نوفمبر 16، 2008

كان يوم يفرح



مكنتش متخيلة لما فكرنا اننا نعمل يوم لزيارة الايتام ، انه حيكون بالجمال والنجاح ده ، خصوصا ان احنا كبنات اللى تولينا الترتيب لليوم ككل بس الحمد لله طلع احلى بكتير مما كنا متخيلين ،احنا كان هدفنا من البداية انا وايناس نهر الحب ودعاء ربع ضارب ونسمة انه مش بس يكون لقاء للمدونين، لكن اننا كمان نقدر نخدم مجتمعنا من خلال اللقاءات دى ، وده شئ يارب نقدر نحققه باستمرار
******
اليوم بدأ بالنسبة لى الساعه 10.30 صباحا لما وصلت انا ودعاء عند الدار ولقيت ايناس ونسمة موجودين بره ، ولقيت معاهم ماما امولة ودى كانت اول مرة اتقابل بيها وبصراحه سعيده جدا بمعرفتها وكانت بالنسبة لى من اهم مكاسب اليوم
******
قررنا اننا ندخل علشان نظبط الحاجه لغاية ما تبدأ الناس توصل ، ودخلنا صاله الاكل وبصراحه كان شكلها ميسرش ، زبالة على الارض وكراسى مكسرة ، والغريب ان كل ده اتغير بقدرة قادر لما المديرة وصلت !!!
******
اول واحد وصل كان الخواجه احمد الصباغ ، وده لقبه الجديد وحتعرفوا بعد كده سبب التسمية ، بعدها وصل خالد همس الاحباب وكان معاه العسقلانى ، ودى كانت اول مرة اقابله بس اكتشفت انه من الشخصيات المرحة وطيب جداوكفاية الشنطة اللى كانت تقيله جدا اللى كتر خيره شالها ووصلها
******
كمان جت سارة محاولات فى البحث عنى وكنت سعيده جدا انى اخيرا شفتها بنوتة لذيذه والحمد لله كسبت صديقة جميلة
******
وبعدها وصل شفقة هانم واحسان بك اللى اكتشفت بجد انهم حاجه تانية غير ما بيكتبوا عن بعض ، وان نقارهم على المدونة نتيجه انهم couple لذيذ وخفاف الدم جدا
******
طبعا البنات والشباب راحوا يصلوا الجمعه ، وانا وايناس اضطرينا نستنى علشان نرتب الحاجه ونصنفها ، وخلال الوقت ده ابتدينا ناخد بالنا من حاجات فى الدار
*اكبر بنت فى الدار اللى هى مخطوبة حاليا كانت بتتكلم معانا بمنتهى الدبلوماسية ولما سالناها عن المعاملة فى الدار كانت بترد كانها حافظة الكلام ، او كان الدار مفيهاش اى سلبيات وده مستحيل

*لاحظنا ان المشرفات سابونا ندخل وفضلوا قاعدين بره عادى من غير ما يدخلوا معانا يشوفوا احنا بنعمل ايه مع الاطفال، صحيح كان كل شوية واحده تيجى وتروح بس المفروض لما يكون فيه ناس غريبة عن الدار سواء بنات او شباب ان المشرفة متتحركش من جنب الاولاد

*كمان لاحظنا ان فيه رجالة طالعه ونازلة المبنى ولما سالنا عرفنا انه مهندس وعمال بيرمموا مبنى موجود، حتى لما حبيت اصلى المشرفة قالتلى اطلعى فوق فى مصلى من غير ما تطلع معايا

*اول ما المديرة وصلت المشرفات حالهم اتبدل ، وابتدى الكنس والمسح ، حتى الاطفال خلوهم جابوا كراسى تانية غير المكسرة وفى ثوانى الصاله بقت حاجه تانية

*كان فيه طفلتين موجودين معانا من الاول قبل ما باقى الاطفال تنزل ، استغربنا جدا من طريقة كلامهم خصوصا انهم بيقولوا على عاملات النظافة خدامين ، حاولنا نفهمهم يقولوا دادا او اى حاجه تانية اصروا انهم بينادوهم كده ، كمان صورة عبد الرحمن وهو ماسك المنشار اللى مش عارفه جابه منين وكان عمال يلعب بيه ولا هامم حد من الدار انه يقوله حاجه
******
خلصت صلاه الجمعه ، ورجعوا الشباب وكان معاهم احلى مفاجئة وهى طبعا بابا ابو خالد والاسرة ، بصراحه سعادتنا كانت كبيرة اننا شفناه واطمنا عليه ، وكنا نتمنى يكمل معانا اليوم ،المهم المديرة نزلت كل الاطفال فى الصاله وجزء مننا اخد الحاجات يسلمها فى الادارة والجزء التانى ابتدى يوزع اللعب والحلويات على الاطفال
******
فى الوقت ده ابتدينا نكتشف ان الاطفال بيتعاملوا معانا بطرق مختلفة ، فيه اللى كان زى عبد الرحمن بيحاول يلفت النظر ليه وعايز يكلم اى حد، وفيه اللى منطوى على نفسه وخايف يتكلم او ياخد حاجه، وفيه اللى كان عدوانى او عنيف ودول ضربوا الصباغ لما شبعوا ، كمان كان فيه بعض البنات اللى بتتعامل بعصبية ورافضينا تماما
******
بصراحه مكنتش متوقعه حجم التبرعات اللى جت للاطفال ، بجد ماشاء الله حاجه تفرح ، والجميل ان كل احتياجاتهم جت الحمد لله وكان فيه تنوع والصراحه انا حابة اشكر كل اللى شارك ومقدرش ييجى

داليا قوس قزح اللى طول عمرها سباقة فى الخير الحمد لله وكنا نتمنى وجودها
نوران بنت خيخه اللى مش خيخه خالص وبصراحه مكناش متوقعين كم الحاجات اللى بعتتها خصوصا انها مكلمتش حد فينا قبلها
فاتيما روح قلب ماما توأم روحى اللى بجد كنت اتمنى تيجى وتنورنا
محمد فاروق قلب مصرى جزاه الله كل خير وكنا نتمنى نتعرف بيه
احمد سكر اللى غاب عننا المرة دى بس ان شاء الله المرة الجاية ينورنا
******
خلصنا الزيارة علشان ميعاد غدا الاولاد ، وقررنا اننا نشد الرحال على بورفؤاد ، وقبل ما نركب المعدية لقينا المدون البورسعيدى محمد توفيق ابو العربى بيتصل بينا لانه معرفش يوصل الدار وجالنا عند المعدية وبصراحه جزاه الله كل خير على تبرعه اللى ان شاء الله حنوصله الدار، وركبنا المعدية وياريتنى ما ركبت ، الاخ سواق المعدية الظاهر كان نظره على اده فضل يخبط بينا على الرصيف لحد ما فجاه لقيتنى فى الارض، ايون انا وقعت فى المعدية وبقولها بنفسى بدل ما الصباغ يقعد يذلنى ، لانه مسابش بشر ولا شجر ولا حجر فيكى يابورسعيد الا لما قاله ان داليا وقعت فى المعدية
******
وصلنا النادى ، وقابلنا هناك مجموعه من شباب بورسعيد مدونين وغير مدونين ، بصراحه القعده كانت تحفه قدام الماية والسفن والمعديات عماله تروح وتيجى علينا ، والصباغ من اول ماوصلنا وهو عايش دور الخواجه السايح اللى مسابش حاجه مصورهاش ، المهم قعدنا اتكلمنا فى حاجات كتير لحد ما الغدا يجهز ، صحيح اتاخر قوى يعنى كنا صمنا احسن ، بس بصراحه كان جميل والحمد لله ربنا ستر
******
الغريب ان الصباغ بعد ما اكل -فراخ وسمك وجمبرى شوفوا الطفاسه-وكله موجود بالصور وهو ماسح الاطباق ، ظهرت عليه اعراض غريبة من الاذبهلال والتناحه ، وابتدى يسال اسئلة غير منطقية خالص يعنى مثلا هو اللى حفر قناة السويس مصريين؟ طب حفروها باديهم؟ المهم اقنعته ان الصينيين هم اللى حفروها بالمعالق البلاستيك
بجد كانت قعده لطيفة بعد الغدا، اتكلمنا كتير وضحكنا اكتر ، وبعد كده قررنا ننزل بورسعيد تانى ، اتمشينا على الممشى السياحى وطبعا الخواجه صباغ مسابش حاجه مصورهاش او مسالش عليها اسئلة غير منطقية ، لغاية ما وصلنا لقاعده تمثال ديليسبس والشيطان كان بيوزنى ازقه من هناك بس قلت بلاش حرام ده لسه عازمنا على ايس كريم ، اشهدوا ياقوم الصباغ عزمنا !!!
******
واخيرا جه وقت المرواح بصراحه كان اليوم جميل ومحدش عايز يروح، بس حنعمل ايه بقى ، الحمد لله قدرنا نحقق الهدف اللى كنا عايزينه ، اتبسطنا جدا ويارب نكون قدرنا نبسط الاطفال ، مش حتكون اخر زيارة اكيد على الاقل لينا كبورسعيدية ، وبشكر كل اللى شرفنا وكل اللى اتبرع وكل اللى اهتم باليوم واتصل يطمن وبجد بجد كان يوم يفرح


24 عرفوا عيبها:

واحدة مفروسة on 16 نوفمبر، 2008 7:14 ص يقول...

حلو اوي اليوم ده
وجميل ان الناس تتجمع لعمل خير
ربنا يجازيكم كاكم كل الخير

بس ياريت كنتوا اتكلمتوا مع المديرة على اللى انتو اعترضتوا عليه
من حالة الاطفال و المشرفات
و كل الملاحظات اللى آخذتوها على الدار
يمكن كان ينصلح حاله
زي ما فيه حاجات كتيرة فى بلدنا لازم ينصلح حالها

اجمل شيء انكم اتطمنتم على ابو خالد و انه كويس و بخير
عقبال المرة الجاية و ربنا يقدر و نعرف نيجي

قوس قزح on 16 نوفمبر، 2008 10:03 ص يقول...

ربنا يجزيكم خير ان شاء الله و يتقبل منا جميعا

و ياريت فعلا كان حد بلغ المشرفة باللى بيحصل
حتى لو تكلموها بالتليفون
او تعملوا شكوى فى المكان المسئول بتاع الشئون الاجتماعية

و شىء طبيعى ان يكون فى اولاد عنيفة يمكن لانها حاسة انها منبوذة

ربنا معاهم الاطفال دول و الله


انا كمان بشكر خالد و عسقلانى على انهم متاخروش لحظة عن انهم يشيلوا تبرعات الناس التانية معهم
جزاهم الله خير

و ان شاء الله المرة الجاية ربنا يسهل و اكون معاكم

همس الاحباب on 16 نوفمبر، 2008 1:41 م يقول...

ههههههههه
هههههههههه
حرام عليكى يا داليا
الخواجه الصباغ تاب واقر بغلطته
انتى كده خلصتى منه كل حاجة
هههههههه
بس بجد اليوم كان جميل ورائع
وربنا يجازيكم خيرا
ويجعله فى ميزان حسناتكم
تحياتى وتقديرى

نهر الحب on 16 نوفمبر، 2008 1:42 م يقول...

ممكن اعمل للموضوع كوبى على طول عندى
بجد انتى وصفتى بجمال وصراحة كل اللى حصل بس نسيتى تقولى انت ودعاء تعبتوا اد اية نزول وطلوع
ومحاولة لاختيار مكان مناسب للتبرعات
وانك كنت قاضى الجلسة كل ما نتزنق نقول رأى داليا
بجد جزاكما الله خيرا
مجهود تعاون
صدق فى النية
احترام
عمل
الله يوفقكم
بجد انا فخورة بيكم وباليوم
واول مرة من زمان احس انى فعلا
قادرة على العطاء وان لى فائدة
ولو قليلة والفضل لله ولتعاونا معنا
ربنا يارب يديم الود والاحترام والمحبة الخاصة فيه

رحــــيـل on 16 نوفمبر، 2008 1:49 م يقول...

هههههههههههههه

احمد فعلا ياداليا مخلاش حد معرفوش انك وقعتى كويس انك قولتى هنا بنفسك

كان يوم رائع جدا

انتوا بنات جدعه وبجد انا عمرى مهنسى اليوم ده وان شاء الله نكرره تانى وانا معاكم

سعيده جدا جدا انى اتعرفت عليكم

وبعدين هو انا كل لما ادخل عند حد مننا الاقى صوره عبد الرحمن والمنشار
ههههه اول منزل الصور من على الوبيل هنزل صور مختلفه من باب التغييييييير

Ahmed Al-Sabbagh on 16 نوفمبر، 2008 2:24 م يقول...

هههههههههه
هههههههههههههه
ههههههههههههههههههههه
اخس اخس اخس
قصيدة اخس للمتنبى
ما كانش العشم
وانا اللى كنت ناوى احفظ السر وما قولش لحد انك وقعتى فى المعدية لما الراجل رشق بالمعدية فى المينا بس بردة انا هطلع اكتر منك تسامح ومش هقول السر ده لحد
عااااااااا
أنا اتفضحت يا رجالة
وبعدين انى عندى شك فى المعلومات التاريخية والجغرافية اللى درسناها
عشان كدة كنت بسأل
وبعدين طلع مش الصينين اللى حفروها بقى بكدبكو
قريت فى كتاب ان الموزمبيقين هما اللى حفروها بجوز الهند .. كبسسسة
اصطبرى عليا اما اعمل بوست
عااااااااا

شوكت on 16 نوفمبر، 2008 3:11 م يقول...

كان نفسي اجي بس اعمل ايه بس في الشغل و العيال و غسيل الأطباق و تطبيق الهدوم

و عمل السندويشات للعيال

ربنا يكرمكم و يجازيكم خير

و قشطة يا عم احمد يا صباغ

رئـــــيسـة حزب الأحلام on 16 نوفمبر، 2008 4:23 م يقول...

والله حسستينى ان كنت معاكم بجد حكيتى بالتفاصيل
وجزاكم الله خيرا
ويارب النوبة الجاية فى حاجة فى القاهرة

ahmed_k on 16 نوفمبر، 2008 5:56 م يقول...

طيب فين الصور ؟هههههههه
فعلا اليوم كان جميل بالتجمع الرائع ده
وإن شاء الله المرات القادمه تكون أفضل وأفضل
وربنا يجعله في ميزان حسناتكم

دمتي بكل خير

بت خيخة وأى كلام on 16 نوفمبر، 2008 6:03 م يقول...

انا ملاحظة
ان مافيش غير صورة الولد ده اللى بيلعب بالمنشار هى اللى موجودة عند كل الى راحوا التجمع ده

فين صور الصباغ اللى مطول رقبتنا معاه


كان نفسى جدا اكون معاكم
بس الحمد الله ان الهدف من التجمع اتحقق الا وهو رسم بسمة على وشوش الايتام

جزاكم الله خيرا
ويارب دايما متجمعين فى كل خير

ماما أمولة on 16 نوفمبر، 2008 11:27 م يقول...

انا الصراحة مش عارفة اقول ايه

يوم من اجمل الايام اللي قضيتها

ومن اجمل الشخصيات اللي اتعرفت بها

ناس قلوبها بيضاء بجد

داليا حبيبتي انا سعيدة جدا اني

اتعرفت بكم ربنا يجعل كل تعبكم في

ميزان حسناتكم

اللهم امين

سلميلي على دعاء

محمد الدخاخنى on 16 نوفمبر، 2008 11:33 م يقول...

ربنا يجزيكِ خير ويتقبل منك

فاتيما on 17 نوفمبر، 2008 12:38 ص يقول...

بجد يا بيبو أنا كمان كان نفسى قوى آجى ...
بس معلش المرة الجاية هكون رتبت احوالى اكتر و لازم أن شاء الله أكون من الحاضرين
ربنا يكتبهالكم فى ميزان الحسنات بألف ضعفها يا رب
اليوم باين عليه كان حلو قوى فيما عدا بعض المنغصات اللى كانت واضحة ف الدار نفسها
و اتمنى حد يكون مهتم و يقدر يعمل فرق
إنتوا فرقتوا بزيارتكم و بالحاجة اللى وفرتوها دى و ربنا يكرمكم كمان و كمان
تحياتى يا حبيبتى و تؤامى الجميل

Gannah on 18 نوفمبر، 2008 5:56 م يقول...

داليا
ألف مبروك نجاح اليوم
نيتكم الطيبة واصراركم على فعل شىء مفيد هى أهم عوامل النجاح
بس حال الأطفال يحزن والمفروض يكون فيه اهتمام بالتربية مش تبقى الدار مكان اقامة وخلاص

سعيدة جدااا وربنا يبارك فيكم ويتقبل منكم

الحمد لله انكم طمنتونا على بابا أبو خالد
وربنا يجازى خير كل اللى شارك فى اليوم

كده يا داليا تقعى فى المعدية :)
وتفرحى الصباغ ما صدق اكيد

تحياتى يا أحلى داليا

norahaty on 18 نوفمبر، 2008 9:48 م يقول...

السلام عليكم ورحمة
الله تعالى وبركاته
جزاكى الله كل خير ياداليا وربنا يقدرك على فعل الخير دايماً.مثل هذه الزيارة عملتها مرة واحدة فى حياتى وماقدرتش اكررها للالم اللى حسيت به اثناءها (واللى ربنا يقدرنى عليه ارسله بالحولات )حتقوليلى كده بخبى راسى فى الرمل!! ابدا والله لكن ما اقدر اكررها. الم شديد حسيته ساعتها .اما ان المشرفات يسبوكم مع الاولاد يجوز عازيين يخليكوا تحسوا ان الاولاد على راحتهم فى الكلام ومش مضغوط عليهم من حد او ان فيه مراقب لكلامهم!!
وهم الصينين حفروا قناة السويس بالملاعق البلاستك تؤ تؤ تؤ ياداليا
بالملاعق الصينى مش هم صينين يبقى صنع بلدهم صينى !!!
مرة تانية جزاكى الله كل خير

دعاء مواجهات on 20 نوفمبر، 2008 2:42 ص يقول...

أيا بختكم بجد

وانتى بتوصفى كل مكان ولك حدث كنت شافاه قدامى بالفعل وقولت ياريتنى كنت معاهم ياريتنى

ههههههههههههههههههههههه

ولا كلو كوم بقى وعزومة الصباغ دى لوحدها كوم تانى دا حدث تاريخى يارداله

ياريتنى كنت معاهم فعلا بقى

مااشى ياصباغ بنشوفك كتير وقلبل ولا شوفنا بسكوتة الايس كريم حتى ..

ربنا يجازيكم خير يارب

الحشرى - سيد يونس on 20 نوفمبر، 2008 4:00 م يقول...

بصراحة موضوع ممتاز وكمان كان يوم حلو كتير كنت بتمنى أكون معاكم علشان أشوف الفرحة والبهجة فى العيون كلها

ربنا يجعله بميزان حسناتكم جميعاً

محمد الهادى غانم on 20 نوفمبر، 2008 11:12 م يقول...

السلام عليكم ورحمة الله وبركاته
ازيك ياداليا اخبارك ايه والله ملكم ليكو وحشه انا عارف اين مقصر من نحيتكم بس مشاغل الحياه ربنا يهون علينا .

اولا احب ان احييك علي الاستباقيه لفعل الخير بس انا عارف انك متعرفيش المكان اللي انتي رحتيه كويس .
انا بقه اعرفه لأني كنت هناك من 7 او 8 سنين كنت رحت انا وزوجتي واختها ومجموعه من اصدقائنا اللي كانوا متخرجين من كلية تربية كل واحد في مجال تخصصه بيروح يدرس للعيال اللي هناك بس للأسف العيال اللي هناك مجرد طعم للناس اللي زينا زيكم بيحبوا الخير .
الدار كان بيجي اقدام عنينا له تبرعات ماليه وملابس جديده ولما اكون قاعد مع العيال اسألهم أخبار الهدوم الجديده ايه يقولوا منعرفش الهدوم والملابس دي بتروح فين وما خفي كان أعظم .

اما عن التسيب اللي في الدار انا كنت بدخل واخرج من غير ما حد يقولي انت رايح فين وكنت بطلع فوق للعيال وطبعا انتوا شفتم ان فيه بنات انسات هناك والعيال ملهمش حل بيهربوا من المذاكرة ولما كنت اقول للمشرف العيال مش موجوده يقولي دور عليهم وكانوا بيهربوا مننا ولما نشتكي يقولونا العيال مش عارفين نملكهم علي العموم العيال دي مجرد طعم استغلالي والله أعلم .
علي العموم ربنا ان شاء الله يجازيكم خير علي جهدكم ونيتكم .

واحب اهنيكم علي اليوم اللي كان شكله لذيذ ربنا يسعد ايامكم كلها ان شاء الله .

لا إله إلا انت سبحانك نستغفرك ونتوب اليك .

هى فوضى on 22 نوفمبر، 2008 1:46 ص يقول...

الحمد لله
اليوم كان جميل بفضل ربنا
وبتعاونا وبجد انتى انسانة روحك حلوة وانتى دماغك حلوة جدا ماشاء الله عليكى ومرحة اوى انتى ودعاء ولازم اللى يعرفكوا يحبوكوا بجد
يارب نكرر اليوم تانى

موناليزا on 22 نوفمبر، 2008 11:27 م يقول...

ربنا يجمعكم دايما على فعل الخير
وياريت الملاحظات دى كانت مديرة الدار تعرفها يمكن تقدر تغير الوضع
وربنا يكرمك بجد انك شاركتينا فى اليوم الجميل دة

Sabrena on 25 نوفمبر، 2008 2:42 ص يقول...

عاجبنى جدا كلاامك واليوم الجامد جداا دا,حسستنى انى كنت معاكم
جميل اوى ان الواحد يخصص يوم كل مدة لاسعاد غيرة
يحس انه غير
يحس انه رسم الباسمة على وش برىء
وعشان كدا اتمنى انك تقرى البوست دا
وياريت تكونوا معانا
بقلوبكم اللى مليانه خير

http://just-my-feelings.blogspot.com/2008/08/blog-post.html

محمد الكومي on 26 نوفمبر، 2008 3:18 ص يقول...

ربنا يقدركم دايما على عمل الخير

صاحب المضيفة on 27 نوفمبر، 2008 2:30 م يقول...

ألواحد نفسه يجي والله

لكن ظروف الشغل هي اللي بتحكم برضو

ربنا يعين ونعرف نيجي في مرة كده يارب


كل الود والاحترام

يا مراكبي on 28 نوفمبر، 2008 2:29 م يقول...

ربنا يجعله في ميزان حسناتكم إن شاء الله

 

Term of Use

أهو ده عيبه Copyright © 2009 Flower Garden is Designed by Ipietoon for Tadpole's Notez Flower Image by Dapino