يونيو 14، 2008

تلت التلاته كام ؟



غريب جدا كمية الجمل اللى بنقولها فى حياتنا من غير ما نعرف ايه معناها ولا اتقالت ليه وامتى ، ومنهم جمله تلت التلاته كام ؟ اللى بقالها يومين بتزن فى دماغى ومش عارفه افسرها !!

*****
الجمله دى غالبا ما تقال لاثبات القوة ، زى لما تقول لحد انا محدش يقدر يقوللى تلت التلاته كام ، مع انى والله حسبتها على ايدى وعلى الالة الحاسبة والعداد اليابانى وكل مرة كنت بلاقى ان تلت التلاته واحد مفيش غيره

*****
طب يبقى فين التعجيز مهى سهله اهى واى حد ممكن يعرفها ، اكاد اشك ان الجملة دى اتقالت فى ظروف غامضة لم يكن وقتها قد تم اكتشاف الرياضيات او القسمة او الكسور ، فبالتالى وقتها كانت معضلة حقيقيه انك تعرف الحل ، وان من حقك تحس بالتفرد لو كنت من علية القوم اللى يعرفوا حل المعادلة الرهيبة دى اللى محتاجه اينشتاين يحلها

ويوم ما تعرف الحل يبقى من حقك تمشى نافش ريشك وتهدد الناس كلهم بانك هتعرفهم تلت التلاته يبقى كام ، وكأنك بتهددهم بالقاء لعنه عليهم او قنبلة نووية

*****

الغريب ان اللى قال الجملة دى كان ممكن يصعبها شوية ، يعنى يقول انا هعرفكم الجزر التكعيبى لـ791562 مثلا اهى برضه تبقى مبلوعه وتخض كده اللى تتقال فى وشه وتلجمه ، يقوم يعرف قيمة اللى قدامه ويقَدر بيكلم مين ، انما تلت التلاته دى اى عيل صغير فى الشارع يعرف يحلها

*****
الجمله كمان زى ما بتدل على القوة ممكن تدل على الضعف لما الواحد يقول مثلا ضغطوا على ومقدرتش اقولهم تلت التلاته كام ، مع انه لو كان فكر شوية وحسبهم على صوابع ايده كان عرف الحل وموقفه اتغير من مغلوب على امره لغالب ومكنش اتحط فى الموقف الوحش ده

*****
ساعات كمان تستخدم للدلاله على الجهل ، زى ما تقول لواحد اسكت ده انت متعرفش تلت التلاته كام ، ال يعنى ايش يكون هو علشان يعرف الحل ، ولو انها مش بتستخدم بالمعنى ده كتير لان الناس بتفضل جمله متعرفش الالف من كوز الدرة اللى محيرانى هى كمان ومسيرى اعرف مدلول كوز الدرة وتاثيره على الالف

*****
الظاهر والعلم عند الله ان الناس اللى اخترعوا الجملة دى -اذا كنا نقدر نسميها مجازا اختراع على اعتبار انها نظرية رياضية- مكنش على ايامهم غير الواحد الصحيح ، يعنى لا فيه كسور اعتيادية ولا عشرية ، فاكيد معرفوش تلت الساعه يطلع كام دقيقه ، ولا كانت حصه المواطن من العيش ايامهم متزيدش عن تلت رغيف بالعافية ، ولا استخدموا فى مقادير الاكل تلت معلقه او تلت كبايه زى برامج الاكل ، ولا كانز الحاجه الساقعه ايامهم كان حوالى 330 مليلتر يعنى بتاع تلت لتر كده وبالشئ الفلانى ، والاهم من كل اللى فات ماخدوش علاوة 30% على المرتب اللى لا مؤاخذه توازى بالتقريب تلت المرتب

*****

يعنى الناس دى اكيد معاها عذرها ، لان اكيد اول واحد اكتشف الاكتشاف الخطير ده احتفظ بيه لنفسه ويمكن لم ينقله الا للقدر اليسير من الناس ، اللى بالتالى لم يفشوه لاحد وكانه سر الاسرار ، ففضل باقى الناس الغلابة محتاسين ومش عارفين تلت التلاته يطلع كام

*****
لكن احب اقولكم ان الزمن اتغير خلاص ، والحمد لله ربنا انعم علينا بنعمه المعرفه ، والالة الحاسبة بقت فى الموبايل والساعه يعنى لما ييجى حد يقولك متقدرش تقولى تلت التلاته كام ، قوله ثانية واحده وطلع موبايلك واحسبهاله وحطها فى وشه علشان يرتجع ويعرف ان الله حق
*****

ياريت نبطل نردد جمل منعرفش معناها ، ولا اتقالت امتى وليه ، واتمنى ان اللى يعرف معناها او مقصود منها ايه ينوبه ثواب يقوللى ، ويعرفنى تلت التلاته يطلع كام عن حق !!!

واهــــو ده عيبــــه

*التدوينة مجرد تهييس من حر الصيف مش اكتر

84 عرفوا عيبها:

Tamer Nabil on 14 يونيو، 2008 7:55 م يقول...

تلت التلاته كام ؟

ههههه

بجد تلت كلمات سهلين للكتابة والحفظ والتسميع لكن المعنى مجهول

والبحث عنة جارى ومازال مستمر

بس على ما اعتقد هيا جملة المقصود بيها زى مش عارف انا مين انا هوريك

تختلف الالفاظ والمعنى واحد
ولو فكرنا فى الكلمات والجمل اللى بتتقال قى مواقف واحداث هنجد ملاين الكلمات والحروف

ساعات بتبقى عادات وتقاليد ممكن فاسدة وليها موقف من قرن او قرون لكن خلاص بقت عادة

تحياتى

HERO on 14 يونيو، 2008 8:57 م يقول...

هههههههه
ايه ده انتي مدرتيش دلوقتي الجملة الشائعة ثمن التمانية كام ؟هههههههه
علشان لقوا ان تلت الثلاثة صعبة شوية فدوروا على بديل ليها

تحياتي

همس الاحباب on 14 يونيو، 2008 9:12 م يقول...

بجد هايل قوى البوست ده
مع انى كنت علمى فى ثانوى
وقعدت اربع سنين فى كلية تجارة
وليه 7 سنين محاسب ومش عارف تلت التلاته كام هههههههه
واخيرا طلع الواحد مش ممكن
لا بجد انا محتار زيك فى المثل ده اشمعانة تلت التلاتة نفسى حد يجاوبنى هما كانوا بيقولو ا كده ليه
تحياتى

فاتيما on 14 يونيو، 2008 11:09 م يقول...

بيبو
أنا ممكن اجاوب ؟!!
طيييييب
الجملة دى بتتقال تعبيراً عن مدى الجبروت و الإفترا اللى الواحد من دول بيبقى فيه
فيمسك فى رقبة واحد غلبان و يتجبر عليه
و الناس اللى واقفة تتفرج دى شايفه مفترى قد إيه بس موش قادرين عليه
موش قادرين يفتحوا بوقهم و يقولولا حرام كفاية
موش قادرة تقول تلت التلاتة يبقى واحد
اللى هيا أبسط حاجة فى الدنيا
مسألة سهلة قوى و معروف حلها
لكن ميقدروش يقولوا للغولة عينك حمرا
محدش يجرؤ يفتح فى عين التخين
و يقوله الصراحة بكل شجاعة
يقول
واااااااحد
بس كدا
هذا و الله أعلم فى الأول و الآخر
بس دا تفسيرى بعد 35 سنة بسمع فيها الجملة دى
تحياتى يا بيبو
و دايما بوستاتك فى الصميم

Z_Diva on 14 يونيو، 2008 11:11 م يقول...

ههههههههههههههههههه

لا بجد حلو البوست ده, يابنتي هي جت على دول, انا برضون ساعات كده في لحظة تجلي استكشفالكلام, يا ريتني مثلا عاقلة زيك بحاول اعرف اصل مثل مصري سيريالي اصيل, لا اختك بتمسك اي كلمة, و فجأة حاجة كده تخبطني في نافوخي, و كانني لسة مكتشفة الكلمة دي, و اعد اقدح زينات فكري, بس اصلا بما ان دي بتكون ومضات سريعة و زي ما بتخبط فأجاة بتمشي فأجاة, فانا اصلا مش فاكرة انهي نوع من الكلام اللي كان بيشعشع معايا :)

بالنسبة بقى للمثالين السابق ذكرهم ان يور بوست, انا هقولك الاراء العميقة اللي خرجت بيها بعد لحظة تامل في ملكوت الله

بتاع تلت التلاتة كام: مش الفكرة انها صعبة, بل بالعكس, ده هي الفكرة ان من كتر ما هوالشخص المعني جامد, محدش يستجري يساله السؤال التافه ده, والا يكون بيهينه و يعصبه و يشله وكده يعني, اللي يعوز يساله في حاجة يساله في الانشطار الذري, في الكمية العضوية حتى

نيجي بقى للمثال الثاني: طب دي سهلة يل دالياز, ماهو من كتر الجهل مش عارف اذا كانت العصاية المرسومة قدامه, دي رسمة حرف ولا حد غاوي فن راسمله آلح درة, فخيمتوس ؟؟؟

طب متيجوا نشفلنا حد يجيب اصل الحاجات السيريالية دي بجد, انا بحب الحكاية دي قوي على فكرة -اعرف عالجاهز طبعا مش لسه هدور-

يلا كفايه كدا, انا مش عارفة اخرة الرغي ده ايه, على راي ابي مرة -اعتقد انها كانت هي :)))- ان ماي كومنت بيبقى بوست تاني مش كومنت على بوست, طب انا هبقى اعلق عليكم عندي اجدع بدل الزحمة اللي بعملهالكم هنا :)))))))))))))

-برضه برغي لسه, مش ممكن, عيلة مزعجة-

الباحث عن الحقيقة on 14 يونيو، 2008 11:17 م يقول...

محدش يقدر يقلى تلت التلاته كام
يعني حت محدش يقدر يسأله اسئلة بريئة عادية كناية عن خوفهم منه وانهم بيعملوله حساب

انا ضغطوا عليه بش مقدروش يخلوني اقولهم حتى تلت التلاته كام
يعني حتى الحاجه البديهية استهبلت فيها وعملت معرفهاش

وكده يعني
انا عرفتها بالفكاكه والفتاكة
إلا هي الفكاكة يعني ايه
ومعنى الفتاكة بالمرة ينوبك ثواب؟؟

طارق الغنام on 14 يونيو، 2008 11:54 م يقول...
أزال أحد مشرفي المدونة هذا التعليق.
طارق الغنام on 14 يونيو، 2008 11:58 م يقول...

الرائعة داليا
صدقينى لو بطلما نتكلم فى اللى منعرفش معناة مش حتلاقى حد بيتكلم خالص
المشكلة ان عندنا فى مصر 75 مليون خبير فى كل شئ ومتقوليش تلت التلاتة كام
بوست رائع كعادتك
تقبلى تحياتى
ودمتى بحفظ الله

Unique on 14 يونيو، 2008 11:59 م يقول...

اه يعني تلت التلاتة كام ؟

Rehab Mostafa on 15 يونيو، 2008 1:39 ص يقول...

السلام عليكم
بصي يا ستي أنا فكرت في الجمله دي زي جمل كتير زيها من زماااان وفكرت هو تلت التلاته كام لاقيته واحد عادي سهله .. طيب ليه بيقولوها لاقيت تفسير مقنع وهو ان لو واحد بيسأل واحد تلت التلاته كام ممكن بسهوله يرد عليه ويقوله واحد لكن لما تقولي دي مثلاُ ماتقدرش تقوله تلت التلاته كام--بين راجل ومراته مثلاً-- يعني مش بتقدر تتكلم معاه في أبسط الأمور ولا تسأله أتفه الاسئله لأنه ببساطه مش بيرد عليها كويس أو بيعاملها وحش لدرجة انه مش بيرد على أبــــــســـــــط سؤال
واقتنعت بالتفسير ده بصراحه :)


على فكره أنا مش باجي أكتب تعليق بس متبعاكي من زمان :) ولينك المدونه على الريدر عندي ومدونتك بجد جميله وفكرتها حلوه وبشهادة أحمد فؤاد نجم مش محتاجه شهادتي أنا :)

My Hope$ on 15 يونيو، 2008 4:16 ص يقول...

انا عارفة ياوختشي
اهي حاجات بتطلع
طب مافكرتيش
في الكلمة اللي بتتقال بتاعت
انا اللي يقولي نص كلمة
احط عنيا في صوابعة
قصدي
صوابعي في عنية
اية بقي نص الكلمة ههههههه يعني مقطع في الكلام
احنا لو ركزنامع الشعب مش هنخلص
يلا خلي الشعب يعيش
سلام

حاجات جوايا on 15 يونيو، 2008 4:26 ص يقول...

ههههههههههههههه
موضوعك جميل يا داليا
خلانى مش عارفة أقولك تلت التلاتة كام
ههههههههه

تفسير فاتيما والباحث عن الحقيقة ورحاب مصطفى فى الجووووووون
يللا اديهم الجايزة بقى
هههههههه

دمتى بخير حبيبتى

سالى

نعكشة on 15 يونيو، 2008 8:48 ص يقول...

سلامون عليكي

علي فكرة انتي عرفتي الحل و انتي بتكتبي بس مخدتيش بالك منو

وانا بسأل السيدة مامتي علي كلمة تلت التلاتة كام
قالتلي بكل بساطة

يعني واحدددددددد

الفكرة بقة

الجملة معناها انه محدش يقدر يهوب ناحيتوا ولا يقولولا تلت التلاتة كاام

ودية جاهلة متعرفش تلت التلاتة كام

و معرفتش اقول تلت التلاتة كام

كل دية يعني بالترتيب محدش قدر ينطق بكلمة قدامي

دية جاهلة متعرفش اي حاجة ولا حتي معني تلت التلاتة كام

ومعرفتش اقول ولا حاجة من خيبتي

الفكرة في سهولتها

الفكرة انها سهلة
ولا جزر تكعيبي ولا تربيعي ولا تخميسي

الفكرة محدش قدر يقولي ولا كلمة
بس اسهل من كدة
تلت التلاتة ( يعني حاجة واضحة جداً)
تلت التلاتة ,,, واحددددددد

بس

ودمتي سالمة

سلامون عليكي

مـحـمـد مـفـيـد on 15 يونيو، 2008 12:22 م يقول...

هناك بعض الاقوال المأثوره عن الاجداد نرددها ليل نهار ولا نلقي لا بالا
بس واضح انك كنتي أدبي
:))

ayman badr on 15 يونيو، 2008 1:01 م يقول...

عيبها بقى انى مش عارف اصلها ولا فصلها صحيح وعندى سؤال مهم اشمعنا مقالوش ربع الاربعة كام
دى حاجة تخنق
تحياتى على التهييسة دى

اوعى تفكر on 15 يونيو، 2008 1:24 م يقول...

ايه التلاتات اللى تهت فى وسطيها دى
كل دى تلاتات تلاتات
صحيح هو تلت التلاته كااااام

shayma on 15 يونيو، 2008 3:05 م يقول...

هههههههههههههههههه
لا بوست تحفه
بس تفسير فاتيما عجبنى جدا

بس صحيح اشمعنى يعنى تلت التلاته
طيب ليه مقالوش ربع الاربعه يبقى كام

هههههههههه
سلامى يا جميل
:))

شفقة هانم واحسان بك on 15 يونيو، 2008 5:17 م يقول...

ايه البوست اللى كله رياضه ده....الواحد كان ادبى ليه الاحراج ده بس
بس اسلوبك فى العرض تحفه
شفقة

خواطر رئيس شاب on 15 يونيو، 2008 7:10 م يقول...

اهو ده عيبه بقى
اسئلة صعبة تخلى الواحد فى نص هدومه

عموما عندى احساس ان اللى مش عارف تلت التلاتة كام ده بيبقى مغلوب على امره

لان الحسبة بسيطة جدا بس غلبان ومقهور ومش قادر يتكلم ولا يفتح بقه

ايام العمر on 15 يونيو، 2008 7:26 م يقول...

انا شايف انة الغرض منها مش غرض تعجيزى لا دة هو قصدة ان من كتر ماهى سهلة وهايفة محدش يقدر يقولهالوا يعنى من الاخر محدش يقدر يقولى ولا ربع كلمة يعى ميقدرش يقولى تلت التلاتة كام

أحسن تـستاهـل on 15 يونيو، 2008 9:58 م يقول...

يا سبحان الله لسه بتكلم انا ومرات خالو على كلامنا اللي بنقوله ويا سلااااام تحسي اننا جبنا التايهه
طب فعلا اشمعنى تلت التلاتة ليه مش نص التمانية
داليا،، مشكلة اوي كلام المصريين ده مليان عجب والفاظ ما تعرفيش جبناها منين والله انا فعلا نفسي اعرف اصول الحاجات دي بس مين يدلنا تفتكري؟؟

اهو ده عيبه on 15 يونيو، 2008 11:06 م يقول...

تامر نبيل
----------
المعنى مش مجهول قوى لكن هى مجرد لازمة كلامية واتعودنا عليها ونسينا اساسها ايه

تحياتى لك

اهو ده عيبه on 15 يونيو، 2008 11:09 م يقول...

hero
-----
ياه هم غيروها
مكنتش اعرف يالا احسن برضه

تحياتى لك

اهو ده عيبه on 15 يونيو، 2008 11:51 م يقول...

همس الاحباب
------------
ده احنا زمايل بقى
بصراحه مش عارف اشمعنى التلاته يمكن علشان لا تقبل القسمة الا على نفسها
كل شئ جايز

تحياتى لك

اهو ده عيبه on 15 يونيو، 2008 11:54 م يقول...

فاتيما
-------
تفسيرك حلو وبسيط يا فتومتى
على كده كلنا منقدرش نقول تلت التلاته كام للغوله اللى محمرة عينيها لينا كلنا
طبعا المعنى فى بطن الشاعر

تحياتى يا فاتيما وحضونه كبيرة خالص

اهو ده عيبه on 15 يونيو، 2008 11:57 م يقول...

z_diva
--------
انا مش لاقيه كلام اقوله
معقوله انا شايفه بعنيا كل ده كلام بالعربى كاتباه طب مانتى زى الفل فى العربى اهه
ياريت بجد حد يحاول يدورلنا على اصل كلمات كتير بنقولها من غير ما نعرف معناها ولا الهدف منها
وبعدين مش جايز تطلع شتومه واحنا مش حاسين

سلامى يا قمر

اهو ده عيبه on 15 يونيو، 2008 11:59 م يقول...

الباحث عن الحقيقه
-----------------
جبتك يا عبد المعين
بقى جاى تسالنى انا عن الفكاكه والفتاكه
روح اللهى ربنا يسعدك يارب

اهو ده عيبه on 16 يونيو، 2008 12:01 ص يقول...

طارق الغنام
------------
ياريت كل واحد يبطل يفتى ويقول كلام ميعرفوش كان زمان الحال بقى غير الحال

تحياتى لك

اهو ده عيبه on 16 يونيو، 2008 12:03 ص يقول...

unique
-------
ماهو ده السؤال اللى بساله
لو بالحساب يبقى واحد
لكن يا ترى المقصود منه ايه
ياريت تقوليلى

اهو ده عيبه on 16 يونيو، 2008 12:05 ص يقول...

رحاب مصطفى
-----------
شرفتى ونورتى
بس ينفع كده كل مرة تيجى من غير ماعرف ولا اقوم بالواجب
عموما يا ستى نتمنى متكونش اخر زيارة ومتحرميناش من تعليقك

تحياتى

اهو ده عيبه on 16 يونيو، 2008 12:07 ص يقول...

my hopes
-----------
طب خدى اللى اغرب كمان
انا محدش يقدر يكح معايا
ايه علاقه الكحه بقى بالافترا ولا هو خايف من العدوى
حاجه غريبة بجد

تحياتى لكى

اهو ده عيبه on 16 يونيو، 2008 12:09 ص يقول...

حاجات جوايا
-------------
والله يا سالى كلكم تستاهلوا الجايزة وتستاهلوا كل خير

وانا زى ما قلت دى مجرد تهييسة من الحر
ربنا يستر بقى من شهر 8

تحياتى لكى

اهو ده عيبه on 16 يونيو، 2008 12:11 ص يقول...

نعكشه
-------
دى سلامون ولا تونه :)

والله انا عارفه انها واضحه بس قلت مفيش مانع نهييس مع بعض شوية
ولا ايه رايك

تحياتى

اهو ده عيبه on 16 يونيو، 2008 12:12 ص يقول...

محمد مفيد
---------
ازيك يا استاذ محمد

بالعكس كنت علمى وكلية تجارة بس بصراحه مش شاطره فى الحساب قوى

دمت بخير وسعاده

اهو ده عيبه on 16 يونيو، 2008 12:14 ص يقول...

ايمن بدر
---------
تعددت القسمة والنتيجه واحد
يمكن اللى قالها كان بيحب رقم 3 مثلا
الله اعلم

تحياتى لك

اهو ده عيبه on 16 يونيو، 2008 12:16 ص يقول...

اوعى تفكر
----------
تلات سلامات يا واحشنى

تلت التلاته حضرتك يبقى واحد بس عند الحكومة هيبقى 0.99 بعد خصم الضريبة

تحياتى

اهو ده عيبه on 16 يونيو، 2008 12:17 ص يقول...

شيماء
------
ازيك
والله زى ما تقولى ناس فاضية او الاربعه كانت مش موجوده ايامها مش عارفه بصراحه

دمتى بخير وسعاده

اهو ده عيبه on 16 يونيو، 2008 12:18 ص يقول...

شفقه هانم واحسان بك
---------------------
يا اهلنين وسهلنين بما انكما اثنين

عموما لا ادبى ولا علمى كله فى الاخر بيتساوى

شرفتم ونورتم ونتمنى تتكرر الزيارة

اهو ده عيبه on 16 يونيو، 2008 12:20 ص يقول...

خواطر رئيس شاب
---------------
لا السؤال يخلى الواحد فى تلت هدومه مش نص

وبما اننا كلنا مغلوبين ومقهورين يبقى تحيا جمهورية تلت العربية

تحياتى لك

اهو ده عيبه on 16 يونيو، 2008 12:22 ص يقول...

ايام العمر
-----------
يعنى اللى قالها مستكتر الناس تقوله اى حاجه ولو بسيطة
دى حاجه غريبة قوى

تحياتى لك

اهو ده عيبه on 16 يونيو، 2008 12:23 ص يقول...

احسن تستاهل
-----------
عندك حق احنا محتاجين نعرف اصول كلمات كتير موجودة فى حياتنا

تفتكرى ممكن نلاقيها فى عبمجيد الصحاح ؟

تحياتى لكى

محمد الهادى on 16 يونيو، 2008 12:42 ص يقول...

واحد تقريباً ده الحل صح
هو انتي بتسألي فزروه والا زي مانتي قولتي تهيسه لو تهيسه يبقي مش هقدر اقول غير حاجه واحده لو انتي مش عارفه .
واحـــــــــــــــــــــــــــد
ويجعله عامر

نوره الخشن on 16 يونيو، 2008 2:06 ص يقول...

ههههههههههههههههههههه

طب ربع الاربعة كام

اظن دي اصعب شوية

يمكن يقصدو انها من كتر سهولتها مابيعرفوش يحلوها على اساس اننا بتوع الصعب كلو يعني وعباقره

يمكن؟!!!

مش عارفة

نوره الخشن on 16 يونيو، 2008 2:06 ص يقول...

صحيح معاكي عشرة خمستين او ستة تمنيتين اي حاجة

اموت واعرف ايه ستة تمنيتين اللي كل الناس مسكاها دي

اناعارفة انها تريئة كده على تامر

بس متخللللللللفة

طائر حزين on 16 يونيو، 2008 11:38 ص يقول...

السلام عليكم
على ما اعتقد والعلم عند الله مثلا لما حد بيقول محدش يقدر يقولى تلت التلاته كام بيقصد انه فى منتهى العصبية أو القوة لدرجة ان محدش يقدر يسأله على اى حاجة حتى لو كانت هايفة فبالتالى ميقدرش حتى يتنفس و يقوله تلت التلاته كام.إذن فهى فى هذا الحال فهى تدل على ان الجملة مش عويصة ولا حاجة هى سهلة بس بالرغم من سهولتها الشديدة محدش يقدر يسألها مش كدة ولا ايه؟

محمد فوزي on 17 يونيو، 2008 1:43 ص يقول...

يعني المفتري من دول لو حب ان تلت التلاته يبقى اثنين ولا حد يقدر يفتح بقه ,

وبالنسبه لمحدش يقدر يكح معايا
فانتي عارفه لما تبقي عايزه تعترضي بأدب على حد كبير أو تنبهيه لحاجه فتقومي عامله نفسك بتكحي كده ؟

أهو انتي متقدريش تعمليها مع المفتري ده , أو في قول آخر
إنه كاتم انفاس الناس ومانعهم يكحوا حتى من جبروته , شوفتي الكلام

هذا والله اعلم , والله ولي التوفيق

كاتب مصري on 17 يونيو، 2008 11:01 ص يقول...

هل يمكن أن أدعوك لزيارة مدونتي المتواصعة ..مع أني أطلب هذا الطلب على استحياء لأن هذه زيارتي الأولى لك ولكن سيكون هناك ود بين المدونتين
تحيتي
مدونتي هنا
http://kanyatklam.blogspot.com/

علي الالفي on 17 يونيو، 2008 3:57 م يقول...

واضح المعنى زى ما انا فهمته
انه دايما اللي بيتفشخر بقوته بيبقى من اجهل خلق الله لدرجة انه صعب انك تسأله تلت التلاتة كام

Tamer Nabil on 17 يونيو، 2008 7:40 م يقول...

ازيك اخبارك اية

تحياتى

Soooo on 17 يونيو، 2008 10:48 م يقول...

اهو انتي بالموضوع ده يا دوللي اثبتي لي ولغيري من قراء مدونتك .. انك قويه جدا وماحدش يقدر يقوللك تلت التسعتاشر الف مليون ديشيليار تمانيه وستين .. كام

بصي ياستي
لما واحد يقول .. مايقدرش يقوللي بم - بكسر الباء وتسكين الميم - ولا يقدر يقوللي تلت التلاته كام
دليل على قوته وان ماحدش يقدر يقولو انت واحد بم .. يعني انت واحد بمبكي .. او بتبمبك معاه في الكلام
ودي على طريقة المعلم رضا في قص الكلا .. الكلام يعني

ولكن لطول الجمله (انا ماحدش يقدر يقولي بم ولا تلت التلاته كام) تم اختصارها لـ ماحدش يقدر يقولي تلت التلاته كام .. وبطلو يقولو بم

وفي رأيي المتواضع الشخصي الألمعي .. ان كلمة بم اتحذفت من القاموس المعاصر .. وده لان اتنين بم بيساوي بم بم .. والمنتج ده اتلغى من زمان قوي
بعد ما اتلغى معاه بونبون سيما فقش

وربنا يوفقك ومنتظرين مناقشتك القادمه واللي اعتقد انها هتكون عن المثل الشعبي
قال ياللي انت كده مرتاح وكده مرتاح .. سلامو عليكو

والله ولي التوفيق


سلامووووووووووز

_**( قلب الأسد )**_ on 17 يونيو، 2008 10:51 م يقول...

اة بجد تلت التلاتة كام
مثل مشهور قوى بس اول مرة افكر فية بجدية
مشكورة على البوست الرائع دة
..
.
تقبلى تحياتى
.
..

اهو ده عيبه on 18 يونيو، 2008 1:05 ص يقول...

محمد الهادى
----------
لا يا محمد تهييسة من الحر ربنا يستر على عقلى لا يسيح
مبروك المدونة وعايزين نشوف حاجات حلوة كده

تحياتى

اهو ده عيبه on 18 يونيو، 2008 1:08 ص يقول...

نورة الخشن
-----------
يا هنايا يا سعدى تعليقين مرة واحده

يا ستى عشرة خمستين وسته تمانيتين كانت فى فيلم ظرف طارق وغالبا ده نوع موبايل والله اعلم

اما بقى ليه مقالوش ربع الاربعه فاعتقد علشان التلت اكبر شوية

تحياتى لاحلى نورة

اهو ده عيبه on 18 يونيو، 2008 1:15 ص يقول...

طائر حزين
----------
تفسير منطقى

وكل يوم ينتعرض لمواقف نلاقى نفسنا مش قادرين نقول تلت التلاته كام لكن مش عن قوة
على فكرة انا مش ناسية التاج واوعدك هجاوب عليه ان شاء الله فى اقرب فرصه

تحياتى

اهو ده عيبه on 18 يونيو، 2008 1:18 ص يقول...

محمد فوزى
------------
على كده من كتر المفتريين والظلمة واللى حاسين بجبروت فى حياتنا محدش هيجيله كحه خالص
الظاهر دى طريقه للمحافظة على صحتنا

شرفت ونورت

اهو ده عيبه on 18 يونيو، 2008 1:23 ص يقول...

كاتب مصرى
----------
يا سيدى يشرفنى زيارة مدونتك
وان شاء الله يكون فيه تواصل
شرفت المدونة واتمنى متكونش اخر زيارة ليك

اهو ده عيبه on 18 يونيو، 2008 1:26 ص يقول...

على الالفى
-----------
اولا شرفت ونورت يا على

وفعلا عندك الحق ساعات الجهل بيصور للانسان انه فوق الناس ومحدش يقدر يتكلم معاه
فاكر بتاع انا ميمو يااهفى المسرحية

نورتنا واتمنى تتكرر الزيارة

اهو ده عيبه on 18 يونيو، 2008 1:35 ص يقول...

تامر نبيل
----------
الحمد لله بخير ومتشكرة جدا على سؤالك
واعذرنى وكلكم اعذرونى على التقصير بس بجد الوقت بيطير زى الهوا ومش قادرة اظبطه خالص

تحياتى لك واتمنى تكون بخير وصحه

اهو ده عيبه on 18 يونيو، 2008 1:43 ص يقول...

سوووووووو
----------
يا خطوة عزيزة
الحمد لله قوية ومفترية امال نودى الصحه فين
يعنى ايه بمبكى دى انت بتصعبها على
عامل زى اللى فسر الماء بعد الجهد بالامبوه

والنبى ما تفكرنى بسيما فقش ده اللى كان بيفقش السنان من كتر ما هو ناشف وكبير قوى

ان شاء الله ناخد المثل بتاع كده اوكيه وكده اوكيه ده بعين الاعتبار
واعتقد انها هتكون مناقشة حامية الفتيس

اللهى يكرمك ويسعدك ويرزقك ويكفيك شر الطرى ، الطريق يعنى

اهو ده عيبه on 18 يونيو، 2008 1:48 ص يقول...

قلب الاسد
-----------
يا اهلا وسهلا

شكرا على رايك واتمنى يكون البوست عجبك ولو انى كنت مهيسة فيه على الاخر

شرفت ونورت واتمنى تكرر الزيارة

أمل فتحى عزت on 18 يونيو، 2008 3:32 ص يقول...

اسعدنى المرور بمدونتك وأتمنى لك التقدم والمزيد من الاهداف النبيلة


كما أدعوك لزيارة مدونتى والتى محتواها


تعالوا نسافر المسافات الى زمن من المحبة لاينتهى


كما أدعوك لقرأة قصتى


(بكل لغات العالم أحبك)

mostafa rayan on 18 يونيو، 2008 6:25 ص يقول...

طبعا انا معاك في رأيك دة

hesham on 18 يونيو، 2008 5:45 م يقول...

عزيزتى داليا

موضوعك ده مهم جدا و بيسلط الضوء على حاجة مهمة جدا فى حياتنا و هى مش مجرد جملة بنرددها من غير ما نعرف معناها لكن دى منظومة مسلمات كاملة من اقوال و افعال الناس بتقولها و تعملها من غير ماتقف ثانية مع نفسها و تسال نفسها احنا ليه بنعمل او بنقول كده

و منظومة المسلمات دى معترف بها من كل الناس و كلهم بيعملوها و بياخدوها شىء مسلم بيه مافيش فيه نقاش و بالتالى اى حد يحاول يخرج عن المسلمات دى بيتحول فى نظر المجتمع لشاذ عن الاغلبية و مفرق للجماعات رغم ان زى مانتى و ضحتى بمثل بسيط جدا فى البوست ده و فيه غيره كتير ان مافيش اى مبرر منطقى او عقلانى للمسلمات اللى الناس ماشية بها دى

تحياتى
هش

موناليزا on 18 يونيو، 2008 7:47 م يقول...

كلمة تم نقلها بالوراثة ذى باقى الكلمات والامثال الشعبية

ياسر حسين on 18 يونيو، 2008 10:49 م يقول...

يا سلام لو شعبنا يشتغل قد ما بيتكلم
:)

واحدة مفروسة on 19 يونيو، 2008 2:30 ص يقول...

اهه ده عيبه بجد
الواحد مخلص مدرسه من يجيييييييييييييييي
مش فاكره هوه الواحد اللي بياخده فى المدرسه يفتكره
بقولك يا جميله
تعالى ادخلى معانا المباراة الوديه
ههههههههههه
فى التعليقات
هنا
http://faransaraayek.blogspot.com/

مستنياكي
حتلاقينى ورا
ههههههههه
فى التعليقات
ههههههههههههه

خمسة فضفضة on 19 يونيو، 2008 11:47 ص يقول...

السلام عليكم ورحمة الله وبركاته

ازيك يا دوللي اخبارك ايه

تصدقي بالله كل مرهادخل هنا واقرا الموضوع وخلاص هاسيب تعليق يحصل حاجه تخليني اخرج من غير ماعلق

والله الحكايه دي اتكررت ولا خمس مرات
فالمره دي قلت الحق اعلق بقي قبل ما اي حاجه تحصل
:)))))))))))))


بالنسبه لتلت التلاته فده يعني يقصدوا بيه ان الواحد من كتر جبروته وقوته ماحدش يقدر يقوله ان تلت التلاته واحد بسبب الخوف والرعب منه


فيه كمان مثل حلو اوي "الدبان الازرق مايعرفلوش طريق جره " مش عارفه يعني اشمعني الدبان والازرق بالذات وايه جره دي
يمكن لان ده الدبان اللي بيبقي متجمع علي الجثث مش عارفه انت ايه رايك


سلام

زفته on 19 يونيو، 2008 3:41 م يقول...

في مثل بيقول
خير الكلام ما قل ودل
وتلت التلاته كام اكبر دليل علي كده
شوف جمله واحده الشعب المصري استخدمخا كام مره

هو ده الانجاز

اهو ده عيبه on 19 يونيو، 2008 8:52 م يقول...

امل فتحى عزت
--------------
شرفتينى بالزيارة
وان شاء الله يكون بينا تواصل
تحياتى

اهو ده عيبه on 19 يونيو، 2008 8:53 م يقول...

مصطفى ريان
-----------
كتر الف خيرك جبرت بخاطرى

تحياتى لك

اهو ده عيبه on 19 يونيو، 2008 8:56 م يقول...

هشام
------
اولا ازيك

مش عارفه ارد بايه بعد تعليقك الوافى ده
على فكرة عجبنى موضوعك عن السخرية جدا ولو انى مقدرتش اعلق واقول حاجه لانى برتكب الفعل ده ومش قادرة اتوقف عنه او اوظف السخرية دى بشكل متزن

تحياتى لك

اهو ده عيبه on 19 يونيو، 2008 8:57 م يقول...

موناليزا
----------
المهم اننا نبطل ناخد كل حاجه على انها من المسلمات
ونحاول نفكر شوية

تحياتى لكى

اهو ده عيبه on 19 يونيو، 2008 8:58 م يقول...

ياسر حسين
----------
يا استاذ ياسر لو شعبنا اشتغل اد ما يتكلم ساعتها مش هيبقى شعبنا
هيبقى شعب الجيران

تحياتى لك

اهو ده عيبه on 19 يونيو، 2008 8:59 م يقول...

واحده مفروسه
--------------
يا ستى ولا يهمك اهى من ضمن الفرسات

ان شاء الله الحق توك توك التعليقات ده او اتشعبط فيه حتى

تحياتى لكى

اهو ده عيبه on 19 يونيو، 2008 9:03 م يقول...

خمسه فضفضه
----------
خمس مرات بحالهم يالا انا عارفه حظى بس الحمد لله المرة دى ظبطت

حكاية الدبان الازرق دى والله اعلم يمكن لما كانوا بيقتلوا حد بيحطوه فى جرة ويخفوها لدرجه ان الدبان اللى اعوذ بالله بياكل الجثث مش بيعرف طريقها

ايه السيرة دى :)

المهم سعيده انى شفت تعليقك عندى وان شاء الله تنورينى تانى
تحياتى لكى

اهو ده عيبه on 19 يونيو، 2008 9:05 م يقول...

زفته
----
هو لا مؤاخذه ليه الاسم ده بس
ولا هو زى زفته وميت غمر وكده
عموما هدخل مدونتك واعرف ايه سر التسمية الغريبة دى

شرفتى ونورتى وان شاء الله تكررى الزيارة

نوره الخشن ــ آي و كفاية on 20 يونيو، 2008 2:34 ص يقول...

بئولك ايه

سألتلك في موضوعك ده اللي محيرك اتضح ايه بئى ياستي
ان هم يقصدوا انها حاجة عبيطة جدا ومفيهاش حاجة
يعني لما الواحد يقول ولا حد يقدر يقولي تلت التلاتة كام
يعني يقصد يقول ماقدروش يفتحوا بؤهم معايا بكلمة .. فهمتي حاجة
ولا انا بس هما قالولي كده

سالي محمد سالم on 20 يونيو، 2008 3:43 ص يقول...

بخ..ازيك يادول؟؟باه ياستى الحكايه دى تعبانى برده فى كام جمله كده عجيبه واحنا مصرين عليها تقوليش الموضوع فيه اعراض بعد الشر!!!!
يالا اهو من تقاليد شعبنا المصرى الحبوب الجميل المهاود ربنا يحمينا ويخلينا منعرفش ابدا تلت التلاته كام
الا هو صحيح؟؟كام ياداليا يااختى؟؟يووه والنبى كانت على بالى

princess dodo on 20 يونيو، 2008 5:10 ص يقول...

ههههههه
ازيك ياجميله
انا بسمع انها اتقالت اصلا
فى موقف ضعف زى ما انتى ذكرتى
ان حد مااقدرش يجاوب من الخوف والضغط اللى عليه

ده حتى ماقدرش يفكر ثوانى ويجاوبها


وشكلنا كلنا دلوقت بقينا كده
مش عارفين تلت التلاته كام


وبنشكر ياافندم حر الصيف
اللى طلع حاجات حلوة كده


سلام ياجميله

مواطن مصرى نايم on 20 يونيو، 2008 2:53 م يقول...

تلت التلاتة
= 1
انا بقى اعرف اهوه
ممكن تكون لازمة مع الشخص
او تعود
بس ساعات بتكون
استهانه او استخفاف بالشخص اللى بتتكلم معاه
بس المحصله واحدة
انها ملهاش معنى مفيد

بوست رائع

eslam

اهو ده عيبه on 21 يونيو، 2008 6:53 م يقول...

نورة الخشن
------------
كتر خيرك يا نورة انك حاولتى تعرفى اصل الموضوع
واطمنى فهمت الحمد لله

تحياتى ليكى

اهو ده عيبه on 21 يونيو، 2008 6:55 م يقول...

برنسيس دودو
------------
ميرسى انك شرفتينى بالزيارة
تفسيرك منطقى برضه
وربنا يستر من حر الصيف وهلاوسه

تحياتى لكى

اهو ده عيبه on 21 يونيو، 2008 7:00 م يقول...

مواطن مصرى نايم
---------------
والله عندك حق يا اسلام النتيجه انه كلام مالوش فايدة

عموما حمدالله ع السلامه وفى انتظار جديدك
تحياتى لك

اهو ده عيبه on 21 يونيو، 2008 7:47 م يقول...

سالى محمد سالم
------------
طب ليه بخ والخضه دى انا ناقصه
هو احنا لازم نفضل مهاودين فى كل حاجه حتى الكلام
عموما الحل =1

شرفتى ونورتى

 

Term of Use

أهو ده عيبه Copyright © 2009 Flower Garden is Designed by Ipietoon for Tadpole's Notez Flower Image by Dapino