يونيو 21، 2008

هلا ترفقت بى


لا اعرف بما اناديك، هل اناديك رفيقى ؟ فلطالما رافقتى عمرا طويلا ، لكنها لم تكن يوما بالرفقة المستحبه ، لطالما اتعبتنى وانهكت قواى وانا مستسلمة لك لا اقوى على التحرر منك ، وانت تأبى ان تكف عنى او ترحل



كلا لن اسميك رفيقى ، لا يكفى ان تلازمنى دهرا كى تستحق اللقب ، انت لا تعدو ان تكون قيدا يكبلنى لا يغادر معصمى ، لم اضعه بارادتى او اختار تكبيله لى ، وانا والقيد لا نترافق



اذن فلاسميك عدوى ذلك اوقع ، ولكن مهلا ، انا اعلم انك لاتضمر لى العداوة ، هو فقط قدرى وقدرك ، قدرك ان تلازمنى وقدرى ان اتحملك جاثما فوق راسى متحكما بحياتى ، لذا اعتقد انه ليس من العدل ان ادعوك عدوى ، هذا عملك ليس اكثر



لن يغير من الامر شيئا ان اخلع عليك لقبا ، ولكن الا تسطيع ان تغض الطرف عنى ولو قليلا ، أيجب ان تؤدى عملك بكل هذا القدر من التفانى ؟ قليل من التساهل لن يضيرك - خاصه وانك تعلم بعودتك مرة اخرى لا محاله - ولكن تساهلك سيمثل لى الكثير


اتدرى انك حين تغيب عنى فترة احس بخوف ، لانى اعرف انك ستعود أشد واقوى ، ستباغتنى اذا ما استيقظت مبكرا ، او اذا ما دللت نفسى بمزيد من النوم ، ستهاجمنى فى لحظة السعادة كما فى وقت الالم دون تفرقه ، كانك تأبى الا ان تعكر صفو ايامى على اختلافها


كثيرا ما سمعت عن العرض الزائل ، لكنك فى حياتى عرض لا يزول ، اعرف كنهك لكنى لا اعرف سر ملاحقتك اياى ، لم اصرارك على ملازمتى دونما ابداء اية اسباب ، محاولتك السيطرة على عقلى وتفكيرى ومنعى من الاستمتاع حتى بابسط الاشياء


احيانا اود لو انتزع رأسى من فوق كتفى ، واركلها بعيدا بعيدا ، اركلك معها، اتابعك عن بعد وانت تلهو بها كما تشاء ، لا اشعر ، لا اشكو، لم يعد الرأس رأسى فافعل به ما تريد


لكنه الحلم بالمستحيل ، فكما تسكن انت رأسى ، تسكنها اشياء اخرى لا اقوى على فقدها ، مجبرة انا على الاحتفاظ بهذا الرأس، مجبرة على التعايش معك و الاستسلام لك ، لذا ان كان قدرنا الا نفترق ، استحلفك بالله هلا ترفقت بى


الى من لازمنى دهرا ولا يزال/ الصداع

65 عرفوا عيبها:

محمد الهادى غانم on 22 يونيو 2008 في 1:08 ص يقول...

عندما تشعري بالصداع مرة اخري تتبعي سنة البي صلي الله عليه وسلم .
1_ ضعي يدك علي المكان الذي يؤلمك وقولي بسم الله 7 مرات .
2 _ ثم رددي اعوذ بالله من شر ما أجد وأحاذر ، اعوذ بالله من شر ما أجد وأحاذر ثلاث مرات . وتيقني من الشفاء وتسكين الألو إن شاء الله رب العالمين .
اخوك المخلص

غير معرف يقول...

ااااااااااااااااااااه

انا مابيجليش غير صداع نصفي بيجيلي فنص دماغي الشمال بس
مؤؤؤؤؤؤؤؤؤؤلم اكتر من العادي اللي بيجي فالراس كلهاااااااااااا
ببئى بجد حسة اني عيزة اعمل زي الصورة اشيل راسي واحطها جنبي على الطربيزة من كتر الألم
ولما روحت لدكتور قالي اااه صداع نصفي بتاع العباقرة (ابن الهبله) مش عارفة بيتريئني ولا ايه

ربنا يشفيكي ويشفيني يابنتي

ابئي خدي بنادول هيسكن شوية

فاتيما on 22 يونيو 2008 في 2:38 ص يقول...

كدا يا بيبو
بتعلقينى ؟؟
كنت فاكرة آخر البوست
هتقولى يا عقلى
يطلع الصداع ؟؟؟
مااااااشى
احب أوجه نظر سعادتك
إن الصداع دا لو مش بسبب النظر و لا الجيوب الأنفية و لا قلة النوم
يبقى سببه إنتى عارفاه كويس
أيوووووه
عقلك اللى مشغلاه داأربعة و عشرين ساعة مبيونش
طبعاً لا أنصحك تشيليه تركليه طبعاً
ربنا يريح دماغك من الصداع
و اللى بيسبب الصداع
يا رب

أحمد منتصر on 22 يونيو 2008 في 4:59 ص يقول...

أخطأت يا أخي محمد:



تضعي يدك اليمنى على موضع الألم وتقولي: بسم الله (3 مرات). أعوذ بعزة الله وقدرته من شر ما أجد وأحاذر (سبع مرات)

غير معرف يقول...

جميلة يادودا تحفة هههههههههههههه اصلا كنت حاسة من اول البوست بمقلب هييجي في الاخر اصلي بموت في الحركات دي وكنت عملتها مرة نياهاهاهاهاها

سلامتك يا جميل

مها ميهوووو

مـحـمـد مـفـيـد on 22 يونيو 2008 في 12:21 م يقول...

ياله من صداع
يفجر براكين الابداع

مجرد خواطر on 22 يونيو 2008 في 1:46 م يقول...

السلام عليكم
وانا باقرأ كنت متخيله انك بتتكلمى عن عقلك مثلما قالت فاتيما وعماله اجهز الردوالتعليق فى عقلى عشان اكتبه ثم كانت المفاجأة انا كنت كدة طول عمرى عشان عندى الجيوب الأنفية فى البرد الشديد بتتعبنى والحر الشديد تتعبنى لما سافرت وجيت هنا صحيح الجو من غير تكييف لا يصلح للاستخدام الآدمى بس مع التكييف الأمور استقرت عندى واصبح الصداع زائر ثقيل كل مدة هحجزلك تيجى تقضى هنا يومين-الامارت-هتروحى مفيش صداع ولا عقل اساسا وهتعرفى عيبه بجد

همس الاحباب on 22 يونيو 2008 في 1:57 م يقول...

هههههههه
حلوة البعتة دى
كنا متخيليين حاجة تانية خالص
وفى الاخر يطلع الصداع
لا الف سلامة عليكى
وعامة ارحمى نفسك شوية من النت كفاية عليكى الارقام والحسابات والميزانيات
دول لوحدهم يجيبوا العصبى مش الصداع بس
اسالينى انا عن الصداع
تحياتى وتقديرى

Zika on 22 يونيو 2008 في 4:44 م يقول...

هو برشامة بانادول ويتمسح البوست علي طول
طريقتك جميله جدا يا داليا
تحياتي

Mafrousa on 22 يونيو 2008 في 5:39 م يقول...

الصداع ساعات بيبقى حاله نفسيه
يعنى لو فيه حاجه مضيقاكي ممكم يجيلك صداع
الحر ممكن يجيب صداع
الضغط العالى و الواطي
انا بقى بيجيلي من الاولى النفسيه

اهو ده عيبه on 22 يونيو 2008 في 5:55 م يقول...

محمد الهادى غانم
--------------
شكرا على النصيحه يا محمد
وان شاء الله ابقى اعملها

اهو ده عيبه on 22 يونيو 2008 في 5:57 م يقول...

نورة الخشن
-----------
والله يا نورة انا جالى كل الانواع بس ابرزهم النصفى
لا وبيتفسح كمان بين النصين مرة هنا ومرة هنا والنصفى ده بيسموه الشقيقه وممكن يلازم الانسان العمر كله واحيانا يبدا مع الاطفال فى سن صغيرة


وهاخد البنادول اكيد وانا ليه غيره
تحياتى ليكى

اهو ده عيبه on 22 يونيو 2008 في 6:00 م يقول...

فاتيما
-------
والله ما ما قصدى اعلقك يا حبيبتى، لكن بما ان الصداع مسيطر على عقلى فهو دلوقتى اقوى من عقلى

هو غالبا سببه كتر التفكير فى المهم والهايف بس برضه بيجى لو زعلت او نمت كتير او قليل او وقفت فى الشمس او ماكلتش او قمت من النوم فجاه يعنى مخلاش سبب مجاش عشانه

ربنا يستجيب لدعوتك وارتاح منه بقى
عشرته طولت قوى

تحياتى يا احلى فاتيما

اهو ده عيبه on 22 يونيو 2008 في 6:01 م يقول...

احمد منتصر
-----------
ياااه يعنى لازم يجيلى صداع علشان تفتكرنى
بقالك كتير مش بتزورنى
وانا كمان مقصرة معاك سامحنى

عموما اشكرك على التصحيح
وتحياتى لك

اهو ده عيبه on 22 يونيو 2008 في 6:03 م يقول...

مها ميهو
---------
والله ما قاصده يكون مقلب
انا كنت حابه اوجهله رسالة يمكن يستذوقك ويرحل
الغريبة انه لزقه قوى

ميرسى ليكى

اهو ده عيبه on 22 يونيو 2008 في 6:04 م يقول...

محمد مفيد
----------
والله يا استاذ محمد يفجر اى حاجه بس المهم ميفجرش دماغى

وقانا الله واياكم شره
تحياتى لك

اهو ده عيبه on 22 يونيو 2008 في 6:06 م يقول...

مجرد خواطر
------------
سلامتك من الجيوب الانفيه
والله لو ده الحل اجى وماله ان شالله ارجع من غير عقلى حتى

تحياتى لك واتمنى الزيارة تتكرر

اهو ده عيبه on 22 يونيو 2008 في 6:08 م يقول...

همس الاحباب
-----------
بعته غير مقصوده يا استاذ خالد
ياريت كل صداع الدنيا نت وحسابات وارقام بس
لكن احيانا بيكون الحاله النفسية عموما
بس اسالك ليه ؟ اوعى يكون مقيم عندك برضه

تحياتى لك

اهو ده عيبه on 22 يونيو 2008 في 6:16 م يقول...

zika
-------
يا اخ زيكا جربنا البنادول والابيمول والكيتوفان وكل ما خلق ربنا من مسكنات
بس الحمد لله على كل حال

شكرا وتحياتى لك

اهو ده عيبه on 22 يونيو 2008 في 6:17 م يقول...

واحده مفروسه
-----------
عندك حق والله وغالبا هيزيد مع الحر والرطوبة اللى احنا فيهم ودول بيرفعوا الضغط خلقه

سلامتك من اى حاجه تاثر على نفسيتك
معلش كله من الفرسه

تحياتى ليكى

Unknown on 22 يونيو 2008 في 8:12 م يقول...

أولا: أحييكى على الفكرة المبتكرة لطرد الصداع بأسلوب ادبى راقى وبلغة عربية فصحى لا يرقى إليها الخطأ
جميل جدا الموضوع وبجد نص جميل جدا
تحياتى

Z_Diva on 23 يونيو 2008 في 12:07 ص يقول...

انتي هتقوليلي ياختي
و يسالام عليه و هو نصفي كده و ضارب فوق عينك الشمين بكل تقلوه, هيييييييييييه لنا الله ثم البنادول -و يريته بينفع ياختشي-

son's egypt on 23 يونيو 2008 في 12:28 ص يقول...

اسلام عليكم
الراس وما تحوية من افكار واحلام تشعر صاحبها دائما بالصداع
فانه يردي هذا ولا يريد هذا
كلها اشياء تجعانا في حيرة

Unknown on 23 يونيو 2008 في 12:59 ص يقول...

ربنا يشفيكي منه يارب

حاجات جوايا on 23 يونيو 2008 في 1:29 ص يقول...

سلامتك يا داليا ألف سلامة
والحمد لله على كل ألم بيسببهولنا
لانه كفارة لذنوبنا

واسباب الصداع كتير
النظر والجيوب الانفية والأسنان
والزعل وارتفاع الضغط
والكمبيوتر والتليفزيون والرغى فى التليفون والموبايل
والنوم الغير مريح وقلة النوم وكثرته
والحررررررررر

وعشان كده انا تقريبا بيجيلى صداع تلات او اربع مرات فى الاسبوع
الحمد للـــــــــه

سلامتك يا قمر الف سلامة

سالى

سنووايت on 23 يونيو 2008 في 3:16 ص يقول...

ألف سلامة عليكي من الصداع
بس الموضوع في الاول شدني جدا وفوجئت باخر كلمة انه الصداع حبيبي :)

مجرد خواطر on 23 يونيو 2008 في 8:26 ص يقول...

السلام عليكم
يا داليا يا بنتى زيارة ايه اللى تتكرر دا انا مقيمة عندك صحيح ما انا نسيت اقولك انا طائر حزين سابقا ومجرد خواطر حاليا غيرت اسمى ومتنسيش التاج يا داليا مش عشان غيرت الاسم هنسى لاااااااا

Crystal Lobna on 23 يونيو 2008 في 10:54 ص يقول...

سلامتك من الصداع يا داليا و جميل جداً الموضوع ده و خاصتاً الأسلوب كمان موضوع أنه الصداع ده كان مفجأه .

tarek alghnam on 23 يونيو 2008 في 11:21 ص يقول...

الرائعة داليا
بوست رائع كعادتك
وربنا يشفيكى من الصداع
نحن احيانا من نأتى لانفسنا بالصداع رغم اننا بأيدينا البعد عنا
تقبلى تحياتى
ودمتى رائعة

اهو ده عيبه on 23 يونيو 2008 في 6:03 م يقول...

ايمن بدر
----------
ازيك
ايه الكلام الحلو ده اخجلتم تواضعنا
شرفت ونورت وتحياتى لك

اهو ده عيبه on 23 يونيو 2008 في 6:29 م يقول...

z_diva
-------
على رايك يا اختشى معادش بيحوء خالص
الواحد شكله بعد كده يديها بروفين مورفين اى حاجه فيها فين

اهو ده عيبه on 23 يونيو 2008 في 6:37 م يقول...

son's egypt
--------------
اولا شرفت ونورت المدونة

فعلا تداخل الافكار والاحلام ممكن يسبب صداع

تحياتى لك

اهو ده عيبه on 23 يونيو 2008 في 6:57 م يقول...

اسراء
--------
ميرسى يا اسراء ربنا يخليكى
شرفتى ونورتى

اهو ده عيبه on 23 يونيو 2008 في 6:58 م يقول...

حاجات جوايا
-----------
فعلا يا سالى كله تخفيف من عند ربنا والحمد لله على كل حال

وسلامتك يا فمر انتى كمان من الصداع

اهو ده عيبه on 23 يونيو 2008 في 6:59 م يقول...

سنووايت
--------
والله مبسوطة ان الموضع شدك
بس الاهم انه يعجبك

شرفتى ونورتى

اهو ده عيبه on 23 يونيو 2008 في 7:02 م يقول...

مجرد خواطر
-----------
اسفه بجد مكنتش اعرف
عموما انتى تشرفى البيت بيتك

انا مش ناسية التاج وان شاء الله هجاوب عليه مع تاج تانى
بس اعذرينى على التاخير

تحياتى

اهو ده عيبه on 23 يونيو 2008 في 7:03 م يقول...

لبنى
-----
ميرسى يا لبنى بس المهم تكون مفجاه كويسة

شرفتى ونورتى ومتغيبيش علينا تانى
تحياتى

اهو ده عيبه on 23 يونيو 2008 في 7:19 م يقول...

طارق الغنام
-----------
شكرا يا استاذ طارق ربنا يخليك

بس ساعات بيبقى مش بايدينا نبعد الحاجه عننا
تحياتى لك

Yasser Hussein on 23 يونيو 2008 في 7:46 م يقول...

جميل جدا الاسلوب الادبي في وصف احساسك بالصداع .. تمشي قصة قصيرة ناجحة جدا
وبيعجبني اختيارك للصور المصاحبة للموضوعات بتاعتك بيتم توظيف الصورة بشكل جيد جدا مع الموضوعات

خالص تحياتي

Mohamed Dawod on 24 يونيو 2008 في 2:04 م يقول...

والله أنا أول مره أدخل المدونه بتاعة حضرتك وده مش لا قدر الله عدم شهره ليكى(زى ما قريت عندك ان الفاجومى جاب سيرتك ....يا بختك) بس ده لانى مستجد يعنى شويه فى العالم هنا وقد ايه كانت فرحتى ان لقيت حضرتك بلدياتى بورسعيديه وكمان فرحت لما أتعرفت من خلال مدونتك على مدونةالاخ تامر مبروك ومدونات بورسعيديه تانيه بس فى نفس الوقت زعلت قوى من حكاية الصداع دى....قوليلى هو ليه 90% من نساء بورسعيد عندهم صداع مزمن؟ يا ترى احنا رجال بورسعيد السبب؟ ولا دوشة المراكب اللى بتعدى القنال السبب؟ وزعلت كمان على اللى بيحصل مع تامر زى ما قريت فى موضوعك وبدعيله فى غربتى....عموما الف سلامه عليكى واسيبك بقى علشان انا حطير من الفرحه انى لقيت عندك أسامى لمدونات بورسعيديه كتير عاوز اطلع عليها...وياريت تبقى تشرفينى فى بلوجى وتنوريه.....تحياتى وشكرا

مواطن مصرى نايم on 24 يونيو 2008 في 10:30 م يقول...

اه يا دماغى
لما بيكون عندى صداع جااامد جدا
كده
باخد برشام اسمه
برونتو بلس
دا كويس جدا
جربيه و ادعى لى
يحياتى
eslam

_**( قلب الأسد )**_ on 25 يونيو 2008 في 12:54 ص يقول...

لا بصراحة طريقة رائعة فى التعبيروانصحك بما قالة اخى صاحب التعليق الاول

kochia on 26 يونيو 2008 في 12:29 ص يقول...

يااااه
عامله له بوست مخصوص
هو بصراحة شخصيته قوية لما بيجي
علي العموم امشي معاه لاخر الطريق وشوفي هو عاوز ايه
ساعات بيبقي بقصد حاجة مدفونة جوة الراس مش راضية تطلع

تحياتي

سبهللة on 26 يونيو 2008 في 2:02 ص يقول...

الف سلامة عليكى
شفاكى الله وعفاكى
ممكن تحطى ايدك على مكان الالم وتقولى
أسأل الله العظيم رب العرش العظيم ان يشفينى 7 مرات
وممكن تصلى ركعتين قضاء تطلبى من الله الشفاء
وممكن تروحى تعملى عمره وتشربى ماء زمزم بنية شفاءك من الصداع
او اى حد جاى من العمرة وصيه يجيبلك زجاجة من ماء زمزم
ومهم انك تعملى تحاليل واشاعات وتشوفى سببه ايه
ان شاء الله يكون خير
وان كان ابتلاء من الله سبحانه و تعالى فاصبرى واحتسبى
فكل مرة تشعرين فيها بالامل يكفر عنك ذنب او خطيئة من خطاياكى او ترفعى بها درجة كما اخبرنا رسول الله صلى الله عليه وسلم
اسأل الله العظيم رب العرش العظيم ان يشفيكى
اسأل الله العظيم رب العرش العظيم ان يشفيكى
اسأل الله العظيم رب العرش العظيم ان يشفيكى
اسأل الله العظيم رب العرش العظيم ان يشفيكى
اسأل الله العظيم رب العرش العظيم ان يشفيكى
اسأل الله العظيم رب العرش العظيم ان يشفيكى
اسأل الله العظيم رب العرش العظيم ان يشفيكى

واحد من البلد دى on 26 يونيو 2008 في 9:02 م يقول...

السلام عليكم
ألف سلامة على حضرتك من الصداع

أسأل الله لكى العفو و العافية

وإن شاء الله لا يداهمكى ذلك الصداع أبدا

إنه حقا شيئ بغيض أن يلازم الإنسان

طوال عمره
شفاكى الله وعافاكى

اهو ده عيبه on 28 يونيو 2008 في 12:05 ص يقول...

ياسر حسين
----------
اشكرك يا استاذ ياسر على رايك فى الموضوع والصور
وده راى اعتز بيه خصوصا من فنان قادر على فهم الصورة والاحساس بجمالها

تحياتى لك

اهو ده عيبه on 28 يونيو 2008 في 12:11 ص يقول...

محمد داوود
------------
والله انا الاسعد انى اتعرفت عليك وعلى مدونتك وان شاء الله يكون فيه تواصل بين كل مدونى بورسعيد

اما حكاية الرجاله هم سبب الصداع فبلاش نظلم الناس معانا

اتمنى الزيارة تتكرر وسعيدة بمعرفتك

اهو ده عيبه on 28 يونيو 2008 في 12:13 ص يقول...

مواطن مصرى نايم
----------------
شكرا على الوصفه وان شاء الله اجربه
وقانا الله واياكم شر تناحه الصداع

تحياتى لك

اهو ده عيبه on 28 يونيو 2008 في 12:15 ص يقول...

قلب الاسد
----------
شكرا على التعليق
واتمنى يكون الموضوع عجبك
تحياتى

اهو ده عيبه on 28 يونيو 2008 في 12:15 ص يقول...
أزال المؤلف هذا التعليق.
اهو ده عيبه on 28 يونيو 2008 في 12:20 ص يقول...

kochia
--------
حكم القوى بقى هنعمل ايه
هو بس لو على رايك يقولى عايز ايه كان ارتاح وريحنى معاه

تحياتى لك واتمنى الزيارة تتكرر

اهو ده عيبه on 28 يونيو 2008 في 12:23 ص يقول...

سبهللة ع الاخر
--------------
ربنا يخليكى ليا يارب ومتحرمش من دعواتك وان شاء الله انفذ النصايح لو اقدر

شرفتى ونورتى

اهو ده عيبه on 28 يونيو 2008 في 12:25 ص يقول...

واحد من البلد دى
------------------
اشكرك على دعواتك وارجو من الله ان يقبلها

وتحياتى لك وشرفتنى بالزيارة

غير معرف يقول...

الف سلامة عليكى

وربنا يعافيكة ويحفظك من كل سوء


بس عبرتى عنه بابداع فعلا

تحياتى

خالد كامل on 29 يونيو 2008 في 1:35 ص يقول...

ههههههههههههههههه
لأ بجد بوست جامد
و خصوصاً انه بيتكلم عن الصداع اللى مش راضى يفارقنى من ساعة ما بطلت السجاير
عامة الف سلامة عليكى
و طبعاً الف سلامة عليا
و كدة فاضلنا تسعة عندهم صداع و ندخل الدورى السنة الجاية
هههههههههههههههههه
سلام

Empress appy on 29 يونيو 2008 في 2:05 م يقول...

يخرب بيت الصداع يا دودو اللى هيجننا ده
وخاصه لما يكون من شخص

آلاء on 29 يونيو 2008 في 2:11 م يقول...

السلام عليكم
انا اول مره اعلق عندك في المدونه ,جميله اوي مدونتك و اسلوبك جميل جدا وشيق
وبما انك جيتي علي الجرح انا عندي صداع نصفي غالبيه الوقت مبيروحش يفضل كده منورني يومين تلاته و مفيش حاجه بتحوق فيه و خصوصا اني انا عديت مرحله الادويه دي من زمان
معلش صدعتك بكلامي زياده علي صداعك بس انا مبسوطه اني اتعرفت علي مدونتك

اهو ده عيبه on 29 يونيو 2008 في 7:16 م يقول...

همس
----
الله يخليكى وشرفتى ونورتى المدونة
واتمنى الزيارة تتكرر

اهو ده عيبه on 29 يونيو 2008 في 7:22 م يقول...

مهيج الجماهير
------------
ربنا يخليك
وسلامتك من الصداع
بس كويس انك بطلت السجاير وان شاء الله نكمل الفريق وندخل الدورى فوق 70 سنة

شرفت ونورت يافندم

اهو ده عيبه on 29 يونيو 2008 في 7:24 م يقول...

appy
-----
ازيك يا قلتى
يخرب بيت الصداع الف مرة يا ستى
ربنا يرحمنا منه برحمته

تحياتى ليكى يا اختشى

اهو ده عيبه on 29 يونيو 2008 في 7:33 م يقول...

الاء
-----
وعليكم السلام
ميرسى جدا لرايك وان شاء الله تشرفينا تانى
سلامتك الف سلامه من الصداع بس طالما كده صعب لازم تشوفى دكتور يقولك السبب

شرفتى ونورتى

عصفورة من الشرق on 30 يونيو 2008 في 7:30 م يقول...

سلامتك من الصداع انا كمان فكرت ذى فاتيما ان قصدك عقلك اللى ما بيونش اصل كل واحد بيفكر فى مشكلته هو حتى وهو بيقرا مشاكل الناس ربنا يخلصك من الصداع ويريح عقلى شويه يا رب

اهو ده عيبه on 30 يونيو 2008 في 8:05 م يقول...

عصفورة من الشرق
---------------
ربنا يخليكى
وكل واحد بقى بيبحث عن ليلاه وصحيح الموضوع ممكن يمشى عن العقل

شرفتى ونورتى وان شاء الله تكررى الزيارة

نعكشة on 1 يوليو 2008 في 9:37 م يقول...

بنادول اكسترا


أنا و الصداع خلاص بقينا صحاب
لازم كل يوم نتقابل

في كذا مكان مختلف

اومال اية
مرة في عيني اليمين مرةالشمال
مرة منتصصف الجبهة مرة راسي كلها
وعلي مزاجو

يلا خير

د يدل ان حضرتك بتفكري كتير

بطلي تفكير و كلو هيبقي تمام

دمتي سالمة

سلامون عليكي

شهووووده on 16 مايو 2009 في 11:18 ص يقول...

رغم الألم التي تحمله طيات سطورك إلا ان روعة اسلوبك اعطت لكلماتك مذاق خاص.. بكل صدق اقول أذهلتني

 

Term of Use

أهو ده عيبه Copyright © 2009 Flower Garden is Designed by Ipietoon for Tadpole's Notez Flower Image by Dapino