يوليو 26، 2008

حتى يفرقنا الموت


اتعهد بان احبك واحترمك ، فى السراء والضراء ، فى الغنى والفقر ، فى الصحه والمرض ، حتى يفرقنا الموت
عهود جميلة بنسمعها كتير ، لكن هل يا ترى من الممكن تحقيقها فى الواقع ؟ هل من الممكن ان تتحمل شريك حياتك فى الفقر والمرض وتغير الاحوال ؟ ولا هى مجرد كلمات
*****
سؤال يجب ان نطرحه على انفسنا بمنتهى المصداقية ، لان اوقات كتير الانسان بيتوسم فى نفسه المثاليه ، وبيتخيل ان مهما تغيرت الظروف هيكون ثابت على موقفه ، ثم يفاجئ بنفسه يتصرف بشكل مختلف عند تعرضه للموقف فعليا
*****
الازمات اللى بيتعرض لها الانسان كتير ، لكن اخطرها المرض لانه بيمس حياه الانسان ومن حوله بشكل مباشر ، وتاثيره على النفس اشد من ازمات اخرى
*****
فبالتالى لازم كل انسان يسال نفسه بصراحه ، هيكون ايه رد فعلى لو لاقدر الله اصيب شريكى بمرض عضال او معدى ، او فقد عضو من اعضاؤه او اقعد عن الحركة ؟
*****
هل اقبل الحياه معه مهما كانت الظروف ، ولا هيكون ليا رد فعل تانى ، مع الوضع فى الاعتبار الا نحكم على المساله من الناحيه الاخلاقيه فقط ، ولكن ايضا من كافه النواحى لان اى قرار هنتخذه هو فى النهاية قرار مصيرى سيحدد حياتنا
*****
ربما فى الايام القادمه سيفكر اغلب المقبلين على الزواج فى هذا السؤال ، بعد ما اصبح الكشف الطبى الزامى قبل عقد القران لمعرفه اذا كان فيه اى امراض خطيرة او متوارثه ، وكذلك معرفه القدرة الانجابية
*****
البعض قد يراه قرار صائب-من ناحية عقلانيه-لانه هيدى امكانية للكشف المبكر عن امراض وامكانية علاجها فى مرحلة مبكرة ، وايضا توضيح الصورة وايجاد نوع من الصراحه منعا للغش والتدليس
*****
اما البعض الاخر اللى ممكن ينظر للموضوع من زاوية عاطفيه ، هيشوف ان ده اجراء قد يصدم الاطراف ويحرجهم اذا ما ظهر مرض او عرض ، خصوصا بعد الاستعداد نفسيا وماديا وذهنيا للزواج
*****
القرار ربما وضع لكشف الامور مبكرا ، وسرعه علاجها اوحتى تحديد كل انسان لموقفه قبل الزواج ، واذا كان يرغب فى الاستمرار ولا لا، ودى فى حد ذاتها نقطه جيده ، لكن اكيد فى نقط ضعف تانية ، يعنى مثلا ازاى نضمن صحه التحاليل وان مش باى مبلغ ممكن طرف يغير نتيجه تحاليه لصالحه
*****
نقطه كمان وهى اغفال الجانب النفسى ، يعنى كان من الضرورى وجود اختبارات نفسية للمقبلين على الزواج ، لان المساله مش صحه البدن بس ، لكن من المهم برضه الجانب النفسى والسلوكى
*****
عموما وبصرف النظر عن صحه القرار من عدمه ، موافقتنا عليه او رفضنا ، فالمساله فى الاول والاخر ترجع لقناعتنا الشخصية ، وصراحتنا مع النفس فى الاجابة عن السؤال المطروح ، هل من الممكن ان نستمر رغم كل الظروف ؟
*****
نتمنى ان يكون القرار هدفه فعلا الصالح العام ، والكشف عن اى شئ قد يؤرق حياه زوجية سعيدة ، وان ميكونش كل هدفه تجميع فلوس من الشباب المقبل على الزواج اللى مصرين يعصروه لاخر قطرة دم فيه
واهـــــــو ده عيبــــــــه

69 عرفوا عيبها:

جهاد خالد on 28 يوليو 2008 في 2:06 ص يقول...

هو من الناحية العقلانية زي ما قلتي

القرار دا ممتاز جدا بجد

لانه بيدي فرصةكبيرة لعلاج امراض كتير في الاول

وتلافي مشكلات اكبر فيما بعد

يعني لما الاطراف م البداية تكتشف ان في مرض ويحدث فراق افضل من لما يتزوجو ويرتبطو ببعض فعليا وتحصل ازمة اكبر

اما عاطفيا

فدا بيرجع لمدى تعلق كل طرف بالاخر
وهو شايفه بالنسبة له ايه
هل يقدر يعيش من غيره!!
هل هو او هي متجوزين ارواح واخلاق وعقل وفكر واحاسيس ومشاعر ولا متجوزين اجساد بس

صحيح في الزواج كل دا مهم
لكن انهو اللي يغلب ؟؟

وفي موضوع الانجاب بالذات
السؤال دا بيجي على بالي كتير
ياترى
اثناء الخطوبة
طرف اكتشف ان الطرف التاني غير قادر على الانجاب
هيكون تصرفه ايه!!!


متهيالي
بتختلف من شخص لاخر

موضوع راقي وحساس اوي

شكرا جزيلا

Mafrousa on 28 يوليو 2008 في 7:58 ص يقول...

بصي يا داليا
لو الاتنين بيحبوا بعض جدااااا
الحب اللي يخليهم ما يسمعوش كلام من حد
فلو طلع الكشف فيه بلاوي ولا حيسمعوا حيعملو ودن من طين وودن من عجين
و حتسمعي كلام
خليها على الله
توكل على الله
ربك حيستر

و كله من الجمل التوااكل و ليس التوكل

اما إذا كان جواز صالونات...مبني على منافه شخصيه
فممكن يعيدوا النظر فى الجوازه
بعد الكشف

سلام

غير معرف يقول...

عارفه الموضوع ده ممكن يفيد فى انه يخلى الناس تنقى كويس اوى و تركز و هى بتختار علشان لو واحد طلع فيه مرض ما مايجيش التانى و يفضحه قدام الناس لكن ممكن ينسحب بادب و هدوء ..

الحاجه المهمه اوى اوى اوى الى انت قلتيها هى الحاله النفسية و العقلية للشريك .. و على فكره دى غالبا هى الى بتخرب بيوت كتييير اوى لما يكون احد الطراف نفسه و عقله هما الى فيهم المرض .. اما مرض الجسد فده مقدور عليه الى حد ما و يمكن التعايش معه.

tarek alghnam on 28 يوليو 2008 في 1:19 م يقول...

داليا
اولا احييكى على بوستك الرائع
ثانيا انا مع الكشف رغم ان المرض ممكن ييجى بعد الزواج مباشرة وممكن الابتلائات تبدى بعد الزواج ان بس اهم شئ بشدد عليه هو الاختيار الصح
ممكن تتجاوزى عن كل شئ بس فى الاخر تلاقى اللى تجاوزتى عن كل شئ لا يستحق ذلك فأهم شئ الاختيار وحتى لو عرفنا عيبه على رائيك وعلى اسم مدونتك بحب يبقى نستحمل ونعيش راضيين

محمد فاروق الشاذلى on 28 يوليو 2008 في 2:33 م يقول...

الاختيار السليم أهم بكثير من الكشف على الأمراض، لكن طبعا أنا مع الفحص قبل الزواج ولكن أقصد أن الإختيار السليم لشريك الحياة أهم من هذه الفحوصات

Mohamed Dawod on 28 يوليو 2008 في 5:10 م يقول...

فى جريده المصرى اليوم كانوا جايبين خبر ان وزير الصحه وهو بيعمل مرور فى المستشفيات قابل واحده ست فى الخمسينات وبيقولها يا حاجه لو واحد اتقدم يتجوزك دلوقتى حتهتمى بنتيجة الكشف الطبى دى رديت عليه وقالتله الحكمه المصريه الشهيره "يابيه الراجل ميعبوش الا جيبه". تفكير الناس البسطاء فى مصر مش مع الموضوع ده خااااالص وحيعتبروه تقييد ليهم وكمان حمل مادى زايد عليهم. بس انا شخصيا شايف ان له أهميته ويكون قدام العريس والعروسه بعد نتيجة الكشف حرية الأختيار او مراجعة الأختيار....تحياتى على الموضوع وشكرا

Unknown on 29 يوليو 2008 في 3:38 م يقول...

داليا
موضوع هايل
لكن للاسف الاغلب مش بيفكروا كدة فى الزواج
بيفكروا فيه كواجهة اجتماعية ومش بيفكروا فى الاشياء السلبية اللى ممكن يواجهوها فى المستقبل
اعتقد ان الحب وقناعت الشريك خاصة بعد الاحتكاك الفعلى هى اللى هتحدد سلوكة يعنى كلنا عارفين ازمة التجمل فى الخطبة تختلف عن الحقيقة فى الزواج ان كان بعد الزواج فعلا فى مشاعر حب حقيقية وقدرة على الاستمرار او لا
هو دا اللى هيحدد امكانية الاستمرار
ام لا
كمان بعض المسئوليات التى قد تطرءمثل الاولاد
والجانب الاخلاقى العشرة حاجات كتير هى اللى بتحدد

هرجع للموضوع تانى
ان شاء الله

موناليزا on 29 يوليو 2008 في 9:16 م يقول...

بوست منطقى جدا وسؤالك بيفرض نفسه
بالنسبة لى ممكن جدا اضحى لكن صعب الاقى اللى يستاهل تضحيتى دى

محمد الهادى غانم on 29 يوليو 2008 في 11:42 م يقول...

السلام عليكم
اولا احب احييكي علي البوست الرائع ده بس انا هنا عايز اسأل سؤال فرضاً ان فيه اتنين بيحبو بعض وتزوجوا عن حب ثم اصيب احدهما بمرض هل سيتحمل السليم العليل ؟
هنا بس الاجابة يمكن تتخيلها من المعاملة نفسها ويمكنم انا قولت الكلام ده في بوست عندك برضه الراجل او الست يشيلوا بعض لو كل واحد مريح التاني .
الدين الاسلامي هو اللي بيحسنا علي كده وليس كلام الأفلام أو الكلام اللي بيتقال في الهياكل
تحياتي ويجعله عامر

مصطفى حسان on 30 يوليو 2008 في 9:57 ص يقول...

انا شايف ان فكرة التضحية والكلام الكبير ده كله كلام شكله جميل جدا من الظاهر لكن .. في نقطه مهمه معظم الناس مش واخده بالها منها .. وهي إذا كانت التضحية تتجاوز الشخص المضحي وتضر بغيره فهي لا تعتبر تضحيه ولكن جريمة .. بمعنى اخر ولنفترض ان في اتنين هايتجوزوا واتضح ان الزوجه عندها مرض ما والمرض ده وراثي .. الزوج في الحاله دي ما ينفعش يضحي لانه هايضحي بصحة أولاده في المستقبل اللي هايورثوا المرض عن أمهم .. وطبعا لو اتجوزوا يبقوا مجرمين في حق نفسهم وفي حق المجتمع وفي حق الأطفال اللي هايجوا مالهومش أي ذنب يصابوا بمرض من الأمراض

انا اسف على فجاجة الأسلوب لكن غصب عني .. يمكن ماحدش فيكوا شاف حاله من دي بعينه لكن لو شوفتوا كنتوا هاتفهموا الموضوع بشكل آخر .. لو شفتوا شخص مالوش أي ذنب انه يتولد مشوه إلا إن أمه أو أبوه كانوا هما السبب كنتوا هاتقولوا الكلام اللي انا بقوله

يا جماعه التضحيه انا عارف انها من أسمى معاني الحياة لكن مش هي دي التضحية
التضحيه إني أضحي بسعادتي أنا أو بأي شيء لا يضر إلا نفسي فقط ولا يمتد للآخرين

تحياتي على الموضوع المهم جدا

اهو ده عيبه on 30 يوليو 2008 في 10:17 م يقول...

النجمه الصامده
--------------
والله اثرت نقطه مهمة وهى مساله الانجاب
وهو فعلا قرار ذو حدين بس المهم يتنفذ ويتفهم صح
شكرا على الزيارة لاول مرة واتمنى تتكرر
تحياتى

اهو ده عيبه on 30 يوليو 2008 في 10:19 م يقول...

واحده مفروسه
-------------
هى المسالة بترجع فعلا لطبيعه العلاقه بينهم
ومدى استعداد كل واحد للاستمرار رغم الظروف
بس غالبا زى منا شايفه الموضوع هيبقى مجرد اجراء شكلى
انتى عارفه الحكومة عايزة فلوس وبس
تحياتى لكى

اهو ده عيبه on 30 يوليو 2008 في 10:22 م يقول...

koko
-------
بصى صعب برضه نحكم ونقيم الناس بالمرض او الصحه لان ده ابتلاء من ربنا
بس حقيقى مرض الجسد اهون بكتير من العقد النفسية او السادية اللى ممكن متكونش ظاهرة على الانسان

شرفتى ونورتى المدونة

اهو ده عيبه on 30 يوليو 2008 في 10:24 م يقول...

طارق الغنام
--------------
وجهه نظر معقولة يا استاذ طارق
لان مفيش حد ضامن صحته والمرض ممكن يظهر بعد سنوات
يبقى المهم الانسان يكون اختياره سليم ومع حد يستحق انه يضحى علشانه

تحياتى لك

اهو ده عيبه on 30 يوليو 2008 في 10:26 م يقول...

قلب مصرى
---------
كلامك مظبوط ، لو اختيارنا م البداية صح هنقدر نتغلب على اى ازمة تمر بينا

شرفت المدونة ونتمنى تكرار الزيارة

اهو ده عيبه on 30 يوليو 2008 في 10:29 م يقول...

محمد داوود
-----------
والله يمكن ده موروث ثقافى وشعبى ان العيوب المادية اهم من عيوب تانية
وده اللى بيدفع بعض الناس انهم يتزوجوا من اى حد لمجرد امكانياته حتى لو مريض نفسى
طبعا المسالة هتاخد وقت على ما الناس تتقبلها
بس عن تجربة مع بعض الاصدقاء اللى شافوه انها مجرد تجميع فلوس وعبء مادى وخلاص مش خوف على صحه الناس او غيره

تحياتى لك

اهو ده عيبه on 30 يوليو 2008 في 10:34 م يقول...

نهر الحب
--------
انتى لمستى نقطة مهمة وهى التجمل اثناء الخطبة واحيانا اخفاء بعض الحقائق المهمه اللى ممكن تؤثر على الحياه بعد كده
واظن المسالة بترجع لصراحه الانسان مع نفسه ومع الغير
او ممكن يكون هو نفسه مش عارف بحقيقه مرضه فدى فرصه لتدارك الوضع بسرعه
عموما هى مش فكرة وحشة لو احسن تطبيقها

تحياتى لكى

اهو ده عيبه on 30 يوليو 2008 في 10:37 م يقول...

موناليزا
----------
الاهم من التضحيه هو الشخص ، هل فعلا يستحق ان نضحى من اجله
وهل هيقدر ده ولا ممكن بعد كده يتجاهله
ونبقى ساعتها احنا اللى خسرنا

تحياتى لكى ونورتينى

اهو ده عيبه on 30 يوليو 2008 في 10:40 م يقول...

محمد الهادى
-----------
والله لما بيكون فيه عشرة المساله بتفرق
لان فيه تراكمات من التعامل والتفاهم والالفه بتخلى كل شريك يكمل شريكه
اما فى فترة الخطوبة فالمساله ممكن متكونش بالشكل ده
واحيانا يكون فيها اعادة حسابات وتفكير مرة اخرى
عموما دى فى الاول والاخر بترجع لاراده الاتنين وتقبلهم لبعض ايا كانت ظروفهم

تحياتى لك

اهو ده عيبه on 30 يوليو 2008 في 10:43 م يقول...

darsh
-------
نقطه مهمه جدا اللى اثرتها
الانسان من حقه يضحى فيما يخصه لكن مش من حقه يضحى بحياه ومستقبل غيره
واذا كان ارتضى لنفسه الفهل ده يبقى مفيش داعى يجيب للحياه اطفال يعذبهم بمرض او بعجز
يبقى قدام الانسان اختيار طريق من اتنين لان محدش يقدر ياخد من الدنيا كل حاجه
وحتى لو كانت قناعتنا ان كل شئ بامر الله لكن ربنا امرنا اننا منلقيش بنفسنا او بغيرنا فى التهلكة

احييك على تعليقك ونورت المدونة

غير معرف يقول...

مش عارف صراحة يا داليا
دة سؤال يحتاج لكثير من التفكير وكمان حسب نوع المرض وكمان من رجل او ست
لو الرجل لا قدر الله اصبح غير قادر على المعاشرة هل ستتحمله زوجته وتقبل حرمان نفسها من هذاالأحتياج الرئيسي
هل لو اصيب بالشلل ممكن تكون معاه دايما وتلبسه هدومه وتدخله الحمام
و الرجل ممكن يعمل العكس ؟
مش عارف صراحة

Z_Diva on 31 يوليو 2008 في 1:09 م يقول...

و الله يا دودز انا شايفة ان القانون ده كويس جدا, خاصة ان اغلب الناس دلوقتي بترمي نفسها في التهلكة, عفوا, اقصد انهم بيتجوزوا انتريهات و كده من باب اهي جوازة و السلام, فعلى الاقل يبقوا كده ضامنين انهم هيحققوا كل الاهداف المرجوة من الجوازة, بدل ما يتفاجئوا بحاجة كده او كده و تقلب بطلاق و مشاكل, اهم يبقوا على بينة من اولها برضون, بس الخوف بقى من افلام تزوير الشوهادات اللي هتغرق السوق :)

بس كمان انا موافقة ان لازم يكون في اختبارات نفسية, بجد دي اهم و اخطر من حوارات الخلفة و الامراض الوراثية و الليلة دي

يللا ربنا يكرم الكل و يوفقهم لناس طيبة, هيلثي ويلثى اند وايز :))))

دكتور بهــدوء on 31 يوليو 2008 في 4:40 م يقول...

أولا أول مره أزور المدونه الرائعه
بس مش أول مره أسمع عنها******
بصي ياستي
مهم جدا الكشف الطبي قبل الزواج ع كل الراغبين فيه
ده فعلا بيدي فرصه بدري للعلاج
وكمان فيه امراض ممكن تتنقل للاجنه
فدي ممكن نكتشفها
لأن فعلا حدوث مثل هذه الامراض ف الاطفال بتدمرهم
وبيكونوا مصدر زعل وحزن للاسره بدل الفرح
فطبعا الكشف يغني ع ده كلو
بعيدا ع اكتشاف عامل ريسس اللي بسهوله جدا ممكن حمايه الاطفال م التعرض لمضاعفاته
ده الغرض م الكشف
كمان معرفه امكانيه الانجاب عند كلا م الزوجين

اما يوافق يتمم الزواج ولا لا
او لو جه مرض بعد الزواج
ده يقف ع مدي العلاقه بينهم
اكيد لو كانو بيحبو بعض
هيستحملو اي حاجه
بس فيه ناس اصلا عادي بيه م غيره هوه حد تاني اوك مافيش فرق
*********************
سوري طولت عليكي
احيكي ع البوست الرائع جدا
والمختلف جدا

Asmaa mahaba on 31 يوليو 2008 في 7:17 م يقول...

لا اله الا الله دا انا على كدا ممكن اعنس يعنى اتعالج من ايه ولا ايه دا انا مجنونه خلقه لالالالالالالالالالالا انا مش موافقه
خليه يتدبس عشان تطلع عينه
تحياتى ليكى سومه_87

رئـــــيسـة حزب الأحلام on 31 يوليو 2008 في 9:31 م يقول...

اولا مش هيقدروا يحددوا كل دة قبل الزواج لان على مااعتقد ان لازم يقابلهم الموقف وساعتها الكل هيبان على حقيقتة
تحياتى لكى

أختكم فى الله on 31 يوليو 2008 في 10:12 م يقول...

بنحاول نتغير 5

ياريت تشرفونا و تقروا الفكرة و تقولولنا رأيكم

اهو ده عيبه on 1 أغسطس 2008 في 2:39 ص يقول...

z_diva
---------
عندك حق يا اختشى فى موضوع التزوير ده
وعموما ده طلع كشف صورى كده اى كلام وسمعن كمان انهم لغوا القرار

شرفتى ونورتى

اهو ده عيبه on 1 أغسطس 2008 في 2:44 ص يقول...

دكتور بهدوء
-----------
سعيدة بزيارتك المدونة واتمنى تكون عجبتك
انا مش ضد القرار لانه فعلا هيخفف عن ناس معاناه كبيرة ممكن تقابلهم مستقبلا
لكن للاسف فيه ناس بتبص تحت رجليها بس زى اللى بيصمموا على جواز الاقارب

شرفت ونورت المدونة واتمنى تكرار الزيارة

اهو ده عيبه on 1 أغسطس 2008 في 2:52 ص يقول...

مصطفى ريان
-----------
والله دى ترجع لطبيعه العلاقه والعاطفه بينهم
ومدى احتمالهم لبعض
ووجود الرحمة ما بينهم
يعنى المسالة لها اعتبارات كتير
تحياتى لك

اهو ده عيبه on 1 أغسطس 2008 في 2:56 ص يقول...

سومه
------
متقوليش كده انتى زى الفل
ولو اتدبس يبقى دى احلى تدبيسة حصلتله
سلامى يا قمر

اهو ده عيبه on 1 أغسطس 2008 في 2:59 ص يقول...

رئيسة حزب الاحلام
-----------------
المهم كل شئ يكون على نور وبينة
وبعد كده الانسان من حقه يختار
وربنا يوفق الجميع
تحياتى لكى

اهو ده عيبه on 1 أغسطس 2008 في 3:00 ص يقول...

اختكم فى الله
----------
ان شاء الله نحاول نتابع الفكرة
تحياتى لكى

Unknown on 1 أغسطس 2008 في 3:32 ص يقول...

أحييكى على البوست الرائع
ماعنديش كلام اضيفه اكتر من اللى اتقال
لكن بنظرة عقلانية فاكيد ان الكشف الطبى مهم جدا حتى وان كان حد من الطرفين بيعانى من اى مرض او شىء فمعرفة الطرف التانى بده وتقبله ليه قبل الزواج افضل بكتير من بعد الزواج وكمان فرصة اعلاج من امراض ممكن تسبب مشاكل بعد كده

لكن برده لازم يكون فى موازنة بين الناحية العقلانية والعاطفية وان ده ماياثرش على علاقتهم ببعض

طرح ممتاز لموضوعك
تقبلى تحياتى

عروسة ننوسة on 2 أغسطس 2008 في 1:30 م يقول...

مش عارفة اقولك ايه ....لكن اللى بيحب بيتغاض عن اى شىء

مواطن مصرى نايم on 3 أغسطس 2008 في 12:55 ص يقول...

بصى يا داليا
الحب اول شئ انه تضحية
يعنى لو كل طرف ضحى عشان خاطر الطرف الاخر المركب حتمشى
لكن لو كل واحد اتمسك باللى فى دماغة
و محدش قدر ظروف الاخر
يبقى هما الاتنين ماشين فى سكة غلط
اخرها طريق مسدود
اما حيضطروا يرجعوا تانى
او كل واحد يشوف له طريق تانى
و ده بيكون سبب الفشل بس
لكن اللى بيحب حد بيحب اى حاجة بيحبها الحد ده
تحياتى
اسلام

كرانيش on 3 أغسطس 2008 في 4:00 م يقول...

لا بقه انا وانتى وكلنا عارفين ان هدف القرار هو بس تجميع فلوس والسلام


لنا الله يا اخيه

Mohamed Dawod on 5 أغسطس 2008 في 5:40 ص يقول...

من فضلك تعالى خدى التاج/الواجب من عندى وياريت مطنشيش المره دى ممكن؟
خالص تحياتى وشكرا

رئيس جمهوريه نفسى on 5 أغسطس 2008 في 2:33 م يقول...

بصى يا داليا
اولا موضوع القرارات المصيريه بتختلف واللة حسب كل فرد بمعنى ليه اسباب غير متعلق بالوضع او الموقف فبتلاقى فى نفس الموقف ناس بتفكر بطرق مختلفه عن بعض وبتتصرف بطرق مختلفه بترجع للتفكير والقدرة على الاحتمال ومقدار حب كل طرف للاخر
موضوع الكشف الطبى انا معاه قلبا وقالبا بس شريطه ان يتم تطبيقه بصورة فعليه بمعنى انى عندنا فى الصعيد مع تطبيق القرار ناس واللة بتروح تدفع الرسم وتتختم الشهاده وتمشى من غير اى كشف وده غلط

Omar El-Tahan on 6 أغسطس 2008 في 3:25 م يقول...

بصراحة نحن مجتمع عاطفي و لكنها عاطفية ساذجة .... عاطفية تجعلنا نأتي المحرمات كتقبيل الأقارب اللذين يحلون أو محرمين تحريم مؤقت أو الجلوس بملابس مكشوفة أمام أزواج العمات و الخالات و غيرها كثيراً مما لا يحصى من الجوانب التي توطنت لدينا و شكلت ثقافة خاطئة تجعل العروس تخلع حجابها يوم زفافها و تحل للمنقبة خلع النقاب اذا دعت لفرح احدى قريباتها ... غير الرقص أمام الأغراب و الكذب للتخفيف من أمور معينة ... المهم أن عاطفيتنا هذه تجعلنا نخشى الإحراج .. و لكن ماذا عن صدمة المعرفة بعد الزواج الفعلي ... شخص لا ينجب أو عنين .. امرأة لديها مرض جنسي معدي "حتى لو اصيبت به بصورة عارضة" او التهاب كبدي أو مرض جلدي ... هل سيكون عذاب مدى العمر بالمعاناة او العدوى أم تصارح من البداية و كل منا يتحمل نتيجة قراره سواء بالإستمرار أو بعدم إكمال الإرتباط؟؟

هذا غير الأمراض الوراثية التي قد يحملها الآباء دون الإصابة بها و يتم توارثها في حالات معينة من التوافق الجيني بين الزوجين ....

القائمة لا تحصى و أنا شخصياً أرى ضرورة هذا الموضوع.

بالمناسبة والداي أجريا هذا الإختبار منذ 32 سنة قبل زواجهما ..

شفـقــة و إحســــان on 8 أغسطس 2008 في 2:20 م يقول...

البوست رائع وهادف

الزواج.....روضة الحب on 8 أغسطس 2008 في 8:18 م يقول...

ازيك يا جميل
عاملة ايه
موضوعك جميل جدا

بس كله بأمر الله برده
اللي مضايقني موضوع التلات تلاف اللي يدفعواعند كتب الكتاب
الشباب هايدفع ايه والا ايه
يعيني عليهم

*الطالبة عفو الله *زوزو on 9 أغسطس 2008 في 9:32 م يقول...

ما شاء الله عليكي اختي اثرت موضوع مهم فعلا
ربنا يهدينا لكل ما فيه الخير لينا في الدنيا و الاخرة
جزاكي الله خيرا

غير معرف يقول...

انتي بتتكلمي صح
بس تفتكري مين هيفكر كده ؟؟؟

كلام والله يتفكر فيه ويتقلب في النافوخ
بس بجد مين اللي هيقتنع ومين فاضي وهيطلعولنا بميت حجة وحجة
بس تصدقي عجبتني
بس تفتكري هجربها ف يوم؟؟

بس هو ييجي اسمه ايه اللي اتأخر ده وما جاش واحنا نشوف موضوع الاختبارات دي

ومن ناحيتي مش قلقانة عندي اللي يعملهالي يعني الحتة دي عندي مضمونة
اللي مش مضمون اسمه ايه ده اللي ربنا لسه ما هداهوش لعنوان بيتنا
كخخخخخخخخخخخخخ

مها ميهوووو

Gannah on 10 أغسطس 2008 في 1:45 ص يقول...

داليا
سعدت جدا بلقائك انت والمجموعة ولمست فيكِ انسانة عاقلة منظمة التفكير هادئة تحكم العقل
ما يحدث فى عالمنا العربى للأسف اننا نضع قواعد ثم عند التنفيذ يحدث شىء أخر تماما وينتهى الامر الى مجرد كلام على الورق وربما عينة دم نجرى عليها بعض التحاليل اما كشف طبى حقيقى فلا أظن
أنا شخصيا لو وجدت الانسان المناسب فلن اهتم كثيرا بلكشف الطبى فما يبقى من الانسان هو العشرة الطيبة والاخلاق والتى لا تتغير بتغير الاحوال هذا لو كانت حقيقية
أحييك على تناولك للموضوع
تقبلى تحياتى

حنين القلب on 10 أغسطس 2008 في 9:24 ص يقول...

والله لو المشكله فى القرار اظن ان ممكن اى شىء يتزيف
يا حبيبتى دى اكبر القضايا بتتزيف واظن احنا لسه مش خرجنا من موضوع ممدوح اسماعيل
فما بالك بتحليل عادى هيضر واحد او وحده هيبقى عادى جدا
قوليلى يا داليا لو حبيتى واحد بجد وعملتوا التحاليل وطلع لا قدر الله فيها اى شىء يمنع الجواز يستمر هتكملى ولا ايه؟؟
انا عن نفسى هاكمل مدام اختارت الانسان يبقى اللى ربنا كاتبه هايكون
صدقينى مفيش فى الحياه اى ضمانات
لا مال مضمون ولا بنون مضمون
ربنا ييسر حالنا لما يحب ويرضى
تقبلى مرورى

اهو ده عيبه on 10 أغسطس 2008 في 6:43 م يقول...

totaaa
--------
اولا اهلا وسهلا وشرفتى المدونة

انتى عندك حق فى مساله الموازنة بين الناحية العقلية والعاطفية بس اللى يقدر يعمل كده فعلا

عموما انا سمعت انهم لغوا القرار
سعيده بتعليقك واتمنى تتكرر الزيارة

اهو ده عيبه on 10 أغسطس 2008 في 6:45 م يقول...

عروسة ننوسة
-----------
فعلا الحب ممكن يخلينا نتغاضى
بس برضه منلغيش عقلنا

تحياتى لكى

اهو ده عيبه on 10 أغسطس 2008 في 6:52 م يقول...

مواطن مصرى نايم
------------------
التضحية شئ جميل
بس المهم تفكر كويس قبل ما تضحى وهل دى فعلا تضحية سليمة ولا تهور وتسرع
علشان محدش يندم بعد كده

تحياتى لك

اهو ده عيبه on 10 أغسطس 2008 في 6:58 م يقول...

كرانيش
-------
جبتى المفيد
هو ده كل همهم وبس الفلوس
ومش مهم الناس تتكلف او حياتهم تتاثر

تحياتى لكى

اهو ده عيبه on 10 أغسطس 2008 في 6:59 م يقول...

محمد داوود
---------
ميرسى على الواجب
وان شاء الله احاول اجاوبه

سلامى لك

اهو ده عيبه on 10 أغسطس 2008 في 7:03 م يقول...

رئيس جمهورية نفسى
------------------
مهو المشكلة يا محمود ان مفيش حاجه فى البلد دى بتطبق صح
هى بتطبق وتتحط فى الدرج بس وانت فاهم
وطبعا المسالة هتبقى صورية مش اكتر
ومش بعيد نتيجه التحاليل تطلع بعد الجواز والانجاب كمان

تحياتى لك

اهو ده عيبه on 10 أغسطس 2008 في 7:10 م يقول...

عمر الطحان
-----------
اولا احيى والديك على عقليتهم المتفتحه فى توقيت كان صعب على الناس تتقبل فكرة التحليل ولا زالوا

وعندك حق اننا بنحكم على اشياء بعواطفنا فقط
مع العلم ان مرجعيتنا ينبغى ان تكون دينا
والدين نهى عن الغش والتدليس فى الزواج حتى بالشعر بالمستعار
فما بالك بالمرض او العاهه الجسمانية او العقلية
اعتقد ان مفيش تعارض مع اجراء التحاليل دى والناحية الدينية طالما هدفها اظهار الحقائق وان الانسان يختار شريكه على بينة ونور

تحياتى لك

اهو ده عيبه on 10 أغسطس 2008 في 7:11 م يقول...

شفقه هانم واحسان بك
-------------------
شكرا ان الموضوع عجب سيادتكم
ونتمنى دايما الزيارة تتكرر

اهو ده عيبه on 10 أغسطس 2008 في 7:13 م يقول...

الزواج روضه الحب
----------------
ازيك انتى
انا سمعت برضه عن موضوع التلات الاف بتوع محكمة الاسرة
بس رجعوا قالوا اشاعه
ربنا يستر على الشباب هيلاقيها منين ولا منين

تحياتى لكى

اهو ده عيبه on 10 أغسطس 2008 في 7:15 م يقول...

zizi
-------
اهلا وسهلا بيكى شرفتى المدونة
سعيده ان الموضوع عجبك ولفت انتباهك
واتمنى تنورينا دايما بالزيارة

اهو ده عيبه on 10 أغسطس 2008 في 7:21 م يقول...

مهاميهو
--------
ياحبيبتى ان شاء الله هييجى قريب
وتفرحى قريب
وتعزمينا اكيد
ولا هتاكلى علينا التورتة والجاتوه

تحياتى لكى

اهو ده عيبه on 10 أغسطس 2008 في 7:26 م يقول...

جنة
-----
ده انا يا حبيبتى اللى اتشرفت بمعرفتك لانك بجد شخصية جميلة قوى وست الكل
وبجد سعيده انى كسبت صديقه زيك لو تسمحيلى اعتبر نفسى كده

زى ما قلتى المهم الاخلاق الطيبة والعشرة الكويسة والصحه والمرض دى بيد الله
بس لو نقدر ناخد بالاسباب بشكل سليم ونقى نفسنا واولادنا من شئ يبقى مفيش مشكلة

سلامى لكى ياقمر

اهو ده عيبه on 10 أغسطس 2008 في 7:30 م يقول...

حنين القلب
-------------
التزييف بقى سمة حياه دلوقتى فى كل شئ
عن نفسى لو اتحطيت فى الموقف ده وشايفه ان الانسان اللى اخترته مقدرش اكمل حياتى من غيره
يبقى اى حاجه تانية ممكن تتحل
وفعلا الحياة مفيهاش ضمانات
والضامن هو الله

تحياتى لكى

خالد كامل on 10 أغسطس 2008 في 10:53 م يقول...

أنا رأيى ان الموضوع مش وحش
لأنه ( و لأول مرة ) حاجة كويسة فكروا فيها
هيمنع أمراض كتير
على فكرة أنا ليا ابن خالتى الله يرحمه ( 9 شهور ) ... متهيألى الكشف قبل الجواز ممكن يمنع حاجة زى كدة
******************************
أه صحيح
كان فى حرامى بوستات سارق من عندى بوست
فبعدين بدعبس عنده فى المدونة لقيته سارق البوست ده من عندك
حتى بكلمة
(( و اهو ده عيبه ))
عامة البوست المسروق
من هنا

اربعين سنة ستيوتند on 10 أغسطس 2008 في 11:28 م يقول...

بالعكس انا شايفة انه قرار عشان يمص دم الشباب و بس
انما لو الحكومة الحلوة الطرية اللي كلها حنية خايفة علي صحة الشعب و طبعا ده مشكوك في امره تبقي التحاليل بالمجان زي التطعيم كده
و ان كان الواحد لما يجي يفكر يقول يعني لو لقيتي فعلا حد كويس في زمنا ده
ممكن تتخلي عنه عشان شوية تحاليل و فحوص؟؟؟

(المهاجر الى الله) on 13 أغسطس 2008 في 1:21 ص يقول...

ادعوك لزيارة مدونتى المتواضعة
www.eyuon.blogspot.com
وشكرا

bastokka طهقانة on 13 أغسطس 2008 في 3:10 ص يقول...

متفقة معاكي لازم فحص نفسي
بس تعرفي ما بيبنش غير بالعشرة


اوروفوار

قوس قزح on 13 أغسطس 2008 في 2:24 م يقول...

جميل اوى البوست ده
تحياتى لكى على اسلوبك السهل الممتنع


....................

عايز فعلا تبقى مشاركتك مش بس كلام
و تساعد نفسك و غيرك و بلدك
تعالى شارك معنا
التفاصيل هنا

http://kouskoza7.blogspot.com/2008/08/blog-post_12.html

او هنا

http://bekyaforsale.blogspot.com/2008/08/blog-post.html

أحمد منتصر on 15 أغسطس 2008 في 4:27 ص يقول...

فينك يا داليا ؟

Unknown on 15 أغسطس 2008 في 5:51 م يقول...

حتى يفرقنا الموت بقولك بجد بوست جميل الناس بتقطع عهود فى ظل اللحظة الحالية وبينسوا يفكروا فى المستقبل القريب حتى مش البعيد
بجد حطيتى ايدك على الجرح
تحياتى على الأسلوب المتمكن

خالد كامل on 16 أغسطس 2008 في 12:18 ص يقول...

انتى فين بقالك كتير مش بتدخلى
ابقى طمنينا عليكى
أتمنى تكونى بخير
سلام

كلبوزة لكن سمباتيك on 17 أغسطس 2008 في 12:42 م يقول...

ازاى نضمن صحه التحاليل وان مش باى مبلغ ممكن طرف يغير نتيجه تحاليه لصالحه
==
اكيد في خمسة جنيه تحت الطلب و كلة يبقى تمام
و الف مبروك

تحياتي

واحد من البلد دى on 18 أغسطس 2008 في 4:25 م يقول...

السلام عليكم

القرارات المصيرية كلها كويسة جدا..
لكن إحنا كحكومة و شعب أحسن ناس فى العالم ننفذها غلط..
وبمجرد أن تفتح الحكومة بابا للقرار يفتح الناس ألف باب للرشوة و الفزلكة و المحسوبية و الفهلوة وكل المسميات التى تندرج تحت مسمى(قلة الضمير)...يبقى الأحسن تحتفظ الحكومة بقراراتها و يحتفظ الناس بعقولهم...
دمتى بكل خير

Dr ayman on 19 أغسطس 2008 في 5:59 ص يقول...

ياريت حضرتك تزور الفهرس تانى للاهميه اتمنى منكم الدعم للموضوع http://kinawy.blogspot.com/2008/08/blog-post_11.html

 

Term of Use

أهو ده عيبه Copyright © 2009 Flower Garden is Designed by Ipietoon for Tadpole's Notez Flower Image by Dapino