمد حتى لا يبقى من صلاتك شئ، وسلم على سيدنا محمد حتى لا يبقى من سلامك شئ، وبارك على سيدنا محمد حتى لا يبقى من بركاتك شئ )

******

كلمة واقفة فى زورى:-

اقسم بالله العظيم انى مش ضد المقاطعه، بالعكس انا اتمنى اننا نقدر نقاطع كل حاجة دخيلة على حياتنا ، على الاقل علشان نقدر نملك زمام امرنا زى ما قال الشيخ الشعراوى-رحمه الله- بأن نزرع ما نأكل، ونصنع ما نلبس، وأظن اللى عمله غاندى احنا مش ناقصين ايد ولا رجل علشان نعمله

***

لكن ازاى اقاطع منتجات أنا وتقريبا 90% من الشعب المصرى لا نعرفها ولا بنستعملها،المواطن البسيط اللى مش لاقى الزيت اكيد عمره ما أكل بالزبدة الدنماركى، وماهوش عارف يشترى اللبن السايب لولاده علشان يشربهم لبن العلب الدنماركى، ومداقش الجبنة الدنماركى لان كبيره مثلث الجبنة النستون المصرى اللى ممكن يكون بيشتريه فرط زى السجاير

***

إذن عبء المقاطعه يقع على عاتق اخوانا العرب اللى هما المستهلك الاساسى للحاجات دى، و ال10% اللى بتشترى أكلها من عند كارفور ومترو وغيره ، مش من عند ابو إسلام البقال

افتونى بالله عليكم كيف اقاطع إذن!!!!

******

كلمة تانية واقفة فى زورى:-

من كام يوم قررت دولة بيلا روسيا (روسيا البيضاء) طرد السفيرة الامريكية ، وسحب سفيرها من امريكا وذلك لفرض عقوبات على شركة بترول خاصة بها، واخدين بالكم علشان شركة بترول ، مش علشان اهانوا نبيهم ولا استهزئوا بيه فى رسوماتهم، ولا دبحوا وقتلوا فى عيالهم ، يا ترى كام دولة عربية قررت تطرد السفير الامريكى أو الدنماركى أو الاسرائيلى من ارضها؟؟

وأهـــــــــو ده عيبـــــــــه

عن الاكـــــل والغـــــلا

2008-03-15T16:31:00.018+02:00

اشمعنى يعنى تامر حبيب يكتب عن العشــــق والهــــــــــوى، انا بقى قررت اكتب عن الاكــــــــــل والغـــــــلا

العيش والعيشة واللى عايشينها

وجاءت ازمة رغيف العيش علشان تكمل علينا، ال يعنى الناس رايقة وفاضية وكل حاجة متوفرة ، فحبوا يضيفوا شوية دراما لحياتنا، وبدل ما يبقى عندنا ضحايا عبارات ومراكب يبقى عندنا كمان ضحايا طوابير العيش

***

يمكن لوقت قريب مكانش عندنا هنا -فى بورسعيد-مشكلة طوابير العيش اللى بالساعات دى زى محافظات تانية، بالعكس كان العيش نظيف ورخيص(قروا بقى)وكان ممكن الواحد يشتريه اليوم بيومه

***

وفجأه اتبدل الحال ، طوابير بالساعات، خناقات وقلة ادب،وكل ده سببه افواج الناس اللى بتيجى من محافظات ومدن قريبة علشان تشترى العيش من هنا، وياريتهم بيشتروه علشان ياكلوه او بكميات معقولة، لا تلاقى الواحدة من دول(اغلبهم ستات) جاية واقفة فى الطابور ومعاها شوالين على الاقل وتقول للراجل عايزة بعشرة جنيه

***

طبعا العيش ده بيطلع بره البلد يتباع بتلات او اربع اضعافه، او بيتاخد ويتباع لناس هنا برضه بس مكسلة تقف فى الطابور وعندها استعداد تدفع تمنه مضاعف

***

وبالرغم من حكاية الرقابة على المخابز اللى طلعوا فيها دى، وان محدش يشترى باكتر من 2 جنيه، الا ان الواقع غير كده خالص، وكفاية تدى الواد الفران فى ايده اى حاجة يبيعلك المخبز باللى فيه

***

ولان اكل العيش مش بالساهل، وفى اكل تاكله واكل ياكلك على راى بعرور ، مفيش قدام الواحد غير انه ينتهز اى فرصة يقدر يجيب فيها عيش ويخزنه ، واهو نعمل حسابنا للايام العجاف اللى جاية

***

اما اللى نقطنى بجد وخلانى بفكر اركب مرارة كاوتش، ان رغم مذابح العيش ، والرغيف اللى الواحد بيجيبه بطلوع الروح، لسه فى بعض الفلاحين من بتوع البط والفراخ اللى بيعدوا بمنتهى البجاحة من تحت البيوت ويندهوا :-

اللـــــــــى عندهـــــــــــــــا عيــــــــــــــــششش للبـــــــــــــط

مجانين دول ولا ايه؟؟؟؟ ان شالله ما طفح البط

نصائح ست البيت للاستغناء عن الزيت

اسعار الزيت اللى ارتفعت بشكل جنونى ولسه حترتفع شئ محير، هو صحيح كل حاجة غليت بس بصراحة الزيت ضرب رقم قياسى فى سرعة الزيادة، يعنى ممكن تشترى الازازة الصبح بسعر تروح تسأل عليها بالليل تلاقيها بسعر تانى، ولا البورصة

***

وعلشان كده انا قررت اديكوا شوية نصائح تخليكوا تستغنوا عن الزيت خالص،واهو كله بثوابه

***

-بالنسبة للحوم والفراخ(ولو ان اذا كنتم لسه قادرين تشتروها يبقى اكيد حتشتروا الزيت) فانسوا حكاية البانية والبوفتيك والمقلى والمحمر دى خالص، وعيشوا على المسلوق احسن، وان كان ولابد يبقى اشتروا شواية واقعدوا اشووا فى البيت عليها،او حطوها فى فرن البوتوجاز وهى تستوى لوحدها من غير زيت ولا حاجة ، بلا فلقة دماغ

***

-بالنسبة للحلويات ، شيلوا من قاموسكم القطايف وبلح الشام وصوابع زينب ولقمة القاضى واى حاجة ممكن تحتاج زيت، بطلوا بقى الحاجات البلدى دى ، وخليكوا فى الجاتوهات والتورتات والحاجات اللى بتتعمل بزبده-بس متكونش دانماركى علشان المقاطعه-

***

-اما للى مش بياكل الحاجات دى ومقضيها نباتى، يبقى ينسى البادنجان المقلى والبطاطس المحمرة وتقلية الكشرى واى حاجة ممكن تتعمل بزيت، ويفهم ان الحكومة عايزاه يترقى وياكل السوتيه ويحافظ على صحته من الكوليسترول، حتى ولو كان بيقلى بزيت التموين اللى ميفرقش كتير عن الزيت اللى متغير من عربية ، ومع ذلك الناس مش قادرة على تمنه

بالذمة مش مصيبة اننا نعيش فى بلد تمن ازازة زيت الشعر فيها ارخص من تمن ازازة زيت الاكل!!!!!

بالكيـــــــــلو ولا بالــــــــــــواحده

فى اوروبا والدول المتقدمة من حقك تشترى اكلك بالكمية اللى انت عايزها، يعنى لو ماشى فى الشارع ونفسك راحت للتفاح حتروح مادد ايدك واخد واحدة وعاطى تمنها للبياع عادى خالص من غير ما يطلع يجرى وراك ،ولا يقولك متاخد 2 كيلو على بعض ياباشا

ولو برضه رحت للجزار ممكن تقوله بمنتهى الكبرياء عايز حتتين لحمة او تلاتة حسب العدد اللى انت عايزه، وبمنتهى الادب حيروح مجهزهم ومش بعيد يوصلهم لحد البيت كمان، من غير ما يرفع عليك الساطور ولا يعلقك بدل اللحمة اللى قدامه

طيب تفتكروا النظام ده ممكن يمشى عندنا فى مصر، خصوصا مع السلع اللى سعرها مرتفع، واللى اغلب الناس مش بتقدر تشتريها علشان لازم تتباع بالكيلو مش بالواحدة ولا بالحتة، وبالتالى فى ناس متعرفش طعم حاجات كتير

واشمعنى النظام ده موجود فى دول نظيفة ومرتاحة ومش محتاجه اصلا تشترى اللحمة بالحتة ولا الفاكهه والخضار بالواحدة، لكن كل الحكاية ان المسالة بالنسبة لهم ترشيد استهلاك مش اكتر، بدل بواقى الاكل اللى بتترمى فى الزبالة ويعاد تدويرها بمعرفة ناس تانية تدور عليها وتاكلها، وده اللى بقى عادى فى مصر دلوقتى انك تلاقى ناس بتاكل من صفائح الزبالة

بيتهيالى ان مع الغلا المستمر اللى بيزيد كل يوم رضينا او مرضيناش النظام ده حيطبق، وبكرة نلاقى نفسنا بنشترى اللحمة بالسنتيمتر والزيت بالكوستبان، والرز بالحباية زى الاسبرين

واهــــــــــــــــو ده عيبـــــــــــــــــــــه

أمرك مطاع يا سيد الانطاع

2008-03-10T22:13:00.009+02:00

بسم الله الرحمن الرحيم

((الرِّجَالُ قَوَّامُونَ عَلَى النِّسَاءِ بِمَا فَضَّلَ اللَّهُ بَعْضَهُمْ عَلَى بَعْضٍ وَبِمَا أَنْفَقُوا مِنْ أَمْوَالِهِمْ فَالصَّالِحَاتُ قَانِتَاتٌ حَافِظَاتٌ لِلْغَيْبِ بِمَا حَفِظَ اللَّهُ وَاللَّاتِي تَخَافُونَ نُشُوزَهُنَّ فَعِظُوهُنَّ وَاهْجُرُوهُنَّ فِي الْمَضَاجِعِ وَاضْرِبُوهُنَّ فَإِنْ أَطَعْنَكُمْ فَلَا تَبْغُوا عَلَيْهِنَّ سَبِيلًا إِنَّ اللَّهَ كَانَ عَلِيًّا كَبِيرًا))

صدق الله العظيم

***

طبعا اغلبنا اذا مكانش كلنا عارفين الآية الكريمة، وناس كتير بتحب تستشهد بيها مع اى خلاف بين زوجين، او اى مناقشة فى موضوع المساواة بين الراجل والست اللى مش عايزين يرحمونا منه، بس يا ترى ايه هو المعنى الحقيقى للقوامة؟؟ وايه هو وجه التفضيل للراجل عن الست علشان يقوم بهذه المهمة؟؟؟

***

القوامة بأبسط معانيها هى تحمل الرجل لمسئولية اسرته ماديا ومعنويا، وانفاقه على المسكن والمأكل والمشرب، ورعايته لافراد اسرته، بالظبط زى حديث الرسول عليه الصلاة والسلام (( كلكم راع وكلكم مسئول عن رعيته )) ، والمسئولية اكيد لا تتجزأ

اما بقى عن تفضيل الرجل للقيام بهذه المهمة ، فمش علشان عضلاته ولا الشنب اللى فى وشه، لكن لوجود عبادات يُكلف بها الرجل دون المرأة ، زى الجهاد والصلاة فى المسجد وفى جماعة وغيرها ، وانا عن نفسى شايفاه نوع من التكريم للمرأة انها تقعد كده معززة مكرمة، والافندى بتاعها يقوم بكل طلباتها

***

كل اللى فات ده جميل ، لو موجود وبيطبق صح، لكن للاسف الواقع بقى غير كده، يا ترى حد يعرف فى مصر كام اسرة تعولها ست؟؟ أو بمعنى تانى كام امراة معيلة؟؟

***

المرأة المعيلة يندرج تحتها عدة انواع ، الارملة والمطلقة و زوجة المسجون والمريض والغائب و اللى موجود وعامل مستعبط

بالنسبة للارملة وزوجة المسجون أو المريض ، فالراجل فى الحالة دى مش بيمتنع عن الانفاق بمزاجه ، دى ظروف ممكن تواجه أى اسرة، وبيبقى شئ عظيم ان الست تتحمل مسئولية الاسرة فى الظروف دى

***

المصيبة الكبيرة بقى فى حالة الست المطلقة اللى رافض طليقها يصرف على عياله أو سابهم وطفش ومش عارفين طريقه ، يعنى سيد الرجالة تخلى عن مسئوليته بمزاجه وكيفه، والست فى الحالة دى بتبقى مجبر اخاك لا بطل، يا تنزل تشتغل يا تموت هى وعيالها من الجوع

***

أما المصيبة الاكبر والاعظم ان يكون الراجل عايش ، وموجود فى بيته مش طفشان، وصحته زى الثور يتبنى على كتافه بيت، ومع ذلك عايش مستنطع على مراته، واسفة على اللفظ لكن حاولت ادور على تعريف للراجل اللى عايش عالة على مراته ملقتش فى قاموسنا العامى كلمة اشد من كلمة (( نطع ))

الراجل من دول يبقى نايم فى البيت ، ومراته نازلة تشتغل ،مش مهم عنده بتشتغل ايه، المهم ترجع معاها فلوس وسجاير واكل، وفوق كل ده ياويلها لو فتحت بقها او اشتكت الافندى بتاعها ، أو عابت فى سيد الرجالة اللى مهنيها، والمطلوب منها بعد كل ده انها تقوله ((امرك مطاع يا سيد الانطاع ))

***

نوعيه الرجالة دى موجودة ومنتشرة فى المناطق الفقيرة والعشوائية من زمان ، لكن المصيبة انها بدأت تظهر كمان فى الطبقة المتوسطة، ومش شرط يكون الراجل عاطل ، بالعكس ممكن يكون بيشتغل هو ومراته ، لكن مش عايز يصرف مليم على البيت أوعلى ولاده، والكلمة اللى عنده (( وانتى فلوسك فين)) ، وده مش بخل اد ما هو استنطاع، لانك ممكن تلاقيه راح صرف الفلوس دى على نفسه أو على واحدة تانية، ومعتمد ان مراته طالما بتشتغل يبقى لازم تصرف فلوسها كلها فى البيت

***

أنا مش عارفة هل المشكلة ان الناس دى مش فاهمة دينها صح ، ومش عارفة يعنى ايه قوامة أو ذمة مالية مستقلة للمراة، ولا ده عيب تربية، ولا عيب بيئة ومجتمع ، بصراحة مش قادرة احدد ، كل اللى اعرفه ان حكايات الستات الشقيانة كتير جدا، وكل يوم العدد بيزيد، ومفيش قدامهم غير الصبر على ظل خيال الماتة اللى فى حياتهم

****

اما انت ايها النطع عقبال ما تُساق ان شاء الله الى النطع (بساط من الجلد كان يقتل فوقه المحكوم عليه بالقتل) ، فلو حكمونى عليك وعلى امثالك ، لحكمت عليكم بالاعدام فى ميدان عام رمياً بالبُلغ ، لكن للاسف مفيش بُلغ حتكفى عددكم

واهـــــــــــــــو ده عيبـــــــــــــــــه

مهرجان عيال صحيح

2008-03-07T02:30:00.004+02:00

من يومين كان حفل افتتاح مهرجان سينما الطفل فى دورته الثامنة عشر، ولانى بحب الاطفال والطفولة -مش علشان الدش عطلان ولا حاجة-قعدت اتفرج على حفل الافتتاح

***

قبل الحفل ما يبدأ طبعا لازم بيجيبوا مذيعه كده تقعد على باب المهرجان-اى مهرجان- تلقف الضيف من دول وهو داخل علشان تسأله عن مشاعره واحاسيسه وهو داخل الى هذا الحفل المهيب، ولان المذيعه مثقفة وعارفة انها جاية مهرجان اطفال، كانت لابسة فستان تحفه، وحياتكم الوانه ما تفرق عن الوان الصورة اللى انا حطاها دى، وكله دوائر ومربعات وكل الاشكال الهندسية اللى ربنا خلقها، وكل الالوان اللى ممكن تخطر على بالك

***
الى جانب المذيعه الشيك ، حاطين بره قاعة المهرجان حاجة زى منصه كده، ولقيت المذيعه بتقول ( وزى ما حضراتكم شايفين ، من ضمن احتفالية المهرجان، عرض للاعبين من السيرك القومى الاوروبى)

على فكرة انا اول مرة اعرف ان السيرك بتاعنا بقى اسمه السيرك القومى الاوروبى، ولا يمكن ده سيرك تانى وانا معرفش،المهم لقيت كام وحد طالعين يتنطتوا، وطبعا انتوا عارفين العاب السيرك هى هى اللى متغيرتش من ايام سيرك الخديوى فتحى

***

الحمد لله بدأ الحفل اخيرا ، ولانه مهرجان اطفال، فطبعا كان الحفل من تقديم 3 اطفال كل واحد بيتكلم لغة ، ودول كالعادة مستوردين من مدرسة لغات ، وواقف معاهم على المسرح ناس لابسة دباديب، كل ما يطلع واحد من لجنة التحكيم، يروحوا هاجمين عليه وهاتك يابوس واحضان لحد ما يقف فى مكانه، وعاملين ربكة وزحمة مالهاش لازمة

***

شوية وبدأوا يقولوا اسماء الناس المكرمين ويظهر كل واحد فيهم، منهم اللى مثل وهو صغير واختفى بعد كده، ومنهم اللى استمر زى ممدوح عبد العليم اللى لقيته جايب بنته معاه على المسرح وعمال يشاور للناس عليها ، قلت حتى انت يا ممدوح، مش كفاية علينا ال شاهين اللى واحد منهم جاى يتكرم ، والتانى قدمته ليلى علوى من ضمن مجموعه نجوم المستقبل من الاطفال

اه بالمناسبة ليلى علوى كانت اخر واحدة ظهرت من المكرمين علشان يبقى ختامها مسك، وعلشان تنقطنا كالعادة بحلاوتها وشياكتها-الست دى بتاكل ايه-!!!

***

واخيرا صعد السيد وزير الثقافة ليعلن بدأ فعاليات المهرجان، ثم صعد حوالى 150 طفل اللى هما لجنة التحكيم برضه، وانا بالمناسبة دى احب احيي العمال اللى بنوا المسرح ده ، لانه لو مكنش معمول بضمير كان زمانه اخد الناس دى كلها ووقع

***

انا مش ضد ان الطفل يكون ليه مهرجان سينما، لكن يا ترى المهرجان ده موجه لاى فئة من الاطفال، الاطفال النظيفة المستحمية اللى حيكبروا يبقوا شباب المستقبل، والا الاطفال اللى ممكن يكونوا بايتين من غير عشا، ولا نايمين فى الشارع، والفلوس اللى اتصرفت على المسرح والديكورات والازياء والرقصات، واقامة لجان التحكيم من جيب مين؟؟؟؟؟

***

عايزين الحق انا دمى اتحرق وضغطى علا ، بس انا اللى استاهل، ايه اللى خلانى اتفرج من الاول، صحيح ادى اخرة اللى يتفرج على مهرجان عيال

اهــــــــــــو ده عيبـــــــــــه

إذا كنت تعانى

2008-03-04T08:08:00.003+02:00

وما خلق الله من داء إلا وخلق له الدواء، إذا كنت تعانى من حب الشباب ،إذا كنت تعانى من الصدفيه، إذا كنت تعانى من البهاق، إذا كنت تعانى من البواسير ، فالحل لدينا بإذن الله ،مع اعشاب (ودع اهلك) وداعا لهذه الامراض، فقط اتصل بنا على ...... السعر غير شامل مصاريف النقل و المشال

***

اللى فات ده كان نص اعلان من اللى ماليين القنوات عن ادوية ولا السحر، وسبحان الله بتعالج كل الامراض اللى ظهرت واللى لسه حتظهر، طيب اذا افترضنا ان حب الشباب والبهاق والصدفية أمراض جلدية، ايه اللى جاب البواسير فى الموضوع، دى منطقة جغرافية ودى منطقة تانية خالص،وحتى لو كده ازاى دواء يعالج 4 او 5 امراض وكل واحد فيهم ليه اعراضه وطريقة علاجه وادويته اللى موجودة فعلا فى الصيدليات، طب خلوا المعجزات دى لامراض تانية

***

المصيبة ان الحكاية موقفتش على اد علاج حب الشباب وبس،لا دى وصلت لعلاج العقم وتأخر الانجاب كمان، وتلاقى الاعلان من دول جايبلك واحد ماسك طفل(علشان يضربوا ع الوتر الحساس) ويقولك ياللى اتحرمت من التعليم-قصدى الخلفة-الفرصة لسه قدامك، مع الدوا بتاعنا ان شاء الله حتجيب دستة عيال،بس خد بالك العلبة الزرقا للرجالة، والعلبة الحمرا للستات(وممكن يكون اللى جوا العلبتين واحد بس علشان الستات بتحب اللون الاحمر)

وييجى واحد ال عامل دكتور ، ويقول للاخ المتشحتف على الخلفة (ده يا باشا اخر ما توصل اليه العلم ، وميغركش ان العلبة شكلها مش ولابد ومعمولة من مخلفات البلاستيك، الرك على اللى جوا العلبة ، وبالشفا)

وبعد21 يوم، مبروك يا باشمهندس المدام حاتفقس ، وبقت حامل ببركة دعاء الوالدين

***

حتى مستحضرات التجميل معتقوهاش، تطلعلك واحدة تقولك طول عمرى كان نفسى ابقى models(بالجمع)، لكن مفيش حد راضى يشغلنى لان شعرى خفيف، لدرجة انى كنت بلبس الطرحة قدام جوزى، لكن بعد ما استعملت المستحضر ده، بقوا كل مخرجين الاعلانات يجروا ورايا ومش ملاحقة على الشغل ، بس برضه لسه بلبس الطرحة قدام جوزى، اصل مفيش محرم وانا بتكسف!!!

***

اذا كانت وزارة الصحة معندهاش علم بالمهزلة دى فتلك مصيبة ، اما لو كانت تعلم فتلك مصيبة اكبر، المشكلة ان الشركات دى بالنسبة لنا مجرد ارقام تليفونات مش اكتر، لا نعرف مكانها ولا اذا كان فى اشراف على منتجاتها ، ولا حتى اذا كانت دى ادوية فعلا ولا ملبس، ده الواحد بيخاف يشترى لحاف ولا بطانية بالتليفون يقوم يشترى دواء، وبعدين هى الصيدليات اتعملت ليه؟؟

***

الناس دى بتفكرنى بالنصابين اللى كانوا بيقفوا فى الميادين والموالد يخلعوا الضرس بمايه النار، ويبيعوا اعشاب ومقويات، وقالك ايه قالك اه قالك صلى على رسول الله ، حتحطه على شعرك يطول، على وشك ينور، على وسطك يدٌور واسال مجرب ولا تسألشى طبيب

***

الفرق ما بينهم بس الوشوش السمحة، والبدل النظيفة، والعلب الشيك ، والاعلانات المتكلفة، ومفيش عسكرى يقفشهم من قفاهم فى قلب الميدان

واهـــــــــــــــــو ده عيبـــــــــه

امسك انفى من فضلك

2008-03-03T11:14:00.004+02:00

فاكرين فيلم نص ساعة جواز بتاع شادية ورشدى اباظه اوحى يا اوحى والاستبحس واوسنى يا اوسنى و00000000 ما علينا، المهم فى الفيلم ده سألت ماجدة الخطيب عادل امام عن اسم الفيلم اللى بيقوم ببطولته، قام متنك قوى ورادد من طرف مناخيره وقايلها (امسك انفى من فضلك )
***
وقتها-يعنى فى الستينات-ده كان اقصى ما وصل اليه خيال السيناريست لاسم فيلم تافه وسطحى من وجهة نظره، ولو انى بيتهيألى انه لو عاش فى أيامنا دى كان يمكن كتبه وانتجه كمان
***
مش عارفه ليه افتكرت الحكاية دى وانا بتفرج على فيلم من عينة امسك انفى ده، طبعا بعد ما اتعرض على القنوات اللى تقولك عرض حصرى واول مرة ومش عارف ايه كأننا حنتفرج على فيلم واخد جايزة اوسكار!!
المهم قلت اتفرج عليه بما إنى وقت عرضه فى السينما طبعا مشفتوش،مش قلة فضا لاسمح الله ، قد ما حسيت إنى خسارة انزل م البيت اتفرج على فيلم زى ده
***
مبدئياً الفيلم من انتاج المنتج الفذ اللى بدأ حياته العملية بتجارة اللحوم والجزارة، ثم تحول للانتاج السينمائى على أساس ان افلامه كلها لحمه برضه، واللى مش عاجبه يوزن بره
والشهاده لله انه مش بس بينتج، لا ده بيشترك فى التأليف والإخراج والمونتاج ولا كأنه فرانسيس كوبولا زمانه
***
وتحبيشة الفيلم عنده دايما معروفة،وغالبا بتبقى عبارة عن مؤلف جديد من اللى بيبقوا كاتبين الفيلم فى كشكـــول 80 ورقة دوبلكس

مخرج مبتدئ ، يادوب صور فرحين فيديو وكام عيد ميلاد

ممثلة بترقص او بتغنى او ياريت الاتنين مع بعض يبقى خير وبركة ، وخللى الشعب يعيش

بطل جديد حليوة عنده خماشر تماشر قميص جداد محيرينه

مطرب شعبى مبعرر او متحنطر او وسطه سايب ،المهم مطرب لزوم الفرح الشعبى وخلاص، منا نسيت اقولكم ان من ضمن أساسيات المنتج ده وجود فرح شعبى فى حارة بيئة ، حتى لو كان الفيلم بتدور احداثه فى المانيا

وطبعا ما دام فى فرح ،لازم يكون فى رقاصة عاملة نفسها مطربة من اللى ليهم كام فيديو كليب كده بيتعرضوا،علشان تبقى على رأى اللمبى الحتة الطرية اللى فى الفيلم

ومفيش مانع من وجود ممثله او ممثل كوميدى صف تانى، اهو يسند المسألة شوية ، ويخفف الجو اللى طبعا حيبقى مكهرب مع وجود كل اللى فاتوا
***
فاضل اهم عنصرين فى كل افلامه:-
1- المنتج نفسه (بفلوسى يا000 )لما يطلع فى مشهد يقولنا بخ ال يعنى عامل فيها الفريد هتشكوك
2-ومين كمان 000000000000000 طبعا حسن حسنى
***
اهو الفيم كان عبارة عن التوليفه دى، مع ان بطلته اول ما ظهرت كانت عايشه فى دور الفتاه اللى النسمة تجرحها، لكن واضح ان المنتج ده بيكتشف نواحى جديدة فى بطلاته مكانوش يعرفوها، منها قدرتهم على الردح والهز وإلقاء الافيهات البايخه، ومسك المطواه كمان
***
الغريب ان كان فى زمان برضه افلام خفيفه وممكن تبان سطحية ومالهاش مضمون ، زى افلام مستر اكس ،والعتبة جزاز ،والرجل الذى عطس وافلام تانية كتير ممكن تبان تافهة من عنوانها ، لكن عمرها ما كان فيها حاجة جارحه او خارجه ، بالعكس كان دمها خفيف وظريفه ومعموله على الأقل بشوية ضمير
***
عموما ولحد ما يخلص عرض الفيلم اللى بيستمر اسبوعين على قناة ما تزوقينى يا ماما ، مضطرة اعيش الفترة دى زى عبد السلام النابلسى الله يرحمه، وانا مغمضة العين مسدودة الانف والاذن والحنجرة والله معى
واهـــــــــــــــــو ده عيبــــــــــــــــــــه