يناير 08، 2009

حوارات عن غزة


سائق الميكروباص بعد ان تمر امامه سيارة تقودها امراءه وبجوارها رجل : واحنا ناقصينك انتى كمان ،لا والبيه قاعد جنبك انا معترفش بالراجل اللى يجيب لمراته عربية ويركب جنبها ده ميبقاش راجل

راكب : افرض عربيتها ، او مش بيعرف يسوق ، وفيها ايه

السائق: لا ياعم برضه ميركبش جنبها ، الرجال قوامون على النساء يبقى ازاى هى اللى تسوق ؟

راكب : انا مش شايف فيها حاجه ، ما الرسول عليه الصلاة والسلام كان بيعمل فى تجارة السيده خديجة

السائق : بس مجبلهاش عربية وركب جنبها

راكبة : يابنى مالك فيها ايه افرض ورثاها ترميها يعنى، ولا حتى جايبهالها علشان يريحها من المواصلات
السائق: ماهم الستات كده عايزين يعملوا كل حاجه وكمان يركبوا الرجالة ويدلدلوا وهم مالهمش الا بيتهم وبس ده لو نفعوا فيه كمان

راكب : ليه بس ما الست بقت بتشتغل كل حاجه دلوقتى حتى فى النيابة والقضاء ، ومن قبل كده كمان على مر الزمن اشتغلت فى حاجات كتير

السائق: والنبى تسيبونا من الكلام ده علشان انا تعبت ومش ناقص مناهده، كفاية ان مبقاش يجرى فى عروقنا دم بعد اللى بيحصل فى غزة ده ، وبيوت ربنا اللى بتتضرب والناس بتصلى جواها

راكب : ده غير الاطفال والستات اللى مالهمش ذنب

السائق: سيبك من الاطفال ، هى وصلت ان بيوت ربنا تتضرب وتنداس ، دى تبقى خلاص القيامه حتقوم ، ياريت الواحد يقدر يروح هناك ويستشهد معاهم

راكب: بس يابنى ده حتى لو قدرت تروح حتموت قبل ما تعدى الحدود

السائق: وماله بس يبقى اسمى مت شهيد ، مش بقولك احنا هنا مبقاش يجرى فى عروقنا دم، ومبنفكرش غير فى نفسنا وبس

ثم توقف اخيرا لينزل سيده بح صوتها من قول هنا ياسطى

******

زميل : تفتكروا المدير هيدينا الزياده السنوية ؟

زميلة : والله مفتكرش ، اكيد حيتحجج ويقولك الظروف ومفيش فلوس رغم ان الشركة بتكسب بس هم يحبوا يدعوا الفقر

زميل : طب وليه كده بس، دى العيشة بقت نار وبعدين يزكوا شوية عن مالهم ، دى الناس عماله تموت كانت اخدت ايه معاها

زميلة : صحيح شفت اللى بيحصل فى غزة ؟

زميل : اه والله ، طول الليل قدام التليفزيون مش قادر انام ، حسبنا الله ونعم الوكيل

زميلة : مش عارفه اخرة المهازل اللى بتحصل دى ايه ، والكل ساكت ومحدش بيتحرك

زميل : فعلا حاجه تقطع القلب ، بس تفتكرى بجد مفيش زيادة السنة دى ؟


******


انا بسخرية : ليه يعنى الكربنة بتلاته ونص ، هى عيار كام ؟

البائع : هى المفروض اربعه ، بس يالا طلعت منى كده مشيها تلاته ونص

انا : طب دى حته خفيفه ومنفوخه على الفاضى

البائع : احمدوا ربنا اننا لاقيينه ، داحنا فى نعمه ، الناس عماله تضرب وتموت فى غزة ، وانتوا بتفاصلوا فى كرنبة ، طب ايه رايك مش بايع غير باربعه !!


******

المذيعه : وليه حضرتك فكرت تعمل الجروب ده ع FACEBOOK ؟

الضيف : والله انا فكرت فى فكرة الجروب من ساعه ما بدأ القصف على غزة ، والهجوم الشديد على مصر لعدم سماحها بفتح المعابر

المذيعه : طب وايه الهدف من الجروب ؟
الضيف : بصراحه انا شايف ان مصر مالهاش دعوة باللى بيحصل ، ومش من حق حد يحملها عبء فوق عبئها ، خصوصا ان اللى بيحصل ده فى الاول وفى الاخر شان فلسطينى ، ومش مطالبين اننا نتحمل نتيجه تصرفات فتح او حماس، او ندخل فى موقف سياسى مع اسرائيل ينتج عنه تعريض مصر لخطر امنى او عسكرى

المذيعه : وفى نهاية لقائنا نحب نقول لحضرتك مسائك سكر زيادة

******

انا لصديقتى على الهاتف : مالها بنتك بتنادى عليكى ليه ؟ شوفى مالها

صديقتى : مفيش ، بتقولى تعالى ياماما افتحيلى الجزيرة علشان اشوف عزة

انا : عزة مين ؟

صديقتى : قصدها غزة ، بتقول الميس بتاعه الفصل قالتلهم افتحوا الجزيرة وشوفوا الاطفال اللى بتموت فى غزة

انا : المدرسة دى اكيد مجنونة ، ازاى تقول كده لاطفال فى كى جى وان ، هى عايزة العيال تتفزع

صديقتى : مش عارفه ، بس انا عن نفسى مش حخليها تتفرج

******

انا لنفسى : لحد امتى حنفضل نشوف المآسى دى ونسكت ، واقصى حاجه نقولها مفيش فى ايدينا حاجه نعملها ، وكبيرنا ندعى او نصوم رغم ان فينا قوة ممكن تهد جبال ، بس الخنوع والخضوع هو اللى مكتفنا ، ناسيين ان الدايرة بتدور ومحدش عارف بكرة الدور على مين

نفسى الامارة : عندنا شغل بدرى ، خلينا ننام دلوقتى وبكرة يحلها الف حلال

انا : مش لو كان فيه بكرة !!


13 عرفوا عيبها:

أحمد (زوج مخنوق سابقا ) on 10 يناير 2009 11:13 ص يقول...

ختام البوست لخص كل حالنا
اولا بتوع مساءك خنقة زيادة و قناة او تي في كلها اساسا ماشية بتفكير نجيب بيه سويرس صاحبها
الباشا مستثمر كبير في اسرائيل و في بيزنس كبير بينهم يبقى لازم مصر ملهاش دعوة بحماس و تسيب اسرائيل تنفضها براحتها
لانها بتهدد امن البلد
طب ما في خمسين جروب في الفيس بوك بيقولوا افتحوا المعابر و شباب متطوعة للحرب بس يمسكوهم سلاح و كلام كتير
ما فكروش في واحد من الجروبات دي ليه؟

الحتة الاهم
اننا لسه لغاية دلوقتي ما بنعملش حاجة غير نتفرج على الجزيرة و نمصمص شفايفنا و نقول يا عيني
و اخر كلامنا مع اصحابنا بيبقى الا ما قولتليش هتعمل حيطان اوضة النوم كافيه اوليه و لا بينك؟

نهر الحب on 10 يناير 2009 11:44 ص يقول...

اه
تصدقى مش عارفة اقول اية
مانا للاسف كدة مش عملت اى شئ
تصدقى بالله مش قادرة ابص فى المرايا من كتر مانا حاسة بضألتى بأنى لا شئ
رجال يقتلوا ونساء تشتهد
وانا قاعدة افكر هكتب اية او هاكل او البس او او
ربنا يرزقنا الشهادة

Ahmed Mubarak on 10 يناير 2009 2:10 م يقول...

لما نعرف نجاهد نفسنا هنجاهد ..
لما نعرف نجاهد نشوف الوقاحة في الاغامي نبقى نجاهد
لما نقدر نجاهد نفسنا ونقرا قرآن نبقى نجاهد
لما نجاهد نفسنا ونشتغل بضمير نبقى نجاهد
لما نجاهد نفسنا ونلتزم بالدين والاخلاق والعرف الصحيح والمرؤة .. يبقى نجاهد..
لا مش هيعرف يجاهد إلي مش بيجاهد نفسه ..
في غزوة للمسلمين وكانوا محاصرين والنصر تاخر نادى قائدهم شوفوا انتوا ناسيين ايه من السنن مش بتعملوه علشان كده تاخر النصر ..
طلع انهم ناسييم السواك .. فلما رجعوا إليه انتصر ..
ديه سنه .. نعمل ايه واحنا مقضينها معاصي؟؟
تحياتي
بس الواقع إن محدش لازم ييأس . ولازم الكل يكون ايجابي .. ويلا بينا نصوم ونصلي وندعي ونشوف واجبتنا .. والمصر هيبقى قريب

mahasen saber on 10 يناير 2009 9:40 م يقول...

هو احنا كده بتفضل كوارثنا ومشاكلنا محور كلامنا اليومى ومسافة ما ننام ونقوم بعد كام يوم الزهايمر بيلعب دوره بفاعليه وبننسى كل شئ

حد يقولى منتظر اليى قلب الدنيا اخباره ايه دلوقت ولاا جراله ايه

ربنا يقوى ذاكرتنا كويس يا رب

مصطفي ريان يقول...

احنا فينا قوة تهد جبال لكن احنا اللي مسقليين نفسنا
مش عارف اقول ايه
بس ربنا ينصرنا ويقوينا
دمت بكل الخير

عازف الناى الحزين on 11 يناير 2009 7:31 م يقول...

رائعة و صادقة جدا
ربنا يفك حصارهم و ينصرهم على الكفرة اليهود

tarek alghnam on 11 يناير 2009 10:36 م يقول...

والله يادايا بوست رائع
فعلا دة حالنا مصلحتنا غلبت على اسلامنا وعلى عروبتنا
ربنا يكون فى عون الشعب فى غزة
واقع بين حماس وفتح واسرائيل والعرب اللى بيتبادلوا الاتهمات
وللاسف كلنا فى العجز عير
تحياتى

م/ الحسيني لزومي on 12 يناير 2009 8:20 م يقول...

حمله المقاطعه
لا تستطيع ان تجاهد
لاتستطيع ان تتظاهر
لا تستطيع ان تتبرع بالمال
اذن قاطع وادعو غيرك للمقاطعه
منتجات كل من يدعم العدو
**** هل تعلم أن:-
1- شركه ستار بوكس(للكافيهات والقهوة) تدعم العدو ب 2 مليار سنويا من ارباحها
2- شركة فليب موريس (مارلبورو & مريت ) تدعم العدو وتدفع بصفة يومية ما مقدارة 12% من ارباحها.وعليه فإن مدخني العالم الإسلامي فقط يدفعون كل صباح 12 مليون دولار اي ما قيمته طائرة اف-16 كل اربعة ايام .

*** قائمة المقاطعة
ستار بوكس
ماكدونالدز
برجر كينج
كنتاكي
بيترا كينج
كوكاكولا
بيبسي
فردركرز
شيليز

لنوقف شراء البضائع الأمريكية والبريطانية لشهر واحد فقط

سوف تكون تكلفة هذا الشهر عليهم خسائر مقدارها
37 بليون دولار

Shimaa Esmail on 12 يناير 2009 10:16 م يقول...

الأستاذة/ داليا محمد
صاحب مدونة / اهو ده عيبه
اعتذر عن الخروج من موضوع التدوينة لقد أرسلت لك الجزء الثالث من الاستمارة (7صفحات)، أرجو منك إرسال رسالة توضح أن الجزء قد وصلك وأنه ليس هناك مشكلة في إرساله أحالت وصله لسيادتك .
تحياتي وتقديري
شيماء إسماعيل
باحث ماجستير- كلية الآداب جامعة القاهرة.

radi on 14 يناير 2009 10:24 م يقول...

ألي الاستاذه داليا
مررت كثيرا علي مدونتك وأعجبتني ولذا أحتفظت بها في الفيفوريت واليوم عاودت المرور وقرأت تدوينتك الاخيرة (حوارات عن غزة) واللقطة الاولي بتاعة سواق الميكروباس والركاب جذبتني وأضحكتني حتي أني ناديت علي زوجتي وأسمعتها لها بصوت عال حيث أني أخرج معها دائما وهي تسوق السيارة وأنا بجانبها بعد أن علمتها قيادة السيارات المهم حواراتك حيه وتشعر القارىء أنه يجلس بين المتحاورين وفي النهايه الهم العام ينسينا أمورنا الشخصية فنتألم لما يحدث في غزة.. المهم يسعدني زيارتك لمدونتي
مدونة عجوز وبها زجل كتبته بعد شراء سيارةزوجتى (الهانم ساقت عربيه) أخيرا
تحياتي وأحترامي وفي أنتظارك وحأحضر الشاى
راضي دائما وأحيانا مش راضي
www.radi-elredda.blogspot.com

همسة on 26 أبريل 2009 2:56 م يقول...

جميل قوى السيناريو بتاعك ده
والمدونة كلها حلوة
تحياتى لكى

موقع زواج on 18 أغسطس 2011 3:31 م يقول...

شكرا على الكلام الجميل

موقع زواج on 27 فبراير 2013 5:24 م يقول...

كلام جميل جدا شكرا لكم

 

Term of Use

أهو ده عيبه Copyright © 2009 Flower Garden is Designed by Ipietoon for Tadpole's Notez Flower Image by Dapino