أبريل 04، 2008

يوم واحد مش كفاية


انهارده كان الاحتفال بيوم اليتيم، صدقونى يوم واحد بس فى السنة مينفعش اننا نفتكرهم فيه وخلاص ، او نروح نزورهم ونقعد معاهم،وباقى السنة ننساهم
*****
اللى اكتشفته انهارده ان الاطفال دى مش محتاجه اكل وشرب ولبس وبس، محتاجه حد يحبهم ويسأل عليهم، زى ما هما فاكرين الناس اللى بتجيلهم واحد واحد وبيسألوا عن اللى مجاش يزورهم
*****
المسأله مش تاديه واجب وخلاص، او زى ما كنت بشوف ناس تهتم قوى انها تاخد ايصال من أى دار ايتام بأى مبلغ كفلوا بيه طفل علشان يخصموه من مصروفاتهم عند الضرائب، وكأن المبلغ البسيط ده مستكترين يبقى سر بينهم وبين نفسهم ومش مهم يضيع ثوابه عند ربنا ما دام حيتحسب عند الضرائب، او حتى مجرد منظرة انهم بيعملوا خير
*****
انا عن نفسى قررت انى ان شاء الله حروح على اد ما اقدر ومش حكتفى بيوم فى السنة، وياريت كلنا نحاول نعمل ده على مدار السنة بدل ما نهجم كلنا فى يوم واحد ونبقى عاملين زى اللى رايحين يغزوا دور الايتام، ونخوف العيال مننا
واهــــــــــــــو ده عيبـــــــــــــــه

8 عرفوا عيبها:

Z_Diva on 5 أبريل 2008 في 12:29 ص يقول...

masha2allah, walhy inty tyba awy :D

أحمد منتصر on 5 أبريل 2008 في 1:16 ص يقول...

فعلا يا داليا المفروض نزوّد من أنشطتنا الخيرية ومش نكلم وبس

فعلا

ربنا يباركلك يا رب :)

بطوط حبوب on 5 أبريل 2008 في 5:30 ص يقول...

سبحان الله كنت ناوى اروح اليوم بس عندى امتحان كمان ساعات من دلوقتى مقدرتش اروح بس كده ندمت

اهو ده عيبه on 5 أبريل 2008 في 9:27 ص يقول...

z_diva
------
الله يخليكى، بس انا مش طيبة انا قوية ومفترية


احمد منتصر
---------
فعلا عندك حق،ساعه معاهم كل اسبوع مش حتفرق فى وقتنا اد ما حتفرق معاهم


بطوط حبوب
---------
ربنا معاك ان شاء الله ويكون امتحان كويس
وياسيدى تتعوض فى اى يوم تانى

الفرعون الثالث on 5 أبريل 2008 في 3:02 م يقول...

و الله يا سكينة ساعات الناس بتاخد إيصال من دار الأيتام عشان تضمن الفلوس توصل للأيتام و محدش يحطها فى جيبه.. أما بخصوص الإعلان عن الصدقة اللى زى دى فده مش حرام لكن مطلوب أحيانا.. "و الذين ينفقون مما رزقناهم سرا و علانية".. و علانية يا سكينة عشان العلانية أحيانا بتبقى قدوة.. انما بأه النية لله سبحانه و ملناش غير الظاهر.. بس لازم نتصدق سرا و علانية زى ما ربنا قال وفعلا كلامك صحيح انه يوم واحد ميكفيش.. احنا شاطرين فى الأفراح و التزمير و الهيصة النهاردة يوم اليتيم و بكرة يوم الطفل و بعده يوم المرأة و مفيش حد له رؤية متكاملة عشان يحل مشكلة معينة.. و أهو ده عيبه.. و انتى عاملة ايه.. ها.. ايه.. ايه بأه؟؟

اهو ده عيبه on 7 أبريل 2008 في 1:04 ص يقول...

الفرعون الثالث
---------------
وهو يعنى لما تاخد ايصال ده حيخليك تعرف الفلوس اتصرفت فين؟
فى فرق بين العلانية علشان القدوة والعلانية علشان المنظرة وهى دى الغالبة

Soooo on 10 أبريل 2008 في 11:57 م يقول...

مشاعر نبيله قوي الحقيقه
وانا تحت امرك لو فكرتي انك تروحي اي دار ايتام ونجمع اكبر عدد ممكن يجي معانا من المدونين وغير المدونين
وياريت ده يحصل



ملحوظه
يوم عن يوم بازداد تعلق بمدونتك وباحترمك كل يوم اكتر من الاول




سلاموووووووووووز

اهو ده عيبه on 11 أبريل 2008 في 1:46 ص يقول...

sooooooo
--------
والله ياعم سوووو الفكرة كويسة ولو ان صعب تنفيذها جغرافيا بالنسبة لبعض الناس زى حالاتى
لكن على الاقل كل واحد يحط فى خطته ساعه فى الاسبوع يقضيها مع الاطفال فى اى دار قريبة منه


وياسيدى شئ يشرفنى ويسعدنى انك تزداد تعلق بالمدونة
وتكون روحها كده خفيفه على قلبك

 

Term of Use

أهو ده عيبه Copyright © 2009 Flower Garden is Designed by Ipietoon for Tadpole's Notez Flower Image by Dapino